ꓘꓶꓽ ꓫꓵꓼ ꓡꓵꓺ ꓐꓰ ꓘꓶꓽ ꓫꓵꓼ ꓫꓵꓼ ꓠꓬꓲꓽ ꓗꓴꓸ ꓚ ꓗꓪ (Q & A)

ꓘꓶꓼ ꓫꓵꓼ ꓡꓵꓺ ꓐꓯ ꓟ ꓠꓬ ꓪꓴ-ꓢ ꓐꓰ ꓬꓲ-ꓢꓷ-ꓡꓲ ꓡꓽ ꓞꓳ ꓠꓬꓲ ꓗꓴꓸ ꓚꓸ ꓗꓪ ꓛꓹ ꓔ ꓟ ꓘꓶꓽ ꓫꓵꓼ ꓔꓯ ꓐꓯ ꓠꓲꓹ ꓫꓵꓹ ꓟ ꓥ ꓪ= ꓢꓲ ꓒꓽ ꓬꓰ-ꓢꓴ ꓟꓽ ꓛꓲ ꓡꓹ ꓢꓰꓼ ꓘꓶꓸ ꓕꓯꓽ ꓗꓪ ꓐꓳ ꓔ ꓟ ꓔꓯ ꓘꓶꓼ ꓫꓵꓼ ꓡꓵꓺ ꓐꓰ ꓕꓱ ꓡꓰ ꓐꓯꓹ ꓟ ꓥ ꓪ= ꓘꓶꓼ ꓫꓵꓼ ꓫꓵꓼ ꓐꓯꓹ ꓟ ꓠꓬ ꓢꓲ ꓒꓽ ꓬꓰ-ꓢꓴ ꓛꓲ ꓡ ꓗꓸ ꓠꓯꓸ ꓐꓳ ꓔ ꓟ ꓢꓲꓽ ꓫꓬ ꓕꓳꓽ ꓶ ꓔꓯ ꓘꓶꓽ ꓫꓵꓼ ꓫꓵꓼ ꓐꓯꓹ ꓟ ꓥˍ ꓡꓳ= ꓘꓶꓼ ꓫꓵꓼ ꓡꓵꓺ ꓠꓬ ꓬꓲ ꓚꓰ ꓬꓲ ꓪꓴꓸ ꓔꓶ ꓔ ꓟ ꓥ ꓢꓲ ꓘꓶꓼ ꓫꓵꓼ ꓫꓵꓼ ꓠꓬ ꓖꓳ ꓟ ꓬꓲ ꓚꓰ ꓬꓲ ꓪꓴꓸ ꓔꓶ ꓔ ꓟ ꓕꓯꓽ ꓢꓲ ꓗꓪ ꓟꓬꓽ ꓠꓬꓲ ꓐꓶꓹ ꓠꓬꓲ ꓟꓳ ꓡ ꓠ ꓟꓳꓸ ꓖꓶꓹ ꓟ ꓔꓶ ꓔ ꓟ ꓚꓱꓹ ꓥˍ ꓡꓳ= ꓘꓶꓼ ꓫꓵꓼ ꓡꓵꓺ ꓗꓪ ꓠꓬ ꓮ ꓡꓰ ꓛꓳ ꓠꓹ ꓟ ꓟꓸ ꓖꓶˍ ꓟ ꓥ ꓢꓲ꓾ ꓘꓶꓼ ꓫꓵꓼ ꓫꓵꓼ ꓗꓪ ꓠꓬ ꓖꓳ ꓡꓰ ꓛꓳ ꓠꓬꓲ ꓔ ꓟ ꓠꓯꓸꓼ ꓗꓪ ꓔꓱꓹ ꓚꓵꓹ ꓟ ꓔꓯ ꓟꓳ ꓡꓰ ꓠ ꓟꓳꓸ ꓖꓶꓹ ꓟ ꓚꓱꓹ ꓥˍ ꓡꓳ= ꓘꓶꓼ ꓫꓵꓼ ꓡꓵꓺ ꓗꓪ ꓠꓬ ꓟꓶꓽ ꓠꓶꓹ ꓝꓸ ꓒꓽ ꓐꓴ ꓡꓰ ꓘꓶꓼ ꓫꓵꓼ ꓫꓵꓼ ꓠꓯꓸꓼ ꓗꓪ ꓮ ꓡꓰ ꓒꓬꓱꓼ ꓡ ꓠ ꓗꓸ ꓟ꓾ ꓐꓲ ꓜꓲꓼ ꓡ ꓠꓹ ꓟ ꓟꓶꓽ ꓠꓶꓹ ꓝꓸ ꓦꓹ ꓟ ꓚꓱꓹ ꓥˍ ꓡꓳ=

 ꓘꓶꓼ ꓫꓵꓼ ꓡꓵꓺ ꓗꓪ ꓠꓬ ꓬꓲ-ꓢꓶ-ꓡꓲ ꓡꓽ ꓞꓳ ꓐꓴ ꓚ ꓟꓲꓽ ꓔꓯ ꓪꓴꓸ ꓓꓵ ꓛꓹ ꓢꓲ ꓐꓳ ꓔ ꓟ ꓥˍ ꓡꓳ= ꓘꓶꓼ ꓫꓵꓼ ꓫꓵꓼ ꓗꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓚꓰꓹ ꓔꓯ ꓟꓬꓽ ꓠꓬꓲ ꓪꓴꓸ ꓓꓵ ꓛꓹ ꓢꓲ ꓐꓳ ꓔ ꓟ ꓥˍ ꓡꓳ= ꓘꓶꓼ ꓫꓵꓼ ꓡꓵꓺ ꓗꓪ ꓠꓬ ꓝꓴꓲꓸ ꓪꓴꓸ ꓠꓬꓲ ꓪꓴ-ꓢ ꓡꓰ ꓮ ꓡꓰ ꓢꓲ ꓝꓴꓲꓸ ꓖꓶꓽ ꓠꓹ ꓟ ꓚꓱꓹ ꓔꓯ ꓐꓯꓹ ꓟ ꓥ ꓢꓲ꓾ ꓘꓶꓼ ꓫꓵꓼ ꓫꓵꓼ ꓠꓬ ꓝꓴꓲꓸ ꓙꓳ ꓢꓴ ꓐꓴ ꓔꓯ ꓪꓴ-ꓢ ꓶꓽ ꓤꓼ ꓫꓱꓸ ꓤꓼ ꓪꓴ-ꓢ ꓣꓱꓽ ꓫꓵꓽ ꓑꓯꓹ ꓟꓶꓹ ꓟ꓾ ꓟꓸ ꓖꓶꓹ ꓟ꓾ ꓟꓳꓸ ꓖꓶꓹ ꓟ ꓚꓱꓹ ꓥˍ ꓡꓳ= ꓘꓶꓼ ꓫꓵꓼ ꓡꓵꓺ ꓗꓪ ꓠꓬ ꓟꓯ-ꓫꓵ-ꓬ ꓚꓱꓹ ꓔꓯ ꓟꓳ ꓟꓶꓽ ꓠꓶꓹ ꓝꓸ ꓦ ꓟ ꓥ ꓢꓲ ꓘꓶꓼ ꓫꓵꓼ ꓫꓵꓼ ꓗꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓠꓬ ꓟꓳꓸ ꓖꓶꓹ ꓟ ꓚꓱꓹ ꓥˍ ꓡꓳ= ꓘꓶꓼ ꓫꓵꓼ ꓡꓵꓺ ꓗꓪ ꓠ ꓬ ꓪꓴ-ꓢ ꓙꓵꓽ ꓗ ꓔꓯ ꓖꓶꓹ ꓟ ꓚꓱꓹ ꓥ ꓢꓲ ꓘꓶꓼ ꓫꓵꓼ ꓫꓵꓼ ꓗꓪ ꓠꓬ ꓖꓳ ꓟ ꓪꓴ-ꓢ ꓙꓵꓽ ꓗ ꓠꓯꓸꓼ ꓗꓪ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓲ ꓞꓲꓼ ꓡꓰ ꓝꓲꓹ ꓟ ꓚꓱꓹ ꓥˍ ꓡꓳ=

  ꓘꓶꓼ ꓫꓵꓼ ꓡꓵꓺ ꓗꓪ ꓠꓬ ꓬꓲ-ꓢꓷ-ꓡꓲ ꓡꓽ ꓞꓳ ꓐꓰ ꓪꓴ-ꓢ ꓠꓬꓲ ꓗꓴ ꓚꓸ ꓗꓪ ꓝꓸ ꓡꓯꓽ ꓘꓳꓹ ꓟ ꓚꓱꓹ ꓥ ꓢꓲ꓾ ꓘꓶꓼ ꓫꓵꓼ ꓫꓵꓼ ꓗꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓡꓰ ꓔꓶ ꓔ ꓟ ꓘꓴ ꓜꓲꓼ ꓞꓳꓹ ꓐꓰ ꓝꓸ ꓡꓯꓽ ꓘꓳꓹ ꓟ ꓚꓱꓹ ꓥ ꓢꓲ ꓞꓳ ꓫꓵꓽ ꓞꓳ ꓙꓵꓽ ꓮꓽ ꓙꓵꓽ ꓐꓰ ꓝꓸ ꓡꓯꓽ ꓘꓳꓹ ꓟ ꓚꓱꓹ ꓥˍ ꓡꓳ=  ꓘꓶꓼ ꓫꓵꓼ ꓡꓵꓺ ꓗꓪ ꓠꓬ ꓪꓴ-ꓢ ꓡꓰ ꓟꓲ ꓠꓯ ꓕꓲꓽ ꓒꓳꓹ ꓢꓲ ꓶꓽ ꓥꓳꓽ ꓙꓱꓽ ꓖꓶꓹ ꓟ ꓚꓱꓹ ꓣꓱꓽ ꓛꓵꓽ ꓖꓶꓹ ꓟ ꓚꓱ ꓥ ꓢꓲ ꓘꓶꓼ ꓫꓵꓼ ꓫꓵꓼ ꓗꓪ ꓠꓬ ꓦ ꓕꓲꓽ ꓒꓳꓹ ꓢꓲ ꓶꓽ ꓥꓳꓽ ꓙꓱꓽ ꓖꓶꓹ ꓟ ꓚꓱꓹ ꓥˍ ꓡꓳ= ꓘꓶꓼ ꓫꓵꓼ ꓡꓵꓺ  ꓗꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓡ ꓠꓹ ꓟ ꓚꓱꓹ ꓔꓯ ꓟꓳ ꓐꓳ ꓔ ꓟ ꓥ ꓢꓲ꓾ ꓘꓶꓼ ꓫꓵꓼ ꓫꓵꓼ ꓗꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓠꓬ ꓚꓬꓴꓹ ꓢꓲꓺ ꓒꓽ ꓥꓹ ꓟ ꓔꓯ ꓟꓳꓸ ꓖꓶꓹ ꓟ ꓚꓱꓹ ꓥˍ ꓡꓳ=