ꓟꓴꓽ ꓗꓪ ꓝꓲ ꓓꓴ ꓣ-ꓩ-ꓰ ꓐꓰ ꓕꓳ-ꓐꓲ-ꓬ ꓟꓸ ꓟꓲꓽ (1) ꓕꓱ

ꓕꓳ-ꓐꓲ ꓕꓳ ꓶ ꓠꓬ ꓐꓚꓰ 300 ꓘꓳꓼ ꓥ ꓠꓬ 200 ꓘꓳꓼ ꓕꓯ ꓬꓳ-ꓔ ꓐꓴ ꓡꓰ ꓐꓳ ꓔ ꓟ ꓥ ꓢꓲ ꓕꓳ ꓶ ꓘꓴꓽ ꓗꓪ ꓠꓬ ꓪꓴ-ꓢ ꓠꓬ ꓬꓲ ꓔꓯ ꓠꓲꓹ ꓠꓵ ꓢꓴ ꓬꓲ ꓚꓳ ꓑ ꓐꓴ ꓔꓯ ꓮ ꓡꓰ ꓫꓵꓽ ꓠꓬꓲˍ ꓟ꓾ ꓬꓲ ꓪ ꓪꓽ ꓘꓴ ꓘꓶꓽ ꓔꓯ ꓓꓽ ꓔꓳꓹ ꓟ꓾  ꓝꓮꓲ ꓠꓬ ꓬꓲ ꓘꓶꓽ ꓫꓵꓽ ꓬꓰ ꓔ ꓟ ꓟꓽ ꓐꓬ ꓡꓰ ꓠ ꓠꓬꓲ ꓙ ꓔ ꓙˍ ꓟ ꓔꓯ ꓟꓸ ꓖꓶ ꓔ ꓡꓳ= ꓕꓳꓽ ꓶ ꓕꓱ ꓟ ꓠꓬ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓥ ꓟ ꓠꓲ-ꓠꓲ-ꓪꓱ ꓡꓳ ꓒꓱ ꓗꓪ ꓔꓬ ꓟ ꓟꓬ ꓢꓶꓽ ꓠꓬꓲꓺ ꓟꓽ ꓟꓳꓻ ꓗꓷ ꓡꓰ ꓟ ꓕꓳ-ꓐꓲ ꓕꓲ ꓦꓲ ꓢꓴ ꓐꓰ ꓮ-ꓘꓷ-ꓟꓰ-ꓕ ꓡꓳ ꓒꓱ ꓗꓪ ꓔꓬ ꓟ ꓠꓱꓸ ꓐꓯ ꓢꓴ ꓡꓰ ꓧꓹ ꓙꓰ ꓗꓷ ꓟꓶ ꓡꓰ ꓟ꓾ ꓠꓱꓸ ꓐꓯ ꓡꓰ ꓡꓳ ꓒꓰꓹ ꓔ ꓟ ꓢ-ꓣ ꓐꓴ ꓬꓲ ꓪ ꓠꓬꓲ ꓦꓲꓻ ꓚꓺ ꓟꓲꓽ ꓔꓯ ꓐꓯ ꓟꓸ ꓔ ꓟ ꓥ ꓡꓳ=

ꓟꓸ ꓟꓲꓽ ꓕꓱ ꓟ ꓠꓬ ꓟꓴ ꓗꓪ ꓝꓲ ꓓꓴ Raphael ꓡꓰ ꓬꓲ ꓔꓯ ꓛꓳ ꓢꓴ ꓙꓵꓻ ꓢꓴ ꓔꓯ ꓮ ꓡꓰ ꓬꓰ ꓙ ꓖꓶˍ ꓟ ꓔꓯ ꓟꓸ ꓖꓶ ꓔ ꓟ ꓥ ꓡꓳ= ꓟꓸ ꓟꓲ ꓠꓬ ꓕꓱ ꓡꓱ ꓥ ꓡꓳ= ꓕꓲ ꓟꓳ ꓡꓳ ꓕꓯ ꓕꓳ-ꓐꓲ ꓐꓰ ꓟꓬꓱꓺ ꓔ ꓟ ꓕꓳ-ꓐꓲ-ꓬ ꓬꓲ ꓐꓹ ꓐ ꓠꓬ ꓐꓱ ꓘꓴꓽ ꓗꓪ ꓠꓽ ꓔꓬ ꓡꓳ= ꓖꓳ ꓕꓯ ꓠꓬꓹ ꓛꓬꓼ ꓡꓯꓼ ꓘꓰꓽ ꓠꓬ ꓬꓲ ꓟꓬ ꓢꓶꓽ ꓗꓪ ꓞꓰ ꓓꓵꓽ ꓡꓰ ꓠꓬꓲ ꓬꓲ ꓟꓬ ꓢꓶꓽ ꓠꓬ ꓮ ꓘꓶꓸ ꓞꓴ ꓡ ꓢꓲ ꓫꓵꓽ ꓡꓰˍ ꓡꓳ= ꓗꓸ ꓠꓯ ꓬꓲ ꓟꓬ ꓢꓶꓽ ꓠꓬ ꓖꓯꓼ ꓡꓯꓼ ꓡꓯꓼ ꓒꓴ ꓒꓴ ꓟꓴ ꓒꓬꓱꓼ ꓡꓰ ꓢꓲ ꓠꓬꓲ ꓟꓽ ꓟꓳ ꓗꓷ ꓡꓰꓳ=

ꓕꓳ-ꓐꓲ-ꓬ ꓬꓲ ꓐꓹ ꓐ ꓠꓬꓲ ꓟꓽ ꓟꓳ ꓗꓷ ꓡꓰ ꓕꓯ ꓬꓲ ꓠꓬ ꓬꓲ ꓕꓲ ꓦꓲ ꓢꓴ ꓐꓱ ꓶ ꓟꓬꓱꓽ ꓬꓰ ꓠ ꓗꓷ ꓡꓰꓳ= ꓖꓳ ꓡꓱ ꓥˍ ꓟꓲ ꓒꓴ ꓮ ꓘꓶꓸ ꓧꓪ ꓫꓸ ꓟ ꓪꓴꓸ ꓠꓬꓲ ꓬꓲ ꓪ ꓠꓬ ꓮ ꓘꓶꓸ ꓐꓰ ꓮ ꓘꓶꓸ ꓫ ꓡꓹ ꓡꓳ= ꓖꓳ ꓡꓱ ꓠꓬꓲ ꓕꓲ ꓠꓬꓲ ꓙꓳˍ ꓕꓯ ꓕꓳ-ꓐꓲ ꓠꓬ ꓬꓲ ꓒꓴ ꓔꓯ ꓟꓯ-ꓓꓲ-ꓬ ꓟꓵꓽ ꓣ-ꓖꓰ ꓡꓳ ꓒꓱ ꓗꓪ ꓔꓬ ꓟ ꓬꓲ ꓖꓪ ꓛꓳꓽ ꓕꓲ ꓣꓳ ꓔꓯ ꓒꓴ ꓡꓯ ꓙꓱ ꓔ ꓟ ꓔꓯ ꓬꓲ ꓤ ꓕꓳ-ꓐꓲ-ꓬ ꓔꓯ ꓐꓯ ꓖꓶˍ ꓡꓳ=

ꓬꓲ ꓠꓬ ꓕꓳ-ꓐꓲ-ꓬ ꓔꓯ ꓟꓯ-ꓓꓲ-ꓬ ꓗꓪ ꓙꓰ ꓢꓲ ꓒꓴ ꓣꓴ ꓙꓰ ꓠꓹ ꓟ ꓐꓯ ꓖꓶˍ ꓡꓳ= ꓕꓳ-ꓐꓲ-ꓬ ꓠꓬ ꓟꓯ-ꓓꓲ-ꓬ ꓗꓪ ꓙꓰ ꓠꓹ ꓟ ꓙ ꓖꓴ ꓢꓷꓸ ꓢꓴ ꓔꓯ ꓧꓪ ꓙꓰˍ ꓡꓳ=  ꓬꓲ ꓖꓳ ꓡꓱ ꓧꓪ ꓙꓰˍ ꓕꓯ ꓟꓴ ꓗꓪ ꓝꓲ ꓓꓴ ꓣ-ꓩ-ꓰ ꓔꓯ ꓟꓳˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓠꓬ ꓟꓴ ꓗꓪ ꓝꓲ ꓓꓴ ꓥ ꓟ ꓕꓳ-ꓐꓲ-ꓬ ꓟꓽ ꓢꓷꓸ= ꓖꓳ ꓡꓱ ꓠꓬꓲ ꓕꓳ-ꓐꓲ-ꓬ ꓡꓰ ꓣ-ꓩ-ꓰ ꓔꓯ ꓟꓯ-ꓓꓲ-ꓬ ꓟꓵꓽ ꓗꓪ ꓬꓲ ꓔꓯ ꓛꓳ ꓙꓰ ꓠꓹ ꓟ ꓐꓯ ꓖꓶˍ ꓕꓯ ꓬꓲ ꓡꓰ꓾ ꓥꓪ ꓠꓬ ꓣ-ꓩ-ꓰ ꓥ ꓡꓳ= ꓝꓮꓲ ꓥꓪ ꓡꓰ ꓠꓴ ꓔꓯ ꓙ ꓖꓴ ꓟꓳꓸ ꓖꓶˍ ꓥꓳ꓾ ꓐꓰ ꓒꓳꓹ ꓖꓶˍ ꓡꓳ=

ꓖꓳ ꓡꓱ ꓠꓬꓲ ꓝꓮꓲ ꓕꓲ ꓠꓬꓲ ꓗꓪ ꓟꓴ ꓗꓪ ꓝꓲ ꓓꓴ ꓣ-ꓩ-ꓰ ꓾ ꓕꓳ-ꓐꓲ-ꓬ ꓐꓰ ꓦꓯ-ꓣ ꓟꓬꓱꓺ ꓔ ꓟ ꓕꓳ-ꓐꓲ-ꓬ ꓬꓲ ꓮꓸ ꓠꓽ ꓐꓴ ꓠꓬ ꓟꓯ-ꓓꓲ-ꓬ ꓗꓪ ꓙꓰˍ ꓡꓳ= ꓬꓲ ꓪ ꓠꓬꓲꓽ ꓣꓳ ꓕꓲ ꓠꓬꓲ ꓡꓱꓸꓼ ꓫꓱꓽ ꓗꓷ ꓠꓬ ꓔꓲ-ꓖ-ꓣꓲ ꓬꓲ ꓙꓬ ꓘꓶꓽ ꓗꓪ ꓬꓲꓼ ꓔ ꓡꓳ= ꓖꓳ ꓕꓯ ꓕꓳ-ꓐꓲ-ꓬ ꓡꓰ ꓛꓲ ꓒꓯꓹ ꓞꓲꓽ ꓠꓹ ꓟ ꓬꓲ ꓙꓬ ꓖꓴ ꓗꓷ ꓠꓬ ꓥꓪꓸ ꓕꓲ ꓟ ꓔꓷꓹ ꓓꓳ ꓡ ꓢꓲ ꓕꓳ-ꓐꓲ-ꓬ ꓛꓲ ꓒꓯꓹ ꓔꓯ ꓘꓳꓼˍ ꓐꓰ ꓬꓰˍ ꓡꓳ= ꓕꓳ-ꓐꓲ-ꓬ ꓠꓬ ꓮ ꓘꓶꓸ ꓙꓳꓺ ꓡꓰ ꓢꓲ ꓘꓴ ꓔꓴ ꓡꓹ ꓡꓳ= ꓟꓴ ꓗꓪ ꓝꓲ ꓓꓴ ꓣ-ꓩ-ꓰ ꓡꓰ ꓕꓽ ꓙꓳꓺ꓾ ꓥꓪꓸ ꓔꓯ ꓣꓴ꓾ ꓕꓽ ꓡꓲꓹ ꓙꓰ ꓝꓲ꓾ ꓐꓯ ꓡꓳ= ꓖꓳ ꓡꓱ ꓠꓬꓲ ꓕꓳ-ꓐꓲ-ꓬ ꓡꓰ ꓥꓪꓸ ꓔꓯ ꓣꓴ ꓢꓲ ꓟꓲ ꓙꓴꓺ ꓗꓪ ꓔꓯꓹ ꓓꓳ ꓡꓹ ꓡꓳ=

ꓟꓴ ꓗꓪ ꓝꓲ ꓓꓴ ꓣ-ꓩ-ꓰ ꓡꓰ  ꓕꓳ-ꓐꓲ-ꓬ ꓔꓯ ꓥꓪꓸ ꓔꓯ ꓘꓶꓽ ꓢꓲ ꓬꓲ ꓠꓲꓹ ꓟˍ ꓐꓰ꓾ ꓬꓲ ꓫꓵꓽ ꓒꓬꓸ ꓔꓯ ꓣꓴ= ꓬꓲ ꓚꓲꓺ ꓔꓯ ꓟꓽ ꓐꓬ ꓡꓰ ꓠ ꓣꓴ ꓢꓲ ꓫ ꓔ= ꓮ ꓡꓲꓳ ꓐꓯ ꓠꓬ ꓬꓲ ꓠꓲꓹ ꓟ ꓐꓰ ꓬꓲ ꓚꓲ ꓠꓬ ꓠꓯ ꓞꓲꓼ ꓓꓽ ꓟ ꓥ ꓡꓳ꓾ ꓐꓯ ꓖꓶˍ ꓡꓳ= ꓕꓳ-ꓐꓲ-ꓬ ꓠꓬ ꓟꓴ ꓗꓪ ꓝꓲ ꓓꓴ ꓐꓯ ꓟ ꓡꓰ ꓬꓰˍ ꓡꓳ=

ꓗꓸ ꓠꓯ ꓕꓲ ꓠꓬꓲ ꓗꓪ ꓬꓲ ꓪ ꓠꓬ ꓟꓯ-ꓓꓲ-ꓬ ꓗꓪ ꓛꓲꓺ ꓬꓰˍ ꓡꓳ=