ꓟꓵꓽ ꓘꓳꓼ ꓐꓰ ꓮꓓ- 3000 ꓘꓳꓼ ꓘꓴꓽ ꓗꓪ (Environment)

ꓠꓬꓲꓸ ꓠꓬꓲ ꓟꓲ ꓠꓯ ꓗꓪ ꓟꓲ ꓠꓯ ꓕꓱ ꓟ ꓢꓲꓽ ꓢꓲꓽ ꓫꓬ ꓫꓬ ꓗꓶ ꓡꓰ ꓠꓹ ꓟ꓾ ꓟꓲ ꓠꓯ ꓕꓱ ꓟ ꓠꓯꓸꓼ ꓗꓪ ꓙꓲˍ ꓟ ꓒꓬꓱꓼ ꓡ ꓠꓹ ꓟ ꓐꓱ ꓶ ꓟꓵꓽ ꓘꓳꓼ ꓐꓯꓹ ꓟ ꓕꓱ ꓟ ꓐꓱ ꓶ ꓟꓲ ꓠꓯ ꓕꓱ ꓟ ꓠꓯꓸꓼ ꓗꓪ ꓪ ꓙꓵꓽ ꓪꓽ ꓔꓯ ꓝꓮꓲ ꓕꓲꓽ ꓧꓪꓹ ꓪ ꓠꓹ ꓟ ꓕꓱ ꓟ ꓠꓬ ꓮꓓ 3000 ꓘꓳꓼ ꓘꓴꓽ ꓗꓪ ꓟꓽ ꓓ ꓬꓳꓸ ꓚꓵꓹ ꓟ ꓔꓶ ꓐꓬꓱ ꓕꓲꓽ ꓟ ꓥ ꓪ= ꓕꓱ ꓡꓰ ꓐꓯꓹ ꓟ ꓠꓬ ꓟꓲ ꓠꓯ ꓗꓪ ꓢꓲꓹ ꓜꓲ ꓡꓳ ꓜꓲ ꓘꓶꓹ ꓠꓲ꓾ ꓫꓵ ꓚꓴꓸ ꓠꓲ ꓕꓲꓽ ꓫꓵ ꓡꓰ ꓕꓲꓽ ꓫꓵꓽ ꓬꓰꓹ ꓟ ꓪꓴꓸ ꓠꓬꓲ ꓟꓲ ꓠꓯ ꓮꓽ ꓘꓶꓸ ꓐꓬ ꓡꓰꓹ ꓟ ꓪꓴꓸ ꓕꓱ ꓟ ꓟꓽ ꓐꓬ ꓡꓰ ꓠ ꓮ ꓡꓰ ꓬꓰ ꓠꓹ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓕꓱ ꓡꓰ ꓬꓰꓹ ꓕꓯꓽ ꓠꓬ ꓣꓳ ꓠꓯꓸꓼ ꓗꓪ ꓟ ꓞꓳ ꓡꓱ ꓐꓴ ꓞꓳ ꓡꓯꓸ ꓪꓽ ꓡꓯꓸ ꓐꓴ ꓢꓯꓼ ꓪꓽ ꓔꓯ ꓘꓴ ꓜꓲꓼ ꓞꓳ ꓠꓬ ꓣꓱꓽ ꓪ ꓠꓹ ꓟ ꓢꓯꓼ ꓕꓵꓼ ꓠꓹ ꓟ ꓬꓳꓸ ꓚꓵˍ ꓡꓳ= ꓮ ꓡꓲꓳ ꓐꓯ ꓠꓬ ꓟꓲ ꓠꓯ ꓗꓪ ꓟꓵꓽ ꓘꓳꓼ ꓐꓬ ꓡꓰ ꓝꓲˍ ꓟ ꓕꓱ ꓟ ꓠꓯꓸꓼ ꓗꓪ ꓞꓳ ꓡꓱ ꓐꓴ ꓤꓽ ꓖꓴꓽ ꓤꓽ ꓡꓯꓸ ꓐꓴ ꓬꓲꓸ ꓪꓽ ꓬꓰ ꓔꓬ_ ꓟ ꓑꓶꓸ ꓓꓴ ꓒꓬꓱꓼ ꓡꓹ ꓟ ꓥˍ ꓟ ꓪꓴꓸ ꓠꓬꓲ ꓥˍ ꓡꓳ=

ꓕꓱ ꓟ ꓕꓳꓽ ꓶ ꓑꓷꓠ ꓔꓯ ꓐꓳ ꓢꓴ ꓠꓬ ꓲ-ꓣꓲ-ꓡꓮꓠꓓ ꓗꓴꓷꓼ ꓗꓪ ꓚꓳꓸ ꓲ-ꓣꓲꓢꓧ ꓔꓲꓺ ꓒꓽ ꓕꓲꓽ ꓣꓳ ꓥ ꓢꓲ ꓠꓬꓲ ꓬꓲ ꓡꓰ ꓐꓯꓹ ꓟ ꓠꓬ ꓲ-ꓣꓲ-ꓡꓮꓠꓓ ꓗꓴꓷꓼ ꓐꓱ ꓶ ꓥˍ ꓟꓲ ꓟꓽ ꓓ ꓬꓳꓸ ꓚꓵˍ ꓟ ꓙꓵꓹ ꓥˍ ꓡꓳ- ꓲ-ꓣꓲ-ꓡꓮꓠꓓ ꓗꓴꓷꓼ ꓗꓪ ꓟꓵꓽ ꓘꓳꓼ ꓒꓳꓹ ꓡˍ ꓟ ꓪꓴꓸ ꓠꓬꓲ ꓗꓷ ꓡꓹ ꓟ ꓫꓵꓽ ꓪꓴ ꓓꓽ ꓟ ꓢꓲꓹ ꓛꓵꓽ ꓓ ꓟ ꓠꓬ 1998 ꓘꓳꓼ ꓗꓪ ꓚꓳꓸ ꓓꓽ ꓪꓴꓸ ꓔꓴ ꓡˍ ꓟ ꓥ ꓪ= ꓮ ꓡꓲꓳ ꓐꓯ ꓠꓬ ꓗꓴꓷꓼ ꓙꓵꓽ ꓢꓴ ꓢꓲꓽ ꓒꓽ ꓐꓴ ꓠꓬ ꓶ ꓡꓯꓼ ꓟꓴꓹ ꓟ ꓠꓯꓸꓼ ꓗꓪ ꓪꓴꓽ ꓡ ꓟꓴ ꓡ ꓠꓹ ꓟ ꓐꓱ ꓶ ꓐꓯ ꓢꓲ ꓙꓼ ꓒꓱ ꓕꓱ ꓡꓲꓳ ꓫꓵꓽ ꓟꓬꓱꓽ ꓓ ꓟ ꓬꓰꓹ ꓟ ꓮꓽ ꓟꓬꓹ ꓕꓱ ꓡꓰ ꓬꓰ ꓡꓹ ꓟ ꓑꓶ ꓓꓴ ꓠꓲ ꓥ ꓪ= ꓕꓱ ꓡꓰ ꓬꓰ ꓡꓹ ꓟ ꓑꓶ ꓓꓴ ꓡꓳꓠꓖ ꓓꓰꓣꓖ ꓐꓯꓹ ꓟ ꓬꓲꓽ ꓟ ꓐꓰ ꓡꓳꓴꓖꓧ ꓣꓰꓮ ꓐꓯꓹ ꓟ ꓬꓲꓽ ꓟ ꓒꓽ ꓖꓳ ꓟ ꓡꓰ ꓟꓽ ꓞꓲ ꓗꓴꓷꓼ ꓘꓴꓽ ꓗꓪ ꓟ ꓬꓲ ꓡꓴꓽ ꓐꓱ ꓬꓲ ꓐꓱ ꓕꓰ ꓡꓲꓳ ꓫꓵꓽ ꓮꓽ ꓙꓵꓽ ꓠꓯꓸꓼ ꓗꓪ ꓟꓽ ꓢꓲꓽ ꓟꓽ ꓫꓬꓹ ꓟ ꓕꓱ ꓡꓰ ꓗꓷ ꓡꓹ ꓓꓴ ꓟ ꓥ ꓪ=

ꓕꓱ ꓡꓰ ꓗꓷ ꓡꓹ ꓟ ꓠꓬ ꓗꓴꓷꓼ ꓘꓴꓽ ꓗꓪ ꓟ ꓙꓼ ꓟꓬꓱꓽ ꓮꓽ ꓟꓬꓹ ꓬꓰ ꓡꓹ ꓟ ꓑꓶ ꓓꓴ ꓙꓼ ꓗꓪ ꓚꓳ ꓓꓳ ꓡꓹ ꓟ ꓟꓽ ꓫꓬꓹ ꓟ ꓠꓬ ꓬꓲ ꓙꓬ ꓘꓴꓽ ꓗꓪ ꓓꓵ ꓡ꓾ ꓖꓳ ꓟ ꓡꓰ ꓟꓽ ꓞꓲ ꓔꓶ ꓫꓵꓽ ꓔꓶ ꓙꓵꓽ ꓔꓶꓹ ꓟ ꓗꓪ ꓣꓱꓹ ꓟ ꓟꓬ ꓞꓲꓼ ꓟꓬ ꓟꓲ ꓟꓳꓼ ꓫꓵ ꓟꓬ ꓞꓲꓼ ꓕꓱ ꓡꓲꓳ ꓫꓵ ꓣꓱꓹ ꓟ ꓪꓴꓸ ꓠꓬ ꓬꓲ ꓙꓬ ꓘꓴꓽ ꓗꓪ ꓟꓽ ꓙꓲꓹ ꓟ ꓮꓽ ꓟꓬ ꓓꓵꓽ ꓡꓹ ꓟ ꓪꓴꓸ ꓠꓬꓲ ꓥ ꓪ= ꓖꓳ ꓟ ꓑꓶꓸ ꓓꓴ ꓬꓲ ꓙꓬ ꓟꓽ ꓫꓬ ꓡꓰꓹ ꓟ ꓗꓶ ꓡꓰˍ ꓓꓴ ꓟ ꓥ ꓪ= ꓖꓳ ꓟ ꓡꓰ ꓟꓽ ꓞꓲ ꓙꓼ ꓕꓱ ꓡꓲꓳ ꓫꓵꓽ ꓕꓲꓽ ꓫꓵꓽ ꓕꓲꓽ ꓫꓵꓽ ꓑꓶ ꓓꓴ ꓠꓲ ꓬꓲ ꓙꓬ ꓡꓰ ꓟꓽ ꓞꓲ ꓟꓶꓽꓦꓲ ꓥˍ ꓟꓲ ꓟꓽ ꓢꓲꓽ ꓟꓽ ꓫꓬ ꓕꓱ ꓡꓲꓳ ꓫꓵꓽ ꓗꓶ ꓡꓰꓹ ꓓꓴ ꓟ ꓥ ꓪ= ꓖꓳ ꓟ ꓡꓰ ꓟꓽ ꓞꓲ ꓞꓳ ꓤꓽ ꓠꓬ ꓪꓴ ꓡ ꓟꓴ ꓡ ꓕꓯꓽ ꓠꓬ ꓞꓳ ꓤꓽ ꓣꓱꓹ ꓟ ꓶ ꓤꓼ ꓶ ꓟꓲ ꓗꓪ ꓚꓳꓸ ꓡꓳ ꓗꓷ ꓠꓹ ꓟ ꓑꓶꓸ ꓛꓵꓽ ꓡꓳꓸ ꓛꓵꓽ ꓕꓱ ꓡꓲꓳ ꓫꓵꓽ ꓮꓽ ꓟꓬꓹ ꓕꓱ ꓡꓰ ꓓꓳ ꓡꓹ ꓓꓴ ꓟ ꓥ ꓪ= ꓖꓳ ꓟ ꓥˍ ꓟꓲ ꓠꓬꓲꓸ ꓠꓬꓲ ꓕꓲꓽ ꓞꓲꓼ ꓗꓪ ꓠꓬ ꓧꓶꓸ ꓕꓯꓽ ꓕꓲꓽ ꓞꓲꓼ ꓕꓯꓽ ꓢꓲ 100 ꓩꓴꓸ ꓗꓪ ꓚꓳꓸ 60% ꓩꓴꓸ ꓚꓵ ꓟꓬꓽ ꓡꓹ ꓐꓶ=