France ꓪꓽ ꓘꓴ ꓦꓲ ꓗꓪ ꓛꓴꓽ ꓙꓳ ꓢꓴ ꓡꓰ ꓓꓶꓽ ꓡˍ ꓟ ꓗꓪ ꓙꓲ-ꓢꓴ ꓢꓲ ꓤ 3 ꓣꓳ ꓫꓵꓻ ꓗꓷꓳ

France ꓪꓽ ꓘꓴ ꓦꓲ ꓗꓪ ꓛꓴꓽ ꓙꓳ ꓢꓴ ꓡꓰ ꓓꓶꓽ ꓡˍ ꓟ ꓗꓪ ꓙꓲ-ꓢꓴ ꓢꓲ ꓤ 3 ꓣꓳ ꓫꓵꓻ ꓗꓷꓳ

ꓗꓳꓸ ꓗꓷ ꓟ 10 ꓦ 29 ꓠꓬꓲ ꓠꓯꓼ ꓕꓯ꓾ France ꓗꓴꓷꓼ ꓾ Nice ꓡꓳ ꓒꓱ ꓗꓪ ꓟ Notre-Dame ꓪꓽ ꓘꓴ ꓦꓲꓻ ꓗꓪ ꓮꓸ ꓕꓽ ꓔꓯꓹ ꓔ ꓟ Islam ꓙꓵꓻ ꓠꓲꓹ ꓗꓪ ꓟ ꓕꓲ ꓣꓳ ꓠꓬ ꓙꓲ-ꓢꓴ ꓢꓲꓺ ꓤ ꓐꓴ ꓔꓯ ꓓꓶꓽ ꓗꓷꓳ= ꓖꓳ ꓟ ꓪꓴꓸ ꓠꓬꓲ ꓖꓳ ꓗꓪ ꓪꓽ ꓘꓴ ꓔꓬꓹ ꓢꓴ 3 ꓣꓳ ꓫꓵꓻ ꓗꓷꓳ=

ꓡꓳ ꓒꓱ ꓙꓵꓽ ꓢꓲꓽ ꓒꓽ Christian Estrosi ꓠꓬ꓾ ꓛꓴꓽ ꓙꓳ ꓢꓴ ꓓꓶꓽ ꓢꓴ ꓔꓯ ꓟꓯꓼ ꓐꓴ ꓡꓰ ꓣꓴ ꓞꓳꓹ ꓗꓷ ꓟ ꓥ ꓢꓲ꓾ ꓬꓲ ꓠꓬ ꓡꓽ ꓞꓳ ꓟꓽ ꓢꓰꓼ ꓗꓷ ꓢꓰꓽ ꓕꓯ ꓐꓰ ꓢꓰꓼ ꓗꓷ ꓗꓸ ꓠꓯꓸ ꓕꓯ “Allahu Akbar” ꓐꓰ ꓘꓴ ꓔꓬꓹ ꓟ ꓔꓯ video file ꓗꓪ ꓟꓳ ꓪ ꓓˍ ꓡꓳ=

ꓡꓳ ꓒꓱ ꓙꓵꓽ ꓢꓲꓽ ꓒ ꓠꓬ ꓾ ꓕꓱ ꓟˍ ꓡꓰ ꓐꓰ ꓗꓳꓸ ꓗꓷ ꓟ ꓦꓬꓼ ꓠꓬꓲ ꓕꓯ Paris ꓡꓳ ꓒꓱ ꓗꓪ ꓬꓲꓸ ꓪꓽ ꓐꓴ ꓘꓴꓽ ꓗꓪ ꓟ ꓞꓳ ꓤ ꓕꓲ ꓣꓳ ꓢꓰꓼˍ ꓟ ꓟꓶ ꓗꓷ ꓟ ꓟꓸ ꓒꓽ ꓫꓵꓽ ꓪꓴ ꓐꓰ ꓫꓱꓸˍ ꓟ ꓔꓯ ꓖꓴ ꓟꓸ ꓖꓶ ꓗꓷꓳ=

ꓢꓰꓼ ꓗꓷˍ ꓟ ꓟꓶ ꓗꓷ ꓟ ꓟꓸ ꓒ ꓠꓬ Samuel Paty ꓥ ꓢꓲ꓾Islam ꓪꓴ-ꓢ ꓮ-ꓡ ꓔꓯ ꓟꓽ ꓒꓵꓽ ꓟꓽ ꓚꓬꓹ ꓬꓰˍ ꓡꓳ ꓐꓯ ꓢꓲ꓾ Muslim ꓢꓳꓺ ꓤ ꓕꓲ ꓣꓳ ꓡꓰ ꓬꓲꓸ ꓔꓯ ꓪꓴꓸ ꓓꓵꓺ ꓓꓶꓻ ꓢꓰꓼ ꓗꓷ ꓟ ꓥ ꓡꓳ꓾ ꓐꓰ ꓐꓯˍ ꓡꓳ=

France media ꓗꓪ ꓐꓯ ꓔ ꓟ ꓠꓬ꓾ ꓢꓰꓼ ꓗꓷˍ ꓟ ꓟꓶ ꓢꓴ ꓕꓲ ꓣꓳ ꓠꓬ ꓞꓲꓼ ꓪꓴꓽˍ ꓟ ꓤ ꓟꓶ ꓤ ꓕꓲ ꓣꓳ ꓥ ꓢꓲ ꓾ ꓪꓴꓸ ꓓꓵꓺ ꓠꓬ ꓮꓽ ꓡ ꓞꓷꓹ ꓗꓷˍ ꓐꓰ ꓪꓽ ꓘꓴ ꓦꓲꓻ ꓗꓪ ꓫꓵꓻ ꓗꓷ ꓟ ꓥꓳ=

ꓠꓬꓲꓽ ꓣꓳ ꓕꓲ ꓣꓳ ꓠꓬ꓾ ꓪꓽ ꓘꓴ ꓦꓲꓻ ꓡꓳꓸ ꓢꓴ ꓕꓲ ꓣꓳ ꓥ ꓢꓲ ꓾ ꓝꓮꓲ 3 ꓣꓳ ꓕꓲ ꓣꓳ ꓠꓬ ꓤ ꓟꓶ ꓤ ꓕꓲ ꓣꓳ ꓥ ꓢꓲ ꓠꓬꓲ꓾ ꓬꓲ ꓠꓬ ꓒ ꓕꓲꓺ ꓗꓪ ꓟ coffee ꓪꓴꓽ ꓖꓴ ꓗꓪ ꓘꓰꓹ ꓙꓰ ꓢꓲ ꓑꓬ ꓔꓬ ꓕꓯ ꓖꓳ ꓗꓪ ꓮꓸ ꓕꓽ ꓐꓰ ꓗꓸ ꓢꓰꓼ ꓗꓷ ꓟ ꓥꓳ꓾ ꓐꓰ ꓐꓯ ꓔ ꓡꓳ=

Notre-Dame ꓪꓽ ꓘꓴ ꓦꓲꓻ ꓠꓬ ꓡꓳ ꓒꓱ ꓖꓳ ꓟ ꓗꓪ ꓟꓽ ꓓ ꓪꓴꓽ ꓓꓰˍ ꓟ ꓪꓽ ꓘꓴ ꓦꓲ ꓕꓲ ꓦꓲ ꓥ ꓐꓯˍ ꓥˍ ꓟꓲ ꓾ ꓔꓲꓺ ꓒ ꓓꓽ ꓔꓬ ꓟ ꓗ-ꓔꓲ-ꓓ-ꓣꓰ ꓟꓽ ꓥ= ꓪꓽ ꓘꓴ ꓦꓲꓻ ꓮ ꓙꓵꓽ ꓚꓵꓸ ꓔ ꓠꓹ ꓟ ꓐꓰ ꓔꓲꓺ ꓒ ꓓꓽ ꓕꓵꓼ ꓪꓽ ꓟꓽ ꓟꓶ ꓡꓰ ꓢꓰꓽ ꓟ ꓦꓬꓼ ꓠꓬꓲ ꓗꓪ ꓪꓽ ꓘꓴ ꓦꓲꓻ ꓔꓯ ꓡꓳꓸ ꓠꓹ ꓟ ꓟꓯꓼ ꓜꓴꓻ ꓔꓯˍ ꓟ ꓪꓽ ꓘꓴ ꓦꓲꓻ ꓥ ꓕ ꓑꓳꓸꓼ ꓗꓪ ꓗꓶ ꓔ ꓠꓹ ꓟ ꓾ ꓔꓲꓺ ꓒ ꓓꓽ Andre Marceau ꓡꓰ ꓕꓵꓼ ꓪꓽ ꓖꓶꓽ ꓗꓷ ꓟ ꓥꓳ=

France ꓗꓴꓷꓼ ꓙꓵꓽ ꓢꓲꓽ ꓒ ꓚꓲꓸ ꓛꓬ ꓪꓽ ꓘꓴ ꓦꓲꓻ ꓗꓪ ꓛꓲꓺ ꓡ ꓢꓲ ꓾ ꓬꓲˍ ꓟꓲ ꓠꓲꓹ ꓟ ꓟꓽ ꓢꓺ꓾ ꓐꓰ ꓐꓯ ꓖꓶ ꓗꓷꓳ= ꓖꓳ ꓟ ꓡꓰꓽ ꓟꓽ ꓛꓲ ꓬꓲꓸ account ꓗꓪ ꓗ-ꓔꓳ-ꓡꓲ ꓘꓴ-ꓜꓲ-ꓞꓳ ꓠꓬ France ꓚꓺ ꓟꓲꓽ ꓗꓪ ꓐ ꓗꓷ ꓟ ꓐꓰ꓾ ꓙꓵꓻ ꓠꓲꓹ ꓚꓱꓹ ꓢꓲꓺ ꓡꓲꓺ ꓗꓷ ꓡꓰ ꓠꓹ ꓟ ꓐꓱ ꓶ ꓐ ꓡˍ ꓕꓲ ꓒꓳꓹ ꓗꓪ ꓐꓰ ꓔ ꓙ ꓖꓶˍ ꓥꓳ ꓐꓰ ꓪꓵꓼ ꓙꓱꓼ ꓢꓲ ꓐꓳ ꓗꓷ ꓟ ꓥ ꓡꓳ=    

Photo courtesy of : Credit: Twitter @cestrosi

https://bit.ly/3ehkj7L

Add new comment

5 + 11 =