ꓪꓴ-ꓢ ꓠꓲꓹ ꓡꓶꓽ

ꓮ ꓐ ꓐꓹ ꓐ ꓪꓴ-ꓢ ꓡꓰ ꓣꓳ ꓔꓯ ꓚꓰꓼ ꓔ ꓟ ꓬꓲꓸ ꓔꓶꓸꓹ ꓙꓱꓼ ꓬꓲꓸ ꓬꓲ ꓢꓲ ꓠꓬ ꓬꓲꓸ ꓔꓯ ꓢꓷˍ ꓟ ꓐꓰ ꓕꓲ ꓠꓬꓲ ꓙꓳˍ ꓠꓬ ꓬꓲ ꓐꓰ ꓕꓲ ꓡꓰꓸꓼ ꓔꓬꓹ ꓪ ꓠꓹ ꓟ ꓥ ꓡꓳ= ꓖꓳ ꓟ ꓑꓶ ꓓꓴ-ꓸ ꓟꓲ  ꓠꓯ ꓞꓳ ꓤ ꓐꓴ ꓠꓬ-ꓸ ꓚꓰꓼ ꓢꓴ ꓢꓲꓺ ꓒ ꓔꓯ ꓢꓷꓸ ꓪˍ ꓥꓳ= ꓞꓳ ꓤ ꓐꓱ ꓶ ꓕꓲꓽ ꓞꓲꓼ ꓕꓲꓽ ꓑ ꓢꓯꓼ ꓟꓬ ꓚꓬꓴꓸ ꓟꓶ ꓠꓹ ꓟ ꓠꓬ ꓬꓲꓸ ꓠꓲꓹ ꓡꓶꓽˍ ꓟꓲ ꓥ ꓡꓳ= ꓣꓳ ꓟꓲ ꓠꓯ ꓞꓳ ꓤ ꓥ ꓟꓲ ꓦꓸꓹ ꓙ ꓖꓴ ꓕꓱ ꓟ ꓗꓪ ꓫꓱꓽ ꓪˍ ꓥꓳ= ꓪꓴ-ꓢ ꓬꓲꓸ ꓚꓰꓼ ꓔ ꓟ ꓮꓽ ꓙꓵꓽ ꓐꓰ ꓬꓲꓸ ꓣꓱꓽ ꓛꓰꓽ ꓔꓯ ꓙ ꓜꓲꓼ ꓠꓲꓹ ꓐꓰ  ꓖꓶꓽ ꓔ ꓟ ꓢꓷꓸ ꓠꓲꓹ ꓠꓬ ꓪꓴ-ꓢ ꓡꓰ ꓖꓶꓽ ꓔ ꓟ ꓥ ꓡꓳ= ꓕꓱ ꓟ ꓔꓯ ꓣꓳꓽ ꓬꓲꓸ ꓙꓲꓻ ꓢꓷꓸ ꓢꓲ-ꓸ ꓬꓲꓸ ꓡꓯ ꓟꓬꓱꓽ ꓔꓯ ꓓꓳ ꓟꓳ ꓫꓱꓸ ꓖꓶ= ꓮ ꓡꓲꓳ ꓐꓯ ꓠꓬ ꓗꓽ ꓚꓳꓸꓸ ꓔˍ ꓟ ꓡꓳ ꓒꓱ ꓗꓪ ꓬꓲ ꓡꓰ ꓓꓵꓽ ꓙ ꓟꓶ ꓓꓵꓽ ꓠꓲꓹ ꓙ ꓟꓬ ꓗꓳˍ ꓟ ꓥꓪ ꓔꓯ ꓟꓳꓸ ꓖꓶ ꓡꓸꓹꓳ=

ꓧꓶꓸ ꓕꓯ ꓪꓴꓸ ꓔꓴ ꓔꓴˍ ꓟ ꓠꓬ ꓔꓶꓸꓹ ꓙꓱꓼ ꓕꓲꓽ ꓫꓵꓽ ꓫꓵꓽ ꓔꓯ ꓧꓪꓸ ꓡꓰ ꓓꓴ ꓬꓲꓸ ꓚꓰꓸꓸ ꓥ ꓡꓳ ꓐꓰ ꓢꓷꓸ ꓠꓲꓹ ꓙꓳ ꓒ ꓡꓰ ꓐꓯ ꓔ ꓡꓳ= ꓣꓳ ꓟꓲ ꓠꓯ ꓞꓳ ꓤ ꓠꓲꓹ ꓫꓵˍ ꓟ ꓔꓯ ꓧꓶꓸ ꓕꓯ ꓓꓵꓽ ꓙ ꓠꓬꓲ ꓡꓯ= ꓗꓸ ꓠꓯꓸ ꓢꓲ ꓗꓪ ꓣꓳꓽ ꓓꓵꓽ ꓙ ꓔ ꓟ ꓬꓲ ꓙꓲꓻ ꓠꓲꓹ ꓟ ꓘꓴ ꓠꓯꓸꓼ ꓗꓪ ꓗꓷ ꓔ ꓢꓲ ꓬꓰ ꓓꓴ ꓥ ꓡꓳ= ꓕꓲꓽ ꓫꓵꓽ ꓫꓵꓽꓔꓯ ꓣꓳ ꓟꓽ ꓓꓵꓽ ꓙꓽ ꓙꓽ ꓟꓽ ꓢꓪ ꓠꓬꓲ ꓠꓬꓲ ꓬꓰˍ ꓕꓯ ꓠꓽ ꓬꓲꓸ ꓙꓵꓹ ꓮꓽ ꓟꓬꓹ ꓖꓴˍ ꓥꓳ= ꓣꓳꓽ ꓚꓲꓸ ꓛꓬ ꓠꓲꓹ ꓡꓶꓽ ꓗꓪ ꓐꓰ ꓙꓲˍ ꓟ꓾ ꓧˍ ꓟ ꓬꓰ ꓐꓭˍ ꓠꓬ ꓒꓵꓽ ꓶ ꓙꓳˍ ꓥꓳ= ꓔꓯꓺ ꓥꓳꓽ ꓠꓴ ꓮ ꓫꓵꓽ ꓬꓰ ꓠꓲꓹ ꓫꓵˍ ꓡ? ꓠꓴ ꓮꓸ ꓫꓵꓽ ꓣꓱꓽ ꓬꓰ ꓗꓴˍ ꓡ? ꓟꓽ ꓥ ꓠꓬ ꓮꓸ ꓫꓵꓽ ꓐꓱ ꓶ ꓙꓲꓻ ꓖꓴ ꓙꓳ ꓢꓲ ꓬꓰˍ ꓟ ꓥ ꓡ? ꓐꓰ ꓠꓸꓹ ꓠꓬꓲ ꓪˍ ꓥꓳ=ꓬꓲꓸ ꓬꓲ ꓢꓲ ꓠꓬ-ꓸ ꓪꓴ-ꓢ ꓬꓲꓸ ꓐꓬꓱꓼ ꓡꓱˍ ꓟ ꓗꓴꓷꓼ ꓗꓪ ꓬꓲꓸ ꓐꓰ ꓕꓲꓽ ꓡꓰꓸꓼ ꓔꓬ ꓪ ꓠꓹ ꓟ ꓥ ꓡꓳ= ꓟꓲ ꓠꓯ ꓗꓪ ꓙꓳˍ ꓟ ꓮꓽ ꓙꓵꓽ ꓟꓽ ꓙꓳ ꓧꓶꓸ ꓕꓯ ꓡꓰ ꓮ ꓐ ꓐꓹ ꓐ ꓪꓴ-ꓢ ꓠꓽ ꓙꓳˍ ꓡꓳ ꓫꓵꓽ ꓥ ꓡꓳ= ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓠꓬ ꓬꓲ ꓗꓪ ꓐꓰ ꓡˍ ꓡꓳ= ꓖꓳ ꓡꓱ ꓢꓲ ꓬꓲꓸ ꓡꓰ ꓚꓰꓼ ꓔ ꓟ ꓥ ꓕ ꓑꓳ ꓠꓬ ꓮ ꓘꓶꓸ ꓙꓲˍ ꓟ ꓥ ꓡꓳ-ꓸ ꓐꓰ ꓬꓲ ꓚꓰ ꓬꓲꓸ ꓪꓴꓸ ꓕꓳ ꓶ ꓗꓪ ꓐꓳꓸꓸ ꓔ ꓟ ꓡꓰ ꓟꓽ ꓞꓲ-ꓸ ꓚꓲꓸ ꓛꓬ ꓠꓲꓹ ꓡꓶꓽ ꓔꓯ ꓟꓰꓹ ꓠꓬꓲ ꓢꓲ ꓬꓰ ꓠ ꓗꓹ ꓡꓳ=