ꓢꓲꓽ ꓫꓬ ꓕꓳꓽ ꓶ ꓚꓱꓹ - ꓘꓶꓽ ꓫꓵꓽ ꓫꓵꓼ (The Bible)

ꓢꓲꓽ ꓫꓬꓹ ꓕꓳ ꓶ ꓕꓲ ꓖ ꓕꓲ ꓔꓳꓸ ꓗꓪ ꓠꓬ ꓪꓴ-ꓢ ꓠꓬ ꓬꓲ ꓡ ꓞꓳ ꓐꓴ ꓔꓯ ꓙꓳꓺ ꓓꓴ ꓫ ꓓꓴ ꓬꓲ ꓘꓶꓽ ꓗꓪ ꓐꓰ ꓚꓬꓴꓸ ꓙˍ ꓟ ꓪꓽ ꓠꓬꓲ ꓢꓴ ꓙꓲˍ ꓟ ꓪ ꓔꓲ ꓕꓲ ꓣꓳ ꓥ ꓟ ꓣꓳ ꓐꓴ ꓔꓯ ꓬꓲꓼ ꓠꓬꓲꓸ ꓖꓶ ꓔ ꓡꓳ= ꓝꓮꓲ ꓕꓲ ꓚꓱꓹ ꓗꓪ ꓠꓬ ꓪꓴ-ꓢ ꓠꓬ ꓬꓲ ꓤ ꓬꓲ ꓠꓱ ꓐꓴ ꓔꓯ ꓡꓳꓸ ꓙˍ ꓟ ꓙꓲˍ ꓟ ꓐꓹ ꓐ ꓕꓲ ꓣꓳ ꓥ ꓟ ꓣꓳ ꓔꓯ ꓬꓲꓼ ꓠꓬꓲꓸ ꓖꓶ ꓔ ꓡꓳ= ꓙꓲˍ ꓟ ꓮ ꓣꓳ ꓡꓳꓸ ꓒ ꓕꓲ ꓣꓳ ꓡꓰ ꓐꓰ ꓬꓲ ꓮ ꓣꓳ ꓜꓴ ꓔꓯ ꓡꓳꓸˍ ꓡꓳ= ꓕꓱ ꓟ ꓮ ꓙꓵꓽ ꓠꓬ ꓘꓶꓽ ꓫꓵꓽ ꓡꓵꓺ ꓗꓪ ꓓˍ ꓟ ꓥ ꓡꓳ= ꓝꓮꓲ ꓕꓲ ꓕꓱ ꓥ ꓟ ꓘꓶꓽ ꓫꓵꓽ ꓫꓵꓼ ꓠꓬ ꓬꓰ-ꓢꓴ ꓙꓲ-ꓢꓴ ꓬꓲ ꓟꓸ ꓟꓲꓽ ꓾ ꓚꓺ ꓟꓲꓽ ꓐꓰ ꓪꓴꓸ ꓔꓴ ꓔ ꓟ ꓥ ꓡꓳ=

ꓬꓰ-ꓢꓴ ꓠꓬ ꓪꓴ-ꓢ ꓬꓲ ꓤ ꓔꓲ ꓥ ꓢꓲ ꓠꓬꓲ ꓪꓴ-ꓢ ꓬꓲ ꓙꓵꓽ ꓗ ꓐꓴ ꓔꓯ ꓟꓽ ꓡꓳꓺ ꓔ ꓔ ꓐꓲ ꓜꓲꓼˍ ꓟ ꓤꓶꓻ ꓗꓪ ꓛꓳ ꓫꓱꓽ ꓗꓷꓳ= ꓬꓲ ꓠꓬ ꓟꓲ ꓠꓯ ꓞꓳ ꓤ ꓐꓴ ꓔꓯ ꓪꓴ-ꓢ ꓟꓸ ꓟꓲꓽ ꓟꓸ ꓖꓶ ꓗꓷ ꓢꓲ ꓫ ꓢꓴ ꓐꓴ꓾ ꓠꓻ ꓢꓴ ꓒꓬꓽ ꓢꓴ ꓐꓴ ꓔꓯ ꓠꓻ ꓫꓬꓹ ꓖꓶ ꓢꓲ ꓠꓬꓲ ꓞꓳ ꓤ ꓐꓴ ꓔꓯ ꓬꓲ ꓡꓰ ꓐꓰ ꓬꓰ ꓠꓹ ꓟ ꓟꓸ ꓖꓶ ꓗꓷꓳ= ꓖꓳ ꓗ ꓠꓯꓸ ꓟꓲ ꓠꓯ ꓞꓳ ꓤ ꓐꓴ ꓥꓳꓽ ꓡꓰ ꓟ ꓚꓱꓹ ꓔꓯ ꓢꓲꓺ ꓗꓷ ꓟ ꓪꓴꓸ ꓠꓬꓲ ꓬꓰ-ꓢꓴ ꓠꓬ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓗꓷꓳ= ꓕꓱ ꓟ ꓠꓬ ꓮ ꓘꓶꓸ ꓐꓰ ꓓꓵꓼ ꓙ ꓟꓶ ꓓꓴ ꓥꓳ=

ꓞꓳ ꓤ ꓐꓴ ꓡꓰ ꓬꓰ-ꓢꓴ ꓚꓺ ꓟꓲꓽ ꓔꓯ ꓐꓳ ꓔ ꓟ ꓠꓬ ꓮ ꓟꓬꓹ ꓓꓵꓽ ꓙ ꓟꓶ ꓓꓴ ꓥꓳ= ꓬꓰ-ꓢꓴ ꓔꓯ ꓛꓳꓻ ꓢꓴ ꓟꓬꓽ ꓡ ꓟ ꓡꓰ ꓐꓰ ꓓꓵꓽ ꓙ ꓟꓶ ꓓꓴ ꓥˍ ꓟꓲ ꓮ ꓟꓬꓹ ꓫꓵꓽ ꓓꓳ ꓡˍ ꓡꓳ= Pentecost ꓥꓪ-ꓞꓲ-ꓠꓬꓲ ꓑꓮꓲꓽ ꓗꓪ ꓢꓲ-ꓫꓬ-ꓟ-ꓦ ꓠꓬ ꓟꓲꓽ ꓦꓲ ꓡꓰ ꓐꓰ ꓬꓯꓼ ꓡ ꓟ꓾ ꓬꓰ-ꓢꓴ ꓔꓯ ꓛꓳꓻ ꓢꓴ ꓠꓬ ꓬꓰ-ꓢꓴ ꓡꓰ ꓐꓰ ꓓꓵꓽ ꓙ ꓟꓶ ꓓꓴ ꓟꓬꓱꓽ ꓬꓰ ꓔꓴ ꓡˍ ꓟ꓾ ꓬꓰ-ꓢꓴ ꓬꓲ ꓛꓳꓽ ꓒꓯꓹ ꓕꓲ ꓣꓳ ꓥ ꓟ ꓬꓳ-ꓦ ꓠꓬ ꓟꓲ ꓠꓯ ꓔꓯ ꓙꓵꓽ ꓠꓹ ꓟ ꓬꓰ-ꓢꓴ ꓝꓮꓲ ꓕꓲ ꓧꓪꓹ ꓛꓲꓺ ꓡ ꓟ ꓔꓯ ꓬꓲꓼ ꓟꓬ ꓘꓳꓹ ꓟ꓾ ꓕꓱ ꓟꓬ ꓙꓰꓽ ꓟ ꓡꓰ ꓐꓰ ꓓꓵꓽ ꓙ ꓟꓶ ꓓꓴ ꓮ ꓟꓬꓹ ꓓꓳꓻ ꓡˍ ꓡꓳ=

ꓢꓲꓺ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓗꓷ ꓢꓲ ꓟꓴꓽ ꓗꓪ ꓗꓪ ꓓꓯ ꓙꓰ ꓗꓸ ꓠꓯ ꓬꓲ ꓔꓯ ꓛꓳ ꓢꓴ ꓐꓴ ꓠꓬ ꓪꓴ-ꓢ ꓙꓵꓽ ꓗ꓾ ꓬꓲ-ꓢꓷ-ꓡꓰ ꓡ ꓞꓳ ꓚꓺ ꓟꓲꓽ꓾ ꓬꓰ-ꓢꓴ ꓙꓲ-ꓢꓴ ꓚꓱꓹ ꓾ ꓐꓰ ꓧꓶꓸ ꓕꓯ ꓟ ꓘꓴ ꓜꓲꓼ ꓞꓳ ꓟꓸ ꓟꓲꓽ ꓐꓴ꓾ ꓕꓱ ꓟ ꓮ ꓙꓵꓽ ꓔꓯ ꓕꓳ ꓶꓽ ꓕꓲ ꓑꓷꓠꓽ ꓗꓪ ꓡꓰꓽ ꓐꓳ ꓝꓲ ꓔ ꓠꓲꓹ ꓫꓵˍ ꓡꓳ= ꓮ ꓟꓶ ꓟ ꓡꓰ ꓮ ꓡꓰ ꓕꓲ ꓕꓱ ꓟ ꓔꓯ ꓠꓬ ꓮ ꓡꓰ ꓗꓪ ꓧꓳꓽ ꓗꓷ ꓡꓯ ꓐꓯ ꓢꓲ ꓖꓪ ꓙꓱꓻ ꓡꓯ ꓘꓳ ꓓꓴ ꓟꓽ ꓬꓰ ꓗꓷ ꓢꓰꓽ ꓕꓯ ꓬꓲ ꓪ ꓮ ꓡꓰ ꓐ ꓡ ꓮ ꓡꓰ ꓐꓳ ꓝꓲ ꓗꓷ ꓟ ꓥꓳ= ꓡꓳꓹ ꓬꓰ ꓗꓪ ꓠꓬ ꓢꓲꓽ ꓫꓬ ꓕꓳꓽ ꓶ ꓐꓯ ꓟ ꓕꓳ ꓶ ꓑꓷꓠꓽ ꓒꓬꓱꓼ ꓡ ꓗꓷꓳ=

ꓮ ꓠꓱ ꓕꓯ ꓒꓬꓱꓼ ꓗꓷ ꓟ ꓠꓬ ꓮ ꓟꓶ ꓗꓪ ꓛꓲꓺ ꓜꓳꓽ ꓔꓬ ꓟ ꓒꓬꓱꓼ ꓔꓬ ꓟ ꓪꓴꓸ ꓠꓬꓲ ꓠꓬꓲꓸ ꓠꓬꓲ ꓦꓬꓼ ꓠꓬꓲ ꓗꓪ ꓠꓬ ꓕꓲ ꓟꓲ ꓠꓯ ꓡꓱꓸꓼ ꓗꓪ ꓔꓬ ꓟ ꓞꓳ ꓤ ꓐꓴ ꓠꓬ ꓢꓲꓽ ꓫꓬ ꓕꓳꓽ ꓶ ꓔꓯ ꓵꓻ ꓔꓬ ꓟ ꓥ ꓡꓳ= ꓪꓴ-ꓢ ꓠꓬ ꓣꓳ ꓐꓰ ꓕꓲ ꓪꓽ ꓔꓬ ꓢꓰꓽ ꓡꓳ= ꓪꓴ-ꓢ ꓠꓬ ꓣꓳ ꓔꓯ ꓫ ꓕꓱ ꓔꓬ ꓢꓰꓽ ꓡꓳ꓾ ꓬꓲ ꓡꓰ ꓣꓳ ꓔꓯ ꓝꓴꓲꓸ ꓖꓼ ꓖꓶ ꓗꓷ ꓢꓲ ꓣꓳ ꓔꓯ ꓠꓲꓹ ꓠꓵ ꓔꓬ ꓡꓳ꓾ ꓬꓲ ꓠꓬ ꓮ ꓕꓯ ꓟꓲ ꓔꓱꓹ ꓚꓵˍ ꓟ ꓙꓲˍ ꓟ ꓥ ꓡꓳ= ꓝꓮꓲ ꓠꓬ ꓢꓲꓽ ꓫꓬ ꓕꓳꓽ ꓶ ꓔꓯ ꓣꓳ ꓐꓴ ꓵˍ ꓕꓯ ꓪꓴ-ꓢ ꓠꓬ ꓮ ꓟ ꓥ ꓟ ꓐꓰ ꓪꓴ-ꓢ ꓮ ꓡꓰ ꓐꓰ ꓗꓹ ꓟ ꓣꓳ ꓢꓷꓸ ꓪ ꓓꓹ ꓢꓰꓽ ꓡꓳ=

ꓢꓲꓽ ꓫꓬ ꓕꓳꓽ ꓶ ꓗꓪ ꓐꓯ ꓔ ꓟ ꓠꓬ “ꓢꓲꓽ ꓫꓬ ꓕꓳꓽ ꓶ ꓮ ꓙꓵꓽ ꓠꓬ ꓪꓴ-ꓢ ꓡꓰ ꓢꓯꓼ ꓧꓳꓽ ꓔ ꓟ ꓥ ꓢꓲ꓾ ꓟꓸ ꓟꓲ ꓟꓸ ꓖꓶˍ ꓟ ꓐꓱ ꓶˍ ꓐꓰ꓾ ꓛꓬˍ ꓟ ꓥꓳꓽˍ ꓟ ꓔꓯ ꓖꓴ ꓟꓸ ꓖꓶˍ ꓟ ꓐꓱ ꓶˍ ꓐꓰ꓾ ꓔꓱꓹ ꓡꓰ ꓝꓲˍ ꓟ ꓐꓱ ꓶˍ ꓐꓰ꓾ ꓙꓲ ꓫꓬˍ ꓟ ꓗꓪ ꓤꓹ ꓓꓰꓼ ꓡꓰ ꓝꓲ ꓠꓹ ꓟ ꓙꓲˍ ꓖꓴ ꓙꓳˍ ꓟ ꓥ ꓡꓳ꓾” ꓐꓰ ꓐꓯ ꓔ ꓡꓳ= (2 ꓕꓲ-ꓟꓳ-ꓕꓲ-ꓪꓴ 3ꓽ16)

ꓧꓷꓹ ꓚ ꓢꓲ ꓐꓯ ꓪˍ ꓠꓬ ꓢꓲꓽ ꓫꓬ ꓕꓳ ꓶ ꓠꓬ ꓪꓴ-ꓢ ꓚꓱꓹ ꓔꓯ ꓐꓳ ꓔ ꓟ ꓟꓸ ꓖꓶ ꓔ ꓟ ꓕꓳꓽ ꓶ ꓕꓲ ꓑꓷꓠꓽ ꓥ ꓡꓳ= ꓘꓶꓽ ꓫꓵꓽ ꓡꓵꓺ ꓠꓬ ꓬꓲ-ꓢꓷ-ꓡꓱ ꓞꓳ ꓫꓵꓽ ꓐꓴ ꓚꓱꓹ ꓥ ꓢꓲ ꓠꓬꓲ ꓘꓶꓽ ꓫꓵꓽ ꓫꓵꓼ ꓠꓬ ꓬꓰ-ꓢꓴ ꓙꓲ-ꓢꓴ ꓐꓰ ꓬꓲ ꓔꓯ ꓛꓳꓻ ꓢꓴ ꓐꓴ ꓚꓱꓹ ꓥ ꓡꓳ= ꓠꓬꓲꓸ ꓠꓬꓲ ꓣꓳ ꓐꓴ ꓠꓬ ꓪꓴ-ꓢ ꓚꓱꓹ ꓔꓯ ꓢꓳ ꓣꓴ ꓐ ꓡˍ ꓢꓰꓽ ꓡꓳ=

ꓕꓱ ꓟ ꓠꓬ ꓢꓲꓽ ꓫꓬ ꓕꓳ ꓶ ꓚꓱꓹ ꓥ ꓡꓳ=