ꓟꓬ ꓔꓶ ꓔꓯ ꓟꓬ ꓔꓶ ꓔꓯ ꓧꓳꓽˍ ꓟ (H0mily)

ꓘꓴ ꓜꓲꓼ ꓞꓳ ꓟꓶꓽ ꓘꓳꓼ 8 ꓠꓽ

ꓢꓰ-ꓣ 27ꓽ 4-7

ꓜ ꓔꓯ ꓪꓺ ꓚꓰ ꓗꓪ ꓥꓳꓽ ꓠꓬꓲˍ ꓕꓯ꓾ ꓜ ꓒꓲꓻ ꓠꓬ ꓕꓯꓽ ꓢꓲ ꓗꓪ ꓓꓳ ꓡˍ ꓥꓳ= ꓛꓳꓽ ꓒꓯꓹ ꓐꓰ ꓫꓸ ꓕꓱ ꓡꓯ ꓘꓳ ꓘꓷ ꓠꓬ ꓡꓽ ꓞꓳ ꓖꓳ ꓕꓲꓽ ꓣꓳ ꓬꓲ ꓫꓱꓹ ꓞꓼ ꓐꓰ ꓡꓳꓸ ꓟꓳ ꓐ ꓡˍ ꓥꓳ=

ꓬꓲꓻ ꓪꓴꓻ ꓐꓲꓹ ꓫꓬꓹ ꓒꓽ ꓠꓬ꓾ ꓙꓲ ꓟꓽ ꓙꓲ ꓢꓲꓺ ꓠꓹ ꓟ ꓮꓸ ꓔꓳꓸ ꓗꓪ ꓛꓴ ꓤꓹ ꓠꓬꓲꓹ ꓟ ꓡꓰ ꓐꓰ꓾ ꓡꓽ ꓞꓳ ꓕꓲꓽ ꓣꓳ ꓬꓲ ꓫꓱꓹ ꓮ ꓡꓰ ꓥˍ ꓟ ꓫ ꓕꓱ ꓡꓯꓽ ꓘꓳˍ ꓟ ꓗꓪ ꓐꓰ ꓚꓬꓹ ꓪ ꓓˍ ꓡꓳ=

ꓐꓱ ꓘꓴꓽ ꓠꓯꓸꓼ ꓗꓪ ꓔꓶ ꓔ ꓟ ꓢꓶꓹ ꓢꓶꓽ ꓜꓲ ꓔꓯ ꓡꓳꓸ ꓠꓬꓲ ꓕꓯ꓾ ꓐꓱ ꓘꓴꓽ ꓖꓳ ꓟ ꓙꓲ ꓟꓽ ꓙꓲ ꓬꓲ ꓢꓶꓽ ꓓꓱꓼˍ ꓟ ꓢꓶꓹ ꓢꓶꓽ ꓔꓯ ꓟꓳˍ ꓕꓯ꓾ ꓚꓬꓹ ꓪ ꓓˍ ꓟ ꓡꓰ ꓐꓰ꓾ ꓡꓽ ꓞꓳ ꓕꓲꓽ ꓣꓳ ꓬꓲ ꓫꓸ ꓕꓱ ꓓꓳ ꓡꓹ ꓟ ꓗꓪ ꓐꓰ꓾ ꓬꓲ ꓠꓲꓹ ꓟ ꓠꓯꓸꓼ ꓗꓪ ꓮ ꓡꓲ ꓓꓵ ꓙ ꓔꓬˍ ꓟ ꓡꓳꓸ ꓓꓳ ꓡˍ ꓡꓳ= ꓡꓽ ꓞꓳ ꓕꓲꓽ ꓣꓳ ꓔꓯ ꓟꓬꓱꓺ ꓓꓳꓽ ꓖꓶ ꓠꓲꓹ ꓫꓵˍ ꓠꓬ꓾ ꓬꓲ ꓟꓽ ꓫ ꓕꓱ ꓡ ꓕꓯ ꓟꓬꓱꓺ ꓓꓳꓽ ꓕꓽ ꓖꓶ= ꓮ ꓡꓲꓳ ꓐꓯ ꓠꓬ ꓬꓲ ꓫꓸ ꓕꓱ ꓡꓹ ꓟ ꓗꓪ ꓬꓲ ꓫꓱꓹ ꓔꓯ ꓢꓷꓸ ꓪ ꓡˍ ꓡꓳ=

ꓘꓳ-ꓡꓱ-ꓕꓴ 15ꓽ 54-58

ꓖꓳ ꓡꓱ ꓠꓬ ꓛꓵꓽ ꓡꓰ ꓓꓻˍ ꓟ ꓕꓱ ꓟ ꓠꓬ꓾ ꓛꓵꓽ ꓡꓰ ꓟꓽ ꓓ ꓟ ꓖꓪꓽ ꓗꓷ ꓢꓲ꓾ ꓫꓵꓻ ꓗꓴˍ ꓟ ꓕꓱ ꓟ ꓠꓬ ꓫꓵꓻ ꓟꓽ ꓗꓴꓸ ꓟ ꓖꓪꓽ ꓗꓷ ꓕꓯ꓾ ꓕꓳ ꓶ ꓗꓪ ꓐꓯ ꓔ ꓟ ꓡꓰ ꓐꓰ꓾ ꓧꓪꓸ ꓡꓰˍ ꓟ ꓡꓰ ꓫꓵꓻ ꓟ ꓔꓯ ꓖꓴ ꓓꓵꓽ ꓡꓰꓳ꓿ꓫꓵꓻ ꓟꓺꓳ꓾ ꓠꓴ ꓧꓪꓸ ꓡꓰˍ ꓟ ꓮꓺ ꓡꓲ ꓗꓪ ꓓꓻˍ ꓡ? ꓫꓵꓻ ꓟꓺꓳ꓾ ꓠꓴ ꓫꓵꓻ ꓓꓳꓼ ꓮꓺ ꓡꓲ ꓗꓪ ꓓꓹ ꓡ?꓾ ꓐꓰ ꓐꓳ ꓔ ꓟ ꓐꓯ ꓘꓶ ꓐꓲ ꓡ ꓥꓳ꓿ꓫꓵꓻ ꓓꓴ ꓓꓳꓼ ꓠꓬ ꓝꓴꓲ ꓥ ꓢꓲ꓾ ꓝꓴꓲ ꓓꓰꓺ ꓪꓽ ꓠꓬꓲˍ ꓟ ꓠꓬ ꓙꓵꓽ ꓗ ꓗꓪ ꓐꓰ ꓥ ꓡꓳ꓿ꓖꓳ ꓡꓱ ꓥ ꓟꓲ ꓣꓳꓽ ꓢꓲ ꓒꓽ ꓬꓰ-ꓢꓴ ꓙꓲ-ꓢꓴ ꓗꓪ ꓐꓰ꓾ ꓣꓳꓽ ꓔꓯ ꓧꓪꓸ ꓡꓰ ꓝꓲ ꓢꓴ ꓪꓴ-ꓢ ꓔꓯ ꓫꓸ ꓟꓳ꓿ꓖꓳ ꓡꓱ ꓠꓬꓲ ꓥꓪ ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓪꓽ ꓠꓬ ꓟꓽ ꓶꓹ ꓡꓵ ꓡꓰ ꓝꓲ ꓝꓲ ꓦꓰꓼ ꓕꓶꓻ ꓞꓹ ꓢꓲ꓾ ꓮ ꓕꓯˍ ꓟꓲ ꓢꓲ ꓒꓽ ꓟꓬꓱꓽ ꓮꓽ ꓟꓬꓹ ꓬꓰ꓿ ꓮ ꓡꓲꓳ ꓐꓯ ꓠꓬ ꓢꓲ ꓒꓽ ꓠꓯꓸꓼ ꓗꓪ ꓠꓴ ꓪꓽ ꓢꓯ ꓕꓵꓼ ꓪꓴꓽ ꓧꓶˍ ꓟ ꓠꓬ ꓮꓽ ꓔꓳˍ ꓡꓰ ꓟꓽ ꓥ ꓟ ꓠꓴ ꓪꓽ ꓢꓷˍ ꓡꓳ꓿

 ꓡꓴ-ꓘ 6ꓽ 39-45

ꓬꓲ ꓝꓮꓲ ꓔꓯ ꓥꓳꓽ ꓣꓱꓽ ꓢꓲ ꓬꓲ ꓪꓽ ꓔꓯ꓾ ꓟꓬ ꓔꓶ ꓠꓬ ꓟꓬ ꓔꓶ ꓔꓯ ꓙ ꓖꓴ ꓧꓳꓽ ꓙꓰ ꓗꓴˍ ꓡ? ꓖꓳ ꓡꓱ ꓬꓰˍ ꓠꓬ ꓠꓬꓲꓽ ꓣꓳ ꓡꓱꓸꓼ ꓟꓲꓻ ꓘꓴꓻ ꓗꓪ ꓞꓰ ꓓꓵꓽ ꓡꓰˍ ꓥꓳ꓾ ꓟꓽ ꓥ ꓡ?ꓢꓳ ꓢꓴ ꓠꓬ ꓟꓸ ꓒ ꓕꓯꓽ ꓢꓲ ꓟꓽ ꓪꓴꓽ꓿ ꓢꓳ ꓖꓴ ꓡꓰ ꓢꓴ ꓮꓽ ꓙꓵ ꓠꓽ ꓬꓲ ꓟꓸ ꓒˍ ꓐꓰ ꓕꓲꓽ ꓡꓰꓹꓼ ꓒꓬꓱꓼ ꓡ ꓥꓳ꓿ꓮꓸ ꓫꓵ ꓪꓴꓸ ꓠꓬꓲ ꓠꓴ ꓬꓲꓼ ꓠꓴ ꓠꓬꓲ ꓟꓬ ꓢꓶꓽ ꓗꓪ ꓓꓯꓹ ꓟ ꓑꓱꓸ ꓛꓵꓽ ꓔꓯ ꓡꓳꓸ ꓠꓬꓲ ꓢꓲ꓾ ꓠꓴ ꓚꓲꓸ ꓛꓬ ꓟꓬ ꓢꓶꓽ ꓗꓪ ꓓꓯꓹ ꓟ ꓢꓲꓹ ꓓꓱꓽ ꓔꓯ ꓟꓽ ꓓꓵꓽ ꓙ ꓠꓬꓲ ꓡ?ꓠꓴ ꓚꓲꓸ ꓛꓬ ꓟꓬ ꓢꓶꓽ ꓗꓪ ꓓꓯꓹ ꓟ ꓢꓲꓹ ꓓꓱꓽ ꓔꓯ ꓟꓽ ꓟꓳꓻ ꓠꓬ꓾ ꓠꓴ ꓬꓲꓼ ꓠꓴ ꓠꓬꓲ ꓔꓯ꓾ ꓥꓪ ꓠꓬꓲ ꓤꓽꓳ꓾ ꓠꓴ ꓟꓬ ꓢꓶꓽ ꓗꓪ ꓓꓯꓹ ꓟ ꓑꓱꓸ ꓛꓵꓽ ꓥꓪ ꓔꓯ ꓗꓳꓸ ꓝꓲ ꓡꓯ꓾ ꓐꓰ ꓮ ꓡꓲ ꓐꓯ ꓓꓻ ꓢꓰꓽ꓿ ꓠꓲꓹ ꓟ ꓠꓬꓲꓽ ꓔꓱꓹ ꓣꓱꓽ ꓢꓴꓳ꓾ ꓠꓴ ꓚꓲꓸ ꓛꓬ ꓟꓬ ꓢꓶꓽ ꓗꓪ ꓓꓯꓹ ꓟ ꓢꓲꓹ ꓓꓱꓽ ꓧꓶꓸ ꓕꓯ ꓣꓴ ꓩꓴ ꓗꓷ꓿ ꓖꓳ ꓗꓸ ꓠꓯꓸ ꓢꓲˍ ꓡꓰꓽ ꓠꓴ ꓬꓲꓼ ꓠꓬꓲ ꓟꓬ ꓢꓶꓽ ꓗꓪ ꓓꓯꓹ ꓟ ꓑꓱꓸ ꓛꓵꓽ ꓗꓳꓸ ꓠꓹ ꓟ꓾ ꓠꓴ ꓠꓬ ꓫꓬꓽ ꓫꓬꓽˍ ꓡꓰꓽ ꓟꓳꓻˍ ꓥꓳ꓿ꓮ ꓡꓲꓳ ꓐꓯ ꓠꓬ ꓙꓲˍ ꓟ ꓢꓲꓹ ꓜꓲ ꓠꓬ꓾ ꓟꓽ ꓙꓲꓻ ꓟ ꓢꓶꓹ ꓢꓶ ꓓꓱꓼ ꓡ ꓟ ꓟꓽ ꓙꓳ꓿ ꓟꓽ ꓙꓲꓻ ꓟ ꓢꓲꓹ ꓜꓲˍ ꓟꓲ꓾ ꓙꓲˍ ꓟ ꓢꓶꓹ ꓢꓶꓽ ꓓꓱꓼ ꓡ ꓟ ꓟꓽ ꓙꓳ꓿ꓮꓸ ꓫꓵ ꓜꓲ ꓥ ꓟꓲ ꓬꓲ ꓢꓶꓽ ꓗꓪ ꓐꓰ ꓢꓷꓸ ꓡꓰ ꓓꓻˍ ꓡꓳ꓿ ꓛꓴꓽ ꓑꓳꓺ ꓗꓪ ꓘꓶꓽ ꓢꓶ ꓧꓼ ꓟꓶ ꓟꓽ ꓓ꓿ ꓝꓮꓲ ꓠꓬ ꓛꓴꓽ ꓟꓳꓼ ꓗꓪ ꓛꓱꓼ ꓡꓱ ꓢꓶꓽ ꓧꓼ ꓟꓶ ꓟꓽ ꓓ꓿ꓞꓳ ꓙꓲꓻ ꓠꓬ ꓬꓲ ꓠꓲꓹ ꓟ ꓗꓪ ꓙꓲˍ ꓟ ꓫꓺ ꓔ ꓠꓬꓲ ꓙꓲˍ ꓟ ꓣꓴꓻ ꓓꓳ ꓡ ꓡꓳ꓿ ꓞꓳ ꓥꓶˍ ꓟꓲ ꓬꓲ ꓠꓲꓹ ꓟ ꓗꓪ ꓥꓶꓻˍ ꓟ ꓫꓺ ꓔ ꓠꓬꓲ ꓥꓶˍ ꓟ ꓣꓴꓻ ꓓꓳ ꓡ ꓡꓳ꓿ ꓮ ꓡꓲꓳ ꓐꓯ ꓠꓬ ꓠꓲꓹ ꓟ ꓗꓪ ꓐꓲ ꓞꓹ ꓟ ꓗꓪ ꓐꓰ ꓟꓷꓽ ꓠꓷꓹ ꓡꓰ ꓐꓯ ꓓꓳ ꓡ ꓟ ꓥ ꓡꓳ꓿