Sudan ꓟꓯꓼ ꓢꓰꓼ ꓡꓯ ꓘꓳꓹ ꓟ ꓑꓶꓸ ꓓꓴ ꓑ ꓫꓬ 8 ꓫꓬꓹ ꓟꓽ ꓞꓲꓺ ꓛꓰꓹ ꓙꓰ (ꓘꓰꓹ ꓙꓰ) ꓠ ꓗꓷ ꓡꓰˍ ꓥꓳ꓾ ꓐꓰ ꓴꓠ ꓡꓰ ꓙꓳꓺ ꓗꓽ ꓖꓶˍ ꓟ

Sudan ꓟꓯꓼ ꓐꓰ ꓠꓱꓸ ꓐꓯ ꓕꓲ ꓜꓴ ꓐꓴ ꓢꓰꓼ ꓡꓯ ꓘꓳꓹˍ ꓟ ꓑꓶꓸ ꓓꓴ ꓑ ꓫꓬ 8 ꓫꓬꓹ ꓟꓽ ꓞꓲꓺ ꓠꓬ Sudan ꓗꓴꓷꓼ ꓘꓴꓽ ꓗꓪ ꓐꓰ ꓛꓰꓹ ꓙꓰ (ꓘꓰꓹ ꓙꓰ) ꓠ ꓗꓷ ꓡꓰˍ ꓥꓳ꓾ ꓐꓰ ꓴꓠ ꓡꓰ 5 ꓦ 1 ꓠꓬꓲ꓾ ꓠꓽ ꓕꓲꓽ ꓠꓬꓲ ꓕꓯ ꓙꓳꓺ ꓗꓽ ꓖꓶ ꓗꓷꓳ꓾ ꓐꓰ ꓢꓷꓸ ꓪ ꓡꓳ=

ꓑ ꓫꓬ ꓮ ꓟꓬꓹ ꓠꓬ ꓬꓲ ꓪ ꓗꓴꓷꓼ ꓒ ꓕꓲꓺ ꓗꓪ ꓙꓳˍ ꓟ Egypt꓾ Chad ꓐꓰ Africa ꓗꓴꓷꓼ ꓐꓴ ꓗꓪ ꓛꓰꓹ ꓙꓰ ꓟ ꓠꓬ 5 ꓪꓸ ꓟꓽ ꓞꓲꓺ ꓙꓳ ꓡꓰꓳ꓾ ꓐꓰ ꓴꓠ ꓫꓸ ꓙꓵ ꓢꓴ ꓐꓴ ꓔꓯ ꓟꓳꓸ ꓬꓰ ꓙ ꓖꓶˍ ꓟ ꓬꓳꓸ ꓴꓠꓧꓚꓣ ꓡꓰ ꓐꓯ ꓡꓳ=

ꓢꓰꓼ ꓡꓯ ꓘꓳ ꓓꓶꓽ ꓡꓯ ꓘꓳ ꓔꓬ ꓟ ꓑꓶꓸ ꓓꓴ ꓬꓰ ꓙ ꓢꓴ ꓐꓴ ꓠꓬ ꓫꓵꓻ ꓗꓷ ꓟ ꓡꓰꓽ ꓟꓽ ꓞꓲꓺ꓾ ꓠꓯꓻ ꓞꓲꓼ ꓦꓲˍ ꓟꓲ ꓐꓬ ꓡꓰ ꓗꓷ ꓢꓲ ꓑ ꓫꓬ ꓐꓴ ꓐꓱ ꓶ ꓬꓰ ꓙ ꓔ ꓟ ꓔꓯˍ ꓟꓲ ꓦꓴꓻ ꓔꓯꓹ ꓙꓰ ꓟ ꓙꓳˍ ꓡꓳ꓾ ꓐꓰ ꓢꓷꓸ ꓪ ꓡꓳ=

ꓫꓵꓽ ꓪꓴ ꓕꓱ ꓟ ꓠꓬ Sudan ꓟꓯꓼ ꓢꓲꓽ ꓒ ꓓꓽ Abdel Fattah al-Burhan ꓐꓰ RSF ꓑ ꓫꓬ ꓟꓯꓼ ꓢꓲꓽ ꓒ ꓓꓽ Mahamed Hamdan Daglo ꓬꓲ ꓪ ꓠꓬꓲꓽ ꓣꓳ ꓟꓽ ꓧꓳꓹ ꓡꓯ ꓘꓳ ꓓꓴ ꓓꓳꓻ ꓡ ꓟ ꓑꓶꓸ ꓓꓴ 4 ꓦ 15 ꓠꓬꓲ ꓗꓪ ꓐꓰ ꓠꓬꓲꓽ ꓛꓱꓽ ꓢꓰꓼ ꓡꓯ ꓘꓳ ꓓꓶꓽ ꓡꓯ ꓘꓳꓹˍ ꓟ ꓓꓳ ꓡ ꓢꓲ ꓮ ꓟꓶ ꓠꓬ 3 ꓠꓽ ꓘꓴꓽ ꓗꓪ ꓛꓲ ꓡꓻꓳ꓾ ꓐꓰ ꓢꓷꓸ ꓪ ꓡꓳ=

ꓢꓰꓼ ꓡꓯ ꓘꓳꓹ ꓟ ꓔꓯ ꓠꓽ ꓔ ꓠꓹ ꓟ ꓖꓪ ꓙꓱ ꓔ ꓟ ꓙꓳˍ ꓥ ꓟꓲ꓾ ꓟꓽ ꓠꓽ ꓗꓷ ꓟ ꓑꓶꓸ ꓓꓴ Khartoum ꓡꓳ ꓒꓱ ꓗꓪ ꓜꓽ ꓓꓴ ꓐꓰ ꓬꓲꓻ ꓙꓬ ꓟꓽ ꓙꓳ ꓗꓷ ꓡꓰ ꓢꓲ꓾ ꓮ ꓔꓳꓸ ꓥˍ ꓟꓲ ꓐꓬ ꓡꓰ ꓗꓷꓳ꓾ ꓐꓰ ꓢꓷꓸ ꓪ ꓡꓳ=