ꓠꓲꓹ ꓟ ꓒꓳꓹ ꓡꓲꓼ ꓠꓬꓲ ꓔ ꓟ (Homily)

ꓜꓺ ꓚꓲꓸ ꓚꓲꓸ ꓙꓵꓹ 3 ꓫꓵꓽ ꓠꓽ

ꓓꓳ ꓙꓰ ꓕꓳꓽ ꓶ 3: 1 ꓟꓳ-ꓫꓲ ꓠꓬ ꓬꓲ ꓐꓹ ꓐ ꓑꓯꓹ ꓬꓲ-ꓕꓷ-ꓣꓳ ꓬꓲ ꓮ ꓣꓳ ꓜꓴ ꓔꓯ ꓡꓳꓸ ꓔꓬ_ ꓡꓳ꓿ ꓬꓲ-ꓕꓷ-ꓣꓳ ꓠꓬ ꓟ-ꓓꓲ-ꓬ ꓟꓵꓽ ꓗꓪ ꓟ ꓔꓲ ꓒ ꓥ ꓡꓳ꓿ ꓟꓳ-ꓫꓲ ꓡꓰ ꓮ ꓣꓳ ꓜꓴ ꓔꓯ ꓡꓲ ꓛꓲ ꓐꓶ ꓓꓵ ꓗꓪ ꓧꓳꓽ ꓙꓰ ꓠꓬ꓾ ꓪꓴ-ꓢ ꓪ ꓚꓲ ꓧꓳ-ꓣ-ꓐꓷ ꓗꓪ ꓛꓲ ꓬꓰ_ ꓡꓳ꓿ ꓖꓳ ꓡꓱ ꓠꓬ ꓬꓰ-ꓧꓳ-ꓧꓪ ꓝꓲ ꓓꓴ ꓡꓰ ꓛꓴꓽ ꓑꓳ ꓠꓯꓸꓼ ꓮ ꓔꓳꓸ ꓡ ꓡꓱꓺ ꓗꓪ ꓐꓰ ꓟꓳ-ꓫꓲ ꓔꓯ ꓟꓳꓸ ꓖꓶ ꓡ_ ꓡꓳ꓿ ꓟꓳ-ꓫꓲ ꓬꓲ ꓡꓳꓸ ꓠꓬꓲ ꓠꓬ꓾ ꓛꓴꓽ ꓑꓳ ꓗꓪ ꓮ ꓔꓳꓸ ꓐꓬꓻ ꓞ_ ꓟꓲ ꓛꓴꓽ ꓑꓳ ꓠꓽ ꓟꓽ ꓐꓬꓻ ꓡꓰ꓿ ꓖꓳ ꓡꓱ ꓠꓬꓲ ꓟꓳ-ꓫꓲ ꓡꓰ꓾ ꓛꓴꓽ ꓑꓳ ꓠꓬ ꓮ ꓡꓲ ꓗꓹ ꓠꓬꓲ ꓟꓽ ꓐꓬꓻ ꓡꓰ ꓥꓺꓽ꓾ ꓮ ꓟꓶ ꓥꓪ ꓚꓳ ꓙꓰ ꓢꓲ ꓓꓵ ꓙ ꓟꓶ ꓓꓴ ꓓꓽ ꓟ ꓕꓱ ꓟ ꓔꓯ ꓡꓳꓸ ꓠꓬꓲ ꓙꓰ_ ꓠꓬꓲ꓾ ꓐꓰ ꓐꓯ_ ꓡꓳ꓿ ꓬꓲ ꓔꓱꓹ ꓠꓬꓲ_ ꓐꓰ ꓚꓳ ꓡ_ ꓟ ꓔꓯ ꓬꓰ-ꓧꓳ-ꓧꓪ ꓟꓳ ꓗꓷ ꓠꓬ꓾ ꓪꓴ-ꓢ ꓡꓰ ꓛꓴꓽ ꓑꓳ ꓠꓯꓸꓼ ꓗꓪ ꓐꓰ ꓬꓲ ꓔꓯ ꓘꓴꓻ ꓢꓲ꓾ ꓟꓳ-ꓫꓲꓳ꓾ ꓟꓳ-ꓫꓲꓳ꓾ ꓐꓯ_ ꓡꓳ꓿ ꓬꓲ ꓡꓰ꓾ ꓥꓪ ꓕꓻ ꓔꓬ_ ꓡꓳ꓾ ꓐꓯ_ ꓡꓳ꓿ ꓪꓴ-ꓢ ꓡꓰ꓾ ꓕꓱ ꓗꓪ ꓕꓽ ꓠꓶꓽ ꓡꓯ꓾ ꓠꓴ ꓛꓲ ꓒꓯꓹ ꓗꓪ ꓟ ꓛꓲꓺ ꓠꓲꓺ ꓡꓵꓸ ꓩꓴ ꓗꓷ꓾ ꓮ ꓡꓲꓳ ꓐꓯ ꓠꓬ ꓠꓴ ꓦꓰꓼ ꓞ ꓖꓴ ꓠꓬ ꓢꓲ ꓫꓬ_ ꓟ ꓟꓲ ꓛꓬ ꓥ ꓡꓳ꓾ ꓐꓯ_ ꓡꓳ꓿ ꓖꓳ ꓟ_ ꓡꓰ ꓟꓽ ꓞꓲ ꓥꓪ ꓠꓬ ꓠꓴ ꓐꓹ ꓐ ꓬꓲ ꓪꓴ-ꓢ ꓥ ꓡꓳ꓿ ꓮ-ꓐ-ꓡ-ꓦ ꓬꓲ ꓪꓴ-ꓢ_ ꓐꓰ꓾ ꓬꓲ-ꓢ ꓬꓲ ꓪꓴ-ꓢ_ ꓐꓰ ꓬ-ꓗꓴ ꓬꓲ ꓪꓴ-ꓢ ꓥ ꓡꓳ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓟꓳ-ꓫꓲ ꓬꓲ ꓒꓬꓱꓽ ꓟꓬ ꓑꓲꓸ ꓗꓷ_ ꓡꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓪꓴ-ꓢ ꓔꓯ ꓡꓳꓸ ꓟꓽ ꓑꓶꓸ꓿ ꓬꓰ-ꓧꓳ-ꓧꓪ ꓡꓰ꓾ ꓬꓲ-ꓙꓲ ꓟꓵꓽ ꓗꓪ ꓔꓬ_ ꓟ ꓥꓪ ꓑ ꓫꓬ ꓐꓴ ꓫꓸ ꓙꓵ ꓔꓬ_ ꓟ ꓔꓯ ꓥꓪ ꓚꓵ ꓚꓵ ꓟꓳꓻ ꓗꓷꓳ꓿ ꓪꓽ ꓤ ꓙꓵꓽ ꓒ ꓐꓴ ꓡꓰ ꓘꓶ ꓙꓵ_ ꓟ ꓑꓶ ꓓꓴ ꓬꓲ ꓪ ꓘꓴ_ ꓟ ꓢꓯꓼ ꓔꓯ ꓥꓪ ꓑ ꓙ ꓗꓷꓳ꓿ ꓮ ꓡꓲꓳ ꓐꓯ ꓠꓬ ꓬꓲ ꓪ ꓫ ꓙꓵ ꓜꓲꓽ ꓔꓬ_ ꓟ ꓔꓯ ꓥꓪ ꓢꓷ_ ꓡꓳ꓿ ꓥꓪ ꓬꓯꓼ ꓡ_ ꓟ ꓠꓬ ꓬꓲ ꓪ ꓔꓯ ꓬꓲ-ꓙꓲ ꓡ ꓞꓳ ꓡꓯ ꓒꓯꓹ ꓗꓪ ꓐꓰ ꓚꓬꓴ ꓓꓳ ꓡ ꓠꓹ ꓟ ꓥ ꓢꓲ꓾ ꓖꓳ ꓕꓲ ꓟꓵꓽ ꓗꓪ ꓐꓰ ꓧꓳꓽ ꓓꓳ ꓡ ꓢꓲ ꓠꓬꓲ꓾ ꓙꓲ_ ꓟ_ ꓐꓰ ꓦꓲꓺ_ ꓟ ꓟꓵꓽ_ ꓐꓰ꓾ ꓮ ꓚꓵꓹ_ ꓐꓰ ꓐꓬꓽ ꓬꓲꓻ_ ꓟ ꓟꓵ ꓗꓪ ꓧꓳꓽ ꓛꓲ ꓬꓰ ꓠꓹ ꓟ ꓥ ꓡꓳ꓿ ꓕꓱ ꓟ ꓠꓬ ꓘꓷ-ꓠ ꓡ ꓞꓳ_ ꓐꓰ꓾ ꓧꓷ-ꓕꓷ ꓡ ꓞꓳ_ ꓐꓰ꓾ ꓬꓹ-ꓟꓳ-ꓡꓲ ꓡ ꓞꓳ_ ꓐꓰ꓾ ꓒꓱ-ꓡꓲ-ꓜꓲ ꓡ ꓞꓳ_ ꓐꓰ꓾ ꓫꓲ-ꓪꓰ ꓡ ꓞꓳ_ ꓐꓰ ꓙꓱ-ꓑꓴ-ꓢꓶ ꓡ ꓞꓳ ꓔꓬ ꓖꓴ ꓟꓵꓽ ꓗꓪ ꓛꓲ ꓥ ꓡꓳ꓿

ꓖꓳ ꓡꓱ ꓠꓬ ꓟꓳ-ꓫꓲ ꓡꓰ ꓪꓴ-ꓢ ꓔꓯ꓾ ꓥꓪ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓔꓬ ꓗꓪ ꓛꓲ ꓬꓰ ꓢꓲ ꓬꓲ ꓪ ꓔꓯ꓾ ꓠꓴ ꓪ ꓒꓵꓽ ꓒ ꓐꓴ ꓬꓲ ꓪ ꓪꓴ-ꓢ ꓡꓰ ꓥꓪ ꓔꓯ ꓠꓴ ꓪ ꓔꓬ ꓗꓪ ꓝꓲ ꓩꓴ ꓡ_ ꓡꓳ꓾ ꓐꓰ ꓐꓯ ꓖꓶ ꓗꓷ ꓠꓬ꓾ ꓬꓲ ꓪ ꓡꓰ ꓥꓪ ꓔꓯ꓾ ꓬꓲ ꓟꓬꓱꓺ ꓮ ꓡꓲ ꓟꓬꓱꓺ ꓔ_ ꓡꓳꓺꓽ꓾ ꓐꓰ ꓠ ꓠꓬꓲ ꓡ_ ꓠꓬ꓾ ꓥꓪ ꓬꓲ ꓪ ꓔꓯ ꓮ ꓡꓲ ꓐꓯ ꓖꓶ ꓠꓯ_ ꓡꓳꓺꓽ꓾ ꓐꓯ_ ꓡꓳ꓿ ꓖꓳ ꓡꓱ ꓠꓬ ꓪꓴ-ꓢ ꓡꓰ ꓟꓳ-ꓫꓲ ꓔꓯ꓾ ꓥꓪ ꓠꓬ ꓥꓪ ꓙꓵꓽ ꓥꓪ ꓟꓴ ꓙꓳ ꓔꓬ ꓢꓴ ꓥ ꓡꓳ꓾ ꓐꓯ_ ꓡꓳ꓿ ꓠꓴ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓕꓱ ꓡꓱ ꓐꓯ ꓖꓶ꓾ ꓥꓪ ꓙꓵꓽ ꓥꓪ ꓟꓴ ꓙꓳ ꓔꓬ ꓢꓴ꓾ ꓐꓰ ꓐꓯ_ ꓟ ꓖꓳ ꓕꓲ ꓣꓳ ꓡꓰ ꓥꓪ ꓔꓯ ꓠꓴ ꓪ ꓔꓬ ꓗꓪ ꓝꓲ ꓩꓴ ꓡ_ ꓡꓳ꓾ ꓐꓯ ꓖꓶ꓾ ꓐꓰ ꓐꓯ_ ꓡꓳ꓿ ꓪꓴ-ꓢ ꓠꓬ ꓟꓳ-ꓫꓲ ꓔꓯ ꓕꓱ ꓡꓱ ꓐꓯ_ ꓢꓰꓽ ꓡꓳ꓾ ꓠꓴ ꓠꓬ ꓬꓲ-ꓢꓷ-ꓡꓰ ꓡ ꓞꓳ ꓔꓯ ꓕꓱ ꓡꓱ ꓐꓯ ꓖꓶ꓾ ꓠꓴ ꓪ ꓒꓵꓽ ꓒ ꓐꓴ ꓬꓲ ꓪ ꓬꓰ-ꓧꓳ-ꓧꓪ ꓪꓴ-ꓢ꓾ ꓮ-ꓐ-ꓡ-ꓦ ꓬꓲ ꓪꓴ-ꓢ_ ꓐꓰ꓾ ꓬꓲ-ꓢ ꓬꓲ ꓪꓴ-ꓢ_ ꓐꓰ꓾ ꓬ-ꓗꓴ ꓬꓲ ꓪꓴ-ꓢ ꓡꓰ ꓥꓪ ꓔꓯ ꓠꓴ ꓪ ꓔꓬ ꓗꓪ ꓝꓲ ꓩꓴ ꓡ_ ꓡꓳ꓿ ꓬꓰ-ꓧꓳ-ꓧꓪ ꓕꓱ ꓟ ꓠꓬ ꓕꓲ ꓞꓲ ꓕꓲ ꓑ ꓗꓪ ꓛꓲ ꓥꓪ ꓟꓬꓱꓺ ꓥ ꓢꓲ꓾ ꓕꓲ ꓤꓶ ꓡꓰ ꓕꓲ ꓤꓶ ꓗꓪ ꓥꓪ ꓔꓯ  ꓓꓵꓽ ꓙ ꓛꓲ ꓡ ꓓꓴ ꓥ ꓡꓳ꓿

1 ꓘꓳ-ꓡꓱ-ꓕꓴ10ꓽ 1-6ꓹ 10-12

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮꓽ ꓠꓱ ꓕꓯ ꓣꓳꓽ ꓒꓵꓽ ꓒ ꓐꓴ ꓮ ꓡꓲ ꓥ ꓟ ꓠꓴ ꓪꓽ ꓔꓯ ꓢꓷꓸ ꓡꓰ ꓝꓲ ꓠꓲꓹ ꓫꓵˍ ꓡꓳ꓿ ꓬꓲ ꓪꓽ ꓮꓽ ꓙꓵ ꓔꓯ ꓠꓬ ꓟꓴ ꓗꓴꓸ ꓬꓲꓻ ꓘꓴ ꓡꓰ ꓛꓸ ꓙ ꓗꓷꓳ꓿ ꓬꓲꓻ ꓡꓴ ꓐꓱ ꓗꓪ ꓧꓪꓸ ꓧꓪ ꓗꓳꓸ ꓙꓻ ꓙꓰꓳ꓿ꓬꓲ ꓪꓽ ꓠꓬ ꓟꓳ-ꓫꓲ ꓔꓯ ꓛꓳ ꓢꓴ ꓥ ꓠꓬꓲ꓾ ꓟꓴ ꓗꓴꓸˍ ꓐꓰ ꓬꓲꓻ ꓡꓴ ꓐꓱ ꓗꓪ ꓖꓳ ꓓꓱ ꓔꓲꓹ ꓗꓷꓳ꓿ꓬꓲ ꓪꓽ ꓮꓽ ꓙꓵ ꓠꓬ ꓦꓻ ꓜꓽ ꓓꓴ ꓕꓲꓽ ꓫꓵꓽˍ ꓡꓰ ꓜꓽ ꓗꓷꓳ꓿ꓝꓮꓲ ꓬꓲ ꓪꓽ ꓠꓬ ꓬꓲ ꓪꓽˍ ꓐꓰ ꓛꓳ ꓔꓬ ꓟ ꓡꓳ ꓓꓰ ꓗꓪ ꓐꓰ ꓦꓻ ꓓꓳꓻ ꓓꓴ ꓕꓲꓽ ꓫꓵꓽˍ ꓡꓰ ꓓꓳ ꓗꓷꓳ꓿ ꓡꓳ ꓓꓰ ꓖꓳ ꓟ ꓠꓬ ꓙꓲ-ꓢꓴ ꓥ ꓡꓳ꓿ꓖꓳ ꓡꓱ ꓥ ꓟꓲ ꓬꓲ ꓪꓽ ꓟꓬꓽ ꓠꓬꓲ ꓕꓲ ꓐꓱ ꓟ ꓔꓯ ꓠꓽ ꓪꓴ-ꓢ ꓟꓽ ꓠꓲꓹ ꓒꓴ ꓠꓬꓲ꓾ ꓡꓲ ꓛꓲ ꓟꓵꓽ ꓛꓱꓹ ꓗꓪ ꓫꓵꓻ ꓝꓲꓳ꓿ꓕꓱ ꓟꓬ ꓫꓵꓽ ꓠꓬ ꓬꓲ ꓪꓽ ꓬꓰ ꓗꓷ ꓟ ꓡꓰ ꓐꓰ꓾ ꓣꓳꓽ ꓠꓬ ꓟꓽ ꓙꓲ ꓟ ꓔꓯ ꓟꓽ ꓠꓲꓹ ꓦꓯꓸ ꓠꓹ ꓟ꓾ ꓣꓳꓽ ꓢꓳ ꓟꓶ ꓓꓴ ꓔꓯꓺ ꓐꓬꓱꓽ ꓥ ꓡꓳ꓿ ꓬꓲ ꓪꓽ ꓕꓲ ꓐꓱ ꓠꓬ ꓱ'ꓽ ꓠꓱꓽ ꓢꓲ꓾ ꓛꓴ ꓛꓰꓹ ꓡꓰ ꓝꓲ ꓢꓴ ꓡꓯꓽ ꓒꓯꓹ ꓗꓪ ꓟꓶꓽ ꓬꓰ ꓟ ꓡꓰ ꓐꓰ ꓟꓽ ꓟꓶꓽ ꓬꓰ ꓡ ꓠꓹ ꓟ꓾ ꓣꓳꓽ ꓠꓬ ꓕꓽ ꓱ'ꓽ ꓠꓱꓽ ꓠꓯꓹ ꓡꓳ꓿ꓬꓲ ꓪꓽ ꓔꓯ ꓕꓱ ꓟꓬ ꓫꓵꓽ ꓗꓷ ꓡꓰ ꓟ ꓠꓬ ꓣꓳꓽ ꓧꓪꓸ ꓛꓲꓽ ꓠꓹ ꓟ ꓥ ꓢꓲ꓾ ꓟꓲ ꓠꓯ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓔꓬ ꓢꓴ ꓣꓳꓽ ꓐꓴ ꓐꓱ ꓶ ꓙꓳꓺ ꓗꓽ ꓓꓴ ꓐꓳ ꓔꓸ ꓬꓰ ꓟ ꓥ ꓡꓳ꓿ꓖꓳ ꓡꓱ ꓠꓬꓲ ꓚꓲ ꓛꓬ ꓠꓽ ꓦꓰꓼ ꓕꓶ ꓞꓹ ꓡꓳ꓾ ꓐꓰ ꓓꓵꓽ ꓙꓽ ꓢꓴ ꓠꓬ ꓟꓽ ꓡꓱꓸ ꓙꓰ ꓠꓹ ꓟ ꓤ ꓟꓳ ꓠꓯꓹ ꓡꓳ꓿

ꓡꓴ-ꓘ 13ꓽ 1-9

ꓖꓳ ꓕꓲ ꓝꓲꓸ ꓗꓪ ꓡꓽ ꓞꓳ ꓕꓲ ꓐꓱ ꓡꓰ ꓬꓰ-ꓢꓴ ꓔꓯ ꓡ ꓢꓲ꓾ ꓒꓲ-ꓡ ꓠꓬ ꓮ ꓡꓲ ꓐꓰ ꓖ-ꓡꓲ-ꓡꓲ ꓢꓴ ꓬꓲ ꓪ ꓔꓲ ꓓꓴ ꓗꓪ ꓬꓲ ꓪꓽ ꓚꓲꓸ ꓚꓬꓽ ꓫꓵꓽ ꓦꓱꓹ ꓡꓰ ꓝꓲˍ ꓟ ꓫꓵꓽ ꓪꓴ ꓖꓳ ꓟ ꓐꓯ ꓖꓶ ꓡ ꓢꓴ ꓙꓳˍ ꓡꓳ꓿ꓬꓰ-ꓢꓴ ꓠꓬ ꓬꓲ ꓪꓽ ꓔꓯ ꓒꓳꓹ ꓖꓶ ꓢꓲ꓾ ꓖ-ꓡꓲ-ꓡꓲ ꓢꓴ ꓖꓳ ꓕꓲ ꓧꓳꓽ ꓔꓯ ꓕꓱ ꓡꓱ ꓔꓳꓹ ꓜꓳꓽ ꓗꓷˍ ꓠꓬꓲ꓾ ꓬꓲ ꓪꓽ ꓠꓽ ꓖ-ꓡꓲ-ꓡꓲ ꓢꓴ ꓮꓽ ꓙꓵ ꓕꓯꓽ ꓢꓲ ꓝꓴꓲ ꓙꓳ ꓢꓴ ꓥꓳ꓾ ꓐꓰ ꓠꓴ ꓪꓽ ꓓꓵꓽ ꓙˍ ꓡ?ꓠꓴ ꓪꓽ ꓔꓯ ꓥꓪ ꓐꓯ ꓖꓶ ꓠꓬꓲ꓾ ꓟꓽ ꓥ꓿ ꓠꓴ ꓪꓽˍ ꓟꓲ ꓟꓽ ꓓꓵꓽ ꓙ ꓒꓳꓹ ꓬꓲꓼ ꓡ ꓕꓯ ꓠꓽ ꓮꓽ ꓙꓵ ꓢꓴ ꓖꓳ ꓟ ꓡꓰ ꓐꓰ ꓟꓶꓽ ꓬꓰˍ ꓥꓳ꓿ꓥ ꓠꓬ ꓢꓲ-ꓡꓳ ꓗꓪ ꓟ ꓟꓵꓽ ꓔꓳꓹ ꓤꓶꓻ ꓐꓱꓽ ꓡꓰ ꓕꓯ ꓔꓲꓸ ꓫꓵꓻ ꓢꓴ ꓞꓲ ꓦꓰꓼ ꓣꓳ ꓟ ꓠꓬ꓾ ꓙꓱ-ꓣꓴ-ꓢ-ꓡꓱ ꓗꓪ ꓔꓬ ꓢꓴ ꓮꓽ ꓙꓵ ꓕꓯꓽ ꓢꓲ ꓝꓴꓲ ꓙꓳ ꓢꓴ ꓥꓳ꓾ ꓐꓰ ꓠꓴ ꓪꓽ ꓓꓵꓽ ꓙˍ ꓡ?ꓠꓴ ꓪꓽ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓟꓽ ꓥ꓿ ꓠꓴ ꓪꓽˍ ꓟꓲ ꓟꓽ ꓓꓵꓽ ꓙ ꓒꓳꓹ ꓬꓲꓼ ꓡ ꓠꓬ ꓮꓽ ꓙꓵ ꓢꓴ ꓖꓳ ꓟ ꓡꓰ ꓐꓰ ꓟꓶꓽ ꓬꓰˍ ꓥꓳ꓾ ꓐꓯˍ ꓡꓳ꓿ꓬꓲ ꓠꓬ ꓔꓯ ꓥꓳꓽ ꓗꓪ ꓐꓰ ꓟꓸ ꓪꓴꓸ ꓔꓴ ꓢꓲ ꓕꓰ ꓡꓱ ꓐꓯˍ ꓡꓳ꓾ ꓡꓽ ꓞꓳ ꓕꓲ ꓣꓳ ꓠꓬ ꓬꓲ ꓛꓱꓼ ꓡꓱꓼ ꓐꓱ ꓗꓪ ꓘꓶꓽ ꓢꓶꓽ ꓕꓲ ꓜꓲ ꓔꓶ ꓔ ꓡꓳ꓿ ꓬꓲ ꓠꓬ ꓢꓶꓹ ꓢꓶ ꓧꓼ ꓠꓹ ꓟ ꓢꓲꓹ ꓜꓲ ꓛꓲ ꓔꓲ ꓗꓪ ꓡꓻ ꓕꓯ ꓢꓶꓹ ꓢꓶꓽ ꓕꓲ ꓢꓶꓽˍ ꓟꓲ ꓧꓪ ꓟꓽ ꓟꓶ꓿ꓖꓳ ꓡꓱ ꓠꓬ ꓬꓲ ꓡꓰ ꓐꓱ ꓡꓳꓸ ꓢꓴ ꓔꓯ꓾ ꓠꓬꓲ ꓠꓹ꓾ ꓥꓪ ꓠꓬ ꓢꓶꓹ ꓢꓶꓽ ꓧꓪ ꓟꓶ ꓠꓹ ꓟ꓾ ꓕꓱ ꓢ ꓘꓳꓼ ꓘꓶꓽ ꓢꓶ ꓕꓱ ꓕꓲ ꓜꓲ ꓛꓲ ꓔꓲ ꓗꓪ ꓡꓻˍ ꓟꓲ꓾ ꓬꓲ ꓢꓶꓽ ꓧꓪ ꓟꓽ ꓟꓶ꓿ ꓮꓸ ꓫꓵ ꓪꓴꓸ ꓠꓬꓲ ꓟꓵꓽ ꓒꓬꓹ ꓟꓲ ꓒꓬꓹ ꓕꓱ ꓡꓱ ꓣꓱꓻ ꓞꓹ ꓝꓲ ꓠꓯꓹ ꓡ? ꓘꓷꓹ ꓩꓴ ꓗꓷ Gꓽ꓾ ꓐꓯˍ ꓡꓳ꓿ꓬꓲ ꓡꓰ ꓒꓳꓹ ꓖꓶ ꓢꓲ꓾ ꓢꓲ ꓒꓽꓳ꓾ ꓞꓲ ꓠꓲꓹ ꓕꓲ ꓘꓳꓼ ꓝꓰꓺ ꓔ ꓢꓰꓽ꓿ ꓥꓪ ꓠꓬ ꓚꓳ ꓡꓳ ꓡꓳ ꓘꓪꓺ ꓢꓲ ꓛꓲꓸ ꓧꓳꓽ ꓖꓶˍ ꓥꓳ꓿ꓠꓯꓸ ꓦꓯꓼ ꓬꓲ ꓢꓶꓽ ꓓꓱꓼ ꓡ ꓠꓬ ꓙꓲˍ ꓥꓳ꓿ ꓟꓽ ꓓꓱꓼ ꓡ ꓠꓬ ꓖꓳ ꓕꓯꓽ ꓢꓲ ꓘꓷꓹ ꓩꓴ ꓗꓷ ꓛꓵˍ ꓡꓳ꓾ ꓐꓯ ꓖꓶˍ ꓡꓳ꓾ ꓐꓰ ꓐꓯˍ ꓡꓳ꓿ꓠꓽ ꓦꓬꓼ ꓠꓬꓲ ꓗꓪ ꓬꓰ-ꓢꓴ ꓠꓬ ꓜꓲꓼ ꓦꓲ ꓕꓲ ꓦꓲ ꓗꓪ ꓟꓸ ꓟꓲꓽ ꓟꓸ ꓔꓬ ꓕꓯ꓾ꓖꓳ ꓗꓪ ꓠꓲꓽ ꓡꓰ ꓞꓲ ꓦꓰꓼ ꓘꓳꓼ ꓘꓶꓻ ꓡꓶꓽ ꓢꓲ꓾ ꓙꓴꓽ ꓝꓲꓸ ꓗꓴꓺ ꓡꓰ ꓢꓲ ꓠꓬꓲ꓾ ꓮ ꓡꓲˍ ꓟꓲ ꓔꓱꓹ ꓔꓱꓹꓼ ꓐꓰ ꓦꓰꓼ ꓟꓽ ꓠ ꓟ ꓤꓽ ꓟꓶ ꓤ ꓕꓲ ꓣꓳ ꓔꓬ ꓡꓳ꓿ꓬꓰ-ꓢꓴ ꓡꓳꓸ ꓟꓳꓻ ꓗꓷ ꓠꓬ ꓬꓲ ꓔꓯ ꓘꓴꓻ ꓔꓯꓹ ꓡ ꓢꓲ꓾ ꓤ ꓟꓶ ꓤꓽꓳ꓾ ꓠꓻ ꓓꓴ ꓕꓱ ꓟ ꓗꓪ ꓐꓰ ꓠꓴ ꓔꓯ ꓩꓴ ꓗꓷꓳ꓾ ꓐꓯ ꓖꓶˍ ꓡꓳ꓿ꓖꓳ ꓡꓱ ꓢꓲ ꓬꓰ-ꓢꓴ ꓬꓲ ꓡꓯꓼ ꓒꓯꓹ ꓠꓬꓲ ꓐꓽ ꓬꓲ ꓕꓯꓽ ꓢꓲ ꓗꓪ ꓚꓰꓹ ꓗꓷ ꓠꓬ꓾ ꓞꓼ ꓐꓰ ꓬꓲ ꓙꓴꓽ ꓝꓲꓸ ꓔꓱꓹ ꓡꓰ ꓠꓬꓲ꓾ ꓬꓲ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶˍ ꓡꓳ꓿