ꓟꓲ-ꓡꓲ-ꓬ - ꓢꓲꓽ ꓫꓬ ꓕꓳ ꓶ ꓗꓪ ꓟ ꓟꓷꓽ ꓠꓷꓹ ꓝ ꓟ

ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓟꓲ-ꓡꓲ-ꓬ ꓠꓬ ꓮꓽ ꓟ ꓥ ꓡ?

ꓢꓲꓽ ꓫꓬ ꓕꓳ ꓶ ꓗꓪ ꓟꓲ-ꓡꓲ-ꓬ ꓠꓬ ꓟꓳ-ꓫꓲ ꓬꓲ ꓮ ꓝꓲ ꓥ ꓡꓳ= ꓓꓳ ꓙꓰ ꓕꓳ ꓶ 15ꓽ20 ꓗꓪ ꓬꓲ ꓔꓯ ”ꓪꓴ-ꓢ ꓬꓲ ꓟꓷ ꓠꓷꓹ ꓝ ꓟ ꓟꓲ-ꓡꓲ-ꓬ” ꓐꓰ ꓐꓯ ꓔ ꓡꓳ= ꓬꓲ ꓠꓬ ꓟꓳ-ꓫꓲ ꓐꓰ ꓬꓲ-ꓢꓷ-ꓡꓰ ꓐꓴ ꓬꓲ-ꓙꓲ ꓟꓵꓽ ꓗꓪ ꓐꓰ ꓓꓳ ꓙꓰˍ ꓟ ꓗꓪ ꓬꓲ ꓠꓬ ꓬꓳ ꓚꓵˍ ꓟ ꓕꓲ ꓣꓳ ꓥ ꓡꓳ=

ꓟꓲ-ꓡꓲ-ꓬ ꓠꓬ ꓠꓲ-ꓡꓳ ꓬꓲꓻ ꓙꓬ ꓘꓶꓽ ꓗꓪ ꓟ ꓟꓳꓼ ꓟꓲ ꓗꓪ ꓬꓲ ꓠꓬꓲ ꓤ ꓟꓳ-ꓫꓲ ꓔꓯ ꓡꓳꓸ ꓔꓬ ꓟ ꓮ ꓝꓲ ꓕꓲ ꓣꓳ ꓥ ꓡꓳ= ꓩ-ꓣꓳ ꓪ ꓔꓲ ꓡꓰ ꓦꓲ-ꓐꓱ-ꓣꓴ ꓮ ꓐꓲ ꓐꓴ ꓔꓯ ꓬꓲꓻ ꓙꓬ ꓘꓴꓽ ꓗꓪ ꓡꓳ ꓧꓳꓽ ꓗꓷ꓾ ꓐꓯ ꓟ ꓕꓵꓼ ꓪ ꓗꓪ ꓐꓰ ꓡꓲꓹ ꓙꓰ ꓗꓷ ꓟꓶ ꓠꓹ ꓟ ꓟꓳ-ꓫꓲ ꓬꓲ ꓟꓹ ꓟ ꓠꓬ ꓟꓳ-ꓫꓲ ꓔꓯ ꓬꓲꓻ ꓑ ꓒꓴꓽ ꓖꓶꓽ ꓐꓻ ꓗꓪ ꓧꓳꓽ ꓢꓲ ꓬꓲꓻ ꓙꓬ ꓘꓶꓽ ꓗꓪ ꓟ ꓟꓳꓼ ꓐꓬꓼ ꓗꓪ ꓚꓵ ꓔ ꓡꓳ(ꓓꓳ ꓙꓰ 1ꓽ22-2ꓽ4)= ꓬꓲ ꓮ ꓝꓲ ꓟꓲ-ꓡꓲ-ꓬ ꓡꓰ ꓶꓽ ꓤ ꓗꓪ ꓐꓰ ꓬꓲ ꓠꓬꓲ ꓤ ꓔꓯ ꓡꓳꓸ ꓔꓬ ꓕꓯ ꓪ ꓔꓲ ꓩ-ꓣꓳ ꓬꓲ ꓮ ꓟꓲꓽ ꓠꓬ ꓟꓳ-ꓫꓲ ꓔꓯ ꓟꓳꓻ ꓡꓰ ꓠꓬꓲ ꓬꓲ ꓔꓯ ꓫꓱꓸ ꓤ ꓡꓳ= ꓖꓳ ꓕꓯ ꓟꓲ-ꓡꓲ-ꓬ ꓠꓬ ꓞꓼ ꓐꓰ ꓔꓷꓹ ꓡ ꓢꓲ ꓤ ꓠꓱ ꓤ ꓔꓯ ꓮ ꓚꓵꓹ ꓖꓶ ꓛꓵꓼ ꓠꓹ ꓟ ꓦꓲ-ꓐꓱ-ꓣꓴ ꓤ ꓟꓶ ꓤ ꓕꓲ ꓣꓳ ꓧꓪ ꓙ ꓠꓯꓹ ꓡ? ꓐꓰ ꓠꓺ ꓠꓬꓲˍ ꓡꓳ= ꓖꓳ ꓡꓱ ꓠꓬꓲ ꓪ ꓔꓲ ꓩ-ꓣꓳ ꓬꓲ ꓮ ꓟꓲꓽ ꓥˍ ꓟꓲ ꓧꓪ ꓙꓰ꓾ ꓐꓯ ꓕꓯ ꓟꓲ-ꓡꓲ-ꓬ ꓠꓬ ꓬꓲ ꓟꓹ ꓟ ꓔꓯ ꓘꓴ ꓙꓰˍ ꓡꓳ= ꓩ-ꓣꓳ ꓪ ꓔꓲ ꓮ ꓟꓲꓽ ꓥˍ ꓟꓲ ꓟꓳ-ꓫꓲ ꓔꓯ ꓦꓵꓻ ꓔ ꓟ ꓬꓲ ꓟꓹ ꓟ ꓔꓯ ꓤ ꓠꓱ ꓔꓯ ꓠꓬꓲꓺ ꓡꓳꓸ ꓗꓪꓼ ꓫꓵ ꓢꓲ ꓪꓴꓽ ꓡˍ ꓕꓯ ꓬꓲ ꓔꓬ ꓗꓪ ꓧꓳꓽ ꓔꓯꓹ ꓡ ꓠꓹ ꓟ ꓕꓵꓼ ꓪ ꓖꓶˍ ꓡꓳ= ꓪꓴ-ꓢ ꓣꓱꓽ ꓛꓰꓽ ꓗꓪ ꓐꓰ ꓟꓲ-ꓡꓲ-ꓬ ꓠꓬ ꓮ ꓐꓲ ꓤ ꓟꓳ-ꓫꓲ ꓔꓯ ꓚꓬꓴꓸ ꓙ ꓗꓷꓳ=(ꓓꓳ ꓙꓰ 2ꓽ5-10)

ꓟꓲ-ꓡꓲ-ꓬ ꓔꓯ ꓯ-ꓣꓷ ꓟꓬꓱꓺ ꓔ ꓟ ꓠꓬꓲꓺ ꓤ ꓕꓲ ꓣꓳ ꓙꓳˍ ꓢꓰꓽ ꓡꓳ= ꓬꓲ ꓪ ꓮꓽ ꓐ ꓮ ꓟ ꓥ ꓟ꓾ ꓧꓷ-ꓟꓷ ꓐꓰ ꓬꓳ-ꓘꓷ-ꓐꓰ(ꓓꓳ ꓙꓰ 6ꓽ20) ꓐꓴ ꓠꓬ ꓬꓲ-ꓢꓷ-ꓡꓰ ꓞꓳ ꓫꓵꓽ ꓡꓱ-ꓬꓲ ꓕꓲ ꓪꓳꓼ ꓗꓪ ꓟ ꓥ ꓡꓳ(ꓓꓳ ꓙꓰ 2ꓽ1)= ꓪꓴ-ꓢ ꓠꓬ ꓟꓳ-ꓫꓲ꓾ ꓟꓲ-ꓡꓲ-ꓬ ꓐꓰ ꓯ-ꓣꓷ ꓐꓴ ꓔꓯ ꓬꓲ ꓟꓬꓱꓽ ꓬꓰ ꓠꓹ ꓟ ꓕꓲ ꓪ ꓣꓱꓽ ꓗꓷ ꓢꓲ ꓬꓲ-ꓢꓷ-ꓡꓰ ꓐꓴ ꓬꓲ-ꓙꓲ ꓟꓵꓽ ꓗꓪ ꓚꓳꓻ ꓑ ꓬꓰˍ ꓟ ꓗꓪ ꓐꓰ ꓪꓴ-ꓢ ꓡꓰ ꓙ ꓟꓳ ꓘꓶꓽ ꓖꓶ ꓔ ꓟ ꓘꓷ-ꓠ ꓟꓵꓽ ꓗꓪ ꓧꓳꓽ ꓙꓰ ꓠꓹ ꓟ ꓬꓲ ꓪ ꓢ ꓣꓳ ꓔꓯ ꓣꓱꓽ ꓗꓷꓳ= ꓬꓲꓻ ꓡꓴ ꓐꓱ ꓗꓪ ꓟ ꓟꓲ ꓙꓴ ꓗꓪ ꓫꓱꓽ ꓗꓳꓸ ꓙꓰ ꓗꓸ ꓠꓯ ꓬꓲ-ꓙꓲ ꓟꓯꓼ ꓐꓴ ꓬꓲꓻ ꓙꓬ ꓟꓷꓸ ꓢꓲ ꓫꓵꓻ ꓗꓷ ꓟ ꓔꓯ ꓟꓳꓻ ꓡꓰ ꓗ ꓠꓯ꓾ ꓟꓲ-ꓡꓲ-ꓬ ꓠꓬ ꓤ ꓟꓶ ꓤ ꓐꓴ ꓔꓯ ꓧꓳꓽ ꓪꓴꓸ ꓟꓴ ꓢꓲ ꓓꓽ ꓘꓴ ꓕꓲ ꓟ ꓔꓯ ꓢꓲ ꓟꓴꓽ ꓖꓪ ꓖꓪ ꓠꓬꓲ ꓗꓪ ꓛꓰꓹ ꓛꓰꓹ ꓠꓬꓲ ꓬꓰ ꓢꓲ ꓪꓴ-ꓢ ꓔꓯ ꓫꓱꓸ ꓖꓶˍ ꓡꓳ(ꓓꓳ ꓙꓰ 15ꓽ20-22) ꓟꓲ-ꓡꓲ-ꓬ ꓟꓴ ꓖꓪ ꓔꓯ ꓓꓳ ꓙꓰ 15ꓽ16 ꓗꓪ ꓟꓸ ꓖꓶ ꓔ ꓡꓳ= “ꓬꓰ-ꓧꓳ-ꓧꓪ ꓠꓬ ꓪꓽ ꓠꓬꓲ ꓠꓬꓲˍ ꓡꓰꓽ ꓧꓪꓸ ꓡꓰ ꓠꓬꓲ ꓬꓲ ꓔꓯ ꓫꓱꓸ ꓖꓶ= ꓢꓲ ꓒꓽ ꓡꓰ ꓮ ꓟꓴꓽˍ ꓐꓰ ꓮ ꓟꓴꓽ ꓜꓶꓽ ꓟꓯꓼ ꓔꓯ ꓬꓲꓻ ꓡꓴꓽ ꓐꓱ ꓗꓪ ꓡꓳ ꓧꓳꓽ ꓗꓷ ꓠꓬꓲ ꓬꓲ ꓔꓯ ꓓꓳ ꓟꓴ”= ꓢꓲꓽ ꓫꓬ ꓕꓳ ꓶ ꓕꓱ ꓕꓲ ꓕꓱ ꓗꓪ ꓟꓲ-ꓡꓲ-ꓬ ꓔꓯ ꓤ ꓟꓶ ꓤ ꓐꓴ ꓘꓴꓽ ꓗꓪ ꓬꓲ ꓪꓴꓸ ꓟ ꓟꓷ ꓠꓷꓹ ꓝ ꓟ ꓟꓬꓱ ꓓꓳꓽ ꓖꓶ ꓔ ꓡꓳ= ꓟꓷꓽ ꓠꓷꓹ ꓝ ꓟ ꓥ ꓟ ꓠꓱꓸ ꓐꓯ ꓐꓴ ꓠꓬ ꓔꓷ-ꓐꓳ-ꓣ (ꓐꓯ ꓟꓴ ꓫꓬꓹ ꓒ 4ꓽ4)꓾ ꓩꓴ-ꓡ-ꓓ (2 ꓪ ꓔꓲ 22ꓽ14)꓾ ꓬꓲ-ꓢ-ꓬ ꓬꓲ ꓦꓲ ꓢꓲ ꓟ (ꓬꓲ-ꓢ-ꓬ 8ꓽ3)꓾ ꓬꓹ-ꓠ ꓮꓠꓠꓮ (ꓡꓴ-ꓘ 2ꓽ36)꓾ ꓝꓮꓲ ꓒꓲ-ꓡꓲ ꓬꓲ ꓮ ꓟꓲꓽ ꓡꓲꓸ ꓣꓳ (ꓝꓲ ꓓꓴ 21ꓽ9) ꓐꓴ ꓥ ꓡꓳ=

ꓖꓳ ꓗ ꓠꓯꓸ ꓟꓲ-ꓡꓲ-ꓬ ꓠꓬ ꓟꓳ-ꓫꓲ ꓡꓰ ꓘꓴ-ꓫꓵ-ꓟ ꓕꓲ ꓣꓳ ꓔꓯ ꓡꓯ ꓒꓯꓹ ꓝ ꓗꓷ ꓟ ꓑꓶꓸ ꓓꓴ ꓟꓳ-ꓫꓲ ꓔꓯ ꓙꓽ ꓘꓶꓽˍ ꓡꓳ= (ꓑ ꓫꓬ ꓵ 12ꓽ1) ꓬꓰ-ꓧꓳ-ꓧꓪ ꓪꓴ-ꓢ ꓠꓬ ꓟꓳ-ꓫꓲ ꓕꓲ ꓣꓳ ꓔꓯ ꓡꓰꓽ ꓫ ꓕꓱˍ ꓡ? ꓣꓳ ꓔꓯˍ ꓟꓲ ꓫ ꓕꓱˍ ꓡꓳ ꓟꓽ ꓥ ꓡ? ꓐꓰ ꓐꓯ ꓡꓳ= ꓪꓴ-ꓢ ꓡꓰ ꓬꓲ ꓡ ꓞꓳ ꓔꓯ ꓧꓳꓽ ꓪꓴꓸ ꓟꓴ ꓠꓹ ꓟ ꓟꓳ-ꓫꓲ ꓔꓯ ꓢꓲꓺ ꓔ ꓟ ꓑꓶꓸ ꓓꓴ ꓟꓲ-ꓡꓲ-ꓬ ꓡꓰ ꓱꓽ ꓠꓱ:ˍ ꓠꓬꓲ ꓪꓴ-ꓢ ꓠꓬ ꓠꓲꓹ ꓟ ꓦꓶ ꓡꓰ ꓢꓲ ꓟꓲ-ꓡꓲ-ꓬ ꓔꓯ ꓔꓸ ꓟ ꓩꓴꓸ ꓓꓲꓻ ꓡꓰ ꓝꓲˍ ꓡꓳ= ꓖꓳ ꓟ ꓔꓯ ꓟꓳꓻ ꓡꓰ ꓕꓯ ꓯ-ꓣꓷ ꓠꓬ ꓬꓲ ꓪ ꓐꓯ ꓛꓬ ꓡꓰ ꓟ ꓑꓶꓸ ꓓꓴ ꓥ ꓡꓳ꓾ ꓐꓰ ꓓꓵꓽ ꓙ ꓟꓶˍ ꓡꓳ= ꓟꓲ-ꓡꓲ-ꓬ ꓠꓬꓲꓺ ꓤ ꓟꓳ-ꓫꓲ ꓥˍ ꓟꓲ ꓟꓲ-ꓡꓲ-ꓬ ꓔꓯ ꓔ ꓟ ꓩꓴꓸ ꓓꓲꓻˍ ꓟ ꓗꓪ ꓐꓰ ꓓꓻ ꓡꓰ ꓠꓹ ꓟ ꓪꓴ-ꓢ ꓔꓯ ꓘꓴ ꓓꓰꓽˍ ꓡꓳ (ꓑ ꓫꓬꓼ ꓵ 12ꓽ13)= ꓕꓲ ꓠꓽ ꓐꓱ ꓗꓷ ꓗ ꓠꓯꓸ ꓟꓲ-ꓡꓲ-ꓬ ꓓꓻ ꓡꓰ ꓢꓲ ꓠꓽ ꓒꓱ ꓔꓶꓸ ꓗꓪ ꓬꓲꓼ ꓡˍ ꓡꓳ= ꓖꓳ ꓗ ꓠꓯꓸ ꓟꓳ-ꓫꓲ ꓐꓰ ꓬꓲ-ꓢꓷ-ꓡꓰ ꓑ ꓫꓬ ꓐꓴ ꓡꓲ ꓛꓲ ꓗꓪ 40 ꓘꓳꓼ ꓶ ꓚꓳ ꓗꓷ ꓗ ꓠꓯꓸ ꓟꓲ-ꓡꓲ-ꓬ ꓠꓬ ꓡꓲ ꓛꓲ ꓗꓪ ꓫꓵꓻꓳ= ꓬꓲ ꓪ ꓐꓴ ꓱꓽ ꓠꓱꓽˍ ꓟ ꓐꓰ ꓙꓵꓻ ꓠꓲꓹ ꓢꓯꓼ ꓐꓽˍ ꓟ ꓪꓴꓸ ꓠꓬꓲ ꓬꓲ-ꓢꓷ-ꓡꓰ ꓞꓳ ꓫꓵꓽ ꓬꓲ ꓪꓴꓸ ꓕꓲ ꓪꓳꓼ ꓐꓴ ꓠꓬ ꓙ ꓟꓳ ꓘꓶꓽ ꓖꓶ ꓔ ꓟ ꓟꓵꓽ ꓗꓪ ꓟꓽ ꓓꓵꓽ ꓪ ꓡꓰ= ꓖꓳ ꓟ ꓘꓴꓽ ꓗꓪ ꓟꓷꓽ ꓠꓷꓹ ꓝ ꓟ ꓟꓲ-ꓡꓲ-ꓬ ꓥˍ ꓟꓲ ꓐˍ ꓟ ꓥ ꓡꓳ= ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓠꓬ ꓘꓷ-ꓓꓰ-ꓫꓵ ꓗꓪ ꓬꓲꓼ ꓡ ꓔꓬ ꓕꓯ ꓞꓲꓼ ꓪꓴꓽ ꓢꓴ ꓐꓴ ꓠꓬ ꓡꓲ ꓛꓲ ꓗꓪ ꓫꓵꓻ ꓖꓴ ꓡꓰꓳ= ꓟꓲ-ꓡꓲ-ꓬ ꓥˍ ꓟꓲ ꓫꓵꓻ ꓢꓲ ꓬꓲ ꓔꓯ ꓖꓳ ꓗꓪ ꓔꓵꓸ ꓗꓷˍ ꓡꓳ (ꓑ ꓫꓬꓼ ꓵ 20ꓽ1)=

ꓕꓱ ꓟ ꓠꓬ ꓣꓳ ꓔꓯ ꓪꓴ-ꓢ ꓡꓰ ꓣꓳ ꓠꓶꓽ ꓛꓳꓽ ꓔꓯ ꓟꓽ ꓟꓬ ꓔꓳꓹ ꓠꓹ ꓟ꓾ ꓪꓴ-ꓢ ꓡꓰ ꓠꓱꓸ ꓐꓯ ꓕꓲ ꓣꓳ ꓔꓯ ꓘꓴˍ ꓕꓯ ꓖꓳ ꓕꓲ ꓣꓳ ꓔꓯ ꓟꓽ ꓟꓬ ꓔꓳꓹ ꓠꓹ ꓟ ꓟꓸ ꓖꓶ ꓔꓬ ꓟ ꓥ ꓡꓳ (ꓕꓲ-ꓔꓳ 3ꓽ1-15꓾ ꓬ-ꓗꓴ 1ꓽ26꓾ 4ꓽ11-12꓾ ꓬꓲ-ꓩꓴ-ꓢꓳ 4ꓽ31꓾ ꓒꓲ-ꓡꓲ-ꓒꓲ 4ꓽ8)= ꓱꓽ ꓠꓱꓽˍ ꓟ ꓟꓽ ꓬꓰ ꓬꓰ꓾ ꓪꓴ-ꓢ ꓬꓲ ꓚꓳ ꓑ ꓕꓲ ꓣꓳˍ ꓡꓰ ꓐꓰ ꓠꓵꓻ ꓠꓲꓹ ꓠꓯꓸꓼ ꓗꓪ ꓢꓯꓸ ꓔꓬ ꓪˍ ꓟ ꓔꓶꓺ ꓙꓱꓼ ꓐꓴ ꓔꓯ ꓬꓲ-ꓢꓷ-ꓡꓰ ꓡ ꓞꓳ ꓐꓴ ꓔꓯ ꓟꓸ ꓖꓶ ꓠꓹ ꓟ ꓙꓵꓽ ꓪ ꓟꓶ ꓡꓰ ꓗꓷꓳ= ꓬꓲ ꓕꓲ ꓤꓶꓻ ꓡꓱꓸꓼ ꓗꓪ ꓥ ꓟꓲ ꓖꓳ ꓟˍ ꓡꓰ ꓐꓰ ꓛꓳ ꓫꓱꓽ ꓗꓷꓳ= ꓖꓳ ꓡꓱ ꓥˍ ꓟꓲ ꓟꓳ-ꓫꓲ ꓤ ꓟꓶ ꓐꓰ ꓗꓴꓸ ꓙꓲ ꓙꓳ ꓢꓲ ꓟꓬꓱꓽ ꓐꓬꓱꓽ ꓘꓶꓽ ꓕꓱ ꓟ ꓗꓪ ꓫꓴꓻ ꓡꓰꓳ=

ꓣꓳ ꓐꓴ ꓥˍ ꓟꓲ ꓣꓳ ꓗꓳ ꓡꓳ ꓗꓪ ꓟ ꓱꓽ ꓠꓱꓽ ꓔꓬ ꓢꓴ ꓐꓴ ꓐꓰ ꓗꓳꓹ ꓢꓴ ꓐꓴ ꓔꓯ ꓢꓲꓺ ꓒ ꓬꓰ-ꓢꓴ ꓬꓲ ꓚꓳ ꓑ ꓕꓲ ꓣꓳ ꓒꓬꓱꓼ ꓪˍ ꓟ ꓠꓬ ꓮ ꓡꓰ ꓫꓵꓽ ꓥ ꓡ? ꓐꓯ ꓟ ꓔꓯ ꓟꓳꓸ ꓖꓶ ꓠꓹ ꓟ ꓙꓵꓽ ꓪ ꓟꓶˍ ꓡꓳ= ꓣꓳ ꓔꓯ ꓖꓶꓽ ꓔ ꓟ ꓥ ꓡꓳ=ꓣꓳ ꓠꓬ ꓣꓳ ꓠꓵꓻ ꓠꓲꓹ ꓐꓰ ꓚꓳ ꓑ ꓬꓰˍ ꓟ ꓗꓪ ꓐꓰ ꓢꓲ ꓤ ꓐꓴ ꓔꓯ ꓬꓰ-ꓢꓴ ꓐꓰ ꓠꓶꓽ ꓡꓰ ꓝꓲ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ= ꓣꓳ ꓚꓲ ꓛꓬ ꓠꓬ ꓢꓲ ꓒ ꓔꓯ ꓐꓰ ꓶꓽ ꓤ ꓕ ꓗꓷ ꓡꓰ ꓝꓲ=