ꓦꓲ ꓠꓬ ꓮ ꓙꓵꓽ ꓟ ꓬꓲ. ꓚꓰꓺ ꓥˍ ꓟ

                ꓠꓬꓲ. ꓠꓬꓲ (27) ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓗꓪ ꓕꓲꓽ ꓟꓵꓽ ꓕꓲꓽ ꓫꓰ ꓡꓳ. ꓗꓪ ꓵ ꓠ ꓔ ꓟ ꓟ. ꓟꓲꓽ ꓠꓬ ꓬꓲ.‐ꓚꓰ‐ꓬꓲ.‐ꓪꓴ. ꓕꓳ ꓶ 2ꓽ18‐24 ꓗꓪ ꓛꓲ꓾ ꓝꓮꓲ ꓠꓬꓲꓽ ꓔꓳ ꓕꓲꓽ ꓔꓳ ꓟ ꓠꓬ ꓦ‐ꓐꓱ‐ꓣꓴ ꓕꓳꓽ ꓶ (2ꓽ9‐11) ꓗꓪ ꓛꓲ ꓥ ꓢꓲ꓾ ꓶ ꓓꓳꓽ ꓫꓱ, ꓓꓳꓽ ꓠꓬ ꓟ‐ꓘꓳ 10ꓽ 2‐12 ꓗꓪ ꓛꓲ ꓥ ꓡꓳ꓿

                ꓟ. ꓟꓲꓽ ꓬꓲ. ꓪꓴ. ꓕꓲꓽ ꓔꓳ ꓗꓪ ꓪꓴ‐ꓢ ꓠꓬ ꓤꓽ ꓑ ꓤꓽ ꓕꓲꓽ ꓣꓳ ꓔꓯ ꓚꓰꓼˍ ꓡꓳ꓿ ꓬꓲ. ꓠꓬ ꓞꓳ ꓒꓯ ꓟꓽ ꓙꓳ ꓟ ꓑꓶ. ꓓꓴ ꓪꓴ‐ꓢ ꓠꓬ ꓙꓱꓽ ꓤ ꓐꓴ ꓔꓯ ꓚꓰꓼ ꓢꓲ ꓤ ꓑ ꓤ ꓮ‐ꓓꓯ ꓔꓯ ꓞꓳꓽ ꓒꓯ ꓬꓰ ꓝꓲˍ ꓡꓳ꓿ ꓖꓳ ꓡꓱ ꓥˍ ꓟꓲ ꓟꓽ ꓐꓲ ꓜꓲꓼ꓿ ꓖꓳ ꓡꓱ ꓠꓬꓲ ꓪꓴ‐ꓢ ꓡꓰ ꓬꓲ. ꓔꓯ ꓤꓽ ꓟꓶꓼ ꓤꓽ ꓕꓲ ꓣꓳ ꓚꓰꓼ ꓖꓶꓽ ꓡꓳ꓿ ꓖꓳ ꓕꓯ ꓢꓲ ꓐꓲ ꓜꓲꓼ ꓡꓰꓳ꓿ ꓪꓴ‐ꓢ ꓠꓬ ꓕꓱ ꓟ ꓔꓯ ꓙꓲˍ ꓡꓳ ꓐꓰ ꓐꓯ ꓡꓳ꓿

                ꓟ. ꓟꓲꓽ ꓠꓬꓲꓽ ꓙꓰ ꓗꓪ ꓥˍ ꓟꓲ꓾ ꓪꓴ‐ꓢ ꓠꓬ ꓢꓲ ꓒ ꓬꓰ ꓢꓴ ꓗꓪ ꓐꓰ ꓮ ꓙꓵꓽ ꓢꓴ ꓔꓯ ꓚꓬꓴ. ꓟꓶ ꓠ, ꓟ ꓠꓲ, ꓡꓶꓽ ꓙꓳˍ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓮ ꓟꓶ ꓠꓬ ꓐꓬꓱꓼ ꓡꓱꓼ ꓡꓱꓼ ꓟ ꓗꓪ ꓔꓬˍ ꓡꓳ ꓐꓯ ꓟ ꓣꓳꓽ ꓵ ꓪ ꓡꓳ꓿

                ꓶ ꓓꓳꓽ ꓫꓱ, ꓓꓳꓽ ꓗꓪ ꓥˍ ꓟꓲ ꓒ‐ꓡꓰ‐ꓢꓲ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓤꓽ ꓖꓴ ꓤꓽ ꓟꓶ ꓧ, ꓡꓯꓼ ꓘꓳ ꓞꓷ, ꓡꓯ ꓘꓳ ꓓ ꓟꓽ ꓓ ꓟ ꓔꓯ ꓠ ꓠꓬꓲˍ ꓟ ꓥ ꓡꓳ꓿ ꓬꓰ‐ꓢꓴ ꓡꓰ ꓬꓲ. ꓪ ꓐꓴ ꓔꓯ꓾ ꓪꓴ‐ꓢ ꓑꓳ. ꓡꓳꓽ ꓔ ꓟ ꓔꓯ ꓞꓳ ꓤꓽ ꓡꓯ ꓕꓽ ꓐꓬꓺ ꓡꓰ ꓝꓲ꓾ ꓐꓯ ꓟ ꓟ. ꓟꓲ ꓥ ꓡꓳ꓿

                ꓠꓬꓲ. ꓠꓬꓲ ꓠꓬ ꓪꓴ‐ꓢ ꓣꓳꓽ ꓔꓯ ꓢꓷ. ꓡꓰ ꓝꓲ ꓠꓲ, ꓫꓵˍ ꓟ ꓠꓬ ꓦꓲꓻ ꓘꓴꓽ ꓐꓯ ꓟ ꓠꓬ ꓮ ꓘꓶ. ꓒꓴˍ ꓡꓳ ꓐꓯ ꓟ ꓢꓷ. ꓝꓲ ꓠꓲ, ꓫꓵˍ ꓟ ꓥꓳ꓿ ꓔꓲꓺ ꓒ ꓪ ꓔꓲ. ꓙꓳꓧꓠꓑꓮꓴꓡ ꓲꓲ ꓠꓬ ꓦꓲꓻ ꓐꓯ ꓟ ꓠꓬ ꓮ ꓫꓵꓽ ꓥˍ ꓟꓲ ꓬꓲ. ꓚꓰꓺ ꓥꓳ ꓐꓰ ꓐꓯ ꓡꓳ꓿ ꓙꓲ ꓟ ꓥˍ ꓟꓲ ꓟꓽ ꓙꓲ ꓟ ꓥˍ ꓟꓲ ꓦꓲ ꓗꓪ ꓐꓰ ꓡꓯˍ ꓡꓳ꓿ ꓦꓲꓻ ꓐꓯ ꓟ ꓠꓬ ꓮ ꓙꓵꓽ ꓟ ꓬꓲ. ꓚꓰꓺ ꓥꓳ꓿ ꓠꓲꓽ ꓢ ꓓꓯ ꓠꓬ ꓕꓱ ꓟ ꓔꓯ ꓢꓷ. ꓟ ꓑꓶ. ꓓꓴ ꓦꓲꓻ ꓘꓴꓽ ꓐꓬꓺ ꓡꓰ ꓠ, ꓟ ꓧ, ꓡꓰ ꓠ ꓟ ꓔꓯ ꓡꓰ ꓢꓯꓼ ꓕꓵꓼˍ ꓡꓳ꓿ ꓦꓲꓻ ꓠꓬ ꓬꓲ. ꓚꓰꓺ ꓥ ꓟ ꓬꓲ. ꓢꓷ. ꓡꓳ꓿

                ꓣꓳꓽ ꓘꓴ ꓜꓲꓼ ꓞꓳ ꓗꓪ ꓡꓯ ꓒꓯ ꓝˍ ꓕꓯ ꓟꓯ. ꓡꓯ. ꓒ ꓟꓯ. ꓡꓯ. ꓟ ꓐꓴ ꓠꓬ ꓕꓲꓽ ꓣꓳ ꓛꓳ ꓕꓲ ꓣꓳ꓾ ꓙꓬ. ꓥˍ ꓟꓲ꓾ ꓛ ꓥˍ ꓟꓲ꓾ ꓠ ꓥˍ ꓟꓲ꓾ ꓒꓬꓽ ꓥˍ ꓟꓲ ꓕꓲꓽ ꓞꓲ ꓟꓽ ꓧ, ꓙꓰ ꓐꓰ ꓐꓯ ꓢꓲ꓾ ꓪꓵꓼ ꓘꓶꓽ ꓖꓶꓽ ꓡꓳ꓿ ꓕꓱ ꓟ ꓠꓬ ꓮ ꓫꓵꓽ ꓔꓯ ꓐꓯˍ ꓡ? ꓥ ꓡꓳ꓿  ꓮ ꓡꓰ ꓘꓶ. ꓞꓲ ꓠꓵ ꓠꓲ, ꓪꓴꓽ ꓥˍ ꓟꓲ ꓫ. ꓙꓵ ꓓꓴ ꓠꓬ ꓔꓳ ꓙꓳꓽ ꓡˍ ꓥꓳ꓿ ꓕꓲꓽ ꓣꓳꓽ ꓛꓳꓽ ꓕꓲ ꓣꓳꓽ ꓓꓵꓽ ꓙ ꓚꓱ ꓟꓽ ꓫꓱ. ꓡꓯ ꓘꓳ꓾ ꓬꓲ. ꓫꓱ, ꓟꓽ ꓫꓱ. ꓡꓯ ꓘꓳ ꓟ ꓑꓶ. ꓓꓴ ꓕꓲꓽ ꓣꓳ ꓛꓳꓽ ꓕꓲꓽ ꓣꓳ ꓟꓷꓽ ꓠꓷ ꓟꓬꓽ ꓡꓯ ꓘꓳ ꓓꓴ ꓠꓬ ꓓꓳꓺ ꓡ ꓓꓴ ꓥꓳ꓿ ꓕꓱ ꓟ ꓠꓬ ꓬꓲ. ꓚꓳꓽ ꓥꓳ꓿ ꓖꓳ ꓡꓱ ꓥˍ ꓟꓲ꓾ ꓕꓱ ꓟ ꓔꓯ ꓟꓽ ꓢꓷ. ꓢꓷ. ꓐꓰ ꓧ, ꓡꓯ ꓘꓳˍ ꓠꓬ ꓮ ꓫꓵꓽ ꓙꓲ ꓖꓴ ꓟꓽ ꓙꓳ꓿

                ꓮ ꓟꓶ ꓞꓲ ꓦꓬꓼ ꓠꓬꓲ ꓗꓪ ꓠꓬ ꓗꓪ ꓓꓰꓟꓳꓚꓣꓬꓚꓬ ꓦꓬꓼ ꓠꓬꓲ ꓗꓪ ꓮ ꓫꓵꓽ  ꓢꓲ. ꓕꓲꓽ ꓙꓰꓽ ꓙꓰꓽ ꓓꓳꓺ ꓡˍ ꓠꓬ ꓒꓰ ꓡꓯ ꓘꓳ ꓧ, ꓘꓳˍ ꓟ ꓓꓳꓺ ꓡ ꓡꓳ꓿ ꓠꓬꓲ. ꓠꓬꓲ. ꓢꓲ ꓒ ꓬꓰ‐ꓢꓴ ꓠꓬ ꓣꓳꓽ ꓔꓯ ꓐꓯ ꓖꓶꓽ ꓡ ꓔꓬ ꓡꓳ꓿ ꓪꓴ‐ꓢ ꓡꓰ ꓑꓳ. ꓖꓶꓽ ꓡ ꓟ ꓔꓯ ꓞꓳ ꓤ ꓡꓯ ꓕꓽ ꓧ, ꓡꓰ ꓝꓲ꓿ ꓐ, ꓐ, ꓪꓴ‐ꓢ ꓠꓲ, ꓡꓶꓽ ꓙꓳˍ ꓟ ꓑꓶ. ꓓꓴ ꓦꓲ ꓘꓴ ꓕꓲꓽ ꓟ ꓒꓬꓱꓼ ꓡ ꓟ ꓑꓶ. ꓓꓴ ꓟꓳ ꓡꓯ ꓘꓳ ꓪ. ꓟ ꓣꓱꓽ ꓛꓰ ꓙꓳ ꓢꓲ꓾ ꓦꓲ, ꓕꓲꓽ ꓟ ꓕꓵꓽ ꓟꓶ ꓡꓰ ꓟ ꓥˍ ꓡꓳ꓿

                ꓖꓳ ꓡꓱ ꓠꓬꓲ ꓦꓲꓻ ꓕꓲꓽ ꓧꓪ ꓕꓴꓽ ꓗꓷ ꓠꓬ ꓐꓳꓺ ꓐꓳꓺ ꓫ. ꓫ. ꓖꓳ. ꓙꓰ ꓠ, ꓟ ꓥꓳ꓿ ꓠꓬꓲ. ꓠꓬꓲ ꓟ. ꓟꓲ ꓗꓪ ꓣꓳꓽ ꓔꓯ ꓐꓯ ꓖꓶꓽ ꓟ ꓠꓬ꓾ ꓦꓲ ꓕꓲꓽ ꓧꓪ ꓕꓴꓽ ꓕꓯ ꓠꓬ ꓤꓽ ꓑ ꓤꓽ ꓤꓽ ꓟꓶ ꓤꓽ ꓠꓬꓲ ꓣꓳˍ ꓡꓰ ꓟꓽ ꓥ‐ꓳ ꓪꓴ‐ꓢ ꓥˍ ꓟꓲ ꓐꓺ ꓡ‐ꓳ ꓚꓬꓼ ꓡ‐ꓳ꓿ ꓖꓳ ꓡꓱ ꓠꓬꓲ ꓦꓲ ꓕꓲꓽ ꓟ ꓕꓴꓽ ꓕꓯ ꓠꓬ ꓢ ꓣꓳ ꓒꓬꓱꓼ ꓡ ꓟ ꓥꓳ꓿ ꓦꓲꓻ ꓘꓴ ꓗꓪ ꓫ. ꓓꓴ ꓟꓷꓼ ꓓꓴ ꓓꓳꓺ ꓡ ꓕꓯ꓾ ꓥ ꓠꓬ ꓓꓵꓽ ꓙ ꓚꓱ ꓟꓽ ꓫꓱ. ꓡꓯ ꓘꓳ ꓟ ꓓꓳꓺ ꓡ ꓠꓬ ꓪꓴ‐ꓢ ꓐꓯ ꓖꓪ ꓙꓱ ꓡꓯ ꓘꓳ꓿ ꓪꓽ ꓘꓴ ꓢꓲ ꓢꓯꓼ ꓕꓵ꓾ ꓧ, ꓡꓯ ꓘꓳ ꓠꓲ, ꓫꓵˍ ꓟ ꓠꓲ, ꓟ ꓓꓳꓺ ꓡ ꓥˍ ꓟꓲ꓾ ꓐ,  ꓐ ꓪꓴ‐ꓢ ꓒꓬꓱꓽ ꓟꓬꓺ ꓡꓳ. ꓢꓲ ꓝꓮꓲ. ꓙꓰ꓿

                ꓪꓴ‐ꓢ ꓠꓲ, ꓡꓶꓽ ꓛꓳ ꓢꓴ ꓠꓬ ꓮ ꓕꓯˍ ꓟꓲ ꓟꓽ ꓐꓬꓺ ꓡꓰ꓿ ꓪꓴ‐ꓢ ꓡꓰ ꓠꓬꓲ. ꓡꓳ. ꓗꓪꓽ ꓫꓵꓼ ꓖꓶꓽ ꓡꓳ꓿ ꓪꓴ‐ꓢ ꓔꓯ ꓠ ꓑꓼ ꓕꓲꓽ ꓗꓷ ꓔ ꓢꓴ ꓠꓬ ꓮ ꓕꓯˍ ꓟꓲ ꓟꓼ ꓐꓬꓺ ꓡꓰ ꓐꓰ ꓟ ꓢꓷ. ꓔ ꓠ ꓗˍ ꓡꓳ꓿ ꓠꓬꓲ. ꓠꓬꓲ. ꓟ. ꓟꓲꓽ ꓗꓪ ꓐꓰ ꓦꓲꓻ ꓘꓴꓽ ꓗꓪ ꓒꓵꓽ ꓛꓳ ꓗꓴ. ꓠ, ꓟ꓾ ꓟꓬꓱꓽ ꓬꓰ ꓗꓴ. ꓠ ꓟ ꓣꓳ ꓔꓯ ꓐꓯ ꓟ ꓖꓶꓽ ꓡ ꓔꓬ, ꓟ ꓥ ꓡꓳ꓿