ꓟꓷꓽ ꓠꓷꓹ ꓝ ꓟ ꓬꓹ-ꓠ ꓟꓸ ꓟꓲꓽ

ꓢꓲꓽ ꓫꓬ ꓕꓳ ꓶ ꓗꓪ ꓬꓹ-ꓠ ꓠꓬ ꓮꓽ ꓟ ꓥ ꓡ?

ꓬꓹ-ꓠ ꓔꓯ ꓢꓲꓽ ꓫꓬ ꓕꓳꓽ ꓶ ꓗꓪ ꓟꓷꓽ ꓠꓷꓹ ꓝ ꓟ ꓕꓲ ꓣꓳ ꓥ ꓡꓳ꓾ ꓐꓰ ꓟꓳꓸ ꓖꓶ ꓔ ꓟ ꓥ ꓢꓲ ꓠꓬꓲ꓾ ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓤ ꓠꓱ ꓤ ꓕꓯ ꓜꓲ ꓡꓯ ꓘꓳ ꓪ ꓢꓴ ꓕꓲ ꓣꓳ ꓥ ꓡꓳ= ꓬꓲ ꓠꓬ ꓩ-ꓠꓴ-ꓡꓲ ꓬꓲ ꓮ ꓟꓲꓽ ꓥ ꓢꓲ ꓬꓹ-ꓫꓱ ꓕꓲ ꓪꓳꓼ ꓢꓴ ꓥ ꓡꓳ= ꓬꓹ-ꓠ ꓐꓯ ꓟ ꓠꓬ “ꓣꓱꓽ ꓛꓰꓽ” ꓔꓯ ꓐꓯ ꓟ ꓥ ꓪ= ꓬꓹ-ꓠ ꓬꓲ ꓟꓸ ꓟꓲꓽ ꓔꓯ ꓡꓴ-ꓘ ꓕꓳꓽ ꓶ ꓬꓲ ꓝꓲꓸ 3 ꓝꓲ ꓗꓪ ꓟꓳꓻ ꓪ ꓓꓹ ꓟ ꓥ ꓡꓳ= ꓢꓲꓽ ꓫꓬ ꓦꓲ ꓗꓪ ꓬꓹ-ꓠ ꓠꓬ ꓮ ꓐꓲ ꓤ ꓬꓰ-ꓢꓴ ꓔꓯ ꓟꓳꓻ ꓡꓰ ꓕꓯ ꓬꓲ ꓤꓶꓻ ꓠꓬ ꓣꓱꓽ ꓛꓰꓽ ꓐꓰ ꓐꓲ ꓞꓹ ꓡꓰ ꓟ ꓔꓯ ꓣꓳ ꓟꓳꓻ ꓪ ꓓꓹ ꓟ ꓥ ꓡꓳ=

ꓡꓴ-ꓘ 2ꓽ36 ꓗꓪ ꓟꓷꓽ ꓠꓷꓹ ꓝꓸ ꓟ꓾ ꓬꓹ-ꓠ ꓟꓬꓱꓽ ꓔ ꓟ ꓞꓳ ꓟꓳꓽ ꓟ ꓕꓲ ꓣꓳ ꓖꓳ ꓗꓪ ꓔꓬ ꓡꓳ꓾ ꓐꓰ ꓐꓯ ꓔ ꓡꓳ= ꓬꓹ-ꓠ ꓠꓬ ꓮ ꓟꓬꓹ ꓣꓳ ꓟꓽ ꓙꓳ ꓟ ꓤ ꓟꓶ ꓤ ꓟꓷꓽ ꓠꓷꓹ ꓝ ꓢꓴ ꓐꓴ ꓘꓴꓽ ꓗꓪ ꓟ ꓕꓲ ꓣꓳ ꓥ ꓡꓳ= ꓠꓱꓸ ꓐꓯ ꓐꓴ ꓠꓬ꓾ ꓟꓳ-ꓫꓲ ꓬꓲ ꓮ ꓝꓲ ꓟꓲ-ꓡꓲ-ꓬ (ꓓꓳ ꓙꓰ 15ꓽ20)꓾ ꓐꓯ ꓟꓳ ꓫꓬ ꓟ ꓔꓷ-ꓐꓳ-ꓣ(ꓐꓯ ꓟꓳ ꓫꓬꓹ ꓒ 4ꓽ4)꓾ ꓫꓲ-ꓡꓷ-ꓠꓷ ꓬꓲ ꓤ ꓟꓶ ꓩꓴ-ꓡ-ꓓ ( 2 ꓚ ꓟꓲꓽ 34ꓽ22)꓾ ꓬꓲ-ꓢ-ꓬ ꓬꓲ ꓤ ꓟꓶ (ꓬꓲ-ꓢ-ꓬ 8ꓽ2)꓾ ꓐꓰ ꓒꓲ-ꓡꓲ ꓬꓲ ꓮ ꓟꓲꓽ ꓡꓲꓸ ꓣꓳ (ꓝꓲ ꓓꓴ 21ꓽ9) ꓐꓴ ꓥ ꓡꓳ=

“ꓬꓲ ꓠꓬ ꓞꓳ ꓟꓳꓽ ꓟ ꓥ ꓡꓳ (ꓡꓴ-ꓘ 2ꓽ36-37)= ꓬꓲ ꓠꓬ ꓬꓲ ꓦꓲ ꓢꓲ ꓒ ꓐꓰ 7 ꓘꓳꓼ ꓛꓲˍ ꓡꓰꓽ ꓔꓬ ꓗꓷ ꓢꓲ ꓗ ꓠꓯꓸ ꓬꓲ ꓕꓲ ꓤꓶꓻ ꓡꓱꓸꓼ ꓗꓪ ꓬꓲ ꓠꓬ ꓟꓶꓽ ꓛꓵꓼ ꓟ ꓒꓬꓱꓼ ꓡ ꓗꓷ ꓟ ꓥ ꓡꓳ= ꓬꓲ ꓠꓬ ꓟꓶꓽ ꓛꓵꓼ ꓟ ꓤꓶ ꓗꓪ ꓬꓲ ꓦꓬꓼ ꓠꓬꓲ ꓟꓶ ꓤ ꓗꓳꓸ ꓗꓷ ꓢꓲ ꓢꓲ ꓫꓬ ꓦꓲ ꓗꓪ ꓪꓴ-ꓢ ꓟꓲ ꓙꓬ ꓗꓪ ꓟꓬꓱꓽ ꓬꓰ ꓗꓷ ꓟ ꓥ ꓡꓳ=

ꓬꓲ ꓠꓽ ꓮ ꓕꓯˍ ꓟꓲ ꓪꓴ-ꓢ ꓟꓲꓽ ꓙꓬ ꓗꓪ ꓐꓰ ꓟꓽ ꓓꓳ ꓙꓰ ꓙꓰ꓾ ꓜꓽ ꓓꓴ ꓚꓲꓸˍ ꓟˍ ꓐꓰ ꓪꓽ ꓘꓴˍ ꓟ ꓡꓰ ꓟꓳꓼ ꓡꓳ ꓢ ꓘꓪ ꓪꓴ-ꓢ ꓔꓯ ꓣꓱꓽ ꓙˍ ꓡꓳ” (ꓡꓴ-ꓘ 2ꓽ37)= ꓬꓲ ꓠꓬ ꓮ ꓡꓰ ꓗꓪˍ ꓟꓲ ꓟꓽ ꓙꓰ꓾ ꓟꓽ ꓠꓽ ꓠꓽ ꓪꓴ-ꓢ ꓔꓯ ꓣꓱꓽ ꓙˍ ꓟ ꓪꓴꓸ ꓠꓬꓲ ꓡꓳꓹ ꓬꓰˍ ꓕꓯ ꓬꓲ ꓠꓬ ꓚꓬꓴꓸ ꓢꓲꓺ ꓒ ꓔꓯ ꓟꓳꓻ ꓪ ꓡꓰ ꓟ ꓠꓬ ꓬꓲ ꓐꓱ ꓶ ꓡꓯꓼ ꓫꓴ ꓓꓽ ꓟ ꓕꓲ ꓟ ꓥ ꓡꓳ= ꓬꓲ ꓮ ꓟꓬꓹ ꓘꓳꓼ ꓣꓱꓽ ꓙ ꓗꓷ ꓟ ꓠꓬ ꓬꓲ ꓟꓶ ꓤ ꓥꓳ ꓡꓳꓸ ꓔꓬ ꓟ ꓟꓲ-ꓢ-ꓬ ꓔꓯ ꓬꓲ ꓟꓳꓻ ꓪ ꓡꓰ ꓟ ꓥ ꓡꓳ=

ꓟ-ꓡꓲ ꓐꓰ ꓬꓳ-ꓢꓷ ꓠꓬ ꓘꓶꓽ ꓫꓵꓼ ꓡꓵ ꓦꓬꓼ ꓠꓬꓲ ꓗꓪ ꓟ ꓢꓲ ꓒ ꓙꓵꓽ ꓗ ꓗꓪ ꓐꓯ ꓔ ꓟ ꓕꓲ ꓡꓰꓹ ꓤ ꓠꓱ ꓤ ꓬꓰ-ꓢꓴ ꓐꓰ ꓕꓲ ꓪ ꓢꓲ ꓫꓬ ꓦꓲ ꓗꓪ ꓡˍ ꓡꓳ= ꓢꓲꓽ ꓫꓬꓹ ꓟ ꓔꓲ ꓓꓴ ꓐꓰ ꓬꓲ ꓪ ꓤ ꓪꓴꓽ ꓥ ꓟ ꓬꓰ-ꓢꓴ ꓔꓯ ꓪꓴ-ꓢ ꓔꓯ ꓔꓲ ꓖꓶ ꓠꓹ ꓟ ꓥ ꓡꓳ= ꓬꓲ ꓪ ꓖꓳ ꓗꓪ ꓔꓬ ꓕꓯ ꓢꓲ-ꓟꓰ ꓟꓬꓱꓺ ꓔ ꓢꓴ ꓕꓲ ꓣꓳ ꓠꓬ ꓬꓰ-ꓢꓴ ꓔꓯ ꓬꓲ ꓡꓯꓼ ꓖꓳ ꓗꓪ ꓔꓯꓹ ꓔ ꓢꓲ ꓪꓴ-ꓢ ꓔꓯ ꓫꓱꓸ ꓖꓶ ꓢꓲ ꓠꓬꓲ ꓟ-ꓡꓲ ꓐꓰ ꓗꓴꓸ ꓙꓲ ꓙꓳ ꓢꓲ ꓟꓷꓽ ꓠꓷꓹ ꓝ ꓖꓶˍ ꓡꓳ= ꓖꓳ ꓕꓲ ꓙꓵꓹ ꓗꓪ ꓬꓹ-ꓠ ꓥˍ ꓟꓲ ꓢꓲꓽ ꓫꓬ ꓦꓲ ꓗꓪ ꓓꓵꓽ ꓡˍ ꓡꓳ= ꓬꓲ ꓠꓬ ꓟꓶ ꓤ ꓥꓳ ꓡꓳꓸ ꓔꓬ ꓟ ꓚꓬꓴꓸ ꓢꓲꓺ ꓒ ꓠꓬ ꓬꓰ-ꓢꓴ ꓥ ꓟ ꓔꓯ ꓢꓷꓸ ꓙ ꓟꓳ ꓙ ꓗꓷ ꓢꓲ ꓪꓴ-ꓢ ꓔꓯ ꓫꓸ ꓟꓳˍ ꓡꓳ=

ꓡꓴ-ꓘ 2ꓽ38 ꓬꓲ ꓠꓬ ꓪꓴ-ꓢ ꓔꓯ ꓫ ꓟꓳ ꓗꓷ ꓢꓲ ꓠꓬꓲ꓾ ꓙꓱ-ꓣꓴ-ꓢ-ꓡꓱ ꓔꓯ ꓫꓴꓹ ꓣꓴˍ ꓟ ꓔꓯ ꓦꓴ ꓠꓬꓹ ꓢꓴ ꓮ ꓙꓵꓽ ꓔꓯ ꓫꓴꓹ ꓣꓴ ꓢꓴ ꓠꓬ ꓤ ꓠꓱ ꓤ ꓕꓱ ꓟ ꓥꓳ꓾ ꓐꓰ ꓐꓯ ꓖꓶˍ ꓡꓳ=” ꓟꓷꓼ ꓠꓷꓹ ꓝ ꓟ ꓬꓹ-ꓠ ꓠꓬ ꓮ ꓠꓬꓲꓽ ꓡꓴ ꓕꓴ ꓗꓪ ꓦꓵꓻ ꓡ ꓗꓷ ꓟ ꓞꓳ ꓫꓵꓼ ꓤ ꓬꓰ-ꓢꓴ ꓔꓯ ꓫꓱꓸ ꓖꓶ ꓓꓳ ꓟꓳꓹ ꓢꓴ ꓮ ꓔꓲꓸ ꓤ ꓟ ꓘꓴꓽ ꓗꓪ ꓟ ꓥ ꓡꓳ= ꓙꓲˍ ꓟ ꓓꓳꓽ ꓠꓬ ꓐꓯ ꓑꓶ ꓓꓴ ꓥ ꓢꓲ꓾ ꓬꓹ-ꓠ ꓠꓬ ꓙꓲˍ ꓟ ꓓꓳꓽ ꓔꓯ ꓟꓲ-ꓢ-ꓬ ꓔꓯ ꓥꓳ ꓡꓳꓸ ꓔꓬ ꓢꓴ ꓮ ꓙꓵꓽ ꓔꓯ ꓐꓯ ꓟꓸ ꓖꓶˍ ꓡꓳ= ꓫꓴꓹ ꓣꓴ ꓢꓴ ꓠꓬ ꓬꓯꓼ ꓡ ꓗꓷꓳ꓾ ꓟꓷꓼ ꓠꓷꓹ ꓝ ꓘꓶꓽ ꓠꓬ ꓐꓲ ꓡꓰꓳ꓾ ꓝꓮꓲ ꓬꓹ-ꓠ ꓠꓬ ꓕꓱ ꓟ ꓔꓯ ꓟꓳꓻ ꓪ ꓡꓰ ꓠꓬꓲ ꓶꓼ ꓙꓳ ꓫꓱꓹ ꓙꓳˍ ꓡꓳ=