ꓟꓷ ꓠꓷ ꓝ ꓒ ꓬꓲ-ꓡꓲ-ꓫ ꓡꓰ ꓬꓲ ꓔꓯ ꓣꓴ ꓡꓹ ꓟ ꓫꓲ-ꓡꓲ-ꓬ ꓟꓯꓼ ꓐꓴ ꓔꓯ ꓧꓪꓸ ꓡꓰˍ ꓟ

ꓫꓲ-ꓡꓲ-ꓬ ꓐꓰ ꓬꓲ-ꓢꓷ-ꓡꓰ ꓐꓴ ꓐꓰ ꓟꓯꓼ ꓓꓶꓽ ꓡꓯ ꓘꓳꓹ ꓕꓯ ꓫꓲ-ꓡꓲ-ꓬ ꓪ ꓔꓲ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓓꓶꓽ ꓠꓹ ꓟ ꓟꓯꓼ ꓒꓱ ꓚꓵꓹ ꓔꓶˍ ꓡꓳ= ꓖꓳ ꓡꓱ ꓥˍ ꓟꓲ ꓪꓴ-ꓢ ꓠꓬ ꓬꓲ-ꓡꓲ-ꓫ ꓗꓪ ꓐꓰ ꓕꓲ ꓝꓸ ꓙꓰ ꓟꓽ ꓓ ꓟ ꓕꓲ ꓔꓳꓸ ꓔꓯ ꓟꓽ ꓙꓰ ꓠꓹ ꓟ ꓮ ꓕꓯ ꓟꓲ ꓐꓯ ꓖꓶ ꓡꓹ ꓡꓳ= ꓫꓲ-ꓡꓲ-ꓬ ꓪ ꓔꓲ ꓠꓬ ꓮ ꓘꓶꓸ ꓠꓲꓹ ꓟ ꓦꓶ ꓢꓲ ꓬꓲ ꓪ ꓐꓴ ꓟꓯꓼ ꓒꓱ ꓚꓵꓹ ꓔꓶ ꓔ ꓟ ꓬꓲ ꓖ ꓔꓯ ꓬꓲ-ꓢꓷ-ꓡꓰ ꓔꓬ ꓗꓪ ꓘꓴꓽ ꓐꓯ ꓟꓳꓸ ꓖꓶ ꓢꓴ ꓙꓳˍ ꓡꓳ ꓐꓰ ꓓꓵꓽ ꓙ ꓔꓬ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓬꓲ ꓟꓯꓼ ꓢꓲꓽ ꓒ ꓐꓴ ꓔꓯ ꓘꓴ ꓡꓳꓽ ꓗꓷ ꓢꓲ꓾ ꓬꓲ ꓪ ꓗꓳ ꓡꓳ ꓗꓪ ꓬꓲ-ꓢꓷ-ꓡꓰ ꓪ ꓔꓲ ꓔꓯ ꓓꓳꓽ ꓘꓴꓽ ꓐꓯ ꓖꓶ ꓢꓴ ꓮ ꓟ ꓥ ꓡ? ꓐꓰ ꓠ ꓠꓬꓲˍ ꓡꓳ= ꓬꓲ ꓪ ꓮ ꓙꓵꓽ ꓠꓬ ꓚꓲ ꓛꓬ ꓠꓽ ꓥ ꓟ ꓓꓳꓽ ꓕꓱ ꓟ ꓐꓯ ꓖꓶ ꓢꓴ ꓠꓬ ꓟꓷ ꓠꓷꓹ ꓝ ꓒ ꓬꓲ-ꓡꓲ-ꓫ ꓥꓳ꓾ ꓐꓰ ꓐꓯ ꓖꓶˍ ꓡꓳ=

ꓬꓲ ꓪ ꓡꓰ ꓪ ꓔꓲ ꓔꓯ ꓾ ꓬꓲ-ꓡꓲ-ꓫ ꓠꓬ ꓘꓷꓹ ꓖꓳꓽ ꓗꓪ ꓠꓴ ꓐꓯ ꓔꓬ ꓟ ꓮ ꓙꓵꓽ ꓔꓯˍ ꓟꓲ ꓬꓲ ꓢꓷꓸˍ ꓡꓳ ꓐꓯ ꓡꓳ= ꓖꓳ ꓡꓱ ꓠꓬꓲ ꓫꓲ-ꓡꓲ-ꓬ ꓪ ꓔꓲ ꓡꓰ ꓟꓷ ꓠꓷꓹ ꓝ ꓒ ꓬꓲ-ꓡꓲ-ꓫ ꓔꓯ ꓧꓪ ꓬꓰ ꓠꓹ ꓟ ꓬꓲ ꓟꓯꓼ ꓐꓴ ꓔꓯ ꓝꓲ ꓩꓴ ꓗꓷˍ ꓡꓳ= ꓖꓳ ꓕꓲ ꓙꓵꓹ ꓗꓪ ꓬꓲ-ꓡꓲ-ꓫ ꓠꓬ ꓓꓳ-ꓕ ꓗꓪ ꓔꓬ ꓡꓳ=  ꓪ ꓔꓲ ꓠꓬ ꓮ ꓟꓴꓽ ꓐꓰ ꓟꓯꓼ ꓖꓽ ꓡꓲꓽˍ ꓐꓰ ꓟꓯꓼ ꓜꓴ ꓓꓽ ꓟ ꓔꓯ ꓝꓲ ꓩꓴ ꓗꓷ ꓢꓲ ꓬꓲ-ꓡꓲ-ꓫ ꓔꓯ ꓣꓴ ꓠꓹ ꓟ ꓢ ꓘꓪ ꓕꓯ ꓓꓳ-ꓕ ꓡꓳ ꓒꓱ ꓔꓯ ꓚꓳꓸ ꓬꓰ ꓝꓲˍ ꓡꓳ=

ꓗ ꓠꓯꓸ ꓠꓯꓼ ꓠꓯꓼ ꓬꓲ-ꓡꓲ-ꓫ ꓔꓯ ꓣꓱꓽ ꓙ ꓢꓴ ꓡꓰ ꓟꓯꓼ ꓜꓴ ꓐꓰ ꓟꓯꓼ ꓖꓽ ꓡꓲꓽ ꓔꓯ ꓟꓳ ꓡꓰ ꓕꓯ ꓮ ꓘꓶꓸ ꓙꓳꓺ ꓡꓰꓳ= ꓬꓲ ꓠꓬ ꓬꓲ ꓢꓲꓺ ꓒ ꓬꓲ-ꓡꓲ-ꓫ ꓔꓬ ꓗꓪ ꓞꓼ ꓞꓼ ꓔꓷꓹ ꓙꓰ ꓢꓲ ꓓꓳꓽ ꓖꓳ ꓟ ꓔꓯ ꓐꓯ ꓖꓶ ꓢꓲ ꓣꓳꓽ ꓮ ꓡꓲ ꓬꓰ ꓠꓯꓹ ꓡ? ꓐꓯ ꓖꓶˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ-ꓡꓲ-ꓫ ꓠꓽ ꓬꓲ ꓔꓯ ꓕꓽ ꓙꓳ꓾ ꓐꓰ ꓠꓲꓹ ꓪꓴꓽ ꓪꓴꓽ ꓡꓰ ꓐꓯ ꓖꓶˍ ꓡꓳ= ꓝꓮꓲ ꓣꓳ ꓔꓯ ꓔ ꓙ ꓢꓴ ꓠꓬ ꓬꓲ ꓪ ꓟꓯꓼ ꓜꓴ ꓢꓶꓸ ꓟꓽ ꓞꓲ ꓟꓬꓽˍ ꓡꓳ ꓐꓰ ꓐꓯ ꓢꓲ ꓬꓲ ꓚꓳ ꓑꓸ ꓔꓯ ꓟꓬ ꓢꓶꓽ ꓒꓴ ꓡ ꓝꓲ ꓠꓹ ꓟ ꓪꓽ ꓘꓴˍ ꓡꓳ= ꓪꓴ-ꓢ ꓡꓰ ꓬꓲ-ꓡꓲ-ꓫ ꓪꓽ ꓘꓴ ꓘꓶꓽ ꓔꓯ ꓓ ꓔꓳꓹ ꓖꓶ ꓢꓲ ꓬꓲ ꓚꓳ ꓑꓸ ꓔꓯ ꓟꓬ ꓢꓶꓽ ꓒꓴ ꓡ ꓝꓲ ꓢꓲ ꓚꓳ ꓑ ꓡꓳꓸ ꓠꓬꓲ ꓗꓷ ꓠꓬ ꓮ ꓔꓳꓸ ꓮ ꓟꓴꓽˍ ꓐꓰ ꓮ ꓔꓳꓸ ꓖꓽ ꓡꓲꓽ ꓜꓴ ꓠꓬ ꓬꓲ-ꓡꓲ-ꓫ ꓔꓬ ꓟ ꓪꓽ ꓚꓲ ꓚꓳ ꓡꓳ ꓗꓪ ꓐꓲ ꓞꓹ ꓟ ꓔꓯ ꓟꓳꓻ ꓡꓰˍ ꓡꓳ=

ꓫꓲ-ꓡꓲ-ꓬ ꓟꓯꓼ ꓜꓴ ꓠꓬ ꓬꓲ-ꓡꓲ-ꓫ ꓔꓯ ꓣꓴ ꓠꓹ ꓟ ꓡꓹ ꓡꓳ= ꓖꓳ ꓕꓯ ꓬꓲ-ꓡꓲ-ꓫ ꓠꓬ ꓝꓮꓲ ꓕꓲ ꓧꓪꓹ ꓪꓽ ꓘꓴ ꓢꓲ ꓪꓴ-ꓢꓺꓳ ꓟꓯꓼ ꓜꓴ ꓕꓱ ꓟ ꓔꓯ ꓠꓬꓲ ꓟꓽ ꓟꓳꓻ ꓗꓷ ꓡꓰ ꓝꓲ꓾ ꓐꓰ ꓓꓰꓽˍ ꓕꓯ ꓪꓴ-ꓢ ꓠꓬ ꓬꓲ-ꓡꓲ-ꓫ ꓪꓽ ꓘꓴˍ ꓟ ꓔꓯ ꓠ ꓠꓹ ꓢꓲ ꓬꓲ ꓪ ꓐꓴ ꓔꓯ ꓠꓬꓲ ꓟꓽ ꓟꓳꓻ ꓗꓷ ꓡꓰ ꓝꓲˍ ꓡꓳ= ꓬꓲ-ꓡꓲ-ꓫ ꓠꓬ ꓟꓯꓼ ꓜꓴ ꓐꓴ ꓔꓯ ꓠꓴ ꓪ ꓧꓪ ꓔꓬ ꓟ ꓕꓲ ꓣꓳ ꓠꓬ ꓕ ꓟꓽ ꓔꓬ= ꓥꓪ ꓔꓯ ꓛꓳ ꓡꓯ꓾ ꓖꓳ ꓡꓱ ꓠꓬ ꓠꓴ ꓪ ꓔꓯ ꓬꓲ ꓔꓬ ꓗꓪ ꓧꓳꓽ ꓙꓰˍ ꓥꓳ꓾ ꓐꓯ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓠꓬꓲ ꓟꓽ ꓟꓳꓻ ꓗꓷ ꓡꓰ ꓟ ꓟꓯꓼ ꓜꓴ ꓐꓴ ꓠꓬ ꓬꓲ ꓪ ꓔꓯ ꓢ-ꓟ-ꓡꓲ ꓡꓳ ꓒꓱ ꓗꓪ ꓧꓳꓽ ꓓꓵꓽ ꓙꓰ ꓔꓬ ꓟ ꓬꓲ-ꓡꓲ-ꓫ ꓔꓯ ꓛꓳ ꓙꓰˍ ꓡꓳ= ꓬꓲ-ꓡꓲ-ꓫ ꓠꓬ ꓟꓯꓼ ꓜꓴ ꓐꓴ ꓟꓬ ꓢꓶꓽ ꓠꓬꓲ ꓟꓳꓻ ꓡ ꓠꓹ ꓟ ꓝꓮꓲ ꓕꓲ ꓧꓪꓹ ꓪꓽ ꓘꓴ ꓢꓲ ꓓꓰꓽˍ ꓡꓳ= ꓟꓯꓼ ꓜꓴ ꓐꓴ ꓟꓬ ꓢꓶꓽ ꓠꓬꓲ ꓟꓳꓻ ꓡꓹ ꓕꓯ ꓬꓲ ꓪ ꓐꓴ ꓠꓬ ꓢ-ꓟ-ꓡꓲ ꓡꓳ ꓒꓱ ꓗꓪ ꓛꓲꓺ ꓡ ꓢꓲ ꓬꓲ-ꓢꓷ-ꓡꓰ ꓪ ꓔꓲ ꓟꓲꓽ ꓙꓬ ꓗꓪ ꓦꓰꓼ ꓞꓹ ꓔꓬ ꓟ ꓢꓷꓸ ꓡꓰꓳ=

ꓬꓲ-ꓢꓷ-ꓡꓰ ꓪ ꓔꓲ ꓡꓰ ꓕꓱ ꓕꓲ ꓧꓳꓽ ꓟ ꓔꓯ ꓥꓪ ꓡꓰ ꓢꓰꓼ ꓗꓷ ꓠꓯꓹ ꓡ ꓐꓰ ꓟꓷ ꓠꓷꓹ ꓝ ꓒ ꓬꓲ-ꓡꓲ-ꓫ ꓔꓯ ꓠ ꓠꓬꓲˍ ꓡꓳ= ꓕꓽ ꓢꓰꓼ ꓗꓷ= ꓟꓯꓼ ꓘꓶꓽ ꓗꓪ ꓐꓰ ꓡꓳꓽ ꓔꓯꓹ ꓡ ꓢꓴ ꓔꓯˍ ꓟꓲ ꓜ ꓖꓶ ꓜꓽ ꓙꓲꓽ ꓙꓳˍ ꓟ ꓡꓳ= ꓖꓳ ꓡꓱ ꓠꓬꓲ ꓬꓲ ꓔꓯ ꓜꓽ ꓓꓴ ꓓꓳ ꓓꓴ ꓖꓶ ꓗꓷ ꓢꓲ ꓬꓲ ꓪ ꓢꓲꓽ ꓒ ꓔꓬ ꓗꓪ ꓬꓲꓼ ꓙꓰ ꓝꓲ꓾ ꓐꓯ ꓖꓶˍ ꓡꓳ= ꓬꓲ-ꓢꓷ-ꓡꓰ ꓪ ꓔꓲ ꓠꓬ ꓬꓲ-ꓡꓲ-ꓫ ꓟꓸ ꓘꓶꓽ ꓔꓯ ꓠ ꓠꓹ ꓢꓲ ꓟꓯꓼ ꓜꓴ ꓔꓯ ꓜꓽ ꓓꓴ ꓖꓶ ꓢꓲ ꓠꓬꓲ ꓫꓲ-ꓡꓲ-ꓬ ꓟꓵꓽ ꓗꓪ ꓬꓲꓼ ꓙꓰ ꓝꓲ ꓗꓷꓳ=