ꓛꓴꓽ ꓙꓳ ꓢꓴ ꓔꓯ ꓠꓲꓹ ꓠꓵ ꓠꓯꓹ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓥ ꓟ-ꓕꓲ 5ꓽ43-48 ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓠꓴ ꓠꓬ ꓠꓴ ꓠꓶꓽ ꓛꓳ ꓕꓲ ꓛꓳ ꓔꓯ ꓠꓲꓹ ꓠꓵ ꓐꓰ ꓐꓯ ꓔ ꓟ ꓔꓯ ꓣꓳ ꓑ ꓙ ꓠꓬꓲˍ ꓡꓳ꓾ ꓠꓴ ꓛꓴꓽ ꓙꓳ ꓔꓯ ꓠꓬ ꓠꓲꓹ ꓦꓶꓻ ꓐꓰ ꓠꓴ ꓑ ꓙ ꓠꓬꓲˍ ꓡꓳ= ꓖꓳ ꓡꓱ ꓥ ꓟꓲ ꓥꓪ ꓡꓰ ꓠꓴ ꓔꓯ ꓐꓯ ꓖꓶˍ ꓠꓬꓲ ꓠꓴ ꓔꓯ ꓗꓸ ꓧꓪ ꓢꓴ꓾ ꓠꓴ ꓔꓯ ꓢꓰꓼ ꓢꓴ꓾ ꓠꓴ ꓔꓯ ꓛꓴꓽ ꓙꓳ ꓢꓴ ꓔꓯˍ ꓟꓲ ꓠꓴ ꓪ ꓠꓲꓹ ꓠꓵ= ꓟꓴꓽ ꓗꓪ ꓗꓪ ꓟ ꓐꓹ ꓐ ꓔꓯ ꓡꓳꓸ ꓠꓬꓲ= ꓬꓲ ꓠꓵꓻ ꓠꓲꓹ ꓠꓬ ꓮ ꓡꓰ ꓪꓴ ꓞꓲ ꓙꓳˍ ꓡ= ꓐꓹ ꓐ ꓪꓴ-ꓢ ꓬꓲ ꓟꓶꓽ ꓛ ꓠꓬ ꓙꓲꓻ ꓢꓴ ꓟꓽ ꓙꓲꓻ ꓢꓴ ꓮ ꓙꓵꓽ ꓕꓯꓽ ꓢꓲ ꓗꓪ ꓣꓳꓺ ꓬꓯꓼˍ ꓟ ꓡꓰ ꓐꓰ ꓐꓹ ꓐ ꓠꓵꓻ ꓠꓲꓹ ꓠꓬ ꓮ ꓘꓶꓸ ꓪꓴꓽˍ ꓡꓳ=

ꓖꓳ ꓡꓱ ꓠꓬꓲ ꓠꓴ ꓪ ꓥˍ ꓟꓲ ꓪꓴ-ꓢ ꓔꓯ ꓛꓳ ꓢꓴ꓾ ꓪꓴ-ꓢ ꓤ ꓠꓱ ꓥ ꓟ ꓢꓷꓸ ꓡꓰ ꓓꓴ ꓠꓬ ꓠꓴ ꓪˍ ꓟꓲ ꓠꓴ ꓪ ꓠꓵꓻ ꓠꓲꓹ ꓔꓯ ꓞꓳ ꓤ ꓕꓲ ꓐꓱ ꓐꓱ ꓶˍ ꓡꓰꓽ ꓕ ꓫ ꓔ= ꓠꓴ ꓪ ꓠꓲꓹ ꓟ ꓔꓯ ꓪꓴꓽ ꓔ= ꓠꓴ ꓪ ꓠꓲꓹ ꓟ ꓔꓯ ꓕꓲ ꓠꓬꓲ ꓕꓲ ꓒꓳꓹ ꓪꓴꓽ ꓡ ꓠꓹ ꓟ ꓢꓯꓼ ꓕꓵꓼ= ꓠꓴ ꓪ ꓠꓲꓹ ꓟ ꓠꓬ ꓚꓲꓸ ꓛꓬ ꓦꓲꓻ ꓘꓴꓽ꓾ ꓚꓲꓸ ꓛꓬ ꓤ ꓠꓱ꓾ ꓚꓲꓸ ꓛꓬ ꓐꓹ ꓐ ꓟꓹ ꓟ ꓔꓯ ꓡꓰꓽ ꓕꓽ ꓖꓴ ꓡꓰ ꓝꓲ꓾ ꓐꓰ ꓐꓯ ꓠꓲꓹ ꓫꓵˍ ꓟ ꓥ ꓡꓳ=

ꓥ ꓡꓳ꓾ ꓠꓬꓲꓸ ꓠꓬꓲ ꓟꓸ ꓟꓲꓽ ꓗꓪ ꓣꓳꓽ ꓑ ꓙˍ ꓟ ꓠꓬ ꓐꓹ ꓐ ꓪꓴ-ꓢ ꓬꓲꓸ ꓟꓲꓸ ꓟꓲꓽ꓾ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓐꓯ ꓘꓶꓽ꓾ ꓬꓰ-ꓢꓴ ꓡꓰ ꓚ ꓚꓱꓹ ꓠꓬ ꓟꓲ ꓠꓯ ꓞꓳ ꓤ ꓡꓰ ꓝꓰꓹ ꓔ ꓟ ꓐꓯ ꓘꓶꓽ ꓔꓯ ꓟꓽ ꓫꓱꓸ= ꓟꓲ ꓠꓯ ꓞꓳ ꓤ ꓐꓴ ꓡꓰ ꓛꓳ ꓫꓱꓽ ꓔꓬ ꓟ꓾ ꓟꓲ ꓠꓯ ꓞꓳ ꓤ ꓐꓴ ꓫꓸ ꓕꓱ ꓡꓯꓽ ꓘꓳ ꓔꓬ ꓟ ꓞꓳ ꓡꓲꓽ ꓪ ꓚꓱꓹ ꓔꓯ ꓟꓽ ꓫꓱꓸ= ꓪꓴ-ꓢ ꓐꓯ ꓘꓶꓽ ꓠꓬ ꓮ ꓘꓶꓸ ꓐꓲ ꓜꓲꓼˍ ꓡꓳ=

ꓠꓬꓲꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓟ ꓡꓰ ꓐꓰ ꓟꓴꓽ ꓗꓪ ꓗꓴꓷꓼ ꓠꓴ ꓐꓹ ꓐ ꓐꓲ ꓜꓲꓼˍ ꓟ ꓡꓰ ꓠꓴ ꓪˍ ꓟꓲ ꓐꓲ ꓜꓲꓼ ꓔꓬ ꓡꓯ꓾ ꓐꓰ ꓐꓯ ꓡꓳ= ꓥ ꓡꓳ꓾ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓬꓲ ꓗꓸ ꓠꓯꓸ ꓖꓼ ꓢꓴ ꓐꓴ ꓔꓯ ꓮ ꓕꓯ ꓟꓲ ꓗꓹ ꓛꓲꓽ ꓛꓲꓽ ꓡꓰꓽ ꓓꓹ ꓝꓲ ꓠꓲꓹ ꓫꓵˍ ꓡꓳ= ꓬꓲ ꓗꓸ ꓠꓯꓸ ꓛꓳ ꓢꓴ ꓠꓬ ꓚꓲꓸ ꓛꓬ ꓡꓯꓼ ꓐꓳ ꓔꓶꓸ ꓓꓴ ꓑꓱꓸ ꓔꓬ ꓥ ꓟꓲ꓾ ꓫ ꓟ ꓙꓻ ꓖꓴ ꓗꓪ ꓠꓯ ꓞꓲꓹ ꓟ ꓗꓪ ꓫꓱꓽ ꓙꓰ ꓔꓬ ꓪˍ ꓟꓲ ꓗꓹ ꓛꓲꓽ ꓛꓲꓽ ꓡꓰꓽ꓾ ꓐ ꓧꓶꓽ ꓐ ꓡꓰꓽ ꓙꓰ ꓝꓲ ꓠꓲꓹ ꓫꓵˍ ꓡꓳ=