Yan King ꓗꓪ ꓡꓳꓽ ꓔꓯꓹ ꓙꓰ ꓢꓲ ꓘꓶ ꓙꓵꓻ ꓟꓶˍ ꓟ ꓞꓳ ꓡꓱ ꓞꓳ ꓡꓯꓸ ꓘꓴꓽ ꓗꓪ ꓗ-ꓔꓳ-ꓡꓲ ꓞꓳ ꓡꓱ ꓤ ꓟꓶ ꓤ ꓕꓲ ꓣꓳˍ ꓟꓲ ꓐˍ ꓟ

Yan King ꓗꓪ ꓡꓳꓽ ꓔꓯꓹ ꓙꓰ ꓢꓲ ꓘꓶ ꓙꓵꓻ ꓟꓶˍ ꓟ ꓞꓳ ꓡꓱ ꓞꓳ ꓡꓯꓸ ꓘꓴꓽ ꓗꓪ ꓗ-ꓔꓳ-ꓡꓲ ꓞꓳ ꓡꓱ ꓤ ꓟꓶ ꓤ ꓕꓲ ꓣꓳˍ ꓟꓲ ꓐˍ ꓟ

Yangon꓾ Yan King ꓡꓳ ꓒꓱ ꓗꓪ 4 ꓦ (18) ꓠꓬꓲ ꓠꓯꓼ ꓕꓯ ꓟꓯꓼ ꓐꓴ ꓗꓪ ꓐꓰ ꓞꓳ ꓡꓱ ꓞꓳ ꓡꓯꓸ ꓐꓴ ꓔꓯ ꓡꓳꓽ ꓔꓯꓹ ꓙꓰ ꓗꓷꓳ꓾ ꓐꓰ ꓓꓳꓽ ꓑ ꓙˍ ꓡꓳ= ꓬꓲ ꓪ ꓐꓴ ꓡꓰ ꓟꓽ ꓓ ꓟꓽ ꓞꓽ ꓡꓳꓽ ꓔꓯꓹ ꓙꓰ ꓗꓷ ꓟꓶ ꓡꓰ ꓟ ꓞꓳ ꓡꓱ ꓞꓳ ꓡꓯꓸ ꓐꓴ ꓔꓯ ꓟꓯꓼ ꓐꓴ ꓗꓪ ꓐꓰ ꓓꓶꓽ ꓔꓲꓸ ꓔ ꓟ ꓐꓬꓱꓽ ꓒꓬꓽ ꓐꓴ ꓠꓬ online ꓗꓪ ꓮꓽ ꓟꓬ ꓓꓳ ꓡ ꓗꓷ ꓟ ꓥꓳ=

Yan King ꓗꓪ ꓚꓳꓸ ꓡꓳꓽ ꓔꓯꓹ ꓙꓰ ꓟꓶ ꓗꓷ ꓟ ꓞꓳ ꓡꓱ ꓘꓴꓽ ꓗꓪ Yan King St.Jude ꓘꓴ ꓜꓲ ꓞꓳ ꓜꓴ ꓗꓪ ꓟ ꓞꓳ ꓡꓱ ꓕꓲ ꓣꓳˍ ꓟꓲ ꓡꓳꓽ ꓔꓯꓹ ꓙꓰˍ ꓟ ꓟꓶ ꓗꓷꓳ=

“Ma Khin Nyein Thu (Anne Marie) ꓠꓬ Yan King St.Jude ꓘꓴ ꓜꓲ ꓞꓳ ꓪꓽ ꓘꓴ ꓦꓲ ꓗꓪ ꓪꓽ ꓘꓴ ꓔꓬ ꓟ ꓞꓳ ꓡꓱ ꓕꓲ ꓣꓳ ꓥꓳ= UK ꓗꓪ ꓟ Contemporary Dance ꓢꓷꓸ ꓠꓲꓹ ꓢꓳ ꓣꓴ ꓗꓷ ꓢꓲ ꓟꓬ-ꓟ ꓗꓴꓷꓼ ꓗꓪ ꓬꓲꓼ ꓛꓲ ꓡ ꓢꓴ ꓥꓳ= 18.4.2021 ꓠꓬꓲ ꓠꓯꓼ 2 ꓙꓵꓹ ꓛꓲ ꓕꓯ ꓟꓽ ꓓ ꓟꓽ ꓞꓽ ꓧꓳꓽ ꓔꓯꓹ ꓙꓰ ꓗꓷ ꓢꓲ꓾ ꓮ ꓟꓰ ꓕꓯ ꓗꓪ ꓛꓲ Yan King ꓡꓳ ꓒꓱ ꓟꓯꓼ-ꓔꓼ ꓗꓪ ꓔꓬ ꓗꓷ ꓢꓲ Shwe Pyi Thar ꓠ ꓠꓬꓲ ꓖꓴ ꓗꓪ ꓡꓳꓽ ꓔꓯꓹ ꓙꓰ ꓟꓶ ꓗꓷ ꓢꓴ ꓐꓴ ꓐꓰ ꓕꓲ ꓪꓺꓽ ꓧꓳꓽ ꓔꓯꓹ ꓙꓰ ꓗꓷ ꓟ ꓟꓶ ꓗꓷ ꓟ ꓔꓯ꓾ꓬꓲ ꓕꓲ ꓦꓲ ꓢꓴ ꓐꓴ ꓐꓰ ꓖ ꓡꓯꓼ ꓖ ꓙꓲ ꓔꓬ ꓢꓴ ꓐꓴ ꓗꓪ ꓐꓰ ꓢꓷꓸ ꓪˍ ꓡꓳ=

18ꓸ4ꓸ2021 ꓟꓶꓽ ꓘꓶꓽ 8 ꓙꓵꓹ MWD ꓓꓳꓽ ꓗꓪ ꓦ ꓩꓴ ꓡˍ ꓟ ꓐꓬꓱꓽ ꓗꓪ Ma Khin Nyein Thu (Anne Marie) ꓠꓬ ꓢꓶꓽ ꓛꓲ ꓘꓳꓹ ꓡꓰˍ ꓟ꓾ ꓠꓺ ꓘꓴ ꓘꓳꓹ ꓡꓰˍ ꓟ ꓡꓰꓽ ꓟꓽ ꓞꓲ꓾  ꓐꓽ ꓪꓴꓽ ꓪꓳꓽ ꓔꓳˍ ꓟꓲ ꓘꓳꓹ ꓡꓰ(zygomatic bone fracture) ꓟ ꓔꓯ ꓡꓳꓸ ꓟꓳˍ ꓡꓳ ꓐꓰ ꓠꓯ ꓞꓲꓼ ꓔꓯ ꓟꓳꓸ ꓢꓷꓸ ꓠꓲꓹ ꓙꓳ ꓢꓴ ꓡꓰ ꓚꓬꓹ ꓠꓬꓲ ꓔ ꓡꓳ=

ꓮ ꓟꓶ ꓟ ꓡꓰ ꓐꓰ Hard Tissue, Bony Structure ꓐꓴ ꓔꓯ ꓐꓬ ꓡꓰ ꓠ ꓛꓲ ꓘꓶ ꓙꓵꓻ ꓟꓶ ꓔ ꓟ ꓬꓲ ꓐꓱ ꓶ ꓣꓱꓽ ꓞꓹ ꓟ ꓠꓯ ꓞꓲꓼ ꓫꓬꓹ ꓟꓶ ꓠꓹ ꓟ ꓮ ꓘꓶꓸ ꓣꓱꓽ ꓞꓹ ꓔꓬ ꓡꓳ=

ꓖꓳ ꓡꓱ ꓢꓲ Ma Khin Nyein Thu (Anne Marie) ꓠꓲꓹ ꓞꓼ ꓣꓱꓽ ꓞꓹ ꓔꓬ ꓟ ꓠ ꓫꓬꓹ ꓟꓶ ꓠꓹ ꓟ ꓐꓰ ꓟꓽ ꓓ ꓟꓽ ꓞ ꓡꓳꓽ ꓔꓯꓹ ꓙꓰˍ ꓟ ꓗꓪ ꓐꓰ ꓡꓲꓹ ꓗꓷ ꓠꓹ ꓟ ꓐꓱ ꓶ ꓬꓰ ꓙ ꓠꓹ ꓟ ꓓꓰꓽˍ ꓡꓳ꓾” ꓐꓰ Yangon ꓗ-ꓔꓳ-ꓡꓲ ꓘꓴ ꓜꓲ ꓞꓳ ꓞꓳ ꓡꓱ ꓤ ꓐꓴ ꓬꓲꓸ ꓛꓲꓺ ꓘꓴ-ꓜꓲ-ꓞꓳ ꓗꓪ ꓟꓬꓱꓽ ꓬꓰ ꓔꓬ ꓢꓴ ꓐꓴ facebook ꓗꓪ ꓐꓰ ꓓꓰꓽ ꓔ ꓟ ꓔꓯ ꓟꓳ ꓪ ꓓꓹ ꓡꓳ=

ꓬꓲꓼ ꓤ ꓠꓬꓲ ꓤ ꓮ ꓙꓵꓽˍ ꓟꓲ ꓟꓬ-ꓟ ꓗꓴꓷꓼ ꓑ ꓫꓬ ꓐꓴ ꓔꓯ ꓟꓽ ꓓ ꓟꓽ ꓞ ꓡꓳꓽ ꓔꓯꓹ ꓙꓰ ꓢꓲ ꓘꓶ ꓙꓵꓻˍ ꓟ ꓗꓪ ꓐꓰ ꓠꓲꓹ ꓞꓼ ꓡꓲꓹ ꓙꓰ ꓟꓶ ꓠꓹ ꓟ ꓐꓰ ꓔꓱꓹ ꓚꓵˍ ꓟ democracy ꓟꓶ ꓡꓰ ꓠꓹ ꓟ ꓐꓱ ꓶ ꓡꓳꓽ ꓢꓲ ꓪꓽ ꓘꓴ ꓙ ꓖꓶ ꓠꓹ ꓟ ꓓꓰꓽˍ ꓡꓳ=

Credit to rva Myanmar

Add new comment

6 + 5 =