ꓬꓰ-ꓢꓴ ꓔꓯ ꓘꓳꓹ ꓣꓴ ꓢꓴ ꓠꓬ ꓚꓬꓴꓹ ꓙˍ ꓟ ꓣꓱꓽ ꓛꓲꓽ ꓟꓶˍ ꓟ (Homily)

ꓘꓴ ꓜꓲꓼ ꓞꓳ ꓟꓵꓽ ꓘꓳꓼ 31 ꓫꓵꓽ ꓠꓽ 

ꓙꓽ ꓗꓴꓸ ꓠꓲꓹ ꓕꓳ ꓶ 11ꓽ 22- 12ꓽ 2

ꓢꓲꓺ ꓒꓽ ꓳ꓾ ꓟꓲ ꓠꓯ ꓕꓱ ꓕꓲꓽ ꓢꓶꓽ ꓠꓬ ꓠꓴ ꓟꓲꓽ ꓙꓬꓽ ꓗꓪ ꓣꓳ ꓓꓰꓺ ꓡꓰꓹ ꓟ ꓚ ꓓꓴ ꓢꓶꓽ ꓕꓲꓽ ꓢꓶꓽ ꓐꓰ ꓟꓵꓽ ꓪꓴꓽ ꓗꓪ ꓐꓰ ꓞꓰ ꓡꓹ ꓟ ꓟꓴ ꓦ ꓢꓶꓽ ꓕꓲꓽ ꓜꓯꓹ ꓡꓰ ꓐꓰ ꓥꓳ= ꓖꓳ ꓡꓱ ꓥˍ ꓟꓲ ꓠꓴ ꓠꓬ ꓮꓸ ꓫꓵꓽ ꓥˍ ꓟꓲ ꓬꓰ ꓐ ꓡꓹ ꓟ ꓢꓲꓺ ꓒꓽ ꓥˍ ꓠꓬꓲ꓾ ꓙꓳꓹ ꓟ ꓮꓽ ꓙꓵꓽ ꓔꓯ ꓠꓴ ꓫꓱꓸ ꓤꓼ ꓠꓬꓲ꓾ ꓝꓴꓲꓸ ꓙꓳ ꓢꓴ ꓠꓲꓹ ꓟ ꓡꓶꓸ ꓡ ꓠ ꓗꓪ ꓛꓲ ꓬꓲ ꓪꓽ ꓝꓴꓲꓸ ꓔꓯ ꓠꓴ ꓠꓲꓹ ꓟ ꓗꓪ ꓟꓽ ꓘꓶ ꓔ ꓟ ꓥˍ ꓡꓳ= ꓢꓲꓺ ꓒꓽ ꓳ꓾ ꓙꓳꓹ ꓟ ꓮꓽ ꓙꓵꓽ ꓔꓯ ꓠꓴ ꓠꓲꓹ ꓠꓵˍ ꓠꓬꓲ꓾ ꓚꓰꓼ ꓔ ꓟ ꓮꓽ ꓙꓵꓽ ꓔꓯ ꓠꓴ ꓠꓲꓹ ꓒꓳꓹ ꓟ ꓕꓲꓽ ꓫꓵꓽˍ ꓟꓲ ꓟꓽ ꓙꓳ=

ꓮ ꓡꓲꓳ ꓐꓯ ꓠꓬ꓾ ꓕ꓾ꓽ ꓫꓵꓽ ꓫꓵꓽ ꓔꓯ ꓠꓴ ꓠꓲꓹ ꓒꓳꓹ ꓐꓷ ꓠꓬ꓾ ꓖꓳ ꓕꓲꓽ ꓫꓵ ꓔꓯ ꓠꓴ ꓚꓰꓼ ꓔ ꓡꓳ ꓟꓽ ꓥ= ꓠꓴ ꓟꓽ ꓠꓲꓹ ꓒꓴꓹ ꓐꓷˍ ꓠꓬ ꓚꓰꓼ ꓔ ꓡꓺ ꓳ ꓫꓵꓽ ꓮ ꓡꓰ ꓙꓳ ꓐ ꓡ ꓢꓰꓼ= ꓢꓲꓺ ꓒꓽ ꓟꓽ ꓙꓽ ꓗꓴꓸ ꓐꓷꓹ ꓠꓬ꓾ ꓮ ꓡꓲ ꓐꓰ ꓕꓶꓻ ꓞ ꓐ ꓡˍ ꓡꓳ= ꓢꓯꓸ ꓔꓬ ꓡꓳ ꓫꓵꓽ ꓮꓽ ꓙꓵꓽ ꓔꓯ ꓠꓲꓹ ꓠꓵ ꓢꓴ ꓢꓲꓺ ꓒꓽ ꓳ= ꓙꓳˍ ꓟ ꓮꓽ ꓙꓵꓽ ꓠꓬ ꓠꓴ ꓔꓯ ꓟ ꓥˍ ꓠꓬꓲ꓾ ꓝꓴꓲꓸ ꓬꓰ ꓛꓬ ꓗꓷ ꓢꓴ ꓔꓯ ꓠꓴ ꓘꓳ ꓫꓱꓸ ꓫꓱꓸꓼ ꓗꓪ ꓟꓸ ꓔꓬ ꓢꓲ꓾ ꓮ ꓡꓲ ꓐꓰ ꓛꓬ ꓗꓷˍ ꓟ ꓬꓲ ꓪꓽ ꓔꓯ ꓟꓳꓸ ꓖꓶˍ ꓡꓳ=

ꓕꓰ-ꓢ-ꓡꓳ-ꓠꓲ-ꓬ ꓕꓳꓽ ꓶ 1 11- 2ꓽ 2

ꓕꓱ ꓟ ꓑꓶ ꓓꓴ ꓥꓪ ꓠꓴꓽˍ ꓟꓲ ꓠꓴ ꓪ ꓐꓱ ꓶ ꓮ ꓕꓯ ꓟꓲ ꓪꓽ ꓘꓴ ꓢꓲ꓾ ꓣꓳ ꓪꓴ-ꓢ ꓡꓰ ꓠꓴ ꓪ ꓔꓯ ꓘꓴꓻˍ ꓟ ꓣꓱ ꓛꓰ ꓟꓶ ꓒꓵꓽˍ ꓟ ꓚꓬꓹ ꓖꓶ ꓡ ꓠꓹ ꓟˍ ꓐꓰ꓾ ꓠꓴ ꓪ ꓙꓲˍ ꓟ ꓔꓯ ꓠꓲꓹ ꓥꓳꓺˍ ꓟ ꓮ ꓙꓵˍ ꓐꓰ꓾ ꓙꓵꓻ ꓠꓲꓹ ꓗꓪ ꓐꓰ ꓬꓰˍ ꓟ ꓟꓬꓱꓽ ꓔꓯ ꓠꓬ꓾ ꓬꓲ ꓪꓽ ꓠꓬꓲˍ ꓟ ꓗꓪ ꓐꓰ ꓒꓬꓱꓼ ꓡ ꓝꓲ ꓠꓹ ꓟˍ ꓐꓰ꓾  ꓣꓳ ꓪꓴ-ꓢˍ ꓐꓰ ꓢꓲꓺ ꓒ ꓬꓰ-ꓢꓴ ꓙꓲ-ꓢꓴ ꓬꓲ ꓣꓱ ꓛꓰ ꓔꓯ ꓛꓳ ꓢꓲ꓾ ꓣꓳ ꓢꓲꓺ ꓒ ꓬꓰ-ꓢꓴ ꓟꓬꓱꓺ ꓠꓬ ꓠꓴ ꓪ ꓗꓪ ꓐꓰ ꓟꓬꓱ ꓓꓳꓽ ꓟꓶ ꓢꓲ ꓠꓬꓲ꓾ ꓠꓴ ꓪˍ ꓟꓲ ꓬꓲ ꓗꓪ ꓐꓰ ꓟꓬꓱ ꓓꓳꓽ ꓟꓶ ꓠꓹ ꓟ ꓪ ꓘꓴˍ ꓡꓳ꓿ ꓮ ꓟꓶ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓢꓲꓺ ꓒ ꓬꓰ-ꓢꓴ ꓙꓲ-ꓢꓴ ꓡˍ ꓟˍ ꓐꓰ꓾ ꓣꓳꓽ ꓬꓲˍ ꓐꓰ ꓜꓲꓼ ꓡꓯ ꓘꓳˍ ꓟ ꓔꓯ ꓐꓯˍ ꓠꓬ꓾ ꓥꓪ ꓠꓴꓽ ꓠꓴ ꓪ ꓔꓯ ꓕꓱ ꓡꓱ ꓘꓶꓸ ꓖꓶˍ ꓠꓬꓲ꓾ ꓦꓻ ꓗꓪ ꓐꓰ ꓥˍ ꓟꓲ꓾ ꓐꓯ ꓘꓶ ꓗꓪ ꓐꓰ ꓥˍ ꓟꓲ꓾ ꓢꓴ ꓡꓰ ꓥꓪ ꓠꓴꓽ ꓟꓬꓱꓺ ꓟꓯꓻ ꓢꓲ ꓐꓳ ꓔˍ ꓟ ꓕꓳ ꓶ ꓡꓯꓼ ꓫꓴ ꓗꓪ ꓐꓰ ꓥˍ ꓟꓲ꓾ ꓢꓲꓺ ꓒ ꓦꓬꓼ ꓠꓬꓲ ꓮ ꓟꓶ ꓛꓲ ꓡꓻꓳ꓾ ꓐꓰ ꓗꓶꓸˍ ꓟ ꓠꓴ ꓪ ꓑ ꓙˍ ꓠꓬ꓾ ꓠꓴ ꓪ ꓠꓲꓹ ꓟ ꓠꓬ ꓢꓻ ꓢˍ ꓐꓰ ꓟꓽ ꓷꓹ ꓡꓵꓺ ꓡꓰ ꓝꓲ ꓠꓹ ꓟˍ ꓐꓰ꓾ ꓙꓽˍ ꓟꓲ ꓟꓽ ꓙꓽ ꓫꓸ ꓠꓹ ꓟ ꓘꓶꓸ ꓖꓶˍ ꓡꓳ꓿

ꓡꓴ-ꓘ 9ꓽ 1- 10

ꓬꓰ-ꓢꓴ ꓠꓬ ꓙꓱ-ꓡꓲ-ꓘꓳ ꓡꓳ ꓒꓱ ꓗꓪ ꓓꓵꓽ ꓡꓰ ꓢꓲ ꓗꓳꓸ ꓙꓰ ꓔꓬ ꓕꓯ꓾ 2 ꓝꓲꓸ ꓫ ꓢꓴ ꓪꓴꓸ ꓓꓵ ꓣꓱꓽ ꓒ꓾ ꓢ-ꓘꓰ-ꓬꓴ ꓟꓬꓱ ꓔ ꓟ ꓞꓳ ꓐꓳ ꓕꓲ ꓣꓳ ꓖꓳ ꓗꓪ ꓔꓬ ꓡꓳ꓿ 3 ꓬꓲ ꓠꓬ ꓬꓰ-ꓢꓴ ꓮꓽ ꓟ ꓥ ꓟ ꓡꓳꓸ ꓠꓬꓲ ꓠꓲꓹ ꓫꓵˍ ꓟꓲ꓾ ꓬꓲ ꓠꓽ ꓞꓳ ꓔꓰꓼ ꓡꓰꓼ ꓥ ꓢꓲ꓾ ꓞꓳ ꓜꓴꓻ ꓡꓰ ꓬꓲ ꓔꓯ ꓛꓸ ꓞꓹ ꓠꓬꓲ꓾ ꓬꓰ-ꓢꓴ ꓔꓯ ꓟꓽ ꓟꓳ꓿ 4 ꓖꓳ ꓡꓱ ꓠꓬꓲ ꓬꓰ-ꓢꓴ ꓔꓯ ꓡꓳꓸ ꓠꓬꓲ ꓠꓹ ꓟ ꓬꓲ ꓠꓬ ꓟꓲꓽ ꓕꓯꓽ ꓢꓲ ꓔꓷꓹ ꓙꓰ ꓢꓲ꓾ ꓬꓰ-ꓢꓴ ꓗꓳꓸ ꓬꓯꓼ ꓠ ꓗꓹ ꓟ ꓚꓱꓹ ꓗꓪ ꓟ ꓐꓵꓽ ꓜꓻ ꓜꓲꓻ ꓕꓲ ꓜꓲ ꓗꓪ ꓓꓯ ꓙꓰˍ ꓡꓳ꓿ 5 ꓬꓰ-ꓢꓴ ꓖꓳ ꓗꓪ ꓛꓲ ꓡ ꓠꓬ ꓖꓽ ꓑꓳꓸ ꓬꓲ ꓔꓯ ꓡꓳꓸ ꓢꓲ꓾ ꓢ-ꓘꓰ-ꓬꓴꓳ꓾ ꓮꓸ ꓟꓲꓸ ꓬꓯꓼ ꓡꓯ꓿ ꓮ ꓡꓲꓳ ꓐꓯ ꓠꓬ ꓠꓬꓲꓸ ꓠꓬꓲ ꓥꓪ ꓠꓬ ꓠꓴ ꓦꓲ ꓗꓪ ꓔꓬ ꓠ ꓗꓹ ꓡꓳ꓾ ꓐꓯ ꓖꓶˍ ꓡꓳ꓿ 6 ꓖꓳ ꓡꓱ ꓠꓬ ꓬꓲ ꓮꓸ ꓟꓲꓸ ꓟꓲꓸ ꓬꓯꓼ ꓡ ꓢꓲ꓾ ꓠꓲꓹ ꓒꓴ ꓒꓴˍ ꓐꓰ ꓬꓰ-ꓢꓴ ꓔꓯ ꓘꓳꓻ ꓣꓴˍ ꓡꓳ꓿ 7 ꓬꓲ ꓪꓽ ꓮꓽ ꓙꓵ ꓖꓳ ꓟ ꓔꓯ ꓟꓳꓻ ꓗꓷ ꓠꓬ꓾ ꓬꓲ ꓠꓽ ꓝꓴꓲ ꓙꓳ ꓢꓴ ꓦꓲ ꓗꓪ ꓪꓰ ꓤ ꓟꓴ ꓙꓰꓳ꓾ ꓐꓰ ꓱ'ꓽ ꓠꓱꓽˍ ꓡꓳ꓿ 8 ꓢ-ꓘꓰ-ꓬꓴ ꓠꓬ ꓦꓰꓼ ꓞꓹ ꓢꓲ ꓬꓰ-ꓢꓴ ꓔꓯ꓾ ꓢꓲ ꓒꓽꓳ꓾ ꓥꓪ ꓙꓳˍ ꓟ ꓖꓴꓽ ꓙꓴꓽ ꓠꓬ ꓞꓳ ꓫꓸ ꓔꓯ ꓕꓲ ꓐꓶꓽ ꓐꓱꓻ ꓖꓶˍ ꓥꓳ꓿ ꓝꓮꓲ ꓠꓬ ꓥꓪ ꓮꓽ ꓟ ꓔꓯ ꓘꓳꓹ ꓜ ꓗꓷ ꓐꓷˍ ꓟꓲ ꓬꓲ ꓔꓯ ꓡꓲ ꓩꓴꓸ ꓡꓲꓸ ꓖꓶˍ ꓥꓳ꓾ ꓐꓯˍ ꓡꓳ꓿ 9 ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓢꓯꓼ ꓟꓬ ꓝˍ ꓟ ꓣꓱꓽ ꓛꓰꓽ ꓠꓬ ꓠꓬꓲꓸ ꓠꓬꓲ ꓕꓱ ꓕꓲ ꓦꓲ ꓗꓪ ꓛꓲ ꓡꓺꓳ꓿ ꓮ ꓡꓲꓳ ꓐꓯ ꓠꓬ ꓬꓲˍ ꓟꓲ ꓮ-ꓐ-ꓡ-ꓦ ꓞꓲꓼ ꓤ ꓡꓯꓹ ꓤ ꓥ ꓡꓳ꓿ 10 ꓡ-ꓞꓳ-ꓮ-ꓐꓲ ꓠꓽ ꓒꓲꓼ ꓬꓰ ꓟ ꓡꓽ ꓞꓳ ꓔꓯ ꓧꓪ ꓢꓲ ꓚꓬꓴˍ ꓐꓰ ꓡꓻ ꓟ ꓥ ꓡꓳ꓾ ꓐꓯˍ ꓡꓳ꓿