Burkina Faso ꓗꓪ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓢꓲꓺ ꓡꓲꓺ ꓟ ꓐꓱ ꓶ ꓡꓯꓼ ꓫꓵꓺ ꓥꓳ ꓡꓳ ꓔꓬ ꓡꓳ=

Burkina Faso ꓗꓪ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓢꓲꓺ ꓡꓲꓺ ꓟ ꓐꓱ ꓶ ꓡꓯꓼ ꓫꓵꓺ ꓥꓳ ꓡꓳ ꓔꓬ ꓡꓳ=

Burkina Faso ꓗꓪ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓢꓲꓺ ꓡꓲꓺ ꓟ ꓐꓱ ꓶ ꓡꓯꓼ ꓫꓵꓺ ꓥꓳ ꓡꓳ ꓔꓬ ꓡꓳ

ꓔꓲꓺ ꓒ Antoine Tiabondou ꓠꓬ ꓔꓲꓺ ꓒ ꓙꓵꓽ ꓪ ꓘꓳꓹ ꓣꓴ ꓗꓷ ꓗ ꓠꓯꓸ ꓔꓲꓺ ꓒ ꓤꓶꓻ ꓬꓲꓸ ꓪꓴꓸ (6) ꓘꓳꓼ ꓔꓯ Burkina Faso ꓗꓪ ꓟ Fada N’Gourma ꓢ-ꓢꓶ-ꓠ ꓗꓪ ꓪꓴ-ꓢ ꓟꓬꓱꓽ ꓬꓰ ꓗꓷꓳ= ꓬꓲ ꓟꓬꓱꓽ ꓬꓰ ꓔꓬ ꓟ ꓙꓵꓹ ꓕꓯ ꓬꓲ ꓔꓬ ꓟ ꓗꓪ ꓮ ꓘꓶꓸ ꓢꓲꓺ ꓡꓲꓺ ꓢꓲ꓾ ꓙꓵꓻ ꓠꓲꓹ ꓚꓱꓹ ꓟꓽ ꓫꓱꓸ ꓡꓯ ꓘꓳ ꓟ ꓑ ꓫꓬ ꓐꓴˍ ꓟꓲ ꓕꓲ ꓠꓲꓹ ꓕꓲ ꓪ ꓞꓳ ꓙꓳ ꓔꓬ ꓗꓷꓳ=

2015 ꓗꓪ ꓐꓰ ꓪꓴꓸ ꓔꓴ ꓢꓲ ꓖꓳ ꓡꓱ ꓢꓲꓺ ꓡꓲꓺ ꓔꓬ ꓟ ꓠꓬ ꓞꓼ ꓐꓰ ꓒꓳꓹ ꓡꓶꓸ ꓗꓷ ꓢꓲ꓾ ꓟꓽ ꓙꓲꓻ ꓢꓴ ꓐꓴ ꓡꓰ ꓞꓳ ꓤ ꓐꓴ ꓔꓯ ꓫ ꓡꓰ ꓓꓴ ꓟꓬꓱꓽ ꓟꓽ ꓠꓽ ꓠꓽ ꓬꓰ ꓢꓲ ꓙꓲ-ꓢꓴ ꓢꓲꓺ ꓤ ꓐꓴ ꓔꓯ ꓗꓸ ꓧꓪꓺ ꓡˍ ꓡꓳ= 2018 ꓘꓳꓼ ꓗꓪˍ ꓟꓲ ꓔꓲꓺ ꓒ ꓬꓲ ꓦꓵꓻ ꓟꓬꓱꓽ ꓗꓪ ꓪꓽ ꓘꓴ ꓦꓲꓻ ꓕꓲ ꓟ ꓔꓯ ꓒꓬ ꓦ ꓗꓷꓳ= 2019 ꓘꓳꓼ ꓠꓬꓲꓽ ꓦ ꓕꓯˍ ꓟꓲ ꓪꓴ-ꓢ ꓟꓬꓱꓽ ꓬꓰ ꓔꓬ ꓟ ꓢ-ꓑꓲꓷ ꓞꓳ ꓫꓵꓽ ꓔꓲꓺ ꓒ ꓕꓲ ꓣꓳˍ ꓟꓲ ꓢꓰꓼˍ ꓟ ꓟꓶ ꓗꓷꓳ= ꓔꓲꓺ ꓒ ꓔꓯ ꓢꓰꓼˍ ꓕꓯ ꓗ-ꓕꓳ-ꓡꓲꓗ ꓢꓲꓺ ꓤ 5 ꓣꓳ ꓔꓯˍ ꓟꓲ ꓞꓳꓹ ꓔꓯ ꓙꓰ ꓗꓷꓳ= ꓫꓵꓽ ꓪꓴ ꓖꓳ ꓟ ꓔꓯ ꓟꓴ-ꓢ-ꓡꓲꓟ ꓜꓴꓻ ꓐꓴ꓾ ꓑ-ꓣꓳ-ꓔꓯ-ꓢ-ꓔꓯ ꓐꓴˍ ꓟꓲ ꓠꓲꓹ ꓟ ꓫ ꓟ ꓔꓯ ꓟꓳꓸ ꓖꓶ ꓗꓷꓳ=

ꓮ ꓟꓶ ꓙꓲ-ꓢꓴ ꓢꓲꓺ ꓤ ꓐꓴ ꓤꓶꓻ ꓐꓱ ꓶ ꓮ ꓘꓶꓸ ꓫ ꓓꓴ ꓒꓬꓱꓼ ꓡꓺꓳ= ꓕꓱ ꓡꓱ ꓫ ꓓꓴ ꓔꓳꓹ ꓜꓳꓽ ꓔꓬ ꓟ ꓗꓪ ꓙꓲ-ꓢꓴ ꓢꓲꓺ ꓤ ꓐꓴ ꓠꓬ ꓚꓲ ꓛꓬ ꓙꓵꓻ ꓠꓲꓹ ꓔꓯ ꓢꓷꓸ ꓙ ꓟꓳ ꓙ ꓓꓴ ꓐꓱ ꓶ ꓬꓰ ꓫ ꓡꓹ ꓡꓳ= ꓘꓴ-ꓜꓲ-ꓞꓳ ꓥˍ ꓟꓲ ꓮ ꓟꓶ ꓟ ꓡꓰ ꓟꓽ ꓢꓲꓺ ꓡꓲꓺ ꓟ ꓘꓴꓽ ꓗꓪ ꓠꓲꓹ ꓟ ꓟꓽ ꓙꓬ ꓡꓰ ꓡꓰ ꓝ ꓢꓲ ꓪꓴ-ꓢ ꓟꓬꓱꓽ ꓬꓰ ꓔꓬ ꓡꓳ= ꓘꓴ-ꓜꓲ-ꓞꓳ ꓠꓬ ꓜꓽ ꓓꓴ ꓐꓰ ꓠꓱꓸ ꓐꓯꓼ ꓣꓱꓽ ꓞꓹ ꓟ ꓔꓯ ꓮ ꓡꓰ ꓐ ꓡ ꓠꓬ ꓖꓳ ꓡꓱ ꓬꓰ ꓙ ꓖꓶ ꓔꓬ ꓡꓳ=

ꓫꓸ ꓓꓴ ꓔꓳꓹ ꓜꓳꓽ ꓔꓬ ꓟ ꓠꓬ ꓙꓲ-ꓢꓴ ꓢꓲꓺ ꓤ ꓐꓴ ꓡꓰꓽ ꓟꓽ ꓥ= ꓲ-ꓢ-ꓡꓯ ꓐꓴˍ ꓟꓲ ꓢꓰꓼ ꓗꓷ ꓟ ꓟꓶ ꓔꓬ ꓖꓴˍ ꓡꓳ= ꓬꓲ ꓪ ꓐꓴ ꓪꓽ ꓘꓴ ꓔꓬ ꓕꓯ ꓬꓲ ꓪ ꓐꓴ ꓔꓯ ꓢꓰꓼ ꓡˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓙꓲ-ꓢꓴ ꓢꓲꓺ ꓤ ꓐꓴ ꓡꓰꓽ ꓫꓸ ꓙꓵˍ ꓟ ꓟꓶ ꓔꓬ ꓟ ꓟꓽ ꓥ= ꓔꓲꓺ ꓒ Antoine ꓬꓲ ꓟꓹ ꓟ ꓘꓴ-ꓜꓲ-ꓞꓳ ꓗꓪ ꓐꓰ ꓔꓲꓺ ꓒ ꓕꓲ ꓣꓳ ꓠꓬ 2019 ꓘꓳꓼ ꓕꓯ ꓡꓰ ꓞꓳꓹ ꓔꓯ ꓙꓰ ꓟꓶ ꓗꓷ ꓢꓲ꓾ ꓮ ꓟꓶ ꓗꓪ ꓛꓲꓺ ꓬꓲ ꓔꓯ ꓧꓪꓺ ꓟꓽ ꓟꓶ= ꓗꓳꓸ ꓗꓷ ꓟ ꓦ ꓐ ꓠꓬꓲꓽ ꓟ ꓕꓯ ꓗ-ꓕꓳ-ꓡꓲꓗ ꓢꓲꓺ ꓤ ꓐꓴ ꓠꓽ-ꓦꓬꓼ-ꓠꓬꓲ ꓟꓲ-ꓢ ꓪꓽ ꓘꓴ ꓔꓬ ꓕꓯˍ ꓟꓲ ꓗꓸ ꓧꓪ ꓡˍ ꓟ ꓟꓶ ꓗꓷꓳ=

ꓕꓱ ꓟ ꓠꓬ ꓙꓵꓻ ꓠꓲꓹ ꓚꓱꓹ ꓟꓽ ꓪꓽ ꓡꓯ ꓘꓳ꓾ ꓟꓽ ꓫꓱꓸ ꓡꓯ ꓘꓳ ꓟ ꓑ ꓫꓬ ꓐꓴ ꓔꓯ ꓬꓲ ꓗꓪꓺ ꓗꓪ ꓡꓰ ꓝꓲˍ ꓟ ꓟꓽ ꓥ ꓥ꓾ ꓧꓶꓸ ꓕꓯ ꓟ ꓕꓯꓽ ꓢꓲꓺ ꓪꓽ ꓡꓯ ꓘꓳ ꓡꓰ ꓝꓲˍ ꓡꓳ= ꓫ ꓙꓵꓻ ꓓꓴ ꓕꓱ ꓟ ꓘꓴꓽ ꓗꓪ ꓐꓰ ꓑ ꓫꓬ ꓐꓴ ꓪꓽ ꓡꓯ ꓘꓳꓹ ꓟ ꓢꓯꓼ ꓪ ꓔꓯ ꓟꓳ ꓗꓷ ꓟ꓾ ꓢꓯꓼ ꓪ ꓕꓱ ꓟ ꓗꓪ ꓐꓰ Burkina Faso ꓗꓪ ꓢꓲꓺ ꓡꓲꓺ ꓟ ꓔꓯ ꓫꓬꓹ ꓠꓹ ꓟ ꓥꓳ ꓡꓳ ꓔꓬ ꓟ ꓔꓯ ꓔꓲꓺ ꓒ Antoine ꓡꓰ ꓐꓯ ꓗꓷꓳ=

Ref: Rome Reports

Add new comment

1 + 0 =