ꓫꓱꓸ ꓤ ꓠꓲꓹ ꓙꓳˍ ꓟ ꓞꓳ ꓡꓱꓸꓹ

ꓞꓳ ꓘꓹ ꓕꓲ ꓘꓹ ꓗꓪ ꓞꓲꓼ ꓮꓘꓶꓸ ꓟꓳꓽ ꓡꓰ ꓟ ꓞꓳ ꓟꓳꓽ ꓠꓬꓲꓽ ꓣꓳ ꓙꓳˍ ꓡꓳ= ꓬꓲ ꓪ ꓠꓬꓲ ꓣꓳ ꓤ ꓠꓱꓹ ꓐꓴ ꓠꓬ ꓕꓲ ꓐꓱ ꓠꓬ ꓫꓵꓸꓹ ꓢꓲ-ꓸ ꓕꓲ ꓐꓱ ꓠꓬ ꓦꓲꓸꓹ ꓕꓴꓽ ꓗꓪꓸꓸ ꓕꓴꓽ ꓗꓷꓳ= ꓞꓳ ꓟꓳꓽ ꓠꓬꓲꓽ ꓣꓳ ꓔꓯ ꓠꓬ ꓮ ꓘꓶꓸ ꓫꓱꓸ ꓤ ꓓꓴ ꓧꓸꓸ ꓡꓳ= ꓮ ꓟꓬ ꓗꓪ ꓛꓲ ꓪꓴꓽ ꓧꓶꓸꓹ ꓡ ꓐꓯ ꓥ ꓟꓲ ꓟꓬꓱꓽ ꓬꓰ ꓠ ꓗ ꓡꓳ= ꓞꓳ ꓟꓳꓽ ꓠꓬꓲꓽ ꓣꓳ ꓠꓬ ꓘꓶꓽ-ꓫ ꓟꓲꓸꓸ ꓬꓰ ꓜꓽ-ꓡꓳ=ꓕꓲ ꓠꓬꓲ ꓛꓲ ꓡ ꓠꓬ ꓘꓶꓽ-ꓫ ꓡꓱꓸꓸ ꓝꓲꓸ ꓛꓲꓸꓸ ꓡ ꓪ= ꓬꓲꓸ ꓪ ꓠꓬꓲꓽ ꓣꓳ ꓠꓬ ꓧꓪꓽ ꓖꓳ ꓓꓱ ꓔꓬꓹ ꓟꓽ ꓢ- ꓗꓷ ꓡꓰ ꓢꓲ ꓘꓶꓽ- ꓫ ꓡꓱꓸꓸ ꓟꓽ ꓘꓴ ꓗꓷ ꓡꓰꓳ= ꓖꓳ ꓟ ꓔꓯ ꓞꓳ ꓡꓱ ꓕꓲ ꓣꓳ ꓟꓳ ꓡꓰ ꓢꓲ ꓞꓳ ꓡꓱ ꓖꓳ ꓕꓲ ꓣꓳ ꓥ ꓟꓲ ꓠꓲꓹ ꓟ ꓮ ꓘꓶꓸ ꓫꓸ ꓡꓰꓳ= ꓞꓳ ꓡꓱ ꓖꓳ ꓕꓲ ꓣꓳ ꓠꓬ ꓞꓳ ꓘꓹ ꓗꓪ ꓬꓲꓼ ꓙꓰ ꓗꓷ ꓢꓲ ꓞꓳ ꓡꓱ ꓮ ꓙꓵꓽ ꓔꓯ ꓞꓳ ꓟꓳꓽ ꓠꓬꓲꓽ ꓫꓵꓸ ꓟꓸ ꓟꓲꓽ ꓐꓯ ꓟꓸ ꓖꓶˍ ꓡꓳ=ꓖꓳ ꓕꓯ ꓞꓳ ꓡꓱ ꓐꓴ ꓮ ꓙꓵꓽ ꓥ ꓟꓲ ꓞꓳ ꓟꓳꓽ ꓠꓬꓲꓽ ꓣꓳ ꓔꓯ ꓮ ꓘꓶꓸ ꓫꓱꓸ ꓤ  ꓡꓰ ꓢꓲ-ꓸ ꓟꓬꓱꓽ ꓬꓰ ꓙ ꓙꓰꓳ= ꓞꓳ ꓡꓱ ꓐꓴ ꓟꓬꓱꓽ ꓬꓰ ꓙˍ ꓟ ꓔꓯ ꓞꓳ ꓟꓳꓽ ꓠꓬꓲꓽ ꓣꓳ ꓟꓳ ꓡꓰ ꓢꓲ ꓗꓹ ꓛꓲꓽˍ ꓡꓳ=ꓬꓲꓼ ꓤ ꓠꓬꓲ ꓤ ꓐꓴꓳ-ꓸ ꓣꓳ ꓑꓶꓸ ꓓꓴ ꓢꓴ ꓠꓲꓹ ꓟ ꓢꓸꓸ ꓡꓰ ꓝꓲ= ꓮ ꓙꓵꓽ ꓢꓴ ꓔꓯ ꓮ ꓘꓶꓸ ꓫ ꓟꓳ ꓪ=