ꓬꓲ-ꓙꓲ ꓟꓵꓽ ꓗꓪ ꓔꓳꓹ ꓜꓳꓽ ꓗꓷ ꓟ ꓫꓸ ꓘꓶ ꓓꓴ ꓞꓲꓺ ꓙꓰꓽ

ꓢꓲꓽ ꓫꓬ ꓕꓳꓽ ꓶ ꓗꓪ ꓟ ꓓꓳ ꓙꓰ ꓕꓳꓽ ꓶꓽ ꓗꓪ ꓟꓳꓸ ꓖꓶ ꓔ ꓟ ꓬꓲ-ꓙꓲ ꓟꓵꓽ ꓗꓪ ꓟ ꓫꓸ ꓘꓶ ꓓꓴ ꓞꓲꓺ ꓙꓰꓽ ꓠꓬ ꓬꓲ-ꓢꓷ-ꓡꓰ ꓞꓳ ꓫꓵꓽ ꓔꓯ ꓩ-ꓣꓳ ꓪ ꓔꓲ ꓡꓰ ꓬꓲ-ꓙꓲ ꓟꓵꓽ ꓗꓪ ꓐꓰ ꓓꓳ ꓙꓰ ꓝꓲ ꓟꓽ ꓫꓳ ꓠꓬꓲ ꓬꓲ-ꓙꓲ ꓟꓵꓽ ꓔꓯ ꓪꓴ-ꓢ ꓡꓰ ꓖꓶꓽˍ ꓟ ꓫꓸ ꓘꓶ ꓓꓴ ꓞꓲꓺ ꓙꓰꓽ ꓥ ꓡꓳ=

ꓬꓲ-ꓙꓲ ꓟꓵꓽ ꓗꓪ ꓬꓲ ꓘꓳꓼ 400 ꓘꓳꓼ ꓛꓲ ꓫꓸ ꓙꓵ ꓗꓷ ꓟ ꓬꓲ-ꓢꓷ-ꓡꓰ ꓐꓴ ꓠꓬ ꓚꓳ ꓑ ꓬꓰˍ ꓟ ꓗꓪ ꓐꓰ ꓩꓴ ꓗꓷ ꓖꓶ ꓡ ꓠꓹ ꓟ ꓐꓱ ꓶ ꓩ-ꓣꓳ ꓪ ꓔꓲ ꓔꓯ ꓘꓶꓸ ꓖꓶ ꓠꓹ ꓟ ꓪꓴ-ꓢ ꓡꓰ ꓝꓲ ꓩꓴ ꓔ ꓟ ꓫꓸ ꓘꓶ ꓓꓴ 10 ꓙꓰꓽ ꓥ ꓡꓳ= ꓩ-ꓣꓳ ꓪ ꓔꓲ ꓬꓲ ꓠꓲꓹ ꓟ ꓠꓬ ꓮ ꓘꓶꓸ ꓩꓴˍ ꓟ ꓥ ꓢꓲ ꓬꓲ-ꓢꓷ-ꓡꓰ ꓐꓴ ꓔꓯ ꓚꓳ ꓑ ꓬꓰ ꓝꓲ ꓠꓲꓹ ꓫꓵˍ ꓟ ꓑꓶꓸ ꓓꓴ ꓬꓲ-ꓙꓲ ꓡ ꓞꓳ ꓐꓴ ꓠꓬ ꓮ ꓘꓶꓸ ꓫˍ ꓟ ꓫꓸ ꓘꓶ ꓓꓴ ꓔꓯ ꓔꓳꓹ ꓜꓳꓽ ꓪˍ ꓡꓰꓳ=

 ꓬꓲ-ꓙꓲ ꓚꓳ ꓑ ꓬꓰˍ ꓟ ꓗꓪ ꓐꓰ ꓬꓲ-ꓢꓷ-ꓡꓰ ꓞꓳ ꓫꓵꓽ ꓐꓴ ꓔꓯ ꓚꓬꓴꓸ ꓓꓳ ꓡ ꓠꓹ ꓟ ꓟꓳ-ꓫꓲ ꓔꓯ ꓝꓲ ꓩꓴˍ ꓕꓯ꓾ ꓟꓳ-ꓫꓲ ꓔꓯ ꓪꓴ-ꓢ ꓡꓰ ꓝꓲ ꓩꓴ ꓔ ꓡꓳ ꓐꓯ ꓟ ꓔꓯ ꓞꓳ ꓤ ꓐꓴ ꓢꓷꓸ ꓡꓰ ꓝꓲ ꓠꓹ ꓟ ꓐꓱ ꓶ ꓪꓽ ꓠꓬꓲˍ ꓟ ꓢꓷꓸ ꓡꓰ ꓓꓴ ꓟꓳꓸ ꓖꓶˍ ꓥꓳ ꓐꓰ ꓪꓴ-ꓢ ꓡꓰ ꓟꓳ-ꓫꓲ ꓔꓯ ꓙ ꓟꓳ ꓘꓶꓽ ꓖꓶꓽ ꓗꓷꓳ= (ꓓꓳ ꓙꓰ 3ꓽ20)

ꓙ ꓟꓳ ꓘꓶꓽ ꓕꓱ ꓟ ꓠꓬ ꓬꓲ ꓔꓶꓺ ꓙꓱꓼ ꓠꓬꓲꓽ ꓟ ꓔꓯ ꓐꓲ ꓡꓰ ꓝꓲ ꓠꓹ ꓟ ꓥ ꓡꓳ= ꓬꓲ ꓔꓶꓺ ꓙꓱꓼ ꓕꓲꓽ ꓠꓬ ꓒꓵꓽ ꓒ ꓐꓴ ꓪꓴ-ꓢ ꓠꓬ ꓢꓯꓸ ꓔꓬ ꓟ ꓪꓴ-ꓢ ꓥ ꓢꓲ ꓬꓲ ꓔꓯ ꓦ ꓡꓱ ꓪꓴꓸ ꓓꓵ ꓕꓱꓽ ꓒꓵꓽˍ ꓟ ꓔꓯ ꓬꓲ-ꓢꓷ-ꓡꓰ ꓐꓴ ꓔꓯ ꓟꓳꓸ ꓖꓶ ꓠꓹ ꓟ꓾ ꓠꓬꓲꓽ ꓠꓬ ꓬꓲ-ꓙꓲ ꓡ ꓞꓳ ꓐꓴ ꓦ ꓡꓱ ꓔꓬ ꓟ ꓢꓲꓺ ꓐꓴ ꓠꓬ ꓪꓴ-ꓢ ꓚꓵ ꓟꓽ ꓥ ꓟ ꓔꓯ ꓟꓳꓸ ꓖꓶ ꓠꓹ ꓟ ꓥ ꓡꓳ=

ꓪꓴ-ꓢ ꓡꓰ ꓬꓲ-ꓙꓲ ꓟꓵꓽ ꓗꓪ ꓗꓷ ꓡꓰ ꓝꓲˍ ꓟ ꓫ ꓘꓶ ꓓꓴ 10 ꓙꓰꓽ ꓠꓬ

(1) ꓬꓲ-ꓙꓲ ꓟꓵꓽ ꓗꓪ ꓙꓳˍ ꓟ ꓬꓲꓻ ꓙꓬ ꓮ ꓙꓵꓽ ꓫꓵꓽ ꓑꓶꓸ ꓡꓰ ꓝꓲˍ ꓟ꓾

(2) ꓬꓲ-ꓙꓲ ꓟꓵꓽ ꓗꓪ ꓪꓴꓸ ꓑ ꓖꓪ ꓡˍ ꓟ꓾

(3) ꓬꓲ ꓑꓵꓸ ꓟꓬ ꓜꓲ ꓖꓪ ꓡ ꓟ꓾

(4) ꓟꓯꓸ ꓤꓲꓽ ꓖꓪ ꓡˍ ꓟ꓾

(5) ꓬꓲ-ꓙꓲ ꓡ ꓞꓳ ꓐꓴ ꓡꓰ ꓦꓵꓻ ꓔ ꓟ ꓙꓱꓽ ꓤ ꓜꓴ ꓠꓻ ꓫꓵꓻˍ ꓟ꓾

(6) ꓩ-ꓣꓳ ꓪ ꓔꓲ꓾ ꓬꓲ ꓚꓳ ꓑ ꓐꓴ꓾ ꓬꓲ-ꓙꓲ ꓞꓳ ꓫꓵꓽ ꓐꓴ ꓐꓰ ꓬꓲ ꓪ ꓦꓵꓻ ꓔ ꓟ ꓙꓱꓽ ꓤ ꓐꓴ ꓔꓯ ꓠꓻ ꓛꓴꓽ ꓓꓲꓻˍ ꓟ꓾

(7) ꓬꓲ-ꓙꓲ ꓟꓵꓽ ꓗꓪ ꓪꓽ ꓢꓶꓽ ꓓꓽ ꓟ ꓦˍ ꓟ꓾

(8) ꓚ ꓑꓴ ꓓꓳꓻ ꓡˍ ꓟ꓾

(9) ꓬꓲ-ꓙꓲ ꓕꓲ ꓗꓴꓷꓼ ꓡꓱꓸꓼ ꓠꓯ ꓞꓲꓹ ꓠꓯ ꓕꓳꓽˍ ꓟ

(10) ꓪ ꓔꓲ ꓐꓰ ꓕꓲ ꓪ ꓬꓲ-ꓙꓲ ꓡ ꓞꓳ ꓐꓴ ꓬꓲ ꓪ ꓦꓵꓻ ꓔ ꓟ ꓤ ꓪꓴꓽ ꓐꓰ ꓙꓱꓽ ꓤ ꓜꓴ ꓗꓪ ꓬꓲ ꓪꓴꓸ ꓦꓵꓻ ꓓꓳ ꓡˍ ꓟ ꓙꓱꓽ ꓤ ꓮ ꓙꓵꓽ ꓫꓵꓻˍ ꓟ꓾

ꓩ-ꓣꓳ ꓪ ꓔꓲ ꓬꓲ ꓤ ꓐꓰ ꓬꓲ-ꓙꓲ ꓡ ꓞꓳ ꓤ ꓪꓴꓽ ꓐꓴ ꓫꓵꓻ ꓖꓴ ꓡꓰ ꓗ ꓠꓯꓸ ꓠꓬ ꓬꓲ-ꓢꓷ-ꓡꓰ ꓐꓴ ꓔꓯ ꓬꓲ-ꓙꓲ ꓟꓵꓽ ꓗꓪ ꓐꓰ ꓓꓳ ꓙꓰ ꓝꓲ ꓗꓷꓳ=