ꓚꓳ ꓑꓸ ꓡꓰ ꓬꓲ ꓢꓲ ꓒ ꓔꓯ ꓣꓱꓽ ꓙˍ ꓟ

ꓢꓲ ꓒ ꓬꓰ-ꓢꓴ ꓡꓰ ꓣꓳ ꓔꓯ ꓐꓯ ꓡꓳ꓾ ꓠꓴ ꓪ ꓠꓬ ꓠꓴ ꓪ ꓬꓰ ꓙꓲꓽ ꓙꓳˍ ꓟ ꓟꓬꓱꓽ ꓬꓰ ꓓꓳ ꓡꓰˍ ꓕꓯ ꓥꓪ ꓠꓴꓽ ꓠꓬ ꓚꓳ ꓑꓸ ꓡꓰꓽ ꓥ ꓡꓳ= ꓥꓪ ꓠꓴꓽ ꓠꓬ ꓮ ꓫꓵꓽˍ ꓟꓲ ꓟꓽ ꓬꓰ ꓗꓷ= ꓥꓪ ꓠꓴꓽ ꓬꓰ ꓙꓲꓽ ꓙꓳˍ ꓟ ꓡꓰꓽ ꓬꓰ ꓗꓷ ꓟ ꓥ ꓡꓳ ꓐꓰ ꓐꓯ ꓠ ꓗꓹ ꓡꓳ꓾ ꓐꓯ ꓟ ꓔꓯ ꓐꓯ ꓟꓸ ꓖꓶ ꓡ ꓔꓬ ꓡꓳ=

ꓪꓴ-ꓢ ꓠꓬ ꓣꓳ ꓔꓯ ꓮ ꓫꓵꓽˍ ꓟꓲ ꓟꓽ ꓐꓵ ꓓꓹ= ꓪꓴ-ꓢ ꓬꓲ ꓠꓵꓻ ꓠꓲꓹ ꓗꓪ ꓐꓰ ꓚꓰꓼ ꓔ ꓡꓳ= ꓬꓲ ꓟꓽ ꓥ ꓠꓬ ꓠꓴ ꓟꓽ ꓒꓬꓱꓼ ꓡ= ꓬꓲ ꓠꓬ ꓣꓳ ꓔꓯ ꓮ ꓫꓵꓽ ꓶꓻˍ ꓟꓲ ꓟꓽ ꓙꓳ= ꓮ ꓫꓵꓽ ꓥˍ ꓟꓲ ꓬꓲ ꓣꓳ ꓔꓯ ꓟꓽ ꓐꓵ ꓓꓹ= ꓣꓳ ꓓꓳ ꓟꓴˍ ꓟ ꓣꓳ ꓫꓱꓸ ꓖꓶˍ ꓟ ꓔꓯ ꓥˍ ꓟꓲ ꓬꓲ ꓟꓽ ꓣꓱꓽ ꓞꓹ= ꓖꓳ ꓡꓱ ꓥˍ ꓟꓲ ꓣꓳ ꓠꓬ ꓪꓴ-ꓢ ꓔꓯ ꓣꓱꓽ ꓞꓹ ꓡꓳ= ꓣꓳ ꓤꓶꓻ ꓠꓬ ꓪꓴ-ꓢ ꓟꓽ ꓔꓬ ꓠꓬ ꓢꓯꓸ ꓔꓬ ꓟꓽ ꓐ ꓡ= ꓣꓳ ꓤꓶꓻ ꓠꓬ ꓟꓲꓽ ꓦꓲ ꓟꓽ ꓙꓳ ꓕꓯ ꓢꓯꓸ ꓟꓽ ꓓ ꓟ ꓡꓰ ꓐꓰ ꓪꓴ-ꓢ ꓟꓽ ꓙꓳ ꓠꓬ ꓢꓯꓸ ꓔꓬ ꓟꓽ ꓓ= ꓣꓳ ꓠꓬ ꓬꓲ ꓔꓯ ꓣꓱꓽ ꓞꓹ ꓡꓳ=

ꓣꓳ ꓪꓴ-ꓢ ꓔꓯ ꓓꓳ ꓟꓴˍ ꓟ꓾ ꓪꓴ-ꓢ ꓔꓯ ꓫꓱꓸ ꓖꓶˍ ꓟ ꓠꓬ ꓣꓳ ꓦꓻ ꓐꓱ ꓶ ꓙꓲꓻ ꓖꓴ ꓙꓳ ꓓꓴ ꓥ ꓡꓳ= ꓣꓳ ꓚꓬꓴꓸ ꓟꓶ ꓓꓴ ꓥ ꓡꓳ= ꓣꓳ ꓬꓲ ꓔꓯ ꓪꓴꓸ ꓓꓵ ꓕꓱꓽˍ ꓟ ꓗꓪ ꓐꓰ ꓣꓳ ꓬꓲ ꓔꓯ ꓫꓱꓸ ꓖꓶˍ ꓟ ꓗꓪ ꓐꓰ ꓬꓲ ꓔꓯ ꓠꓬ ꓮ ꓫꓵꓽ ꓕꓲ ꓙꓰꓽ ꓡꓴꓽ ꓡꓰˍ ꓟ ꓟꓽ ꓙꓳ= ꓖꓳ ꓡꓱ ꓥˍ ꓟꓲ ꓣꓳ ꓬꓲ ꓔꓯ ꓫꓱꓸ ꓖꓶˍ ꓟ ꓗꓪ ꓐꓰ ꓚꓬꓴꓸ ꓟꓶˍ ꓡꓳ= ꓣꓳ ꓬꓲ ꓔꓯ ꓙꓵꓻˍ ꓟ ꓗꓪ ꓐꓰ ꓣꓳ ꓚꓬꓴꓸ ꓟꓶˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓣꓳ ꓔꓯ ꓐꓯ ꓟꓳꓸ ꓖꓶ ꓠꓲꓹ ꓫꓵˍ ꓟ ꓠꓬ ꓣꓳ ꓠꓬ ꓚꓳ ꓑꓸ ꓡꓰꓽ ꓥ ꓡꓳ= ꓕꓱ ꓡꓱ ꓐꓯ ꓟ ꓠꓬ ꓣꓳ ꓔꓯ ꓠꓬꓲꓸ ꓞꓰˍ ꓟ ꓟꓽ ꓥ= ꓣꓳ ꓔꓯ ꓚꓳ ꓑꓸ ꓕꓲ ꓣꓳˍ ꓡꓰ ꓐꓰ ꓗꓷ ꓡꓰ ꓝꓲ ꓠꓹ ꓟ ꓬꓲ ꓬꓰˍ ꓟ ꓟꓽ ꓥ= ꓬꓲ ꓐꓯ ꓠꓲꓹ ꓫꓵˍ ꓟ ꓠꓬ ꓣꓳ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓮ ꓕꓯˍ ꓟꓲ ꓙ ꓣꓳꓽ ꓠꓯꓹ ꓡꓳ= ꓪꓴ-ꓢ ꓡꓰ ꓖꓶ ꓙ ꓟꓳˍ ꓟ ꓙ ꓖꓴ꓾ ꓪꓴ-ꓢ ꓡꓰ ꓖꓶ ꓙ ꓟꓳˍ ꓟ ꓮ ꓙꓵꓽ ꓔꓯ ꓫꓸ ꓟꓳˍ ꓟ ꓠꓲꓹ ꓟ ꓡꓰ ꓘꓳ ꓣꓴ ꓗꓴꓸ ꓠꓯꓹ ꓡꓳ ꓐꓯ ꓟ ꓔꓯ ꓐꓯ ꓟꓳꓸ ꓖꓶ ꓡˍ ꓟ ꓥ ꓡꓳ=

ꓕꓲ ꓖ ꓕꓲ ꓧꓪꓹ ꓠꓬ ꓣꓳ ꓤꓶꓻ ꓗꓪ ꓗꓹ ꓛꓲꓽˍ ꓟˍ ꓟꓲ ꓙꓳˍ ꓥꓳ= ꓫꓸ ꓙꓵ ꓟꓷꓼ ꓙꓵˍ ꓟˍ ꓟꓲ ꓙꓳˍ ꓥꓳ= ꓗꓹ ꓛꓲꓽˍ ꓟ ꓔꓯ ꓘꓳ ꓣꓴˍ ꓕꓯ ꓗꓹ ꓛꓲꓽ ꓛꓲꓽ ꓡꓰꓽ ꓘꓳ ꓣꓴˍ ꓟ ꓡꓰ ꓐꓰ꓾ ꓫꓸ ꓙꓵ ꓟꓷꓼ ꓙꓵ ꓓꓴ ꓔꓳꓹ ꓜꓳꓽ ꓡˍ ꓕꓯ ꓥˍ ꓟꓲ ꓙ ꓣꓳꓽˍ ꓟ ꓠꓲꓹ ꓟ ꓡꓰ ꓘꓳ ꓣꓴ ꓐ ꓡ ꓠꓹ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓟ ꓥ ꓡꓳ=

ꓕꓱ ꓟ ꓡꓰꓽ ꓟꓽ ꓞꓲꓺ ꓪꓴ-ꓢ ꓟꓬꓱꓽ ꓟꓯˍ ꓟ ꓗꓪ ꓐꓰ ꓥˍ ꓟꓲ꓾ ꓪꓴ-ꓢ ꓠꓲꓹ ꓡꓶꓽ ꓛꓳˍ ꓟ ꓗꓪ ꓐꓰ ꓥˍ ꓟꓲ ꓪꓴ-ꓢ ꓠꓬ ꓥꓪ ꓔꓯ ꓕꓱ ꓟ ꓖꓶ ꓠꓯꓹ ꓡꓳ꓾ ꓖꓳ ꓟ ꓖꓶ ꓠꓯꓹ ꓡꓳ꓾ ꓐꓰ ꓓꓰꓽ ꓟꓽ ꓓ= ꓐꓯ ꓟꓽ ꓓ= ꓮ ꓡꓲꓳ ꓐꓯ ꓠꓬ ꓪꓴ-ꓢ ꓠꓬ ꓬꓲ ꓫꓱꓸ ꓤ ꓠꓲꓹ ꓗꓪ ꓐꓰ ꓣꓳ ꓔꓯ ꓖꓶˍ ꓟ ꓥ ꓡꓳ= ꓣꓳ ꓠꓬ ꓬꓲ ꓔꓯ ꓠꓴ ꓥꓪ ꓔꓯ ꓕꓱ ꓟ ꓖꓶ ꓡꓯ= ꓥꓪ ꓡꓰ ꓕꓱ ꓬꓰ ꓖꓶˍ ꓟ ꓑꓶꓸ ꓓꓴ ꓥꓪ ꓔꓯ ꓕꓱ ꓟ ꓖꓶ ꓡꓯ ꓐꓰ ꓐꓯ ꓟꓽ ꓓ= ꓪꓴ-ꓢ ꓠꓬ ꓬꓲ ꓠꓵꓻ ꓠꓲꓹ ꓗꓪ ꓐꓰ ꓖꓶ ꓠꓲꓹ ꓫꓵˍ ꓠꓬ ꓖꓶˍ ꓥꓳ= ꓖꓳ ꓡꓱ ꓥˍ ꓟꓲ ꓣꓳ ꓙꓵꓻ ꓔ ꓠꓯꓹ ꓟ ꓠꓬ ꓪꓴ-ꓢ ꓠꓬ ꓣꓳ ꓔꓯ ꓮ ꓕꓯ ꓥˍ ꓟꓲ ꓙꓲˍ ꓟ ꓖꓶˍ ꓡꓳ= ꓣꓳ ꓤꓶꓻ ꓔꓯ ꓫꓸ ꓙꓵ ꓟꓷꓼ ꓙꓵ ꓡꓰ ꓠꓹ ꓟ꓾ ꓥ ꓠꓬ꓾ ꓣꓳ ꓤꓶꓻ ꓐꓬ ꓡꓰ ꓠꓹ ꓟ ꓬꓲ ꓟꓽ ꓬꓰ ꓐꓯ ꓟ ꓔꓯ ꓙꓵꓻ ꓔ ꓠ ꓗꓹ ꓡꓳ=

ꓖꓳ ꓡꓱ ꓠꓬꓲ ꓣꓳ ꓠꓬꓲꓸ ꓠꓬꓲ ꓓꓵꓽ ꓙ ꓠꓬꓲ ꓓꓴ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓬꓰ ꓔꓬ ꓟ ꓟꓬꓱꓽ ꓮ ꓙꓵꓽ ꓠꓬ ꓣꓳ ꓬꓰ ꓙꓲꓽ ꓙꓳˍ ꓟ ꓑꓶꓸ ꓓꓴ ꓬꓰ ꓔꓬ ꓡꓳ꓾ ꓐꓯ ꓢꓲ ꓓꓵꓽ ꓙ ꓢꓲ ꓠꓬꓲ ꓪꓴ-ꓢ ꓔꓬ ꓗꓪ ꓙ ꓣꓳꓽˍ ꓟ ꓠꓲꓹ ꓟ ꓡꓰ ꓠꓴꓽˍ ꓟ ꓠꓲꓹ ꓟ ꓡꓰ ꓙ ꓫꓱꓽ ꓙꓰ ꓠꓹ ꓟ ꓠꓬꓲꓸ ꓠꓬꓲ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥ ꓡꓳ=