ꓢ‐ꓘꓰ‐ꓬꓴ ꓠꓲ, ꓟ ꓡꓶ.ˍ ꓟ (Sunday reflection)

ꓢ‐ꓘꓰ‐ꓬꓴ ꓠꓲ, ꓟ ꓡꓶ.ˍ ꓟ 

ꓬꓰ-ꓢꓴ ꓠꓬ ꓙꓱ-ꓡꓲ-ꓘꓳ ꓡꓳ ꓒꓱ ꓗꓪ ꓓꓵꓽ ꓡꓰ ꓢꓲ ꓗꓳꓸ ꓙꓰ ꓔꓬ ꓕꓯ꓾ 2 ꓝꓲꓸ ꓫ ꓢꓴ ꓪꓴꓸ ꓓꓵ ꓣꓱꓽ ꓒ꓾ ꓢ-ꓘꓰ-ꓬꓴ ꓟꓬꓱ ꓔ ꓟ ꓞꓳ ꓐꓳ ꓕꓲ ꓣꓳ ꓖꓳ ꓗꓪ ꓔꓬ ꓡꓳ꓿ 3 ꓬꓲ ꓠꓬ ꓬꓰ-ꓢꓴ ꓮꓽ ꓟ ꓥ ꓟ ꓡꓳꓸ ꓠꓬꓲ ꓠꓲꓹ ꓫꓵˍ ꓟꓲ꓾ ꓬꓲ ꓠꓽ ꓞꓳ ꓔꓰꓼ ꓡꓰꓼ ꓥ ꓢꓲ꓾ ꓞꓳ ꓜꓴꓻ ꓡꓰ ꓬꓲ ꓔꓯ ꓛꓸ ꓞꓹ ꓠꓬꓲ꓾ ꓬꓰ-ꓢꓴ ꓔꓯ ꓟꓽ ꓟꓳ꓿ 4 ꓖꓳ ꓡꓱ ꓠꓬꓲ ꓬꓰ-ꓢꓴ ꓔꓯ ꓡꓳꓸ ꓠꓬꓲ ꓠꓹ ꓟ ꓬꓲ ꓠꓬ ꓟꓲꓽ ꓕꓯꓽ ꓢꓲ ꓔꓷꓹ ꓙꓰ ꓢꓲ꓾ ꓬꓰ-ꓢꓴ ꓗꓳꓸ ꓬꓯꓼ ꓠ ꓗꓹ ꓟ ꓚꓱꓹ ꓗꓪ ꓟ ꓐꓵꓽ ꓜꓻ ꓜꓲꓻ ꓕꓲ ꓜꓲ ꓗꓪ ꓓꓯ ꓙꓰˍ ꓡꓳ꓿ 5 ꓬꓰ-ꓢꓴ ꓖꓳ ꓗꓪ ꓛꓲ ꓡ ꓠꓬ ꓖꓽ ꓑꓳꓸ ꓬꓲ ꓔꓯ ꓡꓳꓸ ꓢꓲ꓾ ꓢ-ꓘꓰ-ꓬꓴꓳ꓾ ꓮꓸ ꓟꓲꓸ ꓬꓯꓼ ꓡꓯ꓿ ꓮ ꓡꓲꓳ ꓐꓯ ꓠꓬ ꓠꓬꓲꓸ ꓠꓬꓲ ꓥꓪ ꓠꓬ ꓠꓴ ꓦꓲ ꓗꓪ ꓔꓬ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ꓿ 6 ꓖꓳ ꓡꓱ ꓠꓬ ꓬꓲ ꓮꓸ ꓟꓲꓸ ꓟꓲꓸ ꓬꓯꓼ ꓡ ꓢꓲ꓾ ꓠꓲꓹ ꓒꓴ ꓒꓴˍ ꓐꓰ ꓬꓰ-ꓢꓴ ꓔꓯ ꓘꓳꓻ ꓣꓴˍ ꓡꓳ꓿ 7 ꓬꓲ ꓪꓽ ꓮꓽ ꓙꓵ ꓖꓳ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓠꓽ ꓝꓴꓲ ꓙꓳ ꓢꓴ ꓦꓲ ꓗꓪ ꓪꓰ ꓤ ꓟꓴ ꓙꓰꓳ꓾ ꓐꓰ ꓱ'ꓽ ꓠꓱꓽˍ ꓡꓳ꓿ 8 ꓢ-ꓘꓰ-ꓬꓴ ꓠꓬ ꓦꓰꓼ ꓞꓹ ꓢꓲ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓥꓪ ꓙꓳˍ ꓟ ꓖꓴꓽ ꓙꓴꓽ ꓠꓬ ꓞꓳ ꓫꓸ ꓔꓯ ꓕꓲ ꓐꓶꓽ ꓐꓱꓻ ꓖꓶˍ ꓥꓳ꓿ ꓝꓮꓲ ꓠꓬ ꓥꓪ ꓮꓽ ꓟ ꓔꓯ ꓘꓳꓹ ꓜ ꓗꓷ ꓐꓷˍ ꓟꓲ ꓬꓲ ꓔꓯ ꓡꓲ ꓩꓴꓸ ꓡꓲꓸ ꓖꓶˍ ꓥꓳ꓾ ꓐꓯˍ ꓡꓳ꓿ 9 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓢꓯꓼ ꓟꓬ ꓝˍ ꓟ ꓣꓱꓽ ꓛꓰꓽ ꓠꓬ ꓠꓬꓲꓸ ꓠꓬꓲ ꓕꓱ ꓕꓲ ꓦꓲ ꓗꓪ ꓛꓲ ꓡꓺꓳ꓿ ꓮ ꓡꓲꓳ ꓐꓯ ꓠꓬ ꓬꓲˍ ꓟꓲ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓡꓳ꓿ 10 ꓡ-ꓞꓳ-ꓮ-ꓐꓲ ꓠꓽ ꓒꓲꓼ ꓬꓰ ꓟ ꓡꓽ ꓞꓳ ꓔꓯ ꓧꓪ ꓢꓲ ꓚꓬꓴˍ ꓐꓰ ꓡꓻ ꓟ ꓥ ꓡꓳ꓾ ꓐꓯˍ ꓡꓳ꓿

ꓢꓲ‐ꓒ ꓬꓰ‐ꓢꓴ ꓠꓬ ꓝꓴꓲ ꓙꓳ ꓢꓴ ꓢ‐ꓘꓰ‐ꓬꓴ ꓦꓲꓻ ꓗꓪ ꓓꓵ ꓡꓰ ꓢꓲ ꓠꓬꓲ ꓜꓽ ꓜ ꓗꓷ ꓟ ꓥ ꓡꓳ꓿ ꓢ‐ꓘꓰ‐ꓬꓴ ꓠꓬ ꓢꓲꓺ ꓒ ꓬꓰ‐ꓢꓴ ꓐꓰ ꓡꓳ. ꓟꓳ ꓗꓷ ꓗ, ꓠꓯ ꓬꓲ ꓬꓰ ꓛ ꓡꓰ ꓟ ꓝꓴꓲ ꓔꓯ ꓓꓴ ꓙ ꓒꓳ, ꓡꓶ. ꓡ ꓢꓲ ꓠꓬꓲ ꓚꓬꓴ ꓙ ꓟ ꓣꓱ ꓛꓰ ꓘꓳ ꓣꓴ ꓟꓶ ꓡꓰ ꓟ ꓥ ꓡꓳ꓿ ꓣꓳ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓠꓲ, ꓟ ꓠꓯ ꓗꓪ ꓘꓳ ꓣꓴ ꓢꓲ ꓠꓬꓲ ꓣꓳ ꓥꓳꓽ ꓡꓰ ꓟ ꓝꓴꓲ ꓔꓯ ꓢꓲꓺ ꓒ ꓠꓯ ꓗꓪ ꓓꓴ ꓙ ꓒꓳ, ꓡꓶ. ꓠ, ꓟ ꓢꓯꓼ ꓕꓵꓼ ꓢꓲ ꓠꓬꓲ ꓢꓯ. ꓔꓬ ꓓꓴ ꓬꓰ ꓡꓯ ꓐꓰ ꓢꓯ. ꓖꓶ ꓩꓴ ꓡ ꓥꓳ꓿