Kashmir ꓗꓪ ꓟꓳ-ꓓꓳ ꓓꓽ ꓟ ꓟꓳꓼ ꓡꓰ (ꓗꓪ ꓡꓰ) ꓢꓲ ꓞꓳ ꓤ 10 ꓣꓳ ꓛꓲꓺ ꓫꓵꓳ

ꓲ-ꓓꓲ-ꓬ ꓡꓰ ꓙꓵꓽ ꓔꓬ ꓟ ꓗꓮꓢꓧꓟꓲꓣ ꓟꓵꓽ ꓗꓪ ꓙꓳˍ ꓟ ꓢꓲꓺ ꓦꓲꓻ ꓕꓲ ꓟ ꓗꓪ ꓙꓰ ꓔꓬ ꓟ ꓧꓲꓠꓓꓴ ꓦ ꓡꓱ ꓢꓴ ꓐꓴ ꓜꓶꓽ ꓔ ꓟ ꓟꓳ-ꓓꓳ ꓕꓲ ꓒ ꓠꓬ 5 ꓦ 30 ꓠꓬꓲ ꓕꓯ ꓟꓳꓼ ꓡꓰ (ꓗꓪ ꓡꓰ) ꓢꓲ ꓞꓳ ꓤ 10 ꓣꓳ ꓫꓵꓻ ꓢꓲ ꓠꓬꓲ 55 ꓣꓳ ꓠꓻ ꓓꓴ ꓓꓴ ꓡꓰꓳ꓾ ꓐꓰ ꓢꓷꓸ ꓪ ꓡꓳ=

ꓟꓳ ꓓꓳ ꓖꓳ ꓟ ꓠꓬ ꓑꓴꓠꓙꓮꓐ ꓗꓴꓷꓼ ꓫꓴ ꓖꓴ ꓪꓴꓸ ꓕꓲ ꓛꓱꓽ ꓮꓟꓣꓲꓔꓢꓮꓣ ꓡꓳ ꓒꓱ ꓗꓪ ꓐꓰ ꓙꓮꓟꓟꓴ ꓗꓴꓷꓼ ꓫꓴ ꓗ-ꓕ-ꓣ ꓡꓳ ꓒꓱ ꓗꓪ ꓙꓰˍ ꓟ ꓙ ꓖꓴ ꓗꓪ ꓙꓰ ꓔꓬ ꓕꓯ ꓖꓳꓽ ꓙꓱ (ꓓꓽ ꓖꓴꓽ) ꓕꓲ ꓟ ꓕꓯꓽ ꓢꓲ ꓗꓪ ꓐꓰ ꓠꓯꓸ ꓘꓪ ꓗꓪ ꓞꓰꓻ ꓡꓰ ꓟ ꓥ ꓡꓳ=

ꓫꓵꓻ ꓢꓴ ꓐꓴ ꓠꓬ ꓲ-ꓓꓲ-ꓬ ꓐꓶ ꓓꓳ ꓗꓪ ꓙꓳˍ ꓟ ꓐꓲ-ꓦ ꓗꓴꓷꓼ ꓫꓴ ꓗꓪ ꓐꓰ ꓟꓬꓽ ꓠꓬꓲ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ= ꓖ ꓡꓯ ꓖ ꓙꓲ ꓗꓪ ꓟ ꓑ ꓫꓬ ꓐꓴ ꓐꓰ ꓙꓵꓽ ꓪ ꓙꓳ ꓢꓴ ꓐꓴ ꓠꓬ ꓟꓳ-ꓓꓳ ꓟꓳꓼ ꓡꓰ (ꓗꓪ ꓡꓰ) ꓖꓴ ꓗꓪ ꓠꓲꓹ ꓞꓼ ꓙꓰ ꓢꓲ ꓠꓬꓲ ꓬꓰ ꓙ ꓗꓷꓳ= ꓠꓻ ꓓꓴ ꓓꓴ ꓡꓰ ꓢꓴ ꓐꓴ ꓔꓯ ꓠꓬ ꓠꓯꓻ ꓞꓲꓼ ꓦꓲ ꓗꓪ ꓧꓳꓽ ꓙꓰ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓗ-ꓕ-ꓣ ꓡꓳ ꓒꓱ ꓗꓪ ꓙꓳˍ ꓟ ꓦꓲꓢꓧꓠꓴ ꓓꓰꓦꓲ  ꓪꓽ ꓘꓴ ꓦꓲ ꓔꓯ ꓠꓬ ꓧꓲꓠꓓꓴ ꓦ ꓡꓱ ꓢꓴ ꓐꓴ ꓮ ꓘꓶꓸ ꓒꓵꓽ ꓗ ꓬꓰˍ ꓟ ꓥ ꓢꓲ꓾ ꓕꓲ ꓘꓳꓼ ꓡꓰ ꓕꓲ ꓘꓳꓼ ꓪꓽ ꓘꓴ ꓬꓰ ꓢꓴ ꓬꓲ ꓫꓬꓹ ꓟꓽ ꓞꓲꓺ ꓠꓬ ꓙꓰ ꓢꓲ ꓔꓲꓺ ꓖꓶ ꓔꓬ ꓟ ꓥ ꓡꓳ=

ꓲ-ꓓꓲ-ꓬ ꓗꓴꓷꓼ ꓠꓬ ꓟꓲ ꓠꓯ ꓗꓪ ꓟꓳ-ꓓꓳ ꓕꓯꓼ ꓗꓷ ꓟ ꓑꓶꓸ ꓓꓴ ꓫꓵꓻ ꓢꓴ ꓟꓽ ꓓ ꓟꓬꓽˍ ꓟ ꓗꓴꓷꓼ ꓕꓲ ꓗꓴꓷꓼ ꓥ ꓡꓳ꓾ ꓐꓰ ꓢꓷꓸ ꓪ ꓡꓳ=