ꓫꓵꓻ ꓢꓴ ꓐꓱ ꓶ ꓪꓽ ꓘꓴˍ ꓟ (2)(Q & A)

ꓫꓵꓻ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓔꓯ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴ ꓬꓰˍ ꓟ ꓔꓯ 2 ꓟ-ꓘ-ꓐꓲ 12ꓽ 40- 46 ꓗꓪ ꓣꓳꓽ ꓛꓳꓽ ꓠꓬꓲ ꓠꓬ ꓟꓯꓼ ꓔꓯ ꓢꓲ ꓜꓲꓽ ꓪꓴꓽ ꓢꓴ ꓬꓲ ꓜꓲꓽ ꓥˍ ꓟ ꓬꓴ-ꓓ ꓠꓬ ꓢꓰꓼ ꓡꓯꓽ ꓘꓳ ꓓꓶꓽ ꓡꓯꓽ ꓘꓳ ꓠꓯꓸꓼ ꓗꓪ ꓟ ꓫꓵꓻ ꓢꓴ ꓐꓴ ꓔꓯ ꓚꓵꓸ ꓛꓬꓽ ꓒꓵꓽ ꓒꓽ ꓐꓴ ꓔꓵꓸ ꓖꓴ ꓗꓪ ꓔꓵꓸ ꓔ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓬꓲ ꓪꓽ ꓔꓯ ꓮꓽ ꓘꓶꓸ ꓒꓵꓽ ꓢꓲ ꓕꓱ ꓡꓰ ꓒꓵꓽ ꓒꓽ ꓐꓴ ꓔꓵꓸ ꓖꓴ ꓗꓪ ꓔꓵ> ꓔ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓫꓵꓻ ꓢꓴ ꓐꓴ ꓧꓪꓽ ꓗꓳ ꓓꓱˍ ꓐꓰ ꓐꓵ ꓞꓲꓽ ꓐꓯ ꓟꓲ ꓔꓯ ꓛꓳꓽ ꓠꓬ ꓠꓲꓽ ꓪꓸ ꓔꓲꓸ ꓐꓬꓱꓽ ꓕꓱ ꓡꓲꓳ ꓫꓵꓽ ꓔꓯ ꓔꓯꓹ ꓔ ꓟ꓾ ꓠꓷꓸ ꓔ ꓟ ꓔꓯ ꓡꓳꓸ ꓟꓳˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓬꓲ ꓪꓽ ꓫꓵˍ ꓟ ꓠꓬ ꓬꓴ-ꓓ ꓙꓵ ꓠꓲꓹ ꓠꓯꓸꓼ ꓗꓪ ꓟꓽ ꓬꓰ ꓝꓲˍ ꓟ ꓔꓯ ꓬꓰˍ ꓟ ꓑꓶꓸ ꓓꓴ ꓠꓲ ꓥˍ ꓡꓳ ꓐꓰ ꓕꓱ ꓡꓰ ꓡꓳꓸ ꓟꓳˍ ꓡꓳ= ꓖꓳ ꓡꓰ ꓠꓬꓲ ꓬꓲ ꓪꓽ ꓝꓴꓲꓸ ꓔꓯ ꓪꓴˍ ꓢ ꓡꓰ ꓣꓶꓸ ꓖꓶ ꓠꓹ ꓟ ꓐꓱ ꓶ ꓟꓯꓼ ꓒꓽ ꓐꓴ ꓠꓯꓸꓼ ꓗꓪ ꓒꓴ ꓖꓼ ꓢꓲ ꓙꓰ-ꓣꓴ-ꓢ-ꓡꓱ ꓗꓪ ꓒꓴ ꓡꓯꓽ ꓘꓪ ꓩꓴ ꓢꓲ ꓬꓲ ꓪꓽ ꓝꓴꓲꓸ ꓣꓶ ꓖꓶ ꓡ ꓠꓹ ꓟ ꓐꓱ ꓶ ꓛꓴ ꓔꓲˍ ꓟ ꓬꓰ ꓠˍ ꓟ ꓐꓱ ꓶ ꓕꓱ ꓡꓰ ꓒꓴ ꓡꓯꓽ ꓘꓪ ꓩꓴˍ ꓟ ꓚꓱꓹ ꓔꓯ ꓟꓳꓸ ꓡꓳꓸ ꓟꓳ ꓪ ꓓˍ ꓡꓳ= ꓖꓳ ꓕꓲꓽ ꓘꓴꓸ ꓗꓪ ꓮ ꓡꓰ ꓐꓳ ꓔ ꓡ ꓐꓯˍ ꓠꓬ ꓕꓱ ꓡꓰ ꓬꓰˍ ꓟ ꓠꓬ ꓙꓵ ꓠꓲꓹ ꓙꓳ ꓢꓴ ꓬꓰˍ ꓟ ꓙꓲˍ ꓟ ꓟꓬꓱꓽ ꓥˍ ꓡꓳ= ꓮ ꓡꓲꓳ ꓐꓯ ꓠꓬ ꓬꓲ ꓪꓽ ꓠꓬ ꓧꓪꓽ ꓗꓳ ꓓꓱꓽ ꓫꓵꓽˍ ꓟ ꓗꓪ ꓐꓰ ꓝꓮꓲ ꓢꓯꓸ ꓬꓲꓼ ꓡˍ ꓟ ꓔꓯ ꓙꓵ ꓔꓬ ꓟ ꓪꓴ ꓠꓬꓲ ꓥˍ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ=

2 ꓕꓲ-ꓟꓳ-ꓕꓲ-ꓪꓴ 1ꓽ 16-18 ꓗꓪ ꓥˍ ꓟꓲ ꓳ-ꓠꓰ-ꓢꓷ-ꓩꓴ ꓐꓱ ꓶ ꓪꓴ-ꓢ ꓫꓱꓸ ꓤꓼˍ ꓟ ꓙꓳ ꓠˍ ꓟ ꓐꓱ ꓶ ꓝꓲ ꓓꓴ ꓒꓳ-ꓡꓳ ꓡꓰ ꓪꓽ ꓘꓴˍ ꓟ ꓔꓯ ꓡꓳꓸ ꓟꓳ ꓪ ꓓˍ ꓡꓳ= ꓳ-ꓠꓰ-ꓢꓷ-ꓩꓴ ꓠꓬ ꓢꓲꓺ ꓒꓽ ꓻꓰ-ꓢꓴ ꓡꓰ ꓢꓲ ꓚꓰ ꓔ ꓟ 70 ꓣꓳ ꓠꓯꓸꓼ ꓗꓪ ꓐ ꓢꓴ ꓥˍ ꓡꓳ= ꓬꓰ ꓠꓬ ꓚꓳꓡꓳꓑꓧꓳꓠ ꓐꓯˍ ꓟ ꓔꓶꓸ ꓗꓪ ꓘꓴ ꓜꓲꓼ ꓞꓳ ꓔꓯ ꓪꓴꓸ ꓓꓵ ꓣꓱꓽ ꓔꓬ ꓟ ꓥˍ ꓡꓳ= ꓖꓳ ꓡꓰ ꓥˍ ꓟꓲ ꓪꓸ ꓔꓲꓸ ꓠꓰ-ꓣꓳ ꓡꓰ ꓬꓲ ꓔꓯ ꓢꓰꓼ ꓗꓷ ꓟ ꓪꓴꓸ ꓠꓬꓲ ꓫꓵꓳ= ꓖꓳ ꓕꓯ ꓝꓲ ꓓꓴ ꓒꓳ-ꓡꓳ ꓡꓰ ꓬꓰ ꓛꓬ ꓗꓷˍ ꓟ ꓝꓴꓲꓸ ꓔꓯ ꓪꓴ-ꓢ ꓡꓰ ꓫꓱꓸ ꓤꓼ ꓡ ꓠꓹ ꓟ ꓐꓱ ꓶ ꓪꓽ ꓘꓴ ꓖꓶˍ ꓟ ꓚꓱꓹ ꓢꓲꓽ ꓫꓬ ꓕꓳ ꓶ ꓗꓪ ꓕꓱ ꓡꓰ ꓡꓳꓸ ꓟꓳˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓫꓵ ꓢꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓠꓬ ꓙꓲ-ꓢꓴ ꓢꓲ ꓤꓼ ꓐꓴ ꓕ꓾ꓽ ꓝꓸ ꓖꓴ ꓕꓲꓽ ꓝꓸ ꓕꓱ ꓡꓰ ꓬꓰ ꓫꓷꓸ ꓡˍ ꓟ ꓣꓱꓽ ꓫꓷꓸ ꓡˍ ꓟ ꓕꓲꓽ ꓫꓵꓽ ꓥˍ ꓡꓳ= 

ꓠꓬꓲꓸ ꓠꓬꓲ ꓕꓱ ꓡꓰ ꓫꓵꓽ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓔꓯ ꓗ-ꓕꓳ-ꓡꓲ ꓐꓰ ꓳ-ꓔꓳ-ꓓꓳꓫ ꓘꓴ ꓜꓲꓼ ꓞꓳ ꓠꓬ ꓟꓽ ꓓꓽ ꓬꓰˍ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓙꓲ-ꓢꓴ ꓢꓲꓺ ꓤꓼ ꓐꓴ ꓠꓯꓸꓼ ꓗꓪ 3 ꓩꓴꓸ ꓗꓪ ꓚꓳꓸ 2 ꓩꓴꓸ ꓝꓴꓸ ꓠꓬ ꓫꓵꓽ ꓢꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓥ ꓪ= ꓖꓳ ꓟ ꓡꓰ ꓟꓽ ꓞꓲ ꓠꓱꓸ ꓐꓯꓼ ꓘꓴ ꓜꓲꓼ ꓞꓳ ꓗꓪ ꓚꓳꓸ ꓕꓲꓽ ꓐꓱ ꓥˍ ꓟꓲ ꓬꓰ ꓔꓬ ꓟ ꓙꓳˍ ꓡꓳ= ꓔꓯ ꓥꓳꓽ ꓐꓯ ꓠꓬ ꓮꓠꓖꓡꓲꓚꓮꓠ ꓘꓴ ꓜꓲꓼ ꓞꓳ ꓕꓲꓽ ꓐꓱ ꓥˍ ꓟꓲ ꓕꓱ ꓡꓰ ꓬꓰˍ ꓟ ꓔꓯ ꓡꓳꓸ ꓟꓳˍ ꓡꓳ=

ꓕꓱ ꓟ ꓫꓵ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓡꓰ ꓟꓽ ꓞꓲ ꓫꓵꓽ ꓢꓴ ꓐꓴ ꓔꓵꓸ ꓦˍ ꓟ ꓔꓷꓸ ꓡꓱꓼ ꓜꓴ ꓔꓯ ꓥˍ ꓟꓲ ꓡꓬꓽ ꓖꓶˍ ꓡꓳ= ꓢꓲꓽ ꓢꓲꓽ ꓫꓬ ꓫꓬ ꓗꓶ ꓡꓰ ꓠ ꓬꓰ ꓖꓶˍ ꓡꓳ= ꓖꓳ ꓟ ꓠꓬ ꓦꓺ ꓠꓬ ꓧꓪꓽ ꓗꓳ ꓓꓱ ꓐꓰ ꓔ ꓡ ꓢꓲ ꓧꓪꓽ ꓗꓳ ꓓꓱ ꓐꓰ ꓦꓺ ꓕꓲꓽ ꓪꓼ ꓢꓯꓸ ꓬꓲꓼ ꓡˍ ꓥꓳ ꓐꓰ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯ ꓔ ꓟ ꓝꓲ ꓓꓴ ꓐꓴ ꓡꓰ ꓐꓯ ꓔ ꓟ ꓡꓰ ꓐꓰ ꓕꓲꓽ ꓡꓰꓻ ꓝꓮꓲ ꓢꓯꓸ ꓬꓲꓼ ꓡ ꓔꓷꓸ ꓥˍ ꓟ ꓪꓴꓸ ꓠꓬꓲ ꓢꓲꓽ ꓫꓬ ꓢꓴ ꓐꓴ ꓔꓷꓸ ꓥˍ ꓡꓳ= ꓕꓱ ꓕꓲꓽ ꓘꓴꓸ ꓔꓯ ꓡꓱꓼ ꓜꓴ ꓔꓯ ꓢꓲꓽ ꓫꓬ ꓖꓶˍ ꓟ ꓥ ꓪ= ꓡꓬꓽ ꓖꓶˍ ꓟ ꓥ ꓪ=

ꓫꓵ ꓢꓴ ꓐꓱ ꓶ ꓪꓽ ꓘꓴ ꓖꓶꓽ ꓟꓽ ꓛꓲ ꓐꓯˍ ꓟ ꓙꓵ ꓠꓲꓹ ꓠꓬ ꓮꓽ ꓘꓶꓸ ꓙꓲˍ ꓟ ꓥ ꓪ= ꓖꓳ ꓡꓰ ꓥˍ ꓟꓲ ꓢꓲꓺ ꓒꓽ ꓬꓰ-ꓢꓴ ꓡꓰ ꓟ-ꓕꓲ 7ꓽ 21 ꓗꓪ ꓥꓪ ꓔꓯ ꓢꓲꓺ ꓒꓽ ꓢꓲꓺ ꓒꓽ ꓘꓴ ꓢꓴ ꓮꓽ ꓙꓵꓽ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓪ ꓟꓽ ꓓ= ꓥꓪ ꓐꓹ ꓐꓽ ꓠꓲꓹ ꓶ ꓔꓯ ꓛꓳ ꓢꓴ ꓡꓰ ꓢꓲ ꓛꓲ ꓬꓰ ꓡ ꓓꓴ ꓥꓳ ꓐꓰ ꓐꓯ ꓔ ꓡꓳ= ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓽ ꓛꓳˍ ꓟ ꓐꓯˍ ꓟ ꓠꓬ ꓛꓬ ꓥꓳꓽ ꓡꓰˍ ꓟ ꓔꓯ ꓐꓯˍ ꓟ ꓥ ꓪ=ꓛꓬ ꓥꓳꓽ ꓡꓰˍ ꓢꓴ ꓠꓬ ꓝꓴꓲꓸ ꓙꓳ ꓢꓴ ꓥˍ ꓡꓳ= ꓖꓳ ꓡꓰ ꓠꓬꓲ ꓕꓱ ꓕꓲꓽ ꓘꓴꓸ ꓗꓪ ꓪꓴ-ꓢ ꓠꓲꓹ ꓡꓶꓽ ꓔꓯ ꓟꓽ ꓛꓳ ꓢꓴ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓛꓲ ꓐꓰ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯˍ ꓟ ꓪꓴꓸ ꓠꓬꓲ ꓝꓴꓲꓸ ꓙꓳ ꓢꓴ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓟꓽ ꓛꓲ ꓐꓯˍ ꓟ ꓥ ꓪ= ꓪꓴ-ꓢ ꓠꓲꓹ ꓡꓶꓽ ꓔꓯ ꓛꓳ ꓢꓴˍ ꓡꓰ ꓢꓲ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓥꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓪꓴ-ꓢ ꓠꓲꓹ ꓡꓶꓽ ꓐꓹ ꓐꓽ ꓠꓲꓹ ꓶꓶꓽ ꓔꓯ ꓟꓽ ꓛꓳ ꓢꓴ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓛꓲ ꓓꓴ ꓥꓳ= ꓢꓲꓺ ꓒꓽ ꓬꓰ-ꓢꓴ ꓔꓯ ꓙꓵ ꓔꓬ ꓢꓴ ꓮꓽ ꓙꓵꓽ ꓟꓴꓽ ꓗꓪ ꓘꓴꓷꓼ ꓗꓪ ꓟꓽ ꓛꓲ ꓐꓰ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯ ꓔ ꓡꓳ= ꓖꓳ ꓡꓰ ꓠꓬꓲ ꓥꓪ ꓔꓯ ꓢꓲꓺ ꓒꓽ ꓢꓲꓺ ꓒꓽ ꓘꓴ ꓢꓴ ꓮꓽ ꓙꓵꓽ ꓟꓴ ꓗꓪ ꓗꓪ ꓟꓽ ꓛꓲ ꓐꓯˍ ꓟ ꓡꓰ ꓐꓰ ꓕꓲꓽ ꓡꓰ ꓖꓳ ꓟ ꓠꓬ ꓝꓴꓲꓸ ꓪꓴꓸ ꓠꓬꓲ ꓟꓽ ꓛꓲˍ ꓟ ꓥ ꓪ=

 ꓠꓬꓲꓸ ꓠꓬꓲ ꓣꓳꓽ ꓬꓲ-ꓢꓷ-ꓡꓲ ꓡꓽ ꓞꓳ ꓐꓴˍ ꓡꓰ ꓧꓶꓸ ꓕꓯ ꓗꓪ ꓙꓲ-ꓢꓴ ꓢꓲꓺ ꓤꓼ ꓐꓴ ꓬꓰ ꓡꓳꓹ ꓡꓰ ꓟ ꓡꓰ ꓐꓰ ꓫꓵꓻ ꓢꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓬꓲ ꓪꓽ ꓝꓴꓲꓸ ꓔꓯ ꓪꓴ-ꓢ ꓡꓰ ꓣꓶ ꓖꓶ ꓡ ꓠˍ ꓟ ꓐꓱ ꓶ ꓪꓽ ꓘꓴ ꓖꓶ ˍ ꓟ ꓠꓬ ꓙꓲˍ ꓟ ꓟꓬꓱꓽ ꓕꓲꓽ ꓟ ꓥ ꓐꓭ= ꓝꓮꓲ ꓢꓲꓺ ꓒꓽ ꓬꓰ-ꓢꓴ ꓡꓰ ꓐꓯ ꓔ ꓟ ꓠꓬ ꓬꓲ ꓟꓶꓽ ꓕꓲꓽ ꓠꓬꓲ ꓗꓪ ꓐꓯ ꓟꓵ ꓘꓶꓽˍ ꓕꓯ ꓮꓸ ꓣꓳ ꓐꓰ ꓮꓸ ꓛꓵꓼ ꓔꓯ ꓐꓱ ꓩꓴ ꓟ ꓡꓰ ꓐꓰ ꓒꓯꓹ ꓩꓴˍ ꓟ ꓡꓰ ꓐꓰ ꓠꓬꓲꓽ ꓐꓱ ꓒꓯꓽ ꓢꓲ ꓠꓬꓲ ꓐꓯ ꓟꓵ ꓘꓶꓽ ꓓꓴ ꓫꓵꓽ ꓘꓶꓽ ꓓꓴ ꓥꓳ= ꓖꓳ ꓡꓰ ꓫꓵꓽ ꓘꓶˍ ꓕꓯ ꓠꓴ ꓙꓵ ꓠꓲꓹ ꓮ ꓟꓬ ꓙꓳˍ ꓟ ꓙꓳˍ ꓡ ꓐꓰ ꓠ ꓠꓬꓲ ꓓꓴ ꓟꓽ ꓥ= ꓠꓴ ꓠꓬ ꓙꓲˍ ꓟ ꓟ ꓟꓬꓱꓽ ꓮ ꓟꓬ ꓬꓰ ꓗꓷ ꓡ ꓐꓰ ꓕꓱ ꓡꓰ ꓠ ꓠꓬꓲ ꓡ ꓓꓴ ꓥꓳ ꓐꓰ ꓟ-ꓕꓲ 25ꓽ 31-46 ꓗꓪ ꓕꓱ ꓡꓰ ꓐꓯ ꓔ ꓡꓳ=

ꓖꓳ ꓟ ꓪꓴꓸ ꓠꓬꓲ ꓕꓱ ꓕꓲꓽ ꓘꓴꓸ ꓗꓪ ꓙꓲˍ ꓟ ꓟꓬꓱꓽ ꓟꓽ ꓬꓰˍ ꓟ ꓠꓬ ꓝꓴꓲꓸ ꓥ ꓡꓳ ꓐꓯˍ ꓟ ꓔꓯ ꓣꓳ ꓔꓯ ꓢꓷꓸ ꓡꓰ ꓝꓲˍ ꓟ ꓥ ꓪ= ꓙꓲˍ ꓟ ꓟꓬꓱꓽ ꓟꓽ ꓬꓰˍ ꓟ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓪ ꓟꓽ ꓓ ꓐꓰ ꓕꓱ ꓡꓰ ꓢꓷꓸ ꓡꓰ ꓝꓲˍ ꓟ ꓥ ꓪ= ꓖꓳ ꓟ ꓪꓴꓸ ꓠꓬꓲ ꓙꓲˍ ꓟ ꓟꓬꓱꓽ ꓟꓽ ꓬꓰˍ ꓟ ꓠꓬ ꓝꓴꓲ ꓥ ꓢꓲ ꓝꓴꓲꓸ ꓖꓳ ꓟ ꓔꓯ ꓫꓬ ꓡꓰ ꓠꓹ ꓟ ꓐꓱ ꓶ ꓣꓳꓽ ꓠꓬ ꓢꓯꓼ ꓕꓵꓼ ꓠ ꓗˍ ꓡꓳ= ꓖꓳ ꓡꓰ ꓢꓯꓼ ꓕꓵꓼ ꓠˍ ꓟ ꓥˍ ꓟꓲ ꓟꓽ ꓢꓯꓼ ꓕꓵꓼ ꓪ ꓡꓰ ꓠꓬ ꓣꓳ ꓢꓯꓸ ꓢꓴ ꓠꓯꓸꓼ ꓗꓪ ꓓꓰꓽ ꓠˍ ꓟ ꓙꓵꓽ ꓪꓽ ꓙꓳˍ ꓟ ꓪꓴꓸ ꓠꓬꓲ ꓪꓴ-ꓢ ꓠꓯꓸꓼ ꓗꓪ ꓶ ꓓꓰ ꓪꓽ ꓘꓴ ꓠ ꓗˍ ꓡꓳ= ꓮ ꓡꓲꓳ ꓐꓯ ꓠꓬ ꓫꓵꓻ ꓢꓴ ꓠꓬ ꓓꓰꓽ ꓠˍ ꓟ ꓙꓵꓽ ꓪꓽ ꓟꓽ ꓙꓳ ꓡꓰꓳ= ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓡꓰ ꓢꓴ ꓥˍ ꓟꓲ ꓣꓳ ꓡꓰ ꓓꓰꓽ ꓙ ꓡꓯ ꓐꓯ ꓕꓯ ꓢꓲ ꓓꓰꓽ ꓙ ꓙꓲˍ ꓡꓳ=

ꓐꓯ ꓡꓳꓹ ꓡꓰ ꓟ ꓡꓰ ꓐꓰ ꓕꓲꓽ ꓡꓰꓻ ꓢꓲꓺ ꓒꓽ ꓬꓰ-ꓢꓴ ꓔꓯ ꓙꓵ ꓢꓴ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓡ ꓓꓴ ꓥꓳ ꓐꓯˍ ꓟ ꓡꓰ ꓐꓰ ꓝꓴꓲꓸ ꓐꓱ ꓶ ꓶ ꓓꓰꓽ ꓘꓴ ꓟꓽ ꓛꓲ ꓐꓭˍ ꓠꓬ ꓣꓳꓽ ꓮꓽ ꓙꓵꓽ ꓠꓬ ꓟꓴꓽ ꓗꓪ ꓗꓪ ꓛꓲ ꓡꓰ ꓡ ꓓꓴ ꓥꓳ= ꓖꓳ ꓡꓰꓥˍ ꓟꓲ ꓝꓴꓲꓸ ꓪꓴꓸ ꓠꓬꓲ ꓝꓴꓲꓸ ꓐꓱ ꓶ ꓞꓲꓽ ꓫꓬ ꓠˍ ꓟ ꓬꓳꓸ ꓚꓵˍ ꓠꓬ ꓪꓽ ꓘꓴ ꓖꓶˍ ꓟ ꓟ ꓠꓬ ꓟꓬꓽ ꓠꓬꓲ ꓐꓲ ꓜꓲꓼ ꓡꓰ ꓝꓲˍ ꓟ ꓥ ꓪ= ꓖꓳ ꓡꓰ ꓠꓬꓲ ꓕꓱ ꓟ ꓠꓬ ꓐꓲ ꓜꓲꓼ ꓡꓰ ꓝꓲˍ ꓟ ꓥ ꓢꓲ ꓮꓽ ꓠꓱ ꓟ ꓒꓵꓽ ꓒꓽ ꓐꓴ ꓙꓲ-ꓢꓴ ꓢꓲꓺ ꓤꓼ ꓐꓴ ꓬꓰ ꓫꓷꓸ ꓡˍ ꓟ ꓡꓰ ꓐꓰ ꓕꓲꓽ ꓡꓰ ꓠꓬꓲꓸ ꓠꓬꓲ ꓗꓪ ꓛꓲ ꓬꓰˍ ꓟ ꓕꓲꓽ ꓫꓵꓽ ꓥˍ ꓡꓳ= ꓖꓳ ꓟ ꓡꓰ ꓟꓽ ꓞꓲ ꓝꓲ ꓓꓴ ꓐꓴ ꓥˍ ꓟꓲ ꓫꓵꓻ ꓢꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓧꓪꓽ ꓓꓱꓽ ꓔꓯ ꓮꓽ ꓘꓶꓸ ꓒꓵꓽˍ ꓟ ꓔꓯ ꓣꓳꓽ ꓡꓳꓸ ꓟꓳ ꓪ ꓓ_ ꓡꓳ= ꓖꓳ ꓡꓰ ꓠꓬꓲ ꓕꓱ ꓟ ꓫꓵꓻ ꓢꓴ ꓐꓴ ꓐꓱ ꓶ ꓪꓽ ꓘꓴ ꓖꓶˍ ꓟ ꓠꓬ ꓫꓵꓻ ꓢꓴ ꓐꓴ ꓐꓱ ꓶ ꓙꓲ ꓖꓴ ꓙꓳˍ ꓟ ꓒꓬꓱꓼ ꓡ ꓓꓴ ꓥꓳ=