ꓝꓲ ꓓꓴ ꓐꓴ ꓙꓵ ꓠꓲꓹ ꓚꓱꓹ (2 ꓕꓱ) Q & A

ꓮꓓ 200 ꓘꓳꓼ ꓖꓼ ꓡꓯꓼ ꓖꓼ ꓙꓵ ꓗꓪ ꓠꓬ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓙꓵ ꓠꓲꓹ ꓚꓱꓹ ꓔꓯ ꓟꓳꓸ ꓘꓴꓹ ꓣꓴꓹ ꓟ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳ ꓡꓹ ꓟ ꓘꓷ ꓡꓰꓳ= ꓔꓲꓺ ꓒꓽ ꓮ-ꓣꓲ-ꓴꓢ ꓐꓯꓹ ꓢꓴ ꓟ ꓡꓰ ꓢꓲ ꓒꓽ ꓬꓰ-ꓢꓴ ꓠꓬ ꓐꓹ ꓐꓽ ꓪꓴ-ꓢ ꓠꓯꓸꓼ ꓗꓪ ꓐꓰ ꓓꓳ ꓡꓹ ꓟ •ꓹ ꓟ ꓪꓴ ꓠꓬꓲ ꓚꓰꓼ ꓔ ꓟ ꓔꓯ ꓐꓯꓹ ꓟꓶ ꓢꓴ ꓥˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓲ ꓠꓬ ꓪꓴ-ꓢ ꓚꓵ ꓚꓵ ꓟꓽ ꓥ ꓐꓰ ꓐꓯ ꓟꓴ ꓫꓱꓹ ꓟ ꓥ ꓡꓳ= ꓢꓲ-ꓫꓬ-ꓟ-ꓦ ꓥˍ ꓟꓲ ꓐꓹ ꓐꓽ ꓐꓰ ꓤꓼ ꓔꓲꓸ ꓗꓪ ꓐꓰ ꓓꓳ ꓡꓹ ꓟ ꓥꓹ ꓟ ꓪꓴꓸ ꓠꓬꓲ ꓚꓰꓼ ꓔ ꓟ ꓔꓯ ꓐꓯꓹ ꓟꓶ ꓢꓴ ꓥˍ ꓡꓳ= ꓪꓴ-ꓢ ꓟꓽ ꓥ ꓐꓰ ꓐꓯ ꓠꓲꓹ ꓫꓵꓹ ꓟ ꓥˍ ꓡꓳ= ꓖꓳ ꓗꓪ ꓚꓳ ꓙꓲ-ꓢꓴ ꓢꓲ ꓤꓼ ꓐꓴ ꓠꓯꓸꓼ ꓗꓪ ꓐꓯ ꓔꓳꓹ ꓡꓯꓽ ꓘꓳꓹ ꓟ꓾ ꓓꓵ ꓙ ꓢꓲ ꓧꓪ ꓡꓹ ꓟ ꓙꓳ ꓡ ꓕꓱ ꓡꓰ ꓗꓷ ꓡꓰˍ ꓡꓳ= ꓖꓳ ꓕꓯ ꓮꓓ-325 ꓘꓳꓼ ꓕꓯ ꓠꓲ-ꓚꓰꓠꓰ ꓡꓳ ꓒꓱ ꓗꓪ ꓓꓽ ꓪꓴꓸ ꓕꓲꓽ ꓧꓪꓹ ꓟ ꓖꓪ ꓙꓱ ꓜꓲꓼ ꓓꓴ ꓔꓯ ꓬꓰ ꓡꓳ ꓡꓰꓳ= ꓠꓲ-ꓚꓰꓠꓰ ꓚꓣꓰꓰꓓ ꓠꓲ-ꓚꓰꓠꓰ ꓙꓵ ꓠꓲꓹ ꓐꓯ ꓢꓲ ꓓꓳ ꓡ ꓓꓴ ꓟ ꓥ ꓐꓶ= ꓖꓳ ꓡꓰ ꓥˍ ꓟꓲ ꓚꓳꓠ-ꓢ-ꓔꓰꓠ-ꓔꓲ-ꓠꓴ-ꓐꓰꓡ ꓡꓳ ꓒꓱ ꓗꓪ ꓓꓽ ꓪꓴꓸ ꓖꓪ ꓙꓱꓹ ꓟ ꓮꓓ 381 ꓘꓳꓼ ꓕꓯꓽ ꓢꓲ ꓡꓶꓸ ꓔ ꓟ ꓫꓬ ꓑꓱ ꓠꓬꓲ ꓔ ꓟ ꓔꓯ ꓬꓰ ꓓꓳ ꓡꓰ ꓟ ꓥ ꓐꓶ=

ꓝꓮꓲ ꓝꓲ ꓓꓴ ꓐꓴ ꓙꓵ ꓠꓲꓹ ꓐꓯꓹ ꓟ ꓮꓑꓳꓢꓔꓡꓰ ꓚꓣꓰꓰꓓ ꓐꓯꓹ ꓟ ꓙꓳˍ ꓡꓳ= ꓖꓳ ꓟ ꓔꓯ ꓠꓬ ꓟꓲ-ꓡꓮꓠ ꓗꓪ ꓟ ꓖꓪ ꓚꓱ ꓜꓲꓼ ꓓꓴ ꓗꓪ ꓮꓓ 390 ꓘꓳꓼ ꓕꓯꓽ ꓠꓲ-ꓚꓰꓠꓰ ꓚꓣꓰꓰꓓ ꓔꓯ ꓓꓴꓸ ꓡꓰ ꓠ ꓐꓳ ꓦꓹ ꓟ ꓥˍ ꓡꓳ= ꓕꓱ 2 ꓟ ꓠꓯꓸꓼ ꓗꓪ ꓟꓽ ꓪꓽ ꓡꓯꓽ ꓘꓳ ꓟꓽ ꓫꓱꓹ ꓡꓯꓽ ꓘꓳꓹ ꓟ ꓠꓬ ꓠꓲ-ꓚꓰꓠꓰ ꓙꓵ ꓠꓲꓹ ꓠꓬ ꓟꓬ ꓠꓬꓲ ꓫꓵ ꓠ ꓐꓳ ꓦꓹ ꓟ ꓥ ꓢꓲ ꓢꓲꓺ ꓒꓽ ꓬꓰ-ꓢꓴ ꓠꓬ ꓪꓴ-ꓢ ꓥˍ ꓡꓳ ꓐꓯꓹ ꓟ ꓔꓯ ꓟꓬ ꓠꓬꓲ ꓟꓳ ꓡ ꓠ ꓐꓳ ꓦꓹ ꓟ ꓥ ꓐꓶ= ꓢꓲ-ꓫꓬ-ꓟ-ꓦ ꓔꓯ ꓥˍ ꓟꓲ ꓟꓬꓽ ꓠꓬꓲ ꓟꓳ ꓡ ꓠ ꓐꓳ ꓔ ꓟ ꓥ ꓐꓶ= ꓝꓲ ꓓꓴ ꓙꓵ ꓠꓲꓹ ꓗꓪ ꓠꓬ ꓢꓲꓺ ꓒꓽ ꓬꓰ-ꓢꓴ ꓔꓯ ꓪꓴ-ꓢ ꓥˍ ꓡꓳ ꓐꓰ ꓐꓳ ꓔ ꓟ ꓟꓽ ꓙꓳ ꓐꓶ= ꓟꓽ ꓐꓳ ꓔ ꓥˍ ꓟꓲ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓬ ꓪꓴ-ꓢ ꓥꓹ ꓟ ꓢꓷꓸ ꓔ ꓡꓳ ꓐꓰ ꓓꓵꓽ ꓙꓽ ꓢꓲ ꓟꓽ ꓐꓳ ꓔ ꓟ ꓥ ꓐꓶ= ꓢꓲ-ꓫꓬ-ꓟ-ꓦ ꓔꓯ ꓥˍ ꓟꓲ ꓖꓳ ꓟ ꓡꓰ ꓐꓰ ꓕꓲꓽ ꓡꓲꓹ ꓥ ꓐꓶ= ꓠꓲ-ꓚꓰꓠꓰ ꓙꓵ ꓠꓲꓹ ꓗꓪ ꓠꓬ ꓬꓲ ꓪꓴꓸ ꓚꓰꓼ ꓔ ꓟ ꓐꓹ ꓐꓽ ꓗꓪ ꓐꓰ ꓒꓬꓱꓼ ꓡˍ ꓡꓳ= ꓪꓴ-ꓢ ꓐꓰ ꓪꓴ-ꓢ ꓥˍ ꓡꓳ= ꓪꓴ-ꓢ ꓚꓵ ꓚꓵ ꓥˍ ꓡꓳ ꓐꓰ ꓐꓳ ꓔ ꓡꓳ= ꓖꓳ ꓡꓰ ꓥˍ ꓟꓲ ꓝꓲ ꓓꓴ ꓐꓴ ꓙꓵ ꓠꓲꓹ ꓗꓪ ꓠꓬ ꓕꓱ ꓟ ꓐꓳ ꓔ ꓟ ꓟꓽ ꓙꓳ= ꓢꓲ-ꓫꓬ ꓟ-ꓦ ꓔꓯ ꓥˍ ꓟꓲ ꓠꓲꓚꓰꓠꓰ ꓙꓵ ꓠꓲꓹ ꓗꓪ ꓠꓬ ꓮ ꓡꓰ ꓐꓳ ꓔ ꓡꓽ ꓐꓯꓹ ꓠꓬ ꓢꓲꓺ ꓒꓽ ꓥꓹ ꓟ ꓢꓲ-ꓫꓬ-ꓟ-ꓦꓹ ꓟꓲ ꓔꓬ ꓡꓳ= ꓬꓲ ꓔꓯ ꓐꓹ ꓐꓽ ꓐꓰ ꓤꓽ ꓔꓲꓸ ꓐꓰ ꓕꓲꓽ ꓡꓰꓼ ꓐꓰ ꓫꓱꓸ ꓖꓶ ꓡꓳ= ꓕꓱ ꓕꓲ ꓘꓴꓸ ꓗꓪ ꓢꓲ-ꓫꓬ-ꓟ-ꓦ ꓔꓯ ꓪꓴ-ꓢ ꓐꓳ ꓔ ꓟ ꓟꓽ ꓙꓳ ꓥˍ ꓟꓲ ꓪꓴ-ꓢ ꓐꓰ ꓕꓲꓽ ꓡꓲꓼ ꓫꓱ ꓖꓶ ꓡꓳ ꓐꓰ ꓐꓳ ꓔ ꓡꓳ= ꓖꓳ ꓡꓰ ꓥˍ ꓟꓲ ꓝꓲ ꓓꓴ ꓐꓴ ꓙꓵ ꓠꓲꓹ ꓗꓪ ꓠꓬ ꓕꓱ ꓟ ꓐꓳ ꓔ ꓟ ꓟꓽ ꓙꓳ=