India ꓗꓪ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓚꓳꓦꓲꓓ ꓠꓻ ꓔꓯ ꓧꓪꓸ ꓡꓰ ꓠꓹ ꓟ ꓜꓽ ꓓꓴ ꓚꓲꓸ ꓢꓲ ꓪꓽ ꓘꓴˍ ꓟ

India ꓗꓪ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓚꓳꓦꓲꓓ ꓠꓻ ꓔꓯ ꓧꓪꓸ ꓡꓰ ꓠꓹ ꓟ ꓜꓽ ꓓꓴ ꓚꓲꓸ ꓢꓲ ꓪꓽ ꓘꓴˍ ꓟ

India ꓗꓪ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓚꓳꓦꓲꓓ ꓠꓻ ꓔꓯ ꓧꓪꓸ ꓡꓰ ꓠꓹ ꓟ ꓜꓽ ꓓꓴ ꓚꓲꓸ ꓢꓲ ꓪꓽ ꓘꓴˍ ꓟ

ꓚꓳꓦꓲꓓ ꓠꓻ ꓪꓴꓸ ꓠꓬꓲ ꓗꓴꓷꓼ ꓘꓴꓽ ꓗꓪ ꓠꓻ ꓫꓬꓹ ꓖꓶ ꓔꓬ ꓢꓴ ꓠꓬ ꓫꓸ ꓓꓴ ꓔꓳꓹ ꓜꓳꓽ ꓔꓬ ꓢꓲ꓾ ꓞꓳ ꓤ ꓮ ꓟꓬꓹ ꓠꓬ ꓠꓻ ꓠꓷꓼ ꓡꓰ ꓢꓲ ꓫꓵꓻ ꓔꓬ ꓟ ꓪꓴꓸ ꓠꓬꓲ ꓠꓻ ꓓꓱꓽ ꓕꓱ ꓟ ꓗꓪ ꓐꓰ ꓡꓲꓹ ꓙꓰ ꓟꓶ ꓠꓹ ꓟ ꓐꓱ ꓶ ꓕꓲ ꓠꓬꓲ ꓡꓱꓸꓼ ꓜꓽ ꓓꓴ ꓚꓲꓸ ꓪꓽ ꓘꓴˍ ꓟ ꓔꓯ India ꓗꓴꓷꓼ ꓗꓪ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓡꓰ ꓬꓰ ꓗꓷꓳ=

India ꓗꓴꓷꓼ ꓔꓲꓺ ꓒ ꓓꓽ ꓟ ꓐꓴ ꓖꓪ ꓙꓱ ꓜꓲꓼ ꓓꓴ (CBCB) ꓗꓪ ꓜꓽ ꓓꓴ ꓚꓲꓸ ꓪꓽ ꓘꓴˍ ꓟ ꓔꓯ ꓥꓪꓽ ꓦ ꓟ ꓬꓲꓸ ꓪꓴꓸ ꓠꓽ-ꓥꓪꓽ-ꓠꓬꓲ ꓗꓪ ꓬꓰ ꓠꓹ ꓟ ꓐꓯ ꓑꓶ ꓗꓷꓳ= Bombay ꓡꓳ ꓒꓱ ꓗꓪ ꓟ ꓔꓲꓺ ꓒ ꓓꓽ ꓟ ꓐꓴ ꓖꓪ ꓙꓱ ꓜꓲꓼ ꓜꓴ ꓢꓽ ꓡ ꓙꓵꓽ ꓥ ꓟ Cardinal Oswald Gracias ꓡꓰ ꓕꓲ ꓗꓴꓷꓼ ꓡꓱꓸꓼ ꓗꓪ ꓟ ꓔꓲꓺ ꓒ ꓓꓽ ꓐꓴ ꓔꓯ ꓚꓲꓸ ꓛꓬ ꓪꓽ ꓘꓴ ꓦꓲꓻ ꓗꓪ ꓡꓳꓽ ꓗꓷ ꓢꓲ ꓪꓽ ꓘꓴ ꓠꓹ ꓟ ꓓꓰꓽ ꓗꓷꓳ=

Bombay ꓢ-ꓢꓶ-ꓠ ꓐꓱ ꓶ Cardinal ꓡꓰ ꓪꓽ ꓘꓴˍ ꓟ ꓔꓯ ꓙ ꓖꓶ ꓗꓷꓳ= ꓪꓽ ꓘꓴˍ ꓟ ꓗꓪ ꓕꓲ ꓑꓹ ꓤ ꓢꓲꓺ ꓡꓲꓺ ꓐꓰ ꓔꓬ ꓢꓲ ꓪꓴ-ꓢ ꓔꓯ ꓓꓵꓽ ꓙˍ ꓟ꓾ ꓣꓱꓽ ꓞꓹ ꓟ ꓓꓰꓽˍ ꓟ꓾ ꓟ-ꓕꓲ ꓶꓼ ꓓꓳ ꓫꓱꓹ ꓓꓳ ꓕꓳ ꓶ ꓗꓪ ꓟ ꓢꓲꓺ ꓒ ꓬꓰ-ꓢꓴ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽˍ ꓟ ꓟꓸ ꓟꓲꓽ ꓝꓲꓸ ꓔꓯ ꓵ ꓗꓷ ꓢꓲ ꓟꓹ ꓟ ꓟ-ꓡꓲ ꓔꓯ ꓫꓱꓸ ꓖꓶꓽ ꓪꓽ ꓘꓴˍ ꓟ ꓗꓪ ꓐꓰ ꓪꓽ ꓘꓴ ꓓꓴ ꓬꓲꓸ ꓟꓶꓸ ꓢꓰꓼ ꓗꓷꓳ=

ꓗꓴꓷꓼ ꓐꓱ ꓶ ꓪꓽ ꓘꓴ ꓖꓶˍ ꓟ

ꓟꓵ ꓗꓳꓹ ꓓꓵ ꓓꓵ ꓗꓪ ꓒꓬꓱꓼ ꓔꓬ ꓟ ꓠꓻ ꓫꓵꓽ ꓦꓬꓼ ꓠꓬꓲ ꓗꓪ ꓓꓵꓽ ꓙ ꓪꓴꓽ ꓧꓶ ꓓꓴ ꓐꓰ ꓙꓳꓺ ꓛꓱꓽ ꓓꓴ ꓐꓴ ꓔꓳꓹ ꓜꓳꓽ ꓔꓬ ꓪˍ ꓟ ꓣꓳ ꓞꓳ ꓤ ꓐꓴ ꓮꓽ ꓙꓵꓽ ꓐꓱ ꓶ ꓪꓽ ꓘꓴˍ ꓥꓳ꓾ ꓐꓯ ꓢꓲ ꓪꓽ ꓘꓴˍ ꓪꓴꓸ ꓔꓴˍ ꓕꓯ ꓐꓯ ꓗꓷꓳ=

ꓢꓯꓼ ꓕꓵꓼ ꓢꓲ ꓠꓻ ꓫꓬꓹ ꓖꓶ ꓔꓬ ꓟ ꓠꓯ ꓞꓲꓼ ꓟꓸ ꓒ ꓟꓸ ꓟ ꓐꓴ꓾ ꓞꓳ ꓠꓻ ꓕꓲ ꓦꓲꓻ ꓢꓴ꓾ ꓫꓵꓽ ꓤ ꓧꓪ ꓤ ꓐꓴ꓾ ꓟꓽ ꓢꓷꓸ ꓡꓯ ꓘꓳ ꓟ ꓬꓲꓼ ꓤ ꓠꓬꓲ ꓤ ꓐꓴ ꓔꓯ ꓫꓸ ꓟꓳ ꓢꓲ ꓬꓲ ꓪ ꓟꓽ ꓙꓲꓻ ꓟꓽ ꓙꓳꓽ ꓟ ꓟꓽ ꓔꓳꓹ ꓜꓳꓽ ꓠꓹ ꓟ꓾ ꓧꓪꓽ ꓖꓳ ꓓꓱꓽ ꓔꓬ ꓢ ꓠꓹ ꓟ ꓐꓰ ꓢꓯꓼ ꓪ ꓟꓶ ꓠꓹ ꓟ ꓪꓽ ꓘꓴ ꓖꓶˍ ꓡꓳ= ꓖꓳ ꓟ ꓡꓰꓽ ꓟꓽ ꓞꓲ ꓓꓵꓽ ꓙ ꓢꓪꓸ ꓠꓬꓲˍ ꓟ ꓟꓬꓱꓽ ꓬꓰ ꓔꓬ ꓪˍ ꓟ ꓙꓵꓽ ꓪ ꓙꓳ ꓢꓴ ꓐꓴˍ ꓟꓲ ꓪꓴ-ꓢ ꓡꓰ ꓙ ꓖꓴ ꓧꓳꓽ ꓟꓸ ꓖꓶˍ ꓟ ꓟꓶ ꓢꓲ ꓒꓵꓽˍ ꓟ ꓠꓲꓹ ꓟ ꓡꓰ ꓚꓲꓸ ꓛꓬ ꓠꓲꓹ ꓡꓶꓽ ꓔꓯ ꓡꓳ ꓦ ꓗꓷ ꓢꓲ ꓑ ꓫꓬ ꓐꓱ ꓶ ꓣꓱꓽ ꓬꓰ ꓐ ꓡ ꓠꓹ ꓟ꓾ ꓢꓷꓸ ꓠꓲꓹ ꓙꓳ ꓢꓴ ꓐꓴˍ ꓟꓲ ꓠꓻ ꓕꓱ ꓟ ꓔꓯ ꓗꓽ ꓕꓸ ꓚꓱꓹ ꓧꓪ ꓟꓶ ꓡꓰ ꓠꓹ ꓟ ꓪꓽ ꓘꓴ ꓓꓴ ꓕꓱ ꓟ ꓗꓪ ꓐꓰ ꓔꓲꓺ ꓖꓶˍ ꓡꓳ= ꓟꓲ ꓠꓯ ꓠꓬ ꓞꓳ ꓤ ꓐꓴ ꓬꓰˍ ꓟ ꓗꓪ ꓐꓰ ꓐꓬꓺ ꓡꓰ ꓔꓬ ꓟ ꓐꓰ ꓪꓴꓽ ꓧꓶ ꓓꓴ ꓗꓪ ꓐꓰ ꓝꓮꓲ ꓕꓲ ꓧꓪꓹ ꓙꓲꓻ ꓡ ꓧ ꓡ ꓠꓹ ꓟ ꓪꓽ ꓘꓴ ꓓꓴ ꓔꓯ ꓟꓬꓽ ꓠꓬꓲ ꓣꓱꓽ ꓞ ꓔꓬ ꓡꓳ= ꓔꓲꓺ ꓒ ꓓꓽ ꓕꓲ ꓐꓱ ꓥˍ ꓟꓲ ꓣꓳ-ꓢ-ꓣꓲ ꓪꓽ ꓘꓴ ꓢꓲ ꓢꓲꓽ ꓫꓬ ꓕꓳ ꓶ ꓝꓲꓸ ꓵ ꓟ ꓡꓰꓽ ꓟꓽ ꓞꓲ ꓢꓲꓽ ꓫꓬ ꓖꓳ ꓓꓱꓽ ꓔꓯ ꓫꓱꓸ ꓖꓶˍ ꓟ ꓔꓯˍ ꓟꓲ ꓬꓰ ꓠꓹ ꓟ ꓬꓲꓼ ꓠꓬꓲꓸ ꓖꓶ ꓗꓷꓳ=

ꓙꓲ-ꓢꓴ ꓢꓲꓺ ꓤ ꓐꓴ ꓡꓰ ꓬꓰˍ ꓟ ꓟꓬꓱꓽ

ꓕꓲ ꓐꓱ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓥˍ ꓟꓲ India ꓗ-ꓔꓳ-ꓡꓲꓗ ꓔꓲꓺ ꓒ ꓓꓽ ꓐꓴ ꓡꓰ ꓬꓰˍ ꓟ ꓪꓽ ꓘꓴ ꓓꓴ ꓗꓪ ꓐ ꓗꓷꓳ= India ꓕꓲ ꓗꓴꓷꓼ ꓡꓱꓸꓼ ꓐꓰ ꓗꓴꓸ ꓙꓲ ꓙꓳˍ ꓟ ꓘꓴ-ꓜꓲ-ꓞꓳ ꓜꓴ ꓐꓴ ꓐꓰ India ꓶ ꓓꓳꓽ ꓫꓱꓹ ꓓꓳꓽ ꓜꓴ ꓐꓴ ꓠꓬ ꓙꓲ-ꓢꓴ ꓢꓲꓺ ꓤ ꓥꓪꓽ ꓔꓬ ꓫꓬꓹ ꓔꓯ ꓔꓯꓺ ꓔ ꓟ ꓘꓴ ꓜꓲꓼ ꓞꓳ (350) ꓟ ꓐꓰ ꓬꓰ ꓔ ꓟ ꓕꓲ ꓗꓴꓷꓼ ꓡꓱꓸꓼ ꓐꓰ ꓗꓴꓸ ꓙꓲ ꓙꓳˍ ꓟ ꓘꓴ-ꓜꓲ-ꓞꓳ ꓜꓴꓻ ꓗꓪ ꓐ ꓢꓴ ꓐꓴ ꓥ ꓢꓲ ꓜꓴꓻ ꓖꓳ ꓟ ꓐꓴ ꓠꓬ ꓜꓽ ꓓꓴ ꓚꓲꓸ ꓪꓼ ꓘꓴˍ ꓟ ꓗꓪ ꓬꓲ ꓪ ꓐꓴ ꓟꓲ ꓔ ꓗꓷ ꓟ ꓔꓯ (CBCI) ꓐꓰ ꓐꓯ ꓑꓶ ꓗꓷꓳ=

(ꓪꓚꓚ) ꓐꓰ asia ꓗꓴꓷꓼ ꓙꓲ-ꓢꓴ ꓢꓲꓺ ꓤ ꓖꓪ ꓙꓱ ꓜꓲꓼ ꓓꓴ ꓗꓪ꓾ India ꓗꓪ ꓡ ꓞꓳ ꓮꓽ ꓟꓬꓹ ꓠꓬ ꓢꓯꓼ ꓟꓬ ꓞꓷꓹ ꓗꓷˍ ꓟ ꓐꓰ ꓫꓸ ꓙꓵ ꓓꓴ ꓐꓴ ꓘꓴꓽ ꓗꓪ ꓠꓴ ꓪ ꓐꓴ ꓐꓰ ꓕꓲ ꓪꓽꓺ ꓥꓪ ꓠꓴꓽ ꓪꓽ ꓘꓴ ꓘꓶꓽ ꓗꓪ ꓕꓲ ꓠꓲꓹ ꓕꓲ ꓪꓽ ꓔꓬ ꓡꓳ꓾ ꓐꓰ ꓬꓲ ꓪ ꓕꓳꓽ ꓶꓽ ꓗꓪ ꓐꓳ ꓔ ꓡꓳ= ꓠꓽ ꓢꓽ ꓠꓬꓲ ꓠꓯꓼ ꓗꓪ India ꓗꓴꓷꓼ ꓗꓪ ꓟ ꓘꓴ-ꓜꓲ-ꓞꓳ ꓐꓴ ꓗꓪ ꓐꓰ ꓙꓲ-ꓢꓴ ꓢꓲꓺ ꓤ ꓐꓴ ꓐꓰ ꓬꓲ ꓪ ꓡꓰ ꓠꓲꓹ ꓫ ꓟꓬ ꓫ ꓢꓲ ꓪꓽ ꓘꓴ ꓖꓶ ꓔꓬ ꓢꓲ ꓠꓬꓲ ꓕꓲ ꓠꓲꓹ ꓕꓲ ꓪꓽ ꓔꓬ ꓟ ꓔꓯ ꓟꓸ ꓖꓶꓽ ꓗꓷꓳ=

ꓠꓻ ꓓꓽ ꓟ ꓪꓴꓸ ꓠꓬꓲ ꓮꓽ ꓟꓬꓹ ꓚꓱꓹ ꓗꓪ ꓐꓰ ꓫꓸ ꓙꓵ ꓓꓴ ꓔꓳꓹ ꓜꓳꓽ ꓔꓬ ꓢꓴ ꓐꓴ ꓔꓯ ꓢꓯꓼ ꓖꓶꓽ ꓢꓲ ꓠꓲꓹ ꓗꓴ ꓟꓬ ꓗꓴ ꓖꓶꓽ ꓠꓹ ꓟ ꓥꓪꓽ ꓦ (7) ꓠꓬꓲ ꓕꓯ ꓛꓲꓺ ꓡ ꓢꓲ ꓪꓽ ꓘꓴ ꓔꓬ ꓢꓴ ꓕꓲ ꓣꓳ ꓕꓲ ꓣꓳ ꓐꓰˍ ꓟꓲ꓾ ꓕꓲ ꓜꓴꓻ ꓕꓲ ꓜꓴꓻ ꓐꓰˍ ꓟꓲ ꓡꓳꓽ ꓢꓲ ꓪꓽ ꓘꓴˍ ꓟ ꓗꓪ ꓣꓱꓽ ꓠꓹ ꓟ ꓐꓱ ꓶ ꓠꓲꓹ ꓫꓸ ꓟꓬ ꓫꓸ ꓟ꓾ ꓥꓳ ꓡꓳꓸ ꓓꓴ ꓐꓰ ꓢꓯꓼ ꓪ ꓟꓶˍ ꓟ ꓪꓽ ꓘꓴ ꓓꓴ ꓔꓯ ꓕꓳꓽ ꓶ ꓐꓳ ꓢꓲ ꓕꓳꓽ ꓶꓽ ꓒꓬꓽ ꓐꓴ ꓔꓯ ꓐꓱ ꓖꓶ ꓢꓲ꓾ ꓪꓽ ꓘꓴˍ ꓟ ꓗꓪ ꓣꓱꓽ ꓞꓹ ꓟ ꓮꓽ ꓙꓵꓽ ꓔꓯ ꓪꓚꓚ ꓗꓪ ꓐꓰ ꓙꓽ ꓖꓶ ꓗꓷꓳ=

ꓔꓲꓺ ꓒ ꓪ ꓔꓲ ꓡꓰ ꓪꓽ ꓘꓴˍ ꓟ ꓟꓬꓱꓽ ꓬꓰ ꓠꓹ ꓟ ꓕꓵꓼ ꓪꓽ ꓖꓶˍ ꓟ

ꓔꓲꓺ ꓒ ꓪ ꓔꓲ Francis ꓠꓬ ꓫꓸ ꓙꓵꓽ ꓓꓴ ꓠꓻ ꓐꓶꓽ ꓓꓲ ꓔꓳꓹ ꓜꓳꓽ ꓔꓬ ꓟ India ꓗꓴꓷꓼ ꓗꓪ ꓟ ꓑ ꓫꓬ ꓮꓽ ꓙꓵꓽ ꓔꓯ ꓬꓲ ꓠꓲꓹ ꓒꓵꓽ ꓠꓲꓹ ꓡꓱ ꓡꓱ ꓐꓰ ꓕꓲ ꓠꓲꓹ ꓕꓲ ꓪ ꓔꓬ ꓟ ꓔꓯ ꓟꓸ ꓖꓶ ꓠꓹ ꓟ ꓕꓳꓽ ꓶ ꓔꓯ Cardinal Gracias ꓔꓬ ꓗꓪ ꓠꓽ ꓡꓲꓸ ꓠꓬꓲ ꓕꓯ ꓦ ꓩꓴ ꓖꓶ ꓗꓷꓳ= ꓔꓲꓺ ꓒ ꓪ ꓔꓲ ꓠꓬ ꓠꓻ ꓔꓬ ꓢꓴ ꓐꓴ꓾ ꓫꓵꓻ ꓗꓷ ꓢꓴ ꓐꓴ ꓐꓰ ꓤꓰ ꓡꓰ ꓟ ꓕꓲ ꓦꓲꓻ ꓡ ꓞꓳ ꓐꓴ ꓮꓽ ꓙꓵꓽ ꓪꓴ-ꓢ ꓬꓲꓸ ꓠꓻ ꓫꓬꓹ ꓖꓶˍ ꓟ꓾ ꓠꓲꓹ ꓗꓴ ꓟꓬ ꓗꓴ ꓖꓶ ꓟ ꓟꓶ ꓠꓹ ꓟ ꓪꓽ ꓘꓴ ꓖꓶ ꓢꓲ꓾ ꓟꓽ ꓠꓽ ꓠꓽ ꓬꓰ ꓙ ꓖꓶ ꓔꓬ ꓟ ꓠꓯ ꓞꓲꓼ ꓟꓸ ꓒ ꓟꓸ ꓟ ꓐꓴ꓾ ꓬꓲ ꓔꓱꓹ ꓬꓲ ꓕꓲ ꓒꓳꓹ ꓗꓪ ꓐꓰ ꓬꓰ ꓙ ꓔꓳꓹ ꓙ ꓖꓶ ꓔꓬ ꓢꓴ ꓐꓴ ꓔꓯ ꓔꓲꓺ ꓒ ꓪ ꓔꓲ ꓗꓪ ꓐꓰ ꓢꓷꓸ ꓙ ꓟꓳ ꓙˍ ꓟ ꓐꓰ ꓣꓱꓽ ꓙˍ ꓟ ꓮꓽ ꓙꓵꓽ ꓗꓪ ꓠꓵ ꓠꓲꓹ ꓟꓳꓸ ꓖꓶ ꓢꓲ ꓕꓲ ꓠꓲꓹ ꓕꓲ ꓪ ꓔ ꓖꓶˍ ꓟ ꓐꓱ ꓶ ꓗ-ꓔꓳ-ꓡꓲꓗ ꓘꓴ-ꓜꓲ-ꓞꓳ ꓔꓯ ꓫꓸ ꓟꓳˍ ꓟ ꓔꓯ ꓐꓯ ꓖꓶ ꓗꓷꓳ=

ꓗꓴꓷꓼ ꓘꓴꓽ ꓗꓪ ꓮꓽ ꓙꓵꓽ ꓠꓬ ꓧꓶꓸ ꓕꓯ ꓟ ꓡꓰ ꓐꓰ ꓒꓬꓱꓼ ꓡ ꓠꓹ ꓟ ꓐꓱ ꓶ ꓐꓰ ꓠꓻ ꓓꓱꓽ ꓓꓽ ꓟ ꓞꓼ ꓞꓼ ꓟꓶꓽ ꓡꓰ ꓠꓹ ꓟ ꓟꓹ ꓟ ꓟ-ꓡꓲ ꓗꓪ ꓐꓰ ꓪꓴ-ꓢ ꓔꓬ ꓗꓪ ꓪꓽ ꓘꓴ ꓙ ꓖꓶ ꓠꓹ ꓟ ꓐꓱ ꓶ ꓟꓹ ꓟ ꓟ-ꓡꓲ ꓦ ꓐ ꓥ ꓟ ꓥꓪꓽ ꓦ ꓔꓯ꓾ India ꓗꓴꓷꓼ ꓗꓪ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓡꓳꓽ ꓢꓲ ꓔꓬ ꓟ ꓡꓰ ꓐꓰ ꓦ ꓐ ꓖꓳ ꓟ ꓔꓯ꓾ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓟ ꓪꓽ ꓘꓴ ꓑꓮꓲꓽ ꓔꓯ ꓬꓰ ꓠꓹ ꓟ ꓔꓲꓺ ꓒ ꓪ ꓔꓲ ꓗꓪ ꓐꓰ ꓢꓷꓸ ꓙ ꓟꓳ ꓙ ꓔ ꓟ ꓥꓳ=

ꓕꓲ ꓟꓲ ꓠꓯ ꓡꓱꓸꓼ ꓗꓪ ꓟ ꓟꓹ ꓟ ꓟ-ꓡꓲ ꓑꓹ (30) ꓟ ꓔꓯ ꓢꓲꓺ ꓗꓷ ꓢꓲ ꓕꓲꓽ ꓑꓹ ꓕꓲꓽ ꓑꓹ ꓗꓪ ꓙꓳˍ ꓟ ꓢꓲꓺ ꓤ ꓐꓴ ꓗꓪ ꓐꓰ ꓕꓲ ꓠꓬꓲꓽ ꓪꓽ ꓘꓴˍ ꓟ ꓔꓯ ꓧꓳꓽ ꓣꓱꓽ ꓠꓹ ꓟ ꓐꓰ ꓪꓽ ꓘꓴ ꓟ ꓠꓬꓲ ꓮꓽ ꓙꓵꓽ ꓗꓪ ꓔꓶꓻ ꓙꓱꓼ ꓕꓲ ꓟ ꓐꓰ ꓕꓲ ꓟ ꓗꓷ ꓢꓲ ꓪꓽ ꓘꓴ ꓠꓹ ꓟ ꓥ ꓡꓳ=

ꓔꓲꓺ ꓒ ꓪ ꓔꓲ ꓠꓬ ꓣꓳ-ꓟ ꓗꓪ ꓙꓳˍ ꓟ ꓙꓲꓻ ꓫꓬ ꓢꓴ ꓒꓲ-ꓕꓱ ꓑꓹ ꓗꓪ ꓟ ꓐ-ꓢꓲ-ꓡꓲ-ꓗ ꓪꓽ ꓘꓴ ꓦꓲꓻ ꓗꓪ ꓐꓰ “ꓕꓲ ꓤꓶꓻ ꓡꓱꓸꓼ ꓣꓱꓽ ꓙˍ ꓟ” ꓐꓰ ꓟꓬꓱꓻ ꓔ ꓟ ꓗꓪ ꓥꓪꓽ ꓦ ꓕꓲ ꓠꓬꓲ ꓕꓯ “ꓣꓳ-ꓢ-ꓣꓲ ꓪꓽ ꓘꓴˍ ꓟ” ꓔꓯ ꓒꓴ ꓢꓲ ꓑꓮꓲꓽ ꓬꓰ ꓗꓷꓳ= ꓣꓳ-ꓢ-ꓣꓲ ꓪꓽ ꓘꓴˍ ꓟ ꓔꓯ ꓟꓶꓽ ꓘꓶ (6) ꓙꓵꓹ꓾ ꓣꓳ-ꓟ ꓫꓵꓽ ꓫꓵ (4) ꓙꓵꓹ ꓕꓯ Vatican ꓗꓪ ꓐꓰ ꓡꓲꓠꓰ ꓗꓪ ꓚꓳꓸ ꓒꓶ ꓟꓸ ꓖꓶ ꓔꓬ ꓡꓳ= ꓥꓪꓽ ꓦ (7) ꓠꓬꓲ ꓕꓯ ꓒꓲ-ꓡꓲ-ꓒꓲ ꓗꓪ ꓟ ꓬꓲꓻ ꓙꓬ ꓗꓪ ꓐꓰ ꓗꓹ ꓘꓶꓽ ꓓꓳ ꓔꓬ ꓢꓴ ꓐꓴ ꓔꓯ ꓠꓬꓲ ꓙ ꓡꓳꓸ ꓙ ꓖꓶ ꓔꓬ ꓟ ꓢꓲꓺ ꓡꓲꓺ ꓟ ꓟꓹ ꓟ ꓑꓹ ꓗꓪ ꓣꓳ-ꓢ-ꓣꓲ ꓪꓽ ꓘꓴ ꓗꓷꓳ=

Photo courtesy of : AFP or Licensors

https://bit.ly/3uyUzLB

Add new comment

2 + 17 =