ꓡꓲꓽ ꓩꓴꓸꓸ ꓐꓰ ꓪꓳꓸ ꓑ ꓟꓸ ꓟꓲꓽ

ꓮꓽ ꓠꓱ ꓕꓯ ꓢꓶ ꓠꓯꓸꓸ ꓟꓲ ꓗꓪ ꓔꓬ ꓟ ꓪꓳꓸ ꓑ ꓕꓲꓽ ꓘꓹ ꓠꓬ ꓡꓳ ꓖꓪ ꓡꓯ ꓘꓳ ꓓꓴ ꓬꓲ ꓟꓯꓼ ꓛꓳ ꓒꓯꓹ ꓟꓽ ꓔꓬ ꓟ ꓪꓴꓸ ꓠꓬ ꓙ ꓖꓴ ꓫꓱꓽ ꓙꓰˍ ꓕꓯ ꓕꓲ ꓧꓶꓸ ꓡꓰ ꓟꓽ ꓛꓲ ꓠꓬꓲˍꓟ ꓕꓲꓽ ꓖ ꓗꓪ ꓛꓲ ꓬꓰ ꓡꓳ= ꓖꓳ ꓕꓲ ꓖ ꓗꓪ ꓛꓲ ꓬꓰ ꓕꓯ ꓡꓲꓽ ꓩꓴ ꓤꓼ ꓕꓲ ꓘꓹ ꓔꓯ ꓡꓳꓸ ꓟꓳˍ ꓡꓳ= ꓪꓳꓸ ꓑ ꓠꓬ ꓡꓲꓽ ꓩꓴ ꓔꓯ ꓮ ꓕꓯ ꓥ ꓟꓲ  ꓟꓽ ꓟꓳ ꓠꓬꓲ ꓟ ꓪꓴꓸ ꓠꓬꓲ ꓒ ꓕꓲ ꓗꓪ ꓙꓰ ꓢꓲ ꓠꓬꓲꓸ ꓠꓸ ꓬꓰ ꓡꓳ= ꓖꓳ ꓟ ꓡꓰ ꓐꓰ ꓡꓲꓽ ꓩꓴ ꓥ ꓟꓲ ꓪꓳꓸ ꓑ ꓔꓯ ꓮ ꓕꓯ ꓥ ꓟꓲ ꓟꓽ ꓟꓳ ꓠꓬꓲ ꓟ ꓪꓴꓸ ꓠꓬꓲ ꓒ ꓕꓲ ꓗꓪ ꓡ ꓢꓲ ꓠꓬꓲ ꓠꓸ ꓡ ꓡꓳ= ꓠꓴ ꓠꓽ ꓮ ꓫꓵꓽ ꓕꓲ ꓘꓹ ꓥ ꓡ ꓐꓰ ꓡꓲꓽ ꓩꓴ ꓡꓰ ꓠ ꓠꓬꓲˍ ꓡꓳ=  ꓥꓪ ꓠꓬ ꓪꓳꓸ ꓑ ꓥ ꓡꓳ ꓖꓳ ꓢꓶ ꓠꓯꓸꓸ ꓟꓲ ꓗꓪ ꓔꓬ ꓡꓳ = ꓠꓴ ꓡꓲ ꓮ ꓫꓵꓽ ꓕꓲ ꓘꓹ ꓥ ꓡ ꓐꓰ ꓪꓳꓸ ꓑ ꓡꓰ ꓠ ꓠꓬꓲ ꓡꓳ= ꓥꓪ ꓠꓬ ꓡꓲꓽ ꓩꓴꓻ ꓥ ꓡꓳ ꓐꓰ ꓐꓯ ꓢꓲ꓾ ꓬꓲ ꓠꓬꓲꓽ ꓫꓵꓸ ꓢꓴ ꓠꓬ ꓛꓳ ꓒꓯꓹ ꓗꓷ ꓡꓰ ꓡꓳ=

  ꓬꓲ ꓪ ꓠꓬꓲ ꓫꓵ ꓠꓬ ꓕꓲ ꓪꓼ ꓡꓳ ꓖꓪ ꓠꓹ ꓟ ꓢꓯꓼ ꓕꓵꓼ ꓥ ꓟꓲ ꓡꓲꓽ ꓩꓴꓻ ꓠꓯꓼ ꓗꓪ ꓛꓲ ꓒꓯꓹ ꓡꓯ ꓒꓯꓹ ꓟꓽ ꓙꓳ ꓟ ꓪꓴꓸ ꓠꓬꓲ ꓮ ꓡꓰ ꓥ ꓟꓲ ꓡꓳ ꓖꓪ ꓡꓯꓼ ꓘꓳ ꓟꓽ ꓙꓲˍ ꓡꓳ= ꓬꓲ ꓟꓶꓽ ꓗꓪ ꓠꓬ ꓪꓳꓸ ꓑ ꓬꓰˍꓟ ꓡꓰ ꓐꓰ ꓡꓲꓽ ꓩꓴꓻ ꓥ ꓟꓲ ꓬꓰ ꓡꓲꓽ ꓩꓴꓻ ꓬꓰ ꓟ ꓡꓰ ꓐꓰ ꓪꓳꓸ ꓑ ꓥ ꓟꓲ ꓖꓳ ꓡꓰ ꓬꓰ ꓢꓲ꓾ ꓡꓳ ꓖꓪ ꓡꓯꓼ ꓘꓳ ꓡꓳ= ꓖꓳ ꓡꓰ ꓡꓳ ꓖꓪ ꓡꓯꓼ ꓘꓳ ꓟ ꓔꓯ ꓬꓲ ꓠꓬꓲꓽ ꓫꓵꓸ ꓠꓬ ꓮ ꓘꓶꓸ ꓗꓹ ꓛꓲ ꓔꓬ ꓡꓳ=  ꓖꓳ ꓕꓯ ꓟꓲ ꓡꓰ ꓡ ꓟ ꓪꓴꓸ ꓠꓬꓲ ꓬꓲ ꓠꓬꓲꓽ ꓫꓵꓸ ꓦꓲꓸꓹ ꓗꓪ ꓡ ꓙꓰˍꓡꓳ= ꓪꓳꓸ ꓑ ꓦꓲꓸꓹ ꓘꓴꓽ ꓗꓪ ꓡ ꓡ ꓕꓯ ꓡꓲꓽ ꓩꓴꓻ ꓙꓰˍꓟ ꓡꓰ ꓙꓰ ꓢꓲ꓾ ꓡ ꓡ ꓟ ꓔꓯ ꓪꓳꓸ ꓑ ꓬꓲꓸ ꓟꓸ ꓟ ꓟꓳ ꓕꓯ ꓮ ꓘꓶꓸ ꓓꓵꓽ ꓙ ꓟꓶ ꓡꓰ ꓡꓳ= ꓥꓪ ꓤ ꓪꓳꓸ ꓑ ꓡꓲꓽ ꓩꓴꓻ ꓐꓰ ꓛꓳ ꓒꓯꓹ ꓬꓰ ꓔꓬ ꓡ ꓡꓲꓽ ꓩꓴꓻ ꓐꓰ ꓪꓳꓸ ꓑ ꓐꓴ ꓠꓽ ꓛꓴꓽ ꓙꓳ ꓢꓴ ꓥ ꓡꓳ= ꓮ ꓟꓶ ꓖꓳ ꓑꓳꓸ ꓡꓲꓽ ꓩꓴꓻ ꓐꓰ ꓕꓽ ꓪ ꓡꓯꓼ ꓘꓳ ꓐꓰ ꓐꓯ ꓡꓳ= ꓪꓳꓸ ꓑ ꓠꓬ ꓮ ꓡꓰ ꓓꓵꓽ ꓙ ꓟꓽ ꓓꓵꓽ ꓙ ꓗꓷ ꓡꓰ ꓡꓳ= ꓖꓳ ꓟ ꓡꓰ ꓐꓰ ꓡꓲꓽ ꓩꓴꓻ ꓥ ꓟꓲ ꓪꓳꓸ ꓑ ꓙꓰˍꓪ ꓡꓰ ꓙꓰ ꓢꓲ꓾ ꓦꓲꓸꓹ ꓘꓴꓽ ꓗꓪ ꓡ ꓡ ꓕꓯ ꓬꓲꓸ ꓟꓸ ꓟ ꓟꓳ ꓡꓰ ꓡꓳ= ꓥꓪ ꓤ ꓡꓲꓽ ꓩꓴꓻ ꓮ ꓡꓰ ꓙꓰ ꓔꓬ ꓡ ꓐꓰ ꓠ ꓠꓬꓲ ꓕꓯ ꓪꓳꓸ ꓑ ꓐꓰ ꓛꓳ ꓒꓯꓹ ꓪ ꓡꓯꓼ ꓘꓳ ꓢꓲꓽ ꓪꓳꓸ ꓑ ꓡꓰ ꓐꓰ ꓙꓰ ꓢꓳˍ ꓫꓵ ꓥꓳ ꓐꓰ ꓐꓯ ꓕꓯ ꓬꓲꓸ ꓟꓹ ꓟ ꓮ ꓘꓶꓸ ꓠꓲꓹ ꓢꓲꓼ ꓡꓳ= ꓪꓳꓸ ꓑ ꓔꓯ ꓟꓳ ꓕꓯ ꓠꓽ ꓕꓲꓽ ꓕꓳꓹ ꓜ ꓗꓷ ꓠ ꓔ ꓡꓳ=

ꓮ ꓫꓵꓽ ꓪꓴꓸ ꓠꓬ ꓟꓽ ꓜ ꓥ ꓐꓰ  ꓡꓲꓽ ꓩꓴꓻ ꓟꓹ ꓟ ꓡꓰ ꓐꓯ ꓡꓳ= ꓖꓳ ꓕꓯ ꓡꓲꓽ ꓩꓴꓻ ꓓꓵꓽ ꓙ ꓟꓶ ꓡꓰ ꓪ= ꓕꓲ ꓠꓬꓲ ꓛꓲ ꓡ ꓠꓬ ꓪꓳꓸ ꓑ ꓐꓰ ꓡꓲꓽ ꓩꓴꓻ ꓡꓳ ꓖꓪ ꓠꓹ ꓟ ꓜꓲ ꓡꓯ ꓘꓳ ꓡꓳ= ꓪꓳꓸ ꓑ ꓠꓬ ꓙꓳ ꓙꓳ ꓡꓰ ꓗꓷ ꓔꓬ ꓟ ꓪꓴꓸ ꓠꓬꓲ ꓶ ꓤ ꓗꓪ ꓐꓰ ꓡꓳ ꓖꓪ ꓡꓯꓼ ꓘꓳ ꓠꓹ ꓟ ꓪꓳꓸ ꓑ ꓡꓰ ꓡꓲꓽ ꓩꓴ ꓔꓯ ꓐꓯ ꓡꓳ=  ꓪꓳꓸ ꓑ ꓠꓴ ꓐꓰ ꓥꓪ ꓠꓽ ꓛꓴꓽ ꓙꓳ ꓢꓴ ꓟꓽ ꓥ ꓛꓳ ꓒꓯꓹ ꓥ ꓡꓳ= ꓟꓹ ꓟ ꓐꓴ ꓟꓽ ꓪ ꓡꓯꓼ ꓘꓳ ꓟ ꓡꓰ ꓐꓰ ꓠꓴ ꓢꓲ ꓥꓪ ꓠꓽ ꓛꓴꓽ ꓙꓳ ꓢꓴ ꓟꓽ ꓥ ꓪꓳꓸ ꓑ ꓠꓬ ꓡꓲꓽ ꓩꓴꓻ ꓜ ꓥ ꓡ ꓐꓯ ꓡꓰ ꓠꓴ ꓠꓽ ꓥꓪ ꓛꓳ ꓒꓯꓹ ꓥ ꓟ ꓪꓴꓸ ꓠꓬꓲ ꓠꓴ ꓔꓯ ꓟꓽ ꓜ ꓕꓲ ꓪ ꓡꓳ ꓖꓪ ꓡꓯ  ꓐꓰ ꓡꓲꓽ ꓩꓴꓻ ꓡꓰ ꓪꓳꓸ ꓑ ꓔꓯ ꓐꓯ ꓡꓳ= ꓖꓳ ꓕꓯ ꓢꓲ ꓪꓳꓸ ꓑ ꓠꓬ ꓡꓲꓽ ꓩꓴꓻ ꓒ ꓕꓲ ꓗꓪ ꓙꓰ ꓢꓲ꓾ ꓗꓹ ꓛꓲ ꓛꓲ ꓡꓳ ꓖꓪ ꓡꓯꓼ ꓘꓳ ꓡꓳ=ꓕꓱ ꓟꓸ ꓟꓲꓽ ꓟ ꓡꓰ ꓐꓰ ꓤ ꓠꓱ ꓐꓴ ꓥ ꓟꓲ ꓮ ꓡꓰ ꓔꓳꓹ ꓫꓵꓽ ꓞꓳ ꓤ ꓔꓯ ꓥ ꓟꓲ ꓪ ꓡꓯ ꓘꓳ ꓠꓲꓹ ꓠꓵ ꓡꓯꓼ ꓘꓳ ꓢꓲ ꓕꓲ ꓠꓲꓹ ꓕꓲ ꓪ ꓗꓹ ꓛꓲ ꓛꓲ ꓡꓰ ꓞꓳ ꓙꓳ ꓢꓯꓸ ꓔꓬ ꓪ ꓡꓰ ꓝꓲꓸ ꓡꓯ=