ꓮꓓ 400 ꓘꓳꓼ ꓐꓰ 500 ꓘꓳꓼ ꓗꓪ ꓘꓴꓽ ꓗꓪ ꓘꓴ ꓜꓲꓼ ꓞꓳ ꓚꓺ ꓟꓲꓽ (Church history)

 ꓮꓓ 400 ꓘꓳꓼ ꓐꓰ 500 ꓘꓳꓼ ꓗꓪ ꓘꓴꓽ ꓗꓪ ꓘꓴ ꓜꓲꓼ ꓞꓳ ꓚꓺ ꓟꓲꓽ

ꓮ.ꓓ 400 ꓘꓳꓼ ꓐꓰ 500 ꓘꓳꓼ ꓗꓪ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓬ, ꓡˍ ꓡꓳ꓿ꓣꓳ‐ꓟ ꓪ ꓔꓲ ꓙꓵꓽ ꓟ ꓣꓳ‐ꓟ ꓗꓴꓷꓼ ꓗꓪ ꓠꓬ ꓙꓲ‐ꓢꓴ ꓢꓲꓺ ꓤ ꓐꓴ ꓗꓴꓷꓼ ꓡꓰ ꓐꓰ ꓒꓬꓱꓼ ꓡ ꓡꓳ= ꓣꓳ‐ꓟ ꓪ ꓔꓲ Theodosian dynast (2)  ꓡꓯ ꓒꓯ, ꓗꓪ ꓠꓬ ꓘꓴ ꓜꓲꓼ ꓞꓳ ꓠꓯ, ꓗꓪ ꓖꓪꓽ ꓙꓱ ꓜꓲꓼ ꓓꓴ ꓓꓽ ꓟ (2) ꓟ ꓬꓰ ꓗꓷꓳ꓿ ꓓꓽ ꓪꓴ. ꓕꓲ ꓟ ꓠꓬ ꓬꓲ‐ꓩꓴ‐ꓢ ꓡꓳ ꓒꓱ  ꓗꓪ AD 431 ꓗꓪ ꓬꓰ ꓗꓷꓳ꓿ ꓠꓬꓲꓽ ꓧꓪ, ꓕꓲ ꓧꓪ ꓖꓪꓽ ꓙꓱ ꓜꓲꓼ ꓓꓴ ꓔꓯ ꓥ ꓟꓲ ꓬꓲ‐ꓩꓴ‐ꓢꓳ ꓡꓳ ꓒꓱ ꓗꓪ AD 449 ꓘꓳꓼ ꓗꓪ ꓬꓰ ꓗꓷꓳ꓿ꓕꓱ ꓖꓪꓽ ꓙꓱ ꓜꓲꓼ ꓓꓴ ꓗꓪ ꓠꓬ Constantine ꓡꓳ ꓒꓱ ꓗꓪ ꓐꓰ Nestorius ꓡꓰ ꓟ. ꓔ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓞꓳ ꓤ ꓥ ꓟꓲ ꓥ꓾ ꓪꓴ‐ꓢ ꓥ ꓟꓲ ꓥ ꓐꓰ ꓐꓯ ꓔ ꓡꓳ꓿ ꓕꓱ ꓠꓬꓲꓽ ꓟ ꓠꓬ ꓟꓽ ꓪ ꓡꓯ ꓘꓳ ꓐꓰ ꓐꓯ ꓔ ꓡꓳ꓿ ꓝꓮꓲ. ꓢꓲꓺ ꓒ ꓬꓰ‐ꓢꓴ ꓟ, ꓟ ꓟ‐ꓡꓲ ꓔꓯ ꓥ ꓟꓲ ꓪꓴ‐ꓢ ꓟ, ꓟ ꓟꓽ ꓥ ꓐꓰ ꓐꓯ ꓔ ꓡꓳ꓿ ꓘꓴ ꓜꓲꓼ ꓞꓳ ꓠꓬ Nestorius ꓡꓰ ꓟ. ꓔ ꓟ ꓚꓱ, ꓔꓯ ꓟꓽ ꓘꓳ ꓣꓴ꓿

ꓣꓳ‐ꓟ ꓪ ꓔꓲ ꓡꓰ Nestorius ꓔꓯ ꓣꓴ ꓠ, ꓟ ꓬꓰ ꓗꓷ ꓕꓯ ꓬꓲ. ꓪ ꓠꓬ Persia ꓟꓵꓽ ꓗꓪ ꓘꓰ ꓙꓰꓳ꓿ ꓬꓲ ꓠꓬ Orthodox ꓘꓴ ꓜꓲꓼ ꓞꓳ ꓐꓰ ꓔ ꓡꓰ ꓘꓳ ꓗꓷꓳ꓿  ꓘꓴ ꓜꓲꓼ ꓞꓳ ꓘꓴꓽ ꓗꓪ ꓥ ꓟꓲ ꓟꓽ ꓪ ꓡꓯ ꓘꓳ ꓓꓴ ꓮ ꓟꓬ, ꓙꓳ ꓡ ꓟ ꓥ ꓡꓳ꓿ ꓘꓴ ꓜꓲꓼ ꓞꓳ ꓘꓴꓽ ꓗꓪ ꓟꓽ ꓫꓱ ꓡꓯ ꓘꓳ, ꓟ ꓥꓳꓽ ꓫꓵꓽ ꓔꓯ ꓣꓱ ꓟ ꓪꓴ. ꓠꓬꓲ ꓘꓴ ꓜꓲꓼ ꓞꓳ ꓗꓪ Latin ꓥꓳꓽ ꓣꓱ ꓢꓴ ꓐꓰ Greek ꓥꓳꓽ ꓣꓱ ꓢꓴ ꓐꓴ ꓟꓽ ꓪ ꓡꓯ ꓘꓳ ꓓꓴ ꓙꓳ ꓗꓷꓳ꓿ ꓖꓳ ꓡꓱ ꓥ ꓟꓲ ꓘꓴ ꓜꓲꓼ ꓞꓳ ꓠꓬ ꓮ ꓟꓬ, ꓫꓵꓽ ꓗꓪ ꓪꓴꓽ ꓟꓴ ꓡ ꓚꓱ, ꓮ ꓟꓬ, ꓙꓳ ꓡꓰꓳ꓿