ꓡꓽ ꓫꓪꓸ ꓙꓲꓻ ꓖꓴ ꓙꓳˍ ꓟ

ꓡꓽ-ꓫꓪꓸ ꓠꓬ ꓪꓳꓽ ꓒꓬꓽ ꓚꓬꓸ ꓕꓯ ꓟꓽ ꓙꓳ ꓟꓽ ꓓ ꓟ ꓕꓲ ꓫꓵꓽ ꓥꓳ= ꓡꓽ-ꓫꓪꓸ ꓔꓯ ꓛꓴꓺ ꓜꓽ ꓢꓴˍ ꓟꓲ ꓙꓳˍ ꓟ ꓡꓰ ꓐꓰ ꓬꓲ ꓜꓲꓽ ꓜꓽ ꓢꓴˍ ꓟꓲ ꓙꓳˍ ꓡꓳ= ꓜꓽ ꓓꓴ ꓥˍ ꓟꓲ ꓠꓯꓻ ꓞꓲꓼ꓾ ꓠꓯꓻ ꓞꓲꓼ ꓥˍ ꓟꓲ ꓜꓽ ꓓꓴ ꓥ ꓟ ꓪꓴꓸ ꓠꓬꓲ ꓮ ꓡꓰ ꓬꓰ ꓢꓲ ꓜꓽˍ ꓜꓽ ꓡꓽ-ꓫꓪꓸ ꓠꓬ ꓧꓪꓽ ꓖꓳ ꓓꓱꓽ ꓔꓬ ꓢ ꓓꓴ ꓐꓱ ꓶ ꓟꓬꓽ ꓠꓬꓲ ꓙꓲˍ ꓟ ꓜꓽ ꓓꓴ ꓕꓲ ꓙꓰꓽ ꓥꓳ= ꓡꓽ-ꓫꓪꓸ ꓘꓴꓽ ꓗꓪ ꓙꓳˍ ꓟ Sulphur Compounds ꓠꓬ ꓬꓲ ꓐꓵꓽ ꓐꓰ ꓬꓲꓸ ꓢꓯꓼ ꓛꓱꓽ ꓠꓱˍ ꓟ ꓔꓯ ꓒꓬꓱꓼ ꓡ ꓝꓲ ꓢꓲ ꓧꓪꓽ ꓖꓳ ꓓꓱꓽ ꓔꓬ ꓢ ꓠꓹ ꓟ ꓮ ꓟꓬꓹ ꓣꓱꓽ ꓬꓯꓼˍ ꓟ ꓥ ꓡꓳ= ꓡꓽ-ꓫꓪꓸ ꓗꓪ ꓙꓳˍ ꓟ ꓠꓱꓸ ꓐꓯꓼ ꓢꓯꓼ ꓐꓴ ꓥˍ ꓟꓲ ꓧꓪꓽ ꓖꓳ ꓓꓱꓽ ꓔꓬ ꓢ ꓡꓰ ꓝꓲˍ ꓟ ꓪꓴꓸ ꓠꓬꓲ ꓦꓲꓓꓰꓳ ꓔꓯ ꓝ ꓢꓲ ꓠ ꓡꓳꓸ ꓓꓴ ꓬꓰ ꓡꓯ=

ꓡꓽ-ꓫꓪꓸ ꓙꓲꓻ ꓖꓴ ꓙꓳˍ ꓟꓲ ꓚꓱꓹ ꓐꓴ ꓠꓬ----

ꓦꓰꓼ ꓟ ꓙꓶꓺ ꓢˍ ꓟ

ꓡꓽ-ꓫꓪꓸ ꓜꓽˍ ꓟ ꓠꓬ ꓦꓰꓼ ꓟ ꓙꓶꓸˍ ꓟ ꓔꓯ ꓪꓽ ꓠꓬꓲ ꓡꓰ ꓝꓲˍ ꓡꓳ= ꓬꓲ ꓪꓴꓻ ꓟꓬꓱꓽ ꓬꓰˍ ꓟ ꓔꓯ ꓢ ꓡꓰ ꓝꓲˍ ꓟ ꓡꓰꓽ ꓟꓽ ꓞꓲꓺ ꓔꓬꓹ ꓟꓽ ꓢ ꓟ ꓐꓰ ꓠꓬꓲꓹ ꓟꓵˍ ꓟ꓾ ꓞꓰꓹ ꓟ ꓔꓯ ꓐꓰ ꓓꓻ ꓡꓰ ꓝꓲˍ ꓡꓳ=

ꓗꓳ-ꓡꓯꓸ-ꓢ-ꓕ-ꓣꓮꓪꓸ ꓠꓲꓸ ꓡꓰ ꓝꓲˍ ꓟ

ꓡꓽ-ꓫꓪꓸ ꓐꓹ ꓟ ꓜꓽ ꓓꓴ ꓜꓽ ꓖꓶˍ ꓠꓬ ꓧꓪꓽ ꓖꓳ ꓓꓱꓽ ꓔꓬꓹ ꓢˍ ꓟ ꓔꓯ ꓐꓬ ꓡꓰ ꓝꓲˍ ꓟ ꓗꓳ-ꓡꓯꓸ-ꓢ-ꓕ-ꓣꓮꓪꓸ ꓔꓯ ꓠꓲꓸ ꓡꓰ ꓝꓲˍ ꓡꓳ= ꓡꓽ-ꓫꓪꓸ ꓗꓪ ꓐꓹ ꓟ Allicin ꓠꓬ ꓧꓪꓽ ꓖꓳ ꓓꓱꓽ ꓔꓬ ꓢꓺ ꓡꓰ ꓝꓲˍ ꓡꓳ=

ꓫꓵꓽ ꓓꓯˍ ꓟ ꓔꓯ ꓓꓻ ꓡꓰ ꓝꓲˍ ꓟ

ꓫꓵꓽ ꓓꓯˍ ꓓꓻ ꓡꓰ ꓓꓴ ꓐꓱ ꓶ ꓡꓽ-ꓫꓪꓸ ꓠꓬ ꓬꓰ ꓙ ꓖꓶꓽ ꓐ ꓡˍ ꓡꓳ= ꓡꓽ-ꓫꓪꓸ ꓗꓪ ꓓꓹ ꓟ Allicin ꓠꓬ ꓫꓵꓽ ꓢꓯꓼ ꓓꓯˍ ꓟ ꓔꓯ ꓟꓽ ꓒꓬꓱꓼ ꓡꓰ ꓝꓲ ꓝꓲ꓾ ꓫꓵꓽ ꓙꓴꓽ ꓔꓯ ꓤꓶꓻ ꓙꓳ ꓡꓰ ꓠ ꓬꓰ ꓙˍ ꓟ ꓥ ꓡꓳ=

ꓟꓬ ꓢꓶꓽ ꓢꓯꓼ ꓪꓽ ꓠꓬꓲꓺ ꓡˍ ꓟ

ꓡꓽ-ꓫꓪꓸ ꓗꓪ Selenium꓾ Quercetin ꓐꓰ Vitamin C ꓢꓯꓼ ꓮ ꓟꓬꓹ ꓙꓳˍ ꓟ ꓥꓳ= ꓢꓯꓼ ꓕꓱ ꓟꓬ ꓟ ꓠꓬ ꓟꓬ ꓢꓶꓽ ꓘꓴꓽ ꓗꓪ ꓐꓶꓽ ꓓꓲꓻ ꓓꓵꓽ ꓡˍ ꓟ ꓪꓴꓸ ꓠꓬꓲ ꓟꓬ ꓢꓶꓽ ꓳˍ ꓟ ꓟꓽ ꓒꓬꓱꓼ ꓡ ꓝꓲ ꓝꓲ ꓐꓰ ꓟꓬ ꓢꓶꓽ ꓢꓯꓼ ꓙꓳ ꓡ ꓝꓲˍ ꓡꓳ=

ꓙꓬꓻ ꓓꓵꓽ ꓡꓰ ꓟ ꓔꓯ ꓓꓻ ꓡꓰ ꓝꓲˍ ꓟ

ꓡꓽ-ꓫꓪꓸ ꓔꓯ ꓬꓲ ꓜꓲꓽ ꓜꓽ ꓖꓶˍ ꓠꓬ ꓙꓬꓻ ꓓꓵꓽ ꓡꓰ ꓢꓲ ꓠꓻ ꓡˍ ꓟ ꓐꓰ ꓛꓲꓽ ꓚꓵꓸˍ ꓟ ꓔꓯ ꓢꓻ ꓡꓰ ꓝꓲˍ ꓡꓳ= ꓙꓬꓻ ꓓꓵꓽ ꓡꓰˍ ꓠꓬ ꓡꓽ-ꓫꓪꓸ ꓠꓬꓲꓽ ꓧꓹ ꓜꓽ ꓖꓶ ꓓꓹ ꓡꓳ=

ꓫꓵꓽ ꓒꓬꓸ ꓢꓯꓼ ꓙꓳ ꓡ ꓝꓲˍ ꓟ

ꓡꓽ-ꓫꓪꓸ ꓜꓽˍ ꓟ ꓗꓪ ꓐꓰ ꓫꓵꓽ ꓒꓬꓸ ꓢꓯꓼ ꓙꓳ ꓡꓰ ꓝꓲˍ ꓡꓳ= ꓡꓽ-ꓫꓪꓸ ꓘꓴꓽ ꓗꓪ ꓙꓳˍ ꓟ ꓢꓯꓼ ꓐꓴ ꓠꓬ ꓫꓵꓽ ꓒꓬꓸ ꓔꓬꓹ ꓢ ꓠꓹ ꓟ ꓢꓯꓼ ꓖꓶˍ ꓟ ꓥ ꓡꓳ=

ꓓꓳꓼ ꓐꓴ ꓔꓯ ꓫꓬ ꓡꓰ ꓝꓲˍ ꓟ

ꓡꓽ-ꓫꓪꓸ ꓗꓪ Sulphur Compounds ꓮꓽ ꓟꓬꓹ ꓙꓳˍ ꓟ ꓠꓬ ꓧꓪꓽ ꓖꓳ ꓓꓱꓽ ꓘꓴꓽ ꓗꓪ ꓟ ꓬꓲꓸ ꓪꓴꓻ꓾ ꓠꓲꓹ ꓟ꓾ ꓫꓵꓽ ꓒꓬꓸ꓾ ꓐꓵꓼ ꓟꓵ꓾ ꓪꓳꓽ ꓓꓲꓻ ꓕꓱ ꓟꓬ ꓙꓰꓽ ꓔꓯ ꓐꓬ ꓡꓰ ꓝꓲˍ ꓟ ꓬꓲ ꓓꓳꓼ ꓐꓴ ꓔꓯ ꓣꓴ ꓦ ꓖꓶˍ ꓡꓳ=

ꓪꓳꓽ ꓔꓳ ꓝꓲꓸ ꓐꓴ ꓔꓯ ꓢꓯꓼ ꓙꓳ ꓡꓰ ꓝꓲˍ ꓟ

ꓡꓽ-ꓫꓪꓸ ꓬꓲ ꓧꓹ ꓤ ꓤ ꓐꓴ ꓠꓬ ꓪꓳꓽ ꓔꓳ ꓝꓲꓸ ꓐꓴ ꓔꓯ ꓢꓯꓼ ꓙꓳ ꓡꓰ ꓝꓲˍ ꓐꓯ ꓟ ꓠꓬ ꓮ ꓘꓶꓸ ꓓꓵꓽ ꓙ ꓮ' ꓡꓰ ꓓꓴ ꓥꓳ= ꓡꓽ-ꓫꓪꓸ ꓘꓴꓽ ꓗꓪ ꓙꓳˍ ꓟ ꓢꓯꓼ ꓐꓴ ꓠꓬ ꓪꓳꓽ ꓔꓳ ꓝꓲꓸ ꓐꓴ ꓔꓯ ꓢꓯꓼ ꓙꓳ ꓪꓽ ꓠꓬꓲ ꓡ ꓢꓲ ꓢꓲ ꓯ-ꓢ-ꓕ-ꓣꓳ-ꓙꓲꓠ ꓐꓴ ꓔꓯˍ ꓟꓲ ꓟꓬꓽ ꓡ ꓝꓲˍ ꓡꓳ=

ꓠꓲꓹ ꓟ ꓠꓻ ꓓꓻ ꓡꓰ ꓝꓲˍ ꓟ

ꓠꓲꓹ ꓟ ꓠꓻ ꓠꓬ ꓮ ꓟꓶ ꓟꓲ ꓠꓯ ꓗꓪ ꓟꓽ ꓓ ꓒꓬꓱꓼ ꓟꓬꓽ ꓔꓬ ꓟ ꓠꓻ ꓕꓲ ꓟ ꓥ ꓡꓳ= ꓠꓲꓹ ꓟ ꓠꓻ ꓢꓻ ꓡꓰ ꓓꓴ ꓐꓱ ꓶˍ ꓟꓲ ꓡꓽ-ꓫꓪꓸ ꓠꓬ ꓬꓰ ꓙ ꓐ ꓡˍ ꓡꓳ= ꓗꓳ-ꓡꓯꓸ-ꓢ-ꓕ-ꓣꓮꓪꓸ ꓐꓰ ꓬꓲꓸ ꓞꓶꓻ ꓔꓯ ꓠꓲꓸ ꓡꓰ ꓝꓲˍ ꓟ ꓪꓴꓸ ꓠꓬꓲ ꓠꓲꓹ ꓟ ꓒꓬꓱꓼ ꓡˍ ꓟ ꓔꓯ ꓠꓲꓸ ꓡꓰ ꓝꓲˍ ꓡꓳ=

Alzheimer ꓠꓻ ꓐꓱ ꓶ ꓙꓲˍ ꓟ

ꓡꓽ-ꓫꓪꓸ ꓠꓬ Alzheimer ꓠꓻ ꓐꓱ ꓶˍ ꓟꓲ ꓙꓲˍ ꓟ ꓥ ꓡꓳ ꓡꓽ-ꓫꓪꓸ ꓘꓴꓽ ꓗꓪ antioxidant enzyme ꓐꓴ ꓔꓯ ꓟꓬꓽ ꓡ ꓝꓲˍ ꓟ ꓢꓯꓼ ꓙꓳˍ ꓟ ꓥ ꓡꓳ= ꓡꓽ-ꓫꓪꓸ ꓗꓪ ꓙꓳˍ ꓟ ꓬꓲ ꓢꓯꓼ ꓐꓴ ꓠꓬ ꓪꓴꓸ ꓠꓷꓸ ꓐꓱ ꓶ ꓙꓲˍ ꓡꓳ꓾ ꓐꓰ ꓢꓷꓸ ꓪˍ ꓡꓳ=