ꓡꓲꓽ ꓒꓰꓼ ꓬꓲ ꓟꓸ ꓟꓲꓽ ꓚꓱꓹ (Dialogue with Culture)

ꓡꓲꓽ ꓒꓰꓼ ꓐꓯˍ ꓟ ꓔꓯ ꓝꓮꓲ ꓕꓲꓽ ꓫꓵꓽ ꓐꓯ ꓥꓳ ꓐꓯꓹ ꓠꓬ ꓡꓲꓽ ꓒꓰꓼ ꓠꓬ ꓟꓵꓽ ꓕꓲꓽ ꓔꓶꓸ ꓗꓪ ꓔꓬ ꓟ ꓞꓳ ꓤꓽ ꓬꓲ ꓜꓴ ꓬꓲ ꓟꓯꓼ ꓡꓰ ꓓꓵꓽ ꓙꓽ ꓞꓰꓹ ꓢꓲ ꓞꓲꓼ ꓐꓱ ꓶ ꓢꓯꓸ ꓔꓬ ꓟ ꓙꓵꓹ ꓗꓪ ꓮ ꓡꓰ ꓢꓲ ꓬꓲ ꓓꓴ ꓥꓹ ꓡ ꓐꓰ ꓔꓶ ꓐꓬꓱꓽ ꓛꓹ ꓦˍ ꓟ꓾ ꓓꓵꓽ ꓙꓽ ꓞꓰꓼ ꓦˍ ꓟ ꓕꓲꓽ ꓫꓵꓽ ꓥˍ ꓡꓳ= ꓮ ꓓꓰꓢꓲꓖꓠ ꓝꓳꓣ ꓡꓲꓦꓲꓠꓖ ꓐꓯˍ ꓟ ꓓꓰꓢꓲꓖꓠ ꓐꓳ ꓦˍ ꓟ ꓕꓲꓽ ꓫꓵꓽ ꓥˍ ꓡꓳ= ꓖꓳ ꓟ ꓪꓴꓸ ꓠꓬ ꓚꓵꓸ ꓛꓬꓽ ꓢꓯꓸ ꓔꓬˍ ꓟ ꓙꓵꓹ ꓗꓪ ꓚꓵꓸ ꓛꓬꓽ ꓠꓲꓹ ꓫꓵˍ ꓟ ꓡꓰ ꓐꓰ ꓕꓲꓽ ꓡꓰ ꓟꓽ ꓓ ꓙꓲ ꓖꓴ ꓡꓰ ꓠ꓾ ꓟꓽ ꓓ ꓐꓲ ꓖꓴ ꓡꓰ ꓠ ꓕꓱ ꓡꓰ ꓔꓶ ꓐꓬꓱꓽ ꓛꓹ ꓢꓲ ꓛꓳˍ ꓟ ꓔꓯ ꓡꓲꓽ ꓒꓰꓼ ꓐꓯˍ ꓟ ꓥ ꓪ= ꓞꓳ ꓤꓽ ꓕꓲꓽ ꓣꓳ ꓢꓯꓸ ꓔꓬ ꓕꓯ ꓠꓬ ꓬꓲ ꓕꓲꓽ ꓞꓲꓼ ꓗꓪ ꓟꓽ ꓡꓯꓽ ꓛꓲˍ ꓟ꓾ ꓟꓽ ꓐꓲ ꓜꓲꓼˍ ꓟ꓾ ꓔꓳꓹ ꓜꓳ ꓡˍ ꓟ ꓫꓵꓽ ꓪꓴ ꓢꓲꓹ ꓛꓵꓽ꓾ ꓙꓽ ꓫꓸ ꓠꓬꓲ ꓔ ꓟ ꓫꓸ ꓙꓵ ꓟꓶꓽ ꓙꓵ ꓓꓴ ꓔꓳꓹ ꓜꓳˍ ꓟ꓾  ꓬꓲ ꓟꓶ ꓗꓪ ꓒꓬꓱꓼ ꓠꓲꓹ ꓫꓵˍ ꓟ ꓔꓶ ꓐꓬꓱꓽ ꓛꓹ ꓔ ꓟ ꓕꓱ ꓡꓲꓳ ꓫꓵꓽ ꓙꓳˍ ꓡꓳ= ꓞꓳ ꓤꓽ ꓕꓲꓽ ꓞꓲꓼ ꓡꓱꓸꓼ ꓗꓪ ꓣꓱꓽ ꓬꓯꓼˍ ꓟ ꓔꓯ ꓐꓲ ꓜꓲꓼ ꓡꓰ ꓠˍ ꓟ ꓣꓱꓽ ꓬꓯꓼˍ ꓟ ꓔꓯ ꓖꓶ ꓐ ꓡ ꓠˍ ꓟ ꓫꓹ ꓦˍ ꓟ ꓔꓶ ꓦˍ ꓟ ꓛꓳ ꓚꓱꓹ ꓫꓵꓽ ꓪꓴ ꓢꓲꓹ ꓛꓵꓽ ꓔꓯ ꓮ ꓡꓰ ꓢꓲ ꓫꓬ ꓡꓰ ꓠ ꓬꓰˍ ꓟ꓾ ꓬꓲ ꓟꓶ ꓕꓲꓽ ꓠꓬꓲ ꓗꓪ ꓒꓬꓱꓼ ꓠꓲꓹ ꓫꓵˍ ꓟ ꓔꓶ ꓐꓬꓱꓽ ꓛꓹ ꓦˍ ꓟ ꓡꓰ ꓐꓰ ꓛꓲ ꓠ ꓙ ꓫꓱꓽ ꓠˍ ꓟ ꓖꓳ ꓟ ꓡꓰ ꓟꓽ ꓞꓲꓻ ꓓꓵꓽ ꓙˍ ꓟ ꓐꓰ ꓕꓲꓽ ꓡꓰꓺ ꓔꓶ ꓐꓬꓱꓽ ꓛꓹ ꓔ ꓟ ꓬꓲ ꓟꓶꓽ ꓗꓪ ꓑꓯꓹ ꓟꓶ ꓠˍ ꓟ ꓧꓪꓸ ꓟ ꓛꓳ ꓚꓱꓹ ꓕꓱ ꓡꓲꓳ ꓫꓵꓽ ꓙꓳ ꓡˍ ꓟ ꓥ ꓪ= ꓕꓱ ꓡꓲꓳ ꓫꓵꓽ ꓛꓳ ꓚꓱꓹ ꓥ ꓕ ꓑꓳꓸ ꓔꓯ ꓡꓲꓽ ꓒꓰꓼ ꓐꓯˍ ꓟ ꓥ ꓪ=

ꓡꓲꓽ ꓒꓰꓼ ꓐꓯˍ ꓟ ꓠꓬ ꓒꓬꓱꓼ ꓡˍ ꓟ ꓫꓵꓽ ꓪꓴ ꓢꓲꓹ ꓛꓵꓽ ꓔꓯ ꓮ ꓡꓰ ꓢꓲ ꓫꓬ ꓡꓰ ꓠ ꓬꓰ ꓓꓴ ꓥꓹ ꓡ? ꓚꓵꓸ ꓛꓬꓽ ꓕꓲꓽ ꓞꓲꓼ ꓗꓪ ꓣꓱꓽ ꓬꓯꓼˍ ꓟ ꓮ ꓡꓲ ꓢꓲ ꓐꓲ ꓜꓲꓼ ꓡꓰ ꓠ ꓬꓰ ꓓꓴ ꓥꓹ ꓡ? ꓠꓲꓹ ꓘꓪꓽ ꓫꓵ ꓓꓴ ꓮ ꓡꓰ ꓢꓲ ꓬꓰ ꓓꓴ ꓥꓹ ꓡ? ꓖꓳ ꓟ ꓡꓰ ꓟꓽ ꓞꓲ ꓘꓹ ꓖꓴꓽ ꓡꓳ ꓛꓳꓽ ꓣꓳꓽ ꓟꓵꓽ ꓣꓳꓽ ꓡꓳ ꓗꓪ ꓞꓳ ꓤꓽ ꓮꓽ ꓙꓵꓽ ꓪꓽ ꓡꓯꓽ ꓘꓳ ꓫꓱꓹ ꓡꓯꓽ ꓘꓳ ꓠ ꓮ ꓡꓲ ꓢꓲ ꓔꓬ ꓓꓴ ꓥˍ ꓡ? ꓐꓰ ꓕꓱ ꓡꓰ ꓧꓪ ꓢꓲ ꓛꓳˍ ꓟ ꓚꓱꓹ ꓥ ꓪ= ꓞꓳ ꓙꓳ ꓢꓯꓸ ꓔꓬ ꓚꓱꓹ ꓗꓪ ꓚꓳ ꓣꓳ ꓐꓯ ꓥꓳ ꓐꓯ ꓠꓬ ꓡꓲꓽ ꓒꓰꓼ ꓐꓯˍ ꓟ ꓠꓬ ꓞꓳ ꓜꓴ ꓕꓲꓽ ꓜꓴ ꓞꓳ ꓫꓵꓽ ꓕꓲꓽ ꓫꓵꓽ ꓢꓳˍ ꓐꓰ ꓟꓽ ꓪꓽ ꓡꓯꓽ ꓘꓳ ꓠ ꓟꓽ ꓫꓱꓹ ꓡꓯ ꓘꓳ ꓠ ꓛꓳˍ ꓟ ꓛꓳ ꓚꓱꓹ ꓫꓶꓸ ꓡˍ ꓟ ꓡꓲꓽ ꓒꓰꓼ꓾ ꓗ ꓫꓵ꓾ ꓫꓱꓹ꓾ ꓢꓷꓸ ꓠꓲꓹ꓾ ꓬꓰˍ ꓟ ꓟꓬꓱꓽ ꓥ ꓕ ꓑꓳꓸ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓡꓲꓽ ꓒꓰꓼ ꓐꓯˍ ꓕꓯ ꓠꓬ ꓞꓳ ꓤꓽ ꓕꓲꓽ ꓣꓳ ꓪꓴꓽ ꓡ ꓟꓴ ꓡ ꓠˍ ꓟ ꓐꓱ ꓶ ꓢꓳꓺ ꓣꓴˍ ꓟ ꓞꓳ ꓤꓽ ꓕꓲꓽ ꓣꓳ ꓪꓴꓽ ꓡ ꓟꓴ ꓡ ꓠꓹ ꓟ ꓐꓱ ꓶ ꓛꓳ ꓠꓬꓲ ꓔ ꓟ ꓚꓱꓹ ꓕꓱ ꓡꓲꓳ ꓫꓵꓽ ꓔꓯ ꓐꓯˍ ꓟ ꓥ ꓪ=

ꓠꓬꓲ ꓫꓵꓽ ꓕꓲꓽ ꓫꓵꓽ ꓠꓬ ꓞꓳ ꓤꓽ ꓕꓲꓽ ꓜꓶ ꓡꓰ ꓕꓲꓽ ꓜꓶ ꓕꓲꓽ ꓙꓶ ꓕꓲꓽ ꓙꓶ ꓢꓷꓸ ꓠꓬꓲ ꓔ ꓟ ꓤꓼ ꓠꓱ ꓞꓲꓼ ꓞꓳ ꓡꓱ ꓞꓲꓼ ꓞꓳ ꓟꓳꓽ ꓞꓲꓼ ꓕꓱ ꓡꓲꓳ ꓫꓵꓽ ꓕꓲꓽ ꓞꓲꓼ ꓡꓰ ꓕꓲꓽ ꓞꓲꓼ ꓗꓪ ꓢꓷꓸ ꓠꓬꓲ ꓔ ꓟ ꓔꓯ ꓢꓳꓺ ꓣꓴˍ ꓟ ꓖꓳ ꓕꓲꓽ ꓙꓶ ꓗꓪ ꓢꓷꓸ ꓠꓬꓲ ꓔ ꓟ ꓢꓷꓸ ꓠꓲꓹ ꓕꓱ ꓡꓰ ꓢꓳꓺ ꓣꓴ ꓠꓬꓲ ꓔ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓢ ꓫꓵꓽ ꓕꓲꓽ ꓫꓵꓽ ꓞꓳ ꓤꓽ ꓕꓲꓽ ꓣꓳ ꓮ ꓡꓰ ꓢꓯꓸ ꓔꓬ ꓠˍ ꓟ ꓐꓱ ꓶ ꓔꓶ ꓐꓬꓱꓽ ꓐꓳ ꓔ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=  ꓖꓳ ꓟ ꓡꓰ ꓟꓽ ꓞꓲ ꓞꓳ ꓤꓽ ꓥˍ ꓠꓬ ꓖꓳ ꓕꓲꓽ ꓟꓵꓽ ꓗꓪ ꓬꓲ ꓜꓴ ꓬꓲ ꓟꓯꓼ ꓔꓯ ꓫꓬꓹ ꓑꓱ ꓢꓲ ꓪꓴꓽ ꓡ ꓟꓴ ꓡ ꓠ ꓬꓰˍ ꓟ ꓚꓱꓹ ꓥˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓞꓳ ꓤꓽ ꓕꓲꓽ ꓞꓲꓼ ꓡꓱꓸꓼ ꓗꓪ ꓕꓳꓹ ꓜꓳˍ ꓟ ꓫꓵꓽ ꓪꓴ ꓢꓲꓹ ꓛꓵꓽ ꓔꓯ ꓫꓬ ꓡꓰ ꓠ ꓬꓰˍ ꓟ ꓚꓱꓹ꓾ ꓞꓳ ꓤꓽ ꓕꓲꓽ ꓞꓲꓼ ꓠꓯꓸꓼ ꓗꓪ ꓟꓽ ꓐꓲ ꓜꓲꓼˍ ꓟ ꓔꓯ ꓐꓲ ꓜꓲꓼ ꓠ ꓬꓰˍ ꓟ ꓚꓱꓹ꓾ ꓖꓳ ꓟ ꓡꓰ ꓟꓽ ꓞꓲ꓾ ꓟꓵꓽ ꓘꓳꓼ ꓔꓯ ꓛꓳ ꓢꓲ ꓮ ꓡꓰ ꓢꓲ ꓢꓯꓸ ꓔꓬ ꓓꓴ ꓥꓹ ꓡ ꓐꓰ ꓧꓪꓸ ꓟ ꓚꓱꓹ꓾ ꓞꓳ ꓫꓵꓽ ꓕꓲꓽ ꓫꓵꓽ ꓠꓯꓸꓼ ꓗꓪ ꓢꓳˍ ꓐꓰ ꓟꓽ ꓪꓽ ꓡꓯꓽ ꓘꓳ ꓠ ꓛꓳˍ ꓟ ꓚꓱꓹ ꓛꓳˍ ꓟ ꓡꓲꓽ ꓒꓰꓼ ꓣꓱˍ ꓟ ꓡꓲꓽ ꓒꓰꓽ ꓾ꓶ ꓤꓼ ꓶ ꓟꓲ ꓾ꓫꓶꓹ꓾ ꓔꓬ ꓔ ꓠ ꓟ ꓙꓶ꓾ ꓓꓵꓽ ꓙˍ ꓟ ꓥ ꓕ ꓑꓳꓸ ꓮ ꓙꓵꓽ ꓔꓯ ꓐꓯˍ ꓟ ꓥ ꓪ= ꓬꓲ ꓟꓶꓽ ꓗꓪ ꓡꓲꓽ ꓒꓰꓼ ꓐꓯˍ ꓟ ꓠꓬ ꓠꓴˍ ꓟ ꓠꓲꓹ ꓟ ꓡꓰ ꓪꓴꓽ ꓡ ꓟꓴ ꓡ ꓠ ꓒꓳꓹ ꓡꓶꓸ ꓔ ꓟ ꓚꓱꓹ ꓕꓱ ꓟ ꓔꓯ ꓡꓲꓽ ꓒꓰꓼ ꓐꓯˍ ꓟ ꓥ ꓪ ꓐꓰ ꓕꓱ ꓡꓰ ꓐꓯˍ ꓡꓳ=