NYI. NYI M LI-SU DO:

1ꓸ ꓮ ꓗꓪ ꓙꓸꓹ ꓫꓱꓼ ꓥ ꓟꓲ ꓟ-ꓐꓳ-ꓔꓲ ꓔꓯ ꓙꓰ ꓠꓹ ꓟ ꓓꓳꓽ

4 ꓦ 1 ꓠꓬꓲ ꓗꓪ ꓐꓰ ꓪꓴꓸ ꓔꓴ ꓢꓲ-ꓸ ꓙꓸꓹ ꓫꓱꓽ_ ꓟ-ꓸ ꓦꓲ ꓤ ꓦꓲ ꓗꓪ ꓔꓬ ꓕꓯ ꓘꓹ ꓞꓳ ꓪꓴꓽ ꓔꓳꓹ ꓙ ꓕꓳ ꓶ ꓐꓰ ꓟꓽ ꓘꓳꓹ ꓣꓴ ꓟ-ꓐꓳ-ꓔꓲ ꓙꓳ ꓕꓯ ꓢꓲ-ꓸ ꓘꓳꓹ ꓣꓴ ꓓꓴ ꓥ ꓡꓳ= ꓖꓳ ꓕꓲ ꓠꓬꓲ ꓗꓪ ꓐꓰ ꓙꓸꓹ ꓫꓱꓽ ꓢꓴ ꓔꓯ ꓟ-ꓐꓳ-ꓔꓲ ꓐ ꓟꓽ ꓐ ꓓꓵꓽ ꓓꓳ ꓚꓱꓹ ꓗꓪ ꓠ ꓠꓬꓲ ꓚꓬꓹ ꓔ ꓟ ꓥꓳ= ꓟ-ꓐꓳ-ꓔꓲ ꓟꓽ ꓙꓳ ꓢꓴ ꓔꓯ ꓟꓳ-ꓓꓳ ꓖꓮꓔꓰ ꓗꓪ ꓐꓰ ꓥ ꓟꓲ ꓟꓽ ꓘꓳꓹ ꓣꓴ_ ꓟ ꓥꓳ ꓐꓰ ꓙꓸꓹ ꓫꓱꓽ ꓢꓴ ꓕꓲꓽ ꓣꓳ ꓡꓰ ꓐꓯ_ ꓡꓳ= ꓗꓴꓷꓼ ꓫꓴꓸꓸ ꓜꓴꓸꓹ ꓜꓲꓼ ꓢꓲ ꓒꓽ ꓡꓰ ꓟ-ꓐꓳ-ꓔꓲ ꓙꓳ ꓠꓹ ꓟ ꓐꓱ ꓶ ꓑꓮꓠ ꓧꓗꓲꓠ ꓢꓲ ꓟꓮꓠ ꓚꓧꓮꓔ ꓗꓪ ꓐꓰ ꓬꓰ ꓖꓶ ꓥ ꓟꓲ ꓟꓽ ꓬꓰ ꓡꓰ ꓢꓴ ꓔꓬ ꓢꓲ ꓟ ꓑꓶ ꓓꓴ ꓢꓷꓸ ꓡꓰ ꓠꓹ ꓟ ꓐꓱ ꓶ ꓮ ꓟꓶ ꓡꓰ ꓐꓰ ꓓꓵꓽ ꓓꓳ ꓙꓰ ꓖꓮꓔꓰ ꓗꓪ ꓟ-ꓐꓳ-ꓔꓲ ꓙꓳ ꓟꓽ ꓙꓳ ꓠ ꓠꓬꓲ ꓚꓬꓹ ꓔꓬ ꓟ ꓥ ꓡꓳ ꓐꓰ ꓢꓷꓸ ꓪ ꓡꓳ=

2ꓸ ꓬꓮꓠꓖꓳꓠ ꓟꓮꓠꓓꓮꓡꓮꓬ ꓐꓰ ꓬꓮꓠꓖꓳꓠ ꓑꓬꓮꓬ ꓧꓳꓽ ꓙꓱꓸꓸ ꓔꓯ ꓔꓲꓠꓠꓖꓮꓠ ꓑꓮꓲ ꓘꓴꓽ ꓗꓪ ꓟꓽ ꓙꓸꓹ ꓫꓱꓽ ꓐꓯ ꓟ ꓓꓳꓽ

ꓡ ꓠꓹ ꓟ ꓔꓲꓠꓠꓖꓮꓠ ꓑꓮꓲ ꓘꓴꓽ ꓗꓪ ꓬꓮꓠꓖꓳꓠ ꓟꓮꓠꓓꓮꓡꓮꓬ ꓧꓳꓽ ꓙꓱꓸꓸ ꓚꓱꓹ ꓮ ꓟꓮꓔ 3 ꓮꓢꓮꓠ 4 ꓮꓢꓳꓠ ꓔꓯ 4 ꓦ 4 ꓠꓬꓲ ꓗꓪ ꓐꓰ 10 ꓠꓬꓲ ꓗꓪ ꓛꓲ ꓙꓸꓹ ꓫꓱꓽ ꓥ ꓟꓲ 4 ꓦ 11 ꓠꓬꓲ ꓗꓪ ꓐꓰ 16 ꓠꓬꓲ ꓗꓪ ꓛꓲ ꓠ ꓡꓰ ꓢꓲ-ꓸ 4 ꓦ 17 ꓠꓬꓲ ꓗꓪ ꓝꓮꓲ ꓙꓸꓹ ꓫꓱꓽ ꓓꓴ ꓥꓳ ꓐꓰ ꓢꓷꓸ ꓪ ꓡꓳ= ꓬꓮꓠꓖꓳꓠ ꓑꓬꓮꓬ ꓧꓳꓽ ꓙꓱꓸꓸ ꓚꓱꓹ ꓔꓯ ꓥ ꓟꓲ ꓮꓟꓮꓔ 71 ꓮꓢꓮꓠ 72 ꓮꓢꓳꓠ ꓧꓳꓽ ꓙꓱꓸꓸ ꓚꓱꓹ ꓔꓯ 4 ꓦ 13 ꓠꓬꓲ ꓗꓪ ꓛꓲ ꓡꓰ ꓙꓸꓹ ꓫꓱꓽ ꓢꓲ-ꓸ 4 ꓦ 14 ꓠꓬꓲ ꓗꓪ ꓐꓰ 16 ꓠꓬꓲ ꓗꓪ ꓛꓲ ꓠ ꓡꓰ ꓠꓹ ꓟ ꓐꓰ 4 ꓦ 17 ꓠꓬꓲ ꓗꓪ ꓐꓰ ꓝꓮꓲ ꓙꓸꓹ ꓫꓱꓽ ꓓꓴ ꓥꓳ ꓐꓰ ꓢꓷꓸ ꓪ ꓡꓳ=

3ꓸ ꓔꓲꓸꓸ ꓒ ꓪ ꓔꓲ ꓝꓣꓮꓠꓚꓲꓢ ꓡꓰ ꓬꓲ-ꓗ-ꓣꓲꓠꓸ ꓗꓴꓷꓼ ꓗꓬꓲꓦ ꓗꓪ ꓚꓳꓸꓹ ꓙꓰ ꓓꓴ ꓙꓳ_ ꓟ ꓓꓳꓽ

Malta ꓗꓴꓷꓼ ꓗꓪ ꓚꓳꓸꓹ ꓓꓳ ꓙꓰ ꓢꓲ-ꓸ ꓡ ꓡ ꓟ ꓙꓵꓹ ꓗꓪ ꓓꓳꓽ ꓚꓲꓸ ꓚ ꓢꓴ ꓡꓰ ꓔꓲꓸꓸ ꓒ ꓪ ꓔꓲ ꓔꓯ ꓬꓲ-ꓗ-ꓣꓲꓠꓸ ꓗꓪ ꓙꓰ ꓓꓴ ꓚꓱꓹ ꓙꓳ ꓟꓽ ꓙꓳ ꓠꓽ ꓠꓬꓲ ꓕꓯ ꓚꓳꓸꓹ ꓓꓴ ꓚꓱꓹ ꓟꓬꓹ ꓡꓳ ꓐꓰ 4 ꓦ 2 ꓠꓬꓲ ꓕꓯ ꓐꓯ ꓖꓶ_ ꓡꓳ= 2 ꓦ 24 ꓠꓬꓲ ꓗꓪ ꓐꓰ ꓣ-ꓫꓸ ꓟꓯꓼ ꓐꓴ ꓡꓰ ꓑꓳꓸꓸ ꓐꓰ ꓢꓰꓼ ꓪꓴꓸ ꓔꓴ_ ꓟ ꓑꓶ ꓓꓴ ꓐꓬ ꓡꓰ ꓓꓴ ꓮ ꓟꓬꓹ ꓙꓳ_ ꓟ ꓬꓲ-ꓗ-ꓣꓲꓠꓸ ꓗꓴꓷꓼ ꓗꓬꓲꓦ ꓗꓪ ꓚꓳꓸꓹ ꓙꓰ ꓓꓴ ꓙꓳ_ ꓡꓳ ꓐꓰ ꓓꓳꓽ ꓢꓷꓸ ꓪ ꓡꓳ= ꓢꓰꓼ ꓡꓯ ꓘꓳ ꓟ ꓠꓬ-ꓸ ꓮ ꓘꓶꓸ ꓟꓽ ꓙꓲꓸꓹ ꓟ ꓥꓳ ꓓꓰꓸꓸ ꓡꓰ ꓟ ꓥꓳ= ꓡ ꓞꓳ ꓠꓲꓹ ꓟ ꓟꓯꓹ ꓫꓵꓽ ꓥ ꓡꓳ-ꓸ ꓕꓱ ꓟ ꓠꓬ ꓪꓢꓲ ꓒ ꓬꓰ ꓢꓴ ꓗꓸ ꓠꓯꓸ ꓛꓳ ꓢꓴ ꓠꓽ ꓕꓱ ꓡꓱ ꓟꓽ ꓬꓰ ꓐꓰ ꓔꓲꓸꓸ ꓒ ꓪ ꓔꓲ ꓡꓰ ꓐꓯ_ ꓡꓳ=

4ꓸ ꓧꓶꓽ ꓟꓵꓽ ꓢꓧꓮꓠ-ꓧꓮꓲ ꓗꓪ ꓔꓬ ꓟ ꓑ ꓫꓬ 26 ꓫꓬꓹ ꓔꓯ ꓠꓸꓹ ꓫꓵꓽ ꓚꓬꓹ ꓖꓶ ꓓꓴ ꓢꓯꓼ ꓕꓵꓼ ꓔꓬ ꓟ ꓓꓳꓽ

ꓧꓶꓽ ꓟꓵꓽ ꓢꓧꓮꓠꓖ-ꓧꓮꓲ ꓗꓪ ꓔꓬ ꓟ ꓑ ꓫꓬ 26 ꓫꓬꓹ ꓔꓯ ꓚꓳꓦꓲꓓ ꓠꓸꓹ ꓫꓵꓽ ꓚꓬꓹ ꓖꓶ ꓠꓹ ꓟ ꓐꓱ ꓶ ꓟꓯꓼ ꓙꓵꓽ ꓢꓴ ꓐꓴ ꓐꓰ ꓠꓯ ꓞꓲꓼ ꓟꓬꓱꓽ ꓣꓱꓽ ꓢꓴ ꓐꓴ ꓔꓯ ꓧꓶꓽ ꓮ-ꓢꓳ-ꓬ ꓡꓰ ꓝꓲ ꓩꓴ ꓔ ꓟ ꓥꓳ= ꓑ ꓫꓬ ꓕꓲ ꓐꓱ ꓠꓬ ꓠꓯꓼ ꓠꓯꓼ ꓙꓰ ꓢꓲ-ꓸ ꓠꓯ ꓞꓲꓼ ꓚꓬꓹ ꓔꓬ ꓟ ꓥꓳ= ꓢꓧꓮꓠꓖ-ꓧꓮꓲ ꓡꓳ ꓒꓱ ꓚꓳꓦꓲꓓ ꓚꓬꓹ ꓖꓶ ꓓꓴ ꓬꓰ ꓙ ꓠꓹ ꓟ ꓐꓱ ꓶ ꓙꓲꓮꓠꓖꓢꓴ ꓜꓧꓰꓙꓲꓠꓖ ꓐꓰ ꓐꓰꓲꓙꓲꓠꓖ ꓗꓪ ꓐꓰ ꓥ ꓟꓲ ꓠꓯ ꓞꓲꓼ ꓟꓬꓱ ꓣꓱ ꓢꓴ 1 ꓟꓶꓽ ꓛꓲ ꓝꓲ ꓩꓴ ꓦ ꓡꓳ ꓐꓰ ꓓꓳꓽ ꓗꓪ ꓐꓯ ꓔ ꓡꓳ= ꓖꓳꓸ ꓙꓰ ꓟ ꓠꓽ ꓕꓲꓽ ꓠꓬꓲ ꓗꓪ ꓢꓧꓮꓠꓖ-ꓧꓮꓲ ꓗꓪ ꓠꓱꓸ ꓫꓱꓸ ꓟꓸ ꓗꓪ ꓓꓳꓽ ꓙꓰ ꓟꓽ ꓓ ꓐꓰ-ꓸ ꓙꓵꓽ ꓗ ꓔꓶꓸꓸ ꓔ ꓥ ꓟꓲ-ꓸ 4 ꓦ 2 ꓠꓬꓲ ꓕꓯ ꓠꓸꓹ ꓞꓳ ꓤ 8500 ꓣꓳ ꓟ ꓠꓬ ꓮ ꓫꓵꓽ ꓟꓽ ꓠꓸꓹ ꓟꓽ ꓒꓬ ꓟꓽ ꓙꓳ ꓙꓳ ꓐꓰ ꓚꓳꓦꓲꓓ ꓠꓸꓹ ꓫꓵꓽ ꓟꓳ ꓡꓰ ꓢꓲ-ꓸ ꓞꓳ ꓤ 400 ꓣꓳ ꓟ ꓠꓬ ꓠꓸꓹ ꓟ ꓒꓬꓽ ꓟ_ ꓟꓲ ꓙꓳ ꓢꓲ-ꓸ ꓚꓳꓦꓲꓓ ꓟꓲ ꓙꓳ_ ꓡꓳ-ꓸ ꓐꓰ ꓢꓷꓸ ꓪ ꓡꓳ=

 

Add new comment

1 + 7 =