ꓥꓪ ꓔꓯ ꓟꓽ ꓙꓵꓻ ꓠꓬ ꓠꓴ ꓪ ꓝꓴꓲꓸ ꓠꓯꓸꓼ ꓗꓪ ꓫꓵˍ ꓥꓳ꓾ ꓥꓪ ꓔꓯ ꓙꓵˍ ꓠꓬ ꓠꓴ ꓪ ꓚꓬꓴꓸ ꓟꓶˍ ꓥꓳ꓾

ꓠꓬꓲꓸ ꓠꓬꓲ ꓣꓳ ꓑ ꓙꓽ ꓪˍ ꓟ ꓪꓴ-ꓢ ꓐꓯ ꓘꓶꓽ ꓠꓬ ꓬꓳ-ꓦ ꓕꓳꓽ ꓶ 8ꓽ21-30 ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓡꓰ ꓥꓪ ꓔꓯ ꓟꓽ ꓙꓵꓻ ꓠꓬ ꓠꓴ ꓪ ꓠꓬ ꓝꓴꓲꓸ ꓗꓪ ꓐꓰ ꓫꓵˍ ꓥꓳ꓾ ꓥꓪ ꓔꓯ ꓙꓵˍ ꓠꓬ ꓚꓬꓴꓸ ꓟꓶˍ ꓥꓳ꓾ ꓐꓯ ꓡꓳ= ꓕꓱ ꓟ ꓔꓯ ꓣꓳ ꓠꓬꓲꓸ ꓠꓬꓲ ꓓꓵꓽ ꓙ ꓠꓬꓲ ꓡꓯ= ꓢꓲꓺ ꓒ ꓬꓰ-ꓢꓴ ꓔꓯ ꓟꓽ ꓙꓵꓻ ꓢꓴ ꓠꓬ ꓚꓲꓸ ꓛꓬ ꓝꓴꓲꓸ ꓗꓪ ꓐꓰ ꓫꓵˍ ꓥꓳ꓾ ꓐꓰ ꓐꓯ ꓡꓳ= ꓕꓱ ꓟ ꓮ ꓫꓵꓽ ꓔꓯ ꓐꓯ ꓡ? ꓣꓳ ꓝꓴꓲꓸ ꓔꓯ ꓡꓵꓸ ꓦ ꓖꓶ ꓢꓴ ꓠꓬ ꓕꓲ ꓣꓳˍ ꓡꓰꓽ ꓙꓳˍ ꓡꓳ= ꓕꓱ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓥ ꓡꓳ= ꓬꓲ ꓗꓪ ꓐꓰ ꓟꓽ ꓥ ꓠꓬ ꓣꓳ ꓝꓴꓲꓸ ꓔꓯ ꓡꓵꓸ ꓖꓶ ꓐ ꓡ ꓢꓴ ꓟꓽ ꓙꓳ= ꓬꓲ ꓗꓪ ꓐꓰ ꓟꓽ ꓥ ꓠꓬ ꓣꓳ ꓠꓬ ꓒꓶꓻ ꓩꓴ ꓗꓷˍ ꓟ ꓟꓶ ꓟꓽ ꓘꓴ= ꓢꓲꓺ ꓒ ꓬꓰ-ꓢꓴ ꓔꓯ ꓟꓽ ꓙꓵꓻ ꓕꓯ ꓣꓳ ꓠꓬ ꓣꓳ ꓝꓴꓲꓸ ꓗꓪ ꓐꓰ ꓫꓵˍ ꓥꓳ꓾ ꓐꓯ ꓟ ꓫꓬꓽ ꓫꓬꓽ ꓡꓰꓽ ꓣꓳ ꓔꓯ ꓐꓯ ꓔ ꓖꓶˍ ꓡꓳ=

ꓮ ꓟꓶ ꓟꓽ ꓟꓶ ꓫꓵ ꓕꓯ ꓠꓬ ꓢꓲꓺ ꓒ ꓬꓰ-ꓢꓴ ꓫꓵꓻ ꓢꓲ ꓢꓯꓸ ꓬꓲꓼ ꓡ ꓑꓮꓲꓽ ꓥˍ ꓟꓲ ꓛꓲꓺ ꓡ ꓔꓬ ꓡꓳ= ꓮ ꓟꓶ ꓕꓲ ꓫꓬꓸ ꓗꓪ ꓵꓻ ꓪˍ ꓟ ꓟꓸ ꓟꓲꓽ ꓠꓬ ꓢꓲꓺ ꓒ ꓬꓰ-ꓢꓴ ꓐꓰ ꓒ-ꓡꓲ-ꓢꓷ ꓐꓴ ꓫ ꓕꓱ ꓡꓯ ꓘꓳˍ ꓟ ꓣꓳ ꓑ ꓙˍ ꓡꓳ= ꓢꓲꓺ ꓒ ꓬꓰ-ꓢꓴ ꓠꓬ ꓙꓰ ꓗꓷ ꓟꓳˍ ꓟ ꓦꓬ ꓠꓬꓲ ꓗꓪ ꓮ ꓘꓶꓸ ꓬꓳꓸ ꓚꓵˍ ꓟ ꓫ ꓕꓱ ꓘꓶꓽ ꓡꓰꓽ ꓫ ꓕꓱˍ ꓡꓳ= ꓡ ꓞꓳ ꓕꓲ ꓣꓳ ꓟꓲ ꓠꓯ ꓕꓱ ꓟ ꓗꓪ ꓐꓰ ꓢꓯꓼ ꓟꓬ ꓡꓳꓹ ꓬꓰ ꓔꓬ ꓕꓯ ꓬꓲ ꓠꓬ ꓮ ꓫꓵꓽ ꓥꓳꓽ ꓫ ꓕꓱˍ ꓡ? ꓬꓲ ꓐꓱ ꓶ ꓙꓲꓻ ꓓꓴ ꓙꓳˍ ꓟ ꓡꓰꓽ ꓫ ꓕꓱˍ ꓥꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓥˍ ꓟꓲ ꓬꓲ ꓠꓬ ꓟꓽ ꓟꓶ ꓫꓵˍ ꓕꓯ ꓙꓰ ꓠ ꓗˍ ꓡꓳ= ꓫꓸ ꓙꓵꓻ ꓜꓲꓽ ꓢꓲ ꓗ-ꓣ-ꓪ-ꓣꓲ ꓪ ꓚꓲꓺ ꓗꓪ ꓫꓵˍ ꓟ ꓦꓬꓼ ꓠꓬꓲ ꓙꓳ ꓡˍ ꓟ ꓬꓲ ꓢꓷˍ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓣꓳ ꓑ ꓙ ꓪˍ ꓟ ꓟꓸ ꓟꓲꓽ ꓗꓪ ꓠꓴ ꓪ ꓠꓬ ꓥꓪ ꓔꓯ ꓙꓵꓻ= ꓥꓪ ꓔꓯ ꓝꓲ ꓩꓴꓻ ꓡˍ ꓟ ꓥꓪ ꓐꓹ ꓐꓽ ꓔꓯˍ ꓟꓲ ꓙꓵꓻ= ꓠꓴ ꓪ ꓥꓪ ꓔꓯ ꓙꓵˍ ꓠꓬ ꓠꓴ ꓪ ꓠꓬ ꓒꓶꓻ ꓩꓴ ꓗꓷˍ ꓟ ꓟꓶˍ ꓥꓳ= ꓥꓪ ꓔꓯ ꓟꓽ ꓙꓵꓻ ꓢꓴ ꓠꓬ ꓚꓲ ꓛꓬ ꓝꓴꓲꓸ ꓗꓪ ꓐꓰ ꓫꓵˍ ꓥꓳ꓾ ꓐꓰ ꓬꓲ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓠꓹ ꓟ꓾ ꓪ ꓙꓲꓻ ꓬꓲ ꓐꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓙ ꓡꓯꓽ ꓘꓳˍ ꓟ ꓣꓱꓽ ꓛꓰꓽ ꓟꓶ ꓠꓹ ꓟ ꓣꓳꓽ ꓢꓯꓼ ꓕꓵꓼ ꓙꓰ ꓡꓯ= ꓬꓲ ꓔꓯ ꓣꓱꓽ ꓛꓰꓽ ꓓꓰꓽ ꓡꓯ= ꓬꓲ ꓛꓲꓺ ꓔꓲꓺ ꓗꓪ ꓙꓰ ꓢꓲ ꓢꓲꓺ ꓒꓽꓳ꓾ ꓥꓪ ꓠꓬ ꓠꓴ ꓔꓯ ꓙꓵˍ ꓡꓳ꓾ ꓐꓯ ꓢꓲ ꓣꓳ ꓙꓵˍ ꓟ ꓗꓪ ꓣꓳꓽ ꓞꓳ ꓙꓳ ꓢꓲ꓾ ꓣꓳ ꓞꓳ ꓙꓳˍ ꓟ ꓗꓪ ꓠꓱꓸ ꓐꓯ ꓢꓴ ꓔꓯ ꓟꓸ ꓖꓶ ꓠꓹ ꓟ ꓢꓯꓼ ꓪ ꓣꓴ ꓡꓯ=

ꓢꓲꓽ ꓫꓬ ꓕꓳꓽ ꓶ ꓬꓲ ꓪꓴꓸ ꓕꓲ ꓚꓱꓹ ꓗꓪ ꓥˍ ꓟꓲ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓬꓲ-ꓙꓲ ꓟꓵꓽ ꓗꓪ ꓐꓰ ꓓꓳ ꓙꓰˍ ꓕꓯ ꓠꓲꓹ ꓟ ꓫꓵ ꓟꓽ ꓘꓴ ꓢꓲ ꓪꓴ-ꓢ ꓐꓰ ꓟꓳ-ꓫꓲ ꓔꓯ ꓱꓽ ꓠꓱꓽˍ ꓡꓳ= ꓖꓳ ꓕꓯ ꓪꓴ-ꓢ ꓡꓰ ꓡꓲꓽ ꓩꓴꓻ ꓔꓯ ꓩꓴ ꓗꓷ ꓢꓲ ꓩꓴꓻ ꓡꓰ ꓱꓽ ꓠꓱꓽ ꓢꓴ ꓔꓯ ꓕꓳꓹ ꓢꓰꓼ ꓗꓷˍ ꓡꓳ= ꓖꓳ ꓕꓯ ꓑ ꓫꓬ ꓐꓴ ꓠꓬ ꓟꓳ-ꓫꓲ ꓔꓯ ꓪꓴ-ꓢ ꓔꓬ ꓗꓪ ꓶꓼ ꓓꓰꓽ ꓖꓶ ꓠꓹ ꓟ ꓐꓯ ꓖꓶˍ ꓡꓳ= ꓟꓳ-ꓫꓲ ꓡꓰ ꓪꓴ-ꓢ ꓔꓯ ꓶꓼ ꓓꓰꓽ ꓖꓶˍ ꓕꓯ ꓙꓲꓽ ꓗꓪ ꓐꓰ ꓩꓴꓻ ꓐꓬꓱꓽ ꓫꓬꓹ ꓢꓲ ꓠꓴ ꓪ ꓮ ꓙꓵꓽ ꓕꓱ ꓟ ꓔꓯ ꓡꓳꓸ ꓢꓴ ꓠꓬ ꓚꓬꓴꓸ ꓟꓶˍ ꓥꓳ꓾ ꓐꓯ ꓡꓳ= ꓩꓴꓻ ꓕꓳꓹ ꓟꓶ ꓡꓰ ꓢꓴ ꓩꓴꓻ ꓐꓬꓱꓽ ꓔꓯ ꓡꓳꓸ ꓠꓬꓲ ꓗꓷ ꓠꓬ ꓬꓲ ꓪ ꓚꓬꓴꓸ ꓟꓶˍ ꓡꓳ꓾ ꓐꓯ ꓟ ꓣꓳꓽ ꓑ ꓙˍ ꓡꓳ=

ꓢꓲꓺ ꓒ ꓬꓰ-ꓢꓴ ꓦꓬꓼ ꓠꓬꓲ ꓗꓪ ꓢꓲꓺ ꓒ ꓬꓰ-ꓢꓴ ꓥˍ ꓟꓲ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲꓺ ꓗꓪ ꓫꓵꓻꓳ= ꓝꓴꓲꓸ ꓗꓪ ꓐꓰ ꓠꓻ ꓡꓰ ꓟ ꓣꓳꓽ ꓠꓬ ꓬꓰ-ꓢꓴ ꓔꓯ ꓡꓳꓸ ꓢꓴ ꓠꓬ ꓚꓬꓴꓸ ꓟꓶˍ ꓡꓳ= ꓢꓲꓺ ꓒ ꓬꓰ-ꓢꓴ ꓔꓯ ꓙꓵꓻ ꓢꓴ ꓠꓬ ꓢꓯꓼ ꓟꓬ ꓟꓶˍ ꓡꓳ꓾ ꓐꓯ ꓟ ꓔꓯ ꓣꓳꓽ ꓢꓷꓸ ꓪˍ ꓡꓳ= ꓖꓳ ꓡꓱ ꓠꓬꓲ ꓣꓳꓽ ꓠꓬ ꓝꓴꓲꓸ ꓗꓪ ꓐꓰ ꓠꓻ ꓡꓰ ꓟ ꓑꓶꓸ ꓓꓴ ꓝꓴꓲꓸ ꓗꓪ ꓐꓰ ꓣꓳ ꓠꓬ ꓫꓸ ꓙꓵˍ ꓟ ꓑꓶꓸ ꓓꓴ ꓪꓴ-ꓢ ꓔꓯ ꓫꓱꓸ ꓖꓶ ꓡꓯ= ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲꓺ ꓗꓪ ꓫꓵˍ ꓟ ꓪꓴ-ꓢ ꓔꓯ ꓡꓳꓸ ꓠꓬꓲ ꓡꓯ= ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲꓺ ꓫꓵˍ ꓟ ꓢꓲꓺ ꓒ ꓔꓯ ꓡꓳꓸ ꓢꓲ ꓢꓯꓼ ꓟꓬ ꓚꓬꓴꓸ ꓟꓶ ꓠꓹ ꓟ ꓙꓰ ꓡꓯ= ꓠꓬꓲꓸ ꓠꓬꓲ ꓗꓹ ꓛꓲꓽˍ ꓟ ꓕꓲ ꓠꓬꓲ ꓒꓬꓱꓼ ꓡ ꓝꓲ= ꓪꓴ-ꓢ ꓡꓰ ꓶꓼ ꓥꓳꓽ ꓙꓱꓽ ꓖꓶˍ ꓟ ꓟꓶ ꓝꓲ=