ꓐꓬꓻ ꓔꓬ ꓟ ꓮ ꓔꓳꓸ ꓡꓳꓹ ꓝꓳꓼ (ꓮ ꓔꓳ ꓘꓴ) 

ꓐ-ꓐꓲ-ꓡꓶ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓡꓰ ꓙꓱ-ꓣꓴ-ꓢ-ꓡꓱ ꓔꓯ ꓟꓯꓼ ꓓꓶꓽ ꓡ ꓢꓲ ꓗꓽ ꓚꓳꓸ ꓔ ꓕꓯ ꓬꓲ-ꓢꓷ-ꓡꓰ ꓐꓴ ꓠꓬ ꓬꓲ ꓪ ꓔꓯ ꓧꓪꓸ ꓟꓽ ꓘꓴ ꓠꓬꓲ ꓟꓯꓼ ꓓꓶꓽˍ ꓟ ꓗꓪ ꓐ-ꓐꓲ-ꓡꓶ ꓐꓴ ꓔꓯ ꓫꓴꓻ ꓡꓰꓳ= ꓖꓳ ꓕꓯ ꓐ-ꓐꓲ-ꓡꓶ ꓐꓴ ꓠꓬ ꓬꓲ ꓪ ꓟꓯꓼ ꓜꓴꓻ ꓪꓽ ꓠꓬꓲ ꓡ ꓠꓹ ꓟ ꓐꓰ ꓚꓳꓸ ꓑ ꓬꓰ ꓝꓲ ꓠꓹ ꓟ ꓐꓱ ꓶ ꓛ ꓖꓴ ꓟꓽ ꓙꓳ꓾ ꓒꓬꓱꓽ ꓐꓲꓻ ꓖꓪ ꓜꓳꓽˍ ꓟ ꓐꓰ ꓙꓽ ꓗꓴꓸ ꓠꓲꓹ ꓢꓷꓸ ꓠꓲꓹ ꓙꓳˍ ꓟ꓾ ꓝꓮꓲ ꓢꓯꓼ ꓙꓳ ꓪꓽ ꓠꓬꓲˍ ꓟ ꓬꓲ-ꓢꓷ-ꓡꓰ ꓐꓴ ꓔꓯ ꓢꓲꓺ ꓣꓴ ꓢꓲ ꓡꓳꓽ ꓔꓯꓹ ꓙꓰˍ ꓡꓳ= ꓡꓳꓽ ꓔꓯꓹ ꓙꓰˍ ꓟ ꓘꓴꓽ ꓗꓪ ꓓ-ꓠꓲ-ꓡꓰ꓾ ꓧ-ꓠ-ꓠ-ꓬ꓾ ꓟꓲ-ꓫ-ꓡˍ ꓐꓰ ꓱ-ꓢ-ꓡꓲ-ꓬ ꓐꓴˍ ꓟꓲ ꓐꓹ ꓟ ꓥ ꓢꓲ ꓐ-ꓐꓲ-ꓐꓶ ꓗꓪ ꓛꓲꓺ ꓬꓰˍ ꓕꓯ ꓬꓲ ꓪ ꓡꓲꓸ ꓣꓳ ꓔꓯ ꓐꓯ-ꓕꓷ-ꓫ-ꓜ꓾ ꓫ-ꓓ-ꓘꓷ꓾ ꓟꓲ-ꓢ-ꓘꓷ꓾ ꓮ-ꓐꓷ-ꓠꓲ-ꓖꓳ ꓐꓰ ꓟꓬꓱ ꓖꓶˍ ꓡꓳ=

ꓗꓴꓷꓼ ꓙꓵꓽ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓠꓬ ꓫ-ꓓ-ꓘꓷ꓾ ꓟꓲ-ꓢ-ꓘꓷ꓾ ꓮ-ꓐꓷ-ꓠꓲ-ꓖꓳ ꓐꓴ ꓔꓯ ꓮ ꓘꓶꓸ ꓠꓲꓹ ꓒꓴˍ ꓠꓬꓲ ꓬꓲ ꓙꓵꓽˍ ꓟ ꓗꓴꓷꓼ ꓗꓪ ꓬꓲ ꓪ ꓔꓯ ꓙꓵꓽ ꓪ ꓖꓶꓽ ꓗꓷ ꓢꓲ ꓞꓳ ꓤ ꓮ ꓟꓬꓹ ꓔꓯ ꓙꓵꓽ ꓝꓲˍ ꓡꓳ= ꓬꓲ ꓪ ꓥˍ ꓟꓲ ꓮ ꓘꓶꓸ ꓙꓲꓻˍ ꓟ ꓙꓵꓽ ꓢꓴ ꓡꓰ ꓐꓰ ꓟꓬꓱꓽ ꓢꓯꓼ ꓕꓵꓼ ꓗꓷ ꓢꓲ ꓐ-ꓐꓲ-ꓡꓶ ꓞꓳ ꓫꓵꓽ ꓐꓴˍ ꓟꓲ ꓬꓲ ꓪ ꓔꓯ ꓙꓳꓺ ꓒꓵꓽˍ ꓡꓳ= ꓖꓳ ꓡꓱ ꓥˍ ꓟꓲ ꓕꓲ ꓐꓱ ꓠꓽ ꓬꓲ ꓪ ꓔꓯ ꓟꓽ ꓠꓲꓹ ꓒꓴ=

ꓓ-ꓠꓲ-ꓡꓰ꓾ ꓧ-ꓠ-ꓠ-ꓬ꓾ ꓟꓲ-ꓫ-ꓡˍ ꓐꓰ ꓱ-ꓢ-ꓡꓲ-ꓬ ꓐꓴ ꓠꓬ ꓠꓱꓸ ꓐꓯꓼ ꓗꓴꓷꓼ ꓗꓪ ꓔꓬ ꓢꓲ ꓪ ꓔꓲ ꓔꓯ ꓣꓱꓽ ꓙ꓾ ꓬꓲ ꓪ ꓥꓳꓽ ꓫꓸ ꓕꓱ ꓬꓰ ꓔꓬ ꓥ ꓟꓲ ꓔꓱꓹ ꓚꓵˍ ꓟ ꓕꓲ ꓟˍ ꓟ ꓪꓴ-ꓢ ꓔꓯ ꓡꓰꓽ ꓦ ꓡꓱ ꓔꓬ ꓡꓳ= ꓬꓲ ꓪ ꓐꓴ ꓙꓵꓽ ꓪ ꓬꓲꓸ ꓐꓷꓹ ꓬꓲꓸ ꓐꓷꓹ ꓟꓬꓽ ꓡ ꓔꓬ ꓕꓯ ꓐ-ꓐꓲ-ꓡꓶꓽ ꓗꓪ ꓫꓴ ꓙꓵꓽ ꓒ ꓕꓲ ꓐꓱ ꓠꓬ ꓬꓲ ꓪ ꓔꓯ ꓟꓬ ꓔꓳꓹ ꓡˍ ꓡꓳ=

ꓕꓲ ꓠꓬꓲ ꓙꓳˍ ꓕꓯ ꓬꓲ ꓪ ꓐꓴ ꓔꓯ ꓟꓬ ꓔꓳꓹ ꓟ ꓫꓴ ꓙꓵꓽ ꓒ ꓐꓴ ꓡꓰ ꓪ ꓔꓲ ꓔꓯ ꓛꓳꓼ ꓞꓲ ꓛꓬꓹ ꓟꓴ ꓢꓲ ꓫꓵꓺ ꓡꓰ ꓑꓲꓸ ꓔ ꓟ ꓞꓳ ꓐꓬꓱꓽ ꓕꓲ ꓟ ꓑꓵꓺ ꓠꓹ ꓟ ꓕꓵꓼ ꓪ ꓖꓶˍ ꓡꓳ= ꓝꓮꓲ ꓕꓱ ꓟ ꓔꓯ ꓟꓳ ꓢꓴ ꓮ ꓙꓵꓽ ꓟꓳꓼ ꓡꓰ ꓢꓲ ꓪꓴꓸ ꓓꓵ ꓕꓱꓼ ꓝꓲˍ ꓡꓳ= ꓫ-ꓓ-ꓘꓷ꓾ ꓟꓲ-ꓢ-ꓘꓷ꓾ ꓮ-ꓐꓷ-ꓠꓲ-ꓖꓳ ꓐꓴ ꓠꓬ ꓫꓵꓺ ꓞꓳ ꓐꓬꓱꓽ ꓔꓯ ꓮ ꓕꓯˍ ꓟꓲ ꓪꓴꓸ ꓓꓵ ꓟꓽ ꓕꓱꓼ ꓟ ꓢꓷꓸˍ ꓠꓬꓲ ꓛꓬ ꓒꓵꓽ ꓓꓰꓺ ꓠꓹ ꓟ ꓕꓱ ꓡꓱ ꓕꓵꓼ ꓪ ꓖꓶˍ ꓟ ꓥ ꓡꓳ=

ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓠꓬ ꓞꓳ ꓫꓵꓽ ꓮ ꓙꓵꓽ ꓔꓯ ꓡ ꓢꓲ ꓫꓵꓺ ꓞꓳ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓠꓹ ꓟ ꓕꓵꓼ ꓪ ꓖꓶˍ ꓡꓳ= ꓕꓵꓼ ꓪ ꓐꓯ ꓑꓶ ꓒ ꓡꓰ ꓢꓯꓼ ꓓ ꓟ ꓡꓰ ꓘꓴ ꓢꓲ ꓑ ꓫꓬ ꓐꓴ ꓔꓯ ꓐꓯ ꓖꓶˍ ꓡꓳ= ꓐꓽ ꓡ꓾ ꓙꓵꓽ ꓡꓵꓽ꓾ ꓛꓲ ꓐꓶ ꓐꓰ ꓠ ꓢ ꓓꓴ ꓢꓯꓼ ꓬꓲ ꓫꓵꓽ ꓬꓲ ꓙꓰꓽ ꓑ ꓙˍ ꓕꓯ ꓠꓴ ꓪ ꓠꓬ ꓟꓳꓼ ꓡꓰ ꓢꓲ ꓞꓳ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓠ ꓗꓹ ꓡꓳ= ꓖꓳ ꓡꓱ ꓟꓽ ꓥ ꓠꓬ ꓠꓴ ꓪ ꓔꓯ ꓮ ꓔꓳꓸ ꓡꓳꓹ ꓝꓳꓼ(ꓮ ꓔꓳꓸ ꓘꓴ) ꓗꓪ ꓡꓳ ꓧꓳꓽ ꓗꓷˍ ꓥꓳ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓠ ꓢ ꓓꓴ ꓢꓯꓼ ꓐꓵ ꓡꓹ ꓕꓯ ꓞꓳ ꓤ ꓮ ꓙꓵꓽ ꓠꓬ ꓟꓳꓼ ꓡꓰ ꓢꓲ ꓞꓳ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼˍ ꓡꓳ= ꓖꓳ ꓡꓱ ꓥˍ ꓟꓲ ꓫ-ꓓ-ꓘꓷ꓾ ꓟꓲ-ꓢ-ꓘꓷ꓾ ꓮ-ꓐꓷ-ꓠꓲ-ꓖꓳ ꓬꓲ ꓪ ꓢ ꓣꓳ ꓠꓬ ꓪꓴꓸ ꓓꓵ ꓟꓽ ꓕꓱꓼ= ꓬꓲ ꓪ ꓠꓬ ꓪꓴꓸ ꓓꓵ ꓕꓱꓼ ꓔꓬ ꓟ ꓑ ꓫꓬ ꓐꓴ ꓗꓳ ꓡꓳ ꓗꓪ ꓦꓰꓼ ꓞꓹ ꓔꓬ ꓡꓳ=

ꓮ ꓟꓶ ꓠꓬ ꓫ-ꓓ-ꓘꓷ꓾ ꓟꓲ-ꓢ-ꓘꓷ꓾ ꓮ-ꓐꓷ-ꓠꓲ-ꓖꓳ ꓬꓲ ꓪ ꓔꓯ ꓟꓬ ꓔꓳꓹ ꓟ ꓫꓴ ꓙꓵꓽ ꓒ ꓐꓴ ꓠꓬ ꓪ ꓔꓲ ꓔꓬ ꓗꓪ ꓙꓰ ꓢꓲ ꓾ ꓪ ꓔꓲꓸꓳ꓾ ꓠꓴ ꓗꓴꓷꓼ ꓗꓪ ꓙꓵꓽ ꓠꓹ ꓟ ꓠꓴ ꓡꓰ ꓢꓲꓺ ꓔ ꓟ ꓕꓱ ꓬꓴ-ꓔ ꓡ ꓞꓳ ꓐꓴ ꓔꓯ ꓔꓱꓹ ꓠꓬꓲ= ꓬꓲ ꓪ ꓠꓬ ꓠꓴ ꓔꓯ ꓟꓽ ꓠ ꓠꓹ꓾ ꓫꓵꓺ ꓐꓬꓱꓽ ꓔꓯ ꓪꓴꓸ ꓓꓵ ꓟꓽ ꓕꓱꓼ꓾ ꓐꓰ ꓐꓯ ꓖꓶˍ ꓡꓳ= ꓖꓳ ꓕꓯ ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓡꓰ ꓠꓲꓹ ꓟ ꓦꓶ ꓔꓴ ꓡꓹ ꓡꓳ= ꓬꓲ ꓪ ꓢ ꓣꓳ ꓠꓬ ꓪ ꓔꓲ ꓔꓯ꓾ ꓪ ꓔꓲꓳ꓾ ꓠꓴ ꓡꓰ ꓥꓪ ꓠꓴ ꓔꓯ ꓮ ꓔꓳꓸ ꓡꓳꓹ ꓝꓳꓼ(ꓮ ꓔꓳꓸ ꓘꓴ) ꓗꓪ ꓡꓳ ꓧꓳꓽ ꓗꓷˍ ꓟꓲ ꓪꓴ-ꓢ ꓠꓬ ꓥꓪ ꓠꓴ ꓔꓯ ꓚꓬꓴꓸ ꓙˍ ꓥꓳ= ꓪꓴ-ꓢ ꓡꓰ ꓟꓽ ꓚꓬꓴꓸ ꓙ ꓡ ꓐꓯˍ ꓥ ꓟꓲ ꓥꓪ ꓠꓴ ꓠꓬ ꓠꓴ ꓡꓰ ꓫꓬꓹ ꓔ ꓟ ꓞꓳ ꓐꓬꓱꓽ ꓔꓯ ꓠꓽ ꓦ ꓡꓱ ꓟꓽ ꓐ ꓡ꓾ ꓐꓰ ꓒꓳꓹ ꓖꓶˍ ꓡꓳ=

ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓠꓬ ꓠꓲꓹ ꓟ ꓦꓶ ꓔꓴ ꓡ ꓢꓲ ꓡꓳꓹ ꓝꓳꓼ(ꓮ ꓔꓳꓸ ꓘꓴ) ꓗꓪ ꓟ ꓮ ꓔꓳꓸ ꓔꓯ ꓧꓶꓸ ꓕꓯ ꓟ ꓕꓯꓽ ꓢꓲ ꓫꓵꓽ ꓝꓸ ꓞ ꓡ ꓝꓲ ꓢꓲ꓾ ꓬꓲ ꓪ ꓢ ꓣꓳ ꓔꓯ ꓞꓳꓹ ꓢꓲ ꓮ ꓔꓳꓸ ꓗꓪ ꓡꓳ ꓧꓳꓽ ꓗꓷˍ ꓡꓳ= ꓬꓲ ꓪ ꓡꓳ ꓔꓬ ꓕꓯ ꓮ ꓔꓳꓸ ꓗꓪ ꓡꓳ ꓧꓳꓽ ꓗꓷ ꓟꓶ ꓢꓴ ꓠꓬ ꓟꓽ ꓞ ꓟ ꓡꓰ ꓫꓱꓽ ꓗꓳꓸ ꓙꓰ ꓔꓬ ꓟ ꓔꓯ ꓟꓳˍ ꓡꓳ=

ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓠꓬ ꓮ ꓘꓶꓸ ꓓꓵꓽ ꓙ ꓟꓶ ꓡꓰ ꓢꓲ꓾ ꓣꓳ ꓮ ꓔꓳꓸ ꓗꓪ ꓡꓳ ꓧꓳꓽ ꓗꓷ ꓟ ꓠꓬ ꓢ ꓣꓳˍ ꓡꓰꓽ ꓟ ꓥ ꓡ= ꓖꓳ ꓡꓱ ꓥˍ ꓟꓲ ꓡ ꓞꓳ ꓡꓲꓸ ꓣꓳ ꓠꓬ ꓬꓲ ꓪ ꓔꓯ ꓟꓽ ꓞ ꓟˍ ꓡꓰ ꓐꓰ ꓫꓱꓽ ꓗꓳꓸ ꓔꓬ ꓬꓲ ꓬꓲ ꓪ ꓗꓪ ꓟ ꓡꓲꓸ ꓣꓳ ꓕꓲ ꓣꓳ ꓠꓬ ꓢꓲꓺ ꓬꓲ ꓤ ꓡꓰ ꓐꓰ ꓗꓹ ꓡꓳ꓾ ꓐꓰ ꓐꓯˍ ꓡꓳ= ꓮ ꓔꓳꓸ ꓘꓴꓽ ꓗꓪ ꓟꓲ ꓠꓯ ꓞꓳ ꓤ ꓟꓽ ꓥ ꓟ ꓡꓲꓸ ꓣꓳ ꓕꓲ ꓣꓳ ꓔꓬ ꓟ ꓠꓬ ꓚꓵꓺ ꓚꓵꓺ ꓥ ꓡꓳ= ꓪꓴ-ꓢ ꓠꓬ ꓫ-ꓓ-ꓘꓷ꓾ ꓟꓲ-ꓢ-ꓘꓷ꓾ ꓮ-ꓐꓷ-ꓠꓲ-ꓖꓳ ꓔꓯ ꓚꓬꓴꓸ ꓙ ꓗꓷꓳ=

ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓠꓬ ꓮ ꓔꓳꓸ ꓡꓳꓹ ꓝꓳꓼ ꓒ ꓕꓲ ꓗꓪ ꓡ ꓢꓲ꓾ ꓟꓴ ꓡꓳꓹ ꓬꓰ ꓟ ꓪꓴ-ꓢ ꓬꓲ ꓚꓳ ꓑꓸ ꓫ-ꓓ-ꓘꓷ꓾ ꓟꓲ-ꓢ-ꓘꓷ꓾ ꓮ-ꓐꓷ-ꓠꓲ-ꓖꓳꓺꓳ꓾ ꓓꓳ ꓡꓯ꓾ ꓐꓰ ꓘꓴˍ ꓡꓳ= ꓬꓲ ꓪ ꓐꓴ ꓠꓬ ꓮ ꓔꓳꓸ ꓗꓪ ꓐꓰ ꓓꓳ ꓡ ꓕꓯ ꓬꓲ ꓪ ꓔꓯ ꓮ ꓔꓳꓸ ꓛꓴ ꓬꓯꓼ ꓗꓷ ꓟ ꓬꓲ ꓠꓻ ꓓꓴ ꓟꓽ ꓙꓳ ꓟ ꓐꓰ ꓪꓴꓸ ꓞꓱ ꓕꓲꓽ ꓚˍ ꓟꓲ ꓟꓽ ꓔꓵꓹ ꓡꓰ ꓟ ꓔꓯ ꓡꓳꓸ ꓟꓳˍ ꓡꓳ=

ꓪ ꓔꓲ ꓠꓱ-ꓐꓴ-ꓘꓹ-ꓠꓱ-ꓤ ꓠꓬ ꓒꓳꓹ ꓡꓶꓸ ꓗꓷ ꓢꓲ ꓕꓵꓼ ꓪ ꓬꓲ ꓫꓵꓼ ꓕꓲ ꓟ ꓖꓶˍ ꓡꓳ= ꓫ-ꓓ-ꓘꓷ꓾ ꓟꓲ-ꓢ-ꓘꓷ꓾ ꓮ-ꓐꓷ-ꓠꓲ-ꓖꓳ ꓬꓲ ꓪ ꓪꓴ-ꓢ ꓔꓯ ꓔꓳꓹ ꓢꓴ ꓮ ꓙꓵꓽ ꓠꓬ ꓛꓬ ꓒꓵꓽ ꓟꓶˍ ꓥꓳ= ꓪꓴ-ꓢ ꓡꓰ ꓐꓰ ꓞꓳ ꓤ ꓐꓴ ꓔꓯ ꓚꓬꓴꓸ ꓙ ꓐ ꓡˍ ꓟ ꓠꓱꓸ ꓐꓯ ꓢꓲꓺ ꓟꓽ ꓙꓳ꓾ ꓐꓰ ꓐꓯ ꓡꓳ= ꓝꓮꓲ ꓬꓲ ꓡꓰ ꓬꓲ ꓪ ꓐꓴ ꓔꓯ ꓐ-ꓐꓲ-ꓡꓶ ꓫꓴ ꓗꓪ ꓪ ꓜꓲ ꓪꓴꓽˍ ꓟ ꓙꓵꓽ ꓪ ꓖꓶ ꓗꓷꓳ=