ꓙꓱ-ꓣꓴ-ꓢ-ꓡꓱ ꓐꓱ ꓶ ꓬꓰ-ꓢꓴ ꓥꓴˍ ꓟ

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓙꓱ-ꓣꓴ-ꓢ-ꓡꓱ ꓗꓪ ꓛꓲꓺ ꓡˍ ꓐꓰ ꓬꓰˍ ꓕꓯ ꓡꓳ ꓒꓱ ꓔꓯ ꓟꓳ ꓗꓷ ꓠꓬ ꓡꓳ ꓒꓱ ꓐꓱ ꓶ ꓥꓴꓻ ꓢꓲ ꓕꓱ ꓡꓱ ꓐꓯ ꓡꓳ= ꓠꓬꓲꓸ ꓠꓬꓲ ꓥˍ ꓟꓲ ꓠꓴ ꓔꓯ ꓢꓲꓺ ꓡꓲꓺ ꓡꓰ ꓝꓲˍ ꓟ ꓔꓯ ꓢꓷꓸˍ ꓕꓯ ꓠꓽ ꓙꓲˍ ꓡꓳ ꓫꓵꓽ ꓥꓳ= ꓮ ꓟꓶ ꓠꓽ ꓠꓴ ꓟꓬ ꓢꓶꓽ ꓔꓯ ꓚꓲꓸ ꓔ ꓟ ꓥ ꓡꓳ꓾ ꓐꓰ ꓐꓯ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓺ ꓒ ꓬꓰ-ꓢꓴ ꓥꓴꓻ ꓢꓲ ꓟꓬ ꓐꓲꓻ ꓞꓰꓹ ꓡꓳ ꓐꓯ ꓟ ꓠꓬ ꓢꓲꓽ ꓫꓬ ꓕꓳꓽ ꓶ ꓗꓪ ꓮ ꓘꓶꓸ ꓐꓰ ꓟꓳꓻ ꓪˍ ꓟ ꓟꓽ ꓥ= ꓮ ꓘꓶꓸ ꓟꓽ ꓓꓯꓹ ꓟ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓐꓱ ꓶ ꓥꓴˍ ꓡꓳ꓾ ꓐꓯ ꓟ ꓔꓯ ꓣꓳ ꓑ ꓙˍ ꓡꓳ= ꓮ ꓫꓵꓽ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓟꓬ ꓐꓲꓻ ꓞꓰꓹ ꓡ= ꓪꓴ-ꓢ ꓟꓬ ꓐꓲꓻ ꓞꓰꓹ ꓗꓪ ꓛꓲꓺ ꓬꓰ ꓠꓬ ꓕꓱ ꓟ ꓠꓽ ꓢˍ ꓡꓳ ꓫꓵꓽ ꓟꓽ ꓥ= ꓖꓳ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓥꓴꓻˍ ꓡꓳ= ꓟꓬ ꓐꓲꓻ ꓞꓰꓹ ꓡꓳ=

ꓢꓲꓺ ꓒ ꓬꓰ-ꓢꓴ ꓟꓬ ꓐꓲꓻ ꓞꓰꓹ ꓟ ꓠꓬ ꓕꓱ ꓡꓱ ꓥ ꓡꓳ= ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓢꓴ ꓮ ꓙꓵꓽ ꓠꓬ ꓪꓴ-ꓢ ꓬꓲ ꓑ ꓫꓬ ꓐꓴ ꓔꓬ ꓟ ꓬꓲ ꓚꓰꓺ ꓐꓯ ꓥ ꓟꓲ ꓖꓳ ꓗꓪ ꓪꓴ-ꓢ ꓬꓲ ꓢꓲꓺ ꓡꓲꓺ ꓟ ꓟꓽ ꓙꓳ= ꓪꓴ-ꓢ ꓢꓲꓺ ꓡꓲꓺ ꓟ ꓟꓽ ꓙꓳ ꓐꓯ ꓟ ꓠꓬ ꓪꓴ-ꓢ ꓬꓲ ꓚꓲ ꓛꓬ ꓙꓱ-ꓣꓴ-ꓢ-ꓡꓱ ꓗꓪ ꓟꓽ ꓔꓬ ꓟ ꓪꓴꓸ ꓠꓬꓲ ꓥ ꓡꓳ= ꓮ ꓡꓰ ꓐꓰ ꓢꓷꓸ ꓓꓹ ꓡ ꓐꓯ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓢꓴ ꓐꓴ ꓟꓽ ꓘꓳ ꓣꓴ ꓟ ꓔꓯ ꓐꓯ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓲꓹ ꓠꓵˍ ꓟ ꓬꓲ ꓤ ꓐꓴꓳ꓾ ꓣꓳ ꓤꓶꓻ ꓠꓯꓸꓼ ꓗꓪ ꓥ ꓟꓲ ꓠꓲꓹ ꓟ ꓠꓯꓸꓼ ꓗꓪ ꓪꓴ-ꓢ ꓔꓯ ꓣꓳ ꓟꓽ ꓘꓳꓹ ꓣꓴ ꓔ ꓠꓬ ꓪꓴ-ꓢ ꓠꓽ ꓣꓳ ꓐꓱ ꓶ ꓟꓽ ꓔꓬ ꓟ ꓥꓳ= ꓣꓳ ꓚꓲ ꓛꓬ ꓕꓲ ꓣꓳ ꓡꓰ ꓕꓲ ꓣꓳ ꓥ ꓟꓲ ꓪꓴ-ꓢ ꓬꓲ ꓢꓲꓽ ꓫꓬ ꓦꓲ꓾ ꓪꓴ-ꓢ ꓬꓲ ꓔꓬ ꓖꓴ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓪꓴ-ꓢ ꓔꓯ ꓣꓳ ꓟꓽ ꓘꓳ ꓣꓴ ꓔ ꓕꓯ ꓠꓽ ꓣꓳ ꓠꓬ ꓐꓬ ꓡꓰ꓾ ꓟꓶꓽ ꓡꓰ꓾ ꓛꓵꓽ ꓡꓰ ꓖꓴˍ ꓥꓳ= ꓣꓳ ꓠꓬ ꓪꓴ-ꓢ ꓗꓪ ꓐꓰ ꓡꓹ ꓟ ꓑꓶꓸ ꓓꓴ ꓣꓳ ꓪꓴ-ꓢ ꓐꓰ ꓟꓽ ꓔꓬ ꓕꓯ ꓠꓽ ꓣꓳ ꓠꓬ ꓮ ꓫꓵꓽ ꓟꓽ ꓥ ꓟ ꓔꓯ ꓢꓷꓸ ꓪ ꓟ ꓥ ꓡꓳ=

ꓮ ꓟꓶ ꓠꓬ ꓣꓳ ꓤꓶꓻ ꓠꓯꓸꓼ ꓗꓪ ꓒꓴ ꓫꓵꓺ ꓧꓪ ꓠꓬꓲ꓾ ꓟꓬꓱ ꓓꓳꓽ ꓪ ꓠꓬꓲˍ ꓟ ꓔꓯ ꓧꓪ ꓠꓬꓲ꓾ ꓟꓲ ꓠꓯ ꓗꓪ ꓓꓳ ꓟꓴ ꓫꓱꓸ ꓖꓶˍ ꓟ ꓔꓯ ꓟꓶ ꓠꓲꓹ ꓫꓵˍ ꓟ꓾ ꓪ ꓔꓲ ꓢꓯꓼ ꓪ ꓙꓳ ꓢꓴ꓾ ꓪ ꓠꓬꓲ ꓢꓴ ꓒꓬꓱꓼ ꓡ ꓠꓹ ꓟ ꓢꓯꓼ ꓕꓵꓼ ꓔꓬ ꓟ ꓥ ꓡꓳ= ꓖꓳ ꓡꓱ ꓐꓯ ꓥ ꓟꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓪꓴ-ꓢ ꓟꓽ ꓔꓬ ꓥꓳ ꓐꓯ ꓠꓬ ꓣꓳ ꓠꓽ ꓬꓲ ꓖꓳꓽ ꓥ ꓡꓳ= ꓠꓬꓲꓸ ꓠꓬꓲ ꓙꓱ-ꓣꓴ-ꓢ-ꓡꓱ ꓡꓰ ꓐꓰ ꓪꓴ-ꓢ ꓠꓬ ꓣꓳ ꓐꓱ ꓶ ꓥꓴꓻ ꓔꓬ ꓡꓳ=

ꓪꓴ-ꓢ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓟꓽ ꓔꓬ ꓠꓬ ꓢ-ꓓꓯꓼ ꓠꓽ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓓꓵꓽ ꓡꓹ ꓥꓳ= ꓢ-ꓓꓯ ꓠꓬ ꓣꓳ ꓚꓳ ꓡꓳ ꓗꓪ ꓔꓬ ꓢꓴ ꓠꓬ ꓮ ꓕꓯ ꓟꓲ ꓣꓳ ꓔꓯ ꓡꓳꓸ ꓠꓬꓲ ꓔꓬ ꓢꓲ꓾ ꓮ ꓡꓰ ꓕꓲ ꓣꓳ ꓔꓯ ꓘꓳꓼ ꓠꓹ ꓟ꓾ ꓚꓵꓹ ꓣꓴ ꓠꓹ ꓟ ꓡꓳꓸ ꓠꓬꓲ ꓔꓬ ꓟ ꓥ ꓡꓳ= ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓡꓰ ꓡꓳꓸ ꓟꓳ ꓢꓲ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓪꓴ-ꓢ ꓔꓯ ꓣꓳ ꓟꓽ ꓘꓳꓹ ꓣꓴ ꓔ ꓠꓬ ꓢ-ꓓꓯ ꓡꓰ ꓤ ꓠꓬꓲ ꓫꓵꓽ ꓠꓬꓲˍ ꓟ ꓟꓶˍ ꓥꓳ=

ꓪꓴ-ꓢ ꓬꓲ ꓢꓲꓺ ꓡꓲꓺ ꓟ ꓠꓱꓸ ꓐꓯ ꓔꓯ ꓟꓽ ꓫꓱꓸ= ꓕꓲ ꓞꓲꓼ ꓕꓲ ꓑ ꓟ ꓥ ꓡꓳ= ꓪꓴ-ꓢ ꓬꓲ ꓢꓲꓺ ꓡꓲꓺ ꓟ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓙꓳˍ ꓠꓬ ꓮ ꓫꓵꓽ ꓔꓳꓹ ꓜꓳꓽ ꓡꓹ ꓥ ꓟꓲ꓾ ꓮ ꓫꓵꓽ ꓣꓳ ꓟꓽ ꓙꓳ ꓥˍ ꓟꓲ ꓪꓴ-ꓢ ꓬꓲ ꓢꓲꓺ ꓡꓲꓺ ꓟ ꓙꓳ ꓠꓹ ꓟ ꓮ ꓓꓲ ꓬꓳꓸ ꓚꓵˍ ꓟ ꓥ ꓡꓳ= ꓣꓳ ꓟꓲ ꓠꓯ ꓗꓪ ꓒꓴ ꓫꓵꓺ ꓮ ꓟꓬꓹ ꓙꓳˍ ꓥ ꓟꓲ꓾ ꓟꓬꓱ ꓓꓳ ꓮ ꓟꓬꓹ ꓙꓳˍ ꓥ ꓟꓲ꓾ ꓟꓶꓽ ꓘꓶ ꓬꓲꓼ ꓔ ꓕꓯꓢꓲꓺ ꓡꓲꓺ ꓡꓲꓺ ꓐꓰ ꓬꓲꓼ ꓔ ꓟꓽ ꓓ ꓠꓬ ꓣꓳ ꓔꓯ ꓒꓴ ꓫꓵꓺ ꓮ ꓡꓰ ꓟꓬ ꓙꓳˍ ꓥ ꓟꓲ ꓬꓲ ꓖꓳꓽ ꓡꓰꓽ ꓥ ꓡꓳ= ꓣꓳ ꓔꓯ ꓫ ꓙꓵ ꓓꓴ ꓡꓰꓽ ꓟꓬꓽ ꓠꓬꓲ ꓖꓶ ꓡꓹ ꓥꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓪꓴ-ꓢ ꓡꓰ ꓟꓲ ꓠꓯ ꓞꓳ ꓤ ꓔꓯ ꓚꓰꓼ ꓔ ꓟ ꓠꓬ ꓗꓹ ꓛꓲꓽ ꓔꓬ ꓠꓹ ꓟ꓾ ꓠꓲꓹ ꓟ ꓢꓲꓺ ꓡꓲ ꓠꓹ ꓟ ꓐꓱ ꓶ ꓥ ꓡꓳ= ꓕꓲ ꓠꓬꓲ ꓗꓪ ꓠꓬ ꓠꓲꓹ ꓢꓲꓺ ꓡꓲꓺ ꓐꓰ ꓔꓬ ꓠꓲꓹ ꓟ ꓑꓶꓸ ꓓꓴ ꓟꓲ ꓠꓯ ꓗꓪ ꓒꓴ ꓫꓵꓺ ꓮ ꓟꓬꓹ ꓧꓪ ꓔꓬ ꓟ ꓥ ꓡꓳ= ꓖꓳ ꓡꓱ ꓥ ꓟꓲ ꓒꓴ ꓫꓵꓺ ꓠꓽ ꓪꓴ-ꓢ ꓖꓶ ꓡꓹ ꓟ ꓢꓲꓺ ꓡꓲꓺ ꓟ ꓔꓯ ꓟꓽ ꓫꓱꓸ ꓠꓬꓲ ꓬꓲ ꓔꓯ ꓕꓲ ꓝꓲꓸ ꓤ ꓡꓰ ꓠꓲꓹ ꓟ ꓢ ꓡꓰ ꓝꓲˍ ꓡꓳ= ꓗꓹ ꓛꓲ ꓓꓴ ꓕꓲ ꓝꓲꓸ ꓤ ꓡꓰꓽ ꓖꓶ ꓢꓲ ꓠꓬꓲ ꓬꓲ ꓔꓯ ꓠꓲꓹ ꓟ ꓫ ꓝꓲˍ ꓟ ꓠꓲꓹ ꓟ ꓟꓽ ꓢꓲꓺ ꓡꓲꓺ ꓟ ꓒꓬꓱꓼ ꓡ ꓝꓲˍ ꓡꓳ= ꓐꓯ ꓠꓲꓹ ꓫꓵˍ ꓟ ꓠꓬ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓣꓳ ꓠꓲꓹ ꓟ ꓔꓯ ꓢꓲꓺ ꓡꓲꓺ ꓟ ꓖꓶꓽ ꓟꓽ ꓐ ꓡ= ꓪꓴ-ꓢ ꓕꓲ ꓣꓳˍ ꓡꓰꓽ ꓣꓳ ꓔꓯ ꓢꓲꓺ ꓡꓲꓺ ꓟ ꓖꓶ ꓐ ꓡꓹ ꓟ ꓥ ꓡꓳ=

ꓣꓳ ꓠꓲꓹ ꓟ ꓠꓯꓸꓼ ꓗꓪ ꓢꓲꓺ ꓡꓲꓺ ꓟ ꓟꓽ ꓙꓳ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓐꓱ ꓶ ꓥꓴˍ ꓥꓳ= ꓣꓳ ꓠꓲꓹ ꓟ ꓠꓯꓸꓼ ꓗꓪ ꓢꓲꓺ ꓡꓲꓺ ꓟ ꓟꓽ ꓙꓳ ꓠꓬ ꓣꓳ ꓠꓲꓹ ꓟ ꓟꓽ ꓫꓵ ꓟ꓾ ꓣꓳ ꓦꓲ ꓘꓴꓽ ꓢꓴ ꓔꓯ ꓠꓲꓹ ꓟ ꓦꓶꓻ ꓡꓹ ꓟ꓾ ꓣꓳ ꓚꓲ ꓛꓬ ꓠꓶꓽ ꓛꓳꓽ ꓔꓯˍ ꓟꓲ ꓖꓼ ꓖꓶ ꓟꓽ ꓐ ꓡ ꓟ꓾ ꓠꓲꓹ ꓟ ꓧ ꓟꓽ ꓐ ꓡ ꓟ꓾ ꓕꓱ ꓡꓱ ꓫꓵꓽ ꓠꓲꓹ ꓟ ꓒꓬꓱꓼ ꓡꓹ ꓥꓳ꓾ ꓐꓯ ꓠꓬ ꓣꓳ ꓠꓽ ꓢ-ꓓꓯ ꓢꓲꓺ ꓤ ꓒꓬꓱꓼ ꓡꓹ ꓥꓳ= ꓢ-ꓓꓯ ꓢꓲꓺ ꓤ ꓒꓬꓱꓼ ꓡ ꓕꓯ ꓣꓳ ꓤꓶꓻ ꓠꓽ ꓐꓬ ꓡꓰ ꓟꓶꓽ ꓡꓰˍ ꓥꓳ= ꓕꓱ ꓟ ꓔꓯ ꓪꓴ-ꓢ ꓡꓰ ꓢꓷˍ ꓟ ꓪꓴꓸ ꓠꓬꓲ ꓠꓴ ꓪ ꓠꓲꓹ ꓟ ꓠꓯꓸꓼ ꓗꓪ ꓢꓲꓺ ꓡꓲꓺ ꓟ ꓙꓳ ꓠꓹ ꓟ ꓥꓪ ꓔꓯ ꓘꓳꓹ ꓣꓴ ꓡꓯ꓾ ꓐꓰ ꓠꓬꓲꓸ ꓠꓬꓲ ꓗꓪ ꓢꓲꓺ ꓒ ꓬꓰ-ꓢꓴ ꓡꓰ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓔꓯ ꓐꓯ ꓔꓬ ꓟ ꓥ ꓡꓳ=