ꓖꓳ ꓓꓱ ꓔꓲ, ꓒ ꓬꓳ‐ꓦ ꓟ. ꓟꓲꓽ ꓚˍ ꓟ (Sunday reflection)

ꓖꓳ ꓓꓱ ꓔꓲ, ꓒ ꓬꓳ‐ꓦ ꓟ. ꓟꓲꓽ ꓚˍ ꓟ 

ꓮꓸ ꓞꓳꓹ ꓠꓬ ꓮ ꓟꓶˍ ꓡꓰ ꓢꓲꓹ ꓜꓲ ꓬꓲꓸ ꓚꓰ ꓗꓪ ꓟꓳꓸ ꓞꓹ ꓡꓳ꓿ ꓖꓳ ꓡꓱ ꓠꓬꓲ ꓙꓲꓻˍ ꓟ ꓢꓶꓹ ꓢꓶꓽ ꓟꓽ ꓓꓱꓼˍ ꓟ ꓢꓲꓹ ꓜꓲ ꓮꓽ ꓙꓵ ꓠꓬ ꓘꓷꓹ ꓩꓴ ꓗꓷ ꓢꓲ ꓮꓸ ꓔꓳ ꓗꓪ ꓡꓳꓺ ꓧꓳꓽ ꓗꓷˍ ꓥꓳ꓿ 11 ꓠꓴ ꓪꓽ ꓠꓲꓹ ꓟ ꓡꓶꓸ ꓗꓷ ꓟ ꓢꓷꓸ ꓡꓰ ꓓꓴ꓾ ꓥꓪ ꓡꓰ ꓠꓴ ꓪꓽ ꓔꓯ ꓬꓲꓻ ꓙꓬ ꓗꓪ ꓖꓳ ꓓꓱ ꓔꓲꓹ ꓖꓶˍ ꓡꓳ꓿

ꓥꓪ ꓗꓸ ꓠꓯ ꓢꓲ ꓗꓪ ꓡ ꓢꓴ ꓠꓬ ꓥꓪ ꓢꓶꓸ ꓟꓽ ꓞꓲ ꓪꓽ ꓠꓬꓲˍ ꓡꓳ꓿ ꓥꓪ ꓠꓬ ꓬꓲ ꓛꓲ ꓠꓲ ꓡꓵꓸ ꓙ ꓠꓹ ꓟˍ ꓟꓲ ꓟꓽ ꓒꓵꓽ꓿ ꓬꓲ ꓠꓽ ꓢꓲ-ꓫꓬ-ꓟ-ꓦˍ ꓐꓰ ꓮꓸ ꓔꓳꓸ ꓡꓰ ꓠꓴ ꓪꓽ ꓔꓯ ꓔꓲꓹ ꓖꓶ ꓡ ꓥꓳ꓿ 12 ꓬꓲ ꓡꓯꓼ ꓒꓯꓹ ꓗꓪ ꓠꓬ ꓪꓺ ꓟ ꓔꓯꓹ ꓔ ꓢꓲ꓾ ꓬꓲ ꓫꓪꓺ ꓓꓶꓽ ꓓꓰ ꓗꓪ ꓟ ꓫꓪ ꓔꓯ ꓪꓺ ꓫꓬꓻ ꓡꓰ ꓝꓲˍ ꓥꓳ꓿

ꓫꓪ ꓠꓬ ꓫꓪ ꓗꓹ ꓗꓪ ꓫꓺ ꓔ ꓥꓳ꓿ ꓬꓲ ꓒꓲꓻ ꓠꓽ ꓟꓽ ꓫꓵꓻ ꓮꓸ ꓔꓳꓸ ꓗꓪ ꓛꓴꓻ ꓗꓷˍ ꓥꓳ꓾ ꓐꓯˍ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓠꓬ ꓖꓳꓽ ꓓꓱ ꓔꓲ, ꓒ ꓬꓳ‐ꓦ ꓟ. ꓟꓲꓽ ꓚꓺ ꓟ ꓚꓱ, ꓥ ꓡꓳ꓿ ꓬꓲ. ꓠꓬ ꓬꓴ‐ꓔ ꓟꓵꓽ ꓗꓪ ꓓꓴ ꓙ ꓒꓳ, ꓡꓲꓼ ꓡ ꓠ, ꓟ ꓟ. ꓟꓲ ꓚꓺ ꓗꓷ ꓟ ꓥ ꓡꓳ꓿ ꓬꓳ‐ꓦ ꓡꓰ ꓓꓴ ꓙ ꓒꓳ, ꓡꓲꓼ ꓡ ꓢꓴ ꓮ ꓟꓬ, ꓔꓯ ꓝꓴꓲ ꓫꓬ, ꓡꓰ ꓝꓲ ꓠ, ꓟ ꓖꓳꓽ ꓓꓱ ꓔꓲ, ꓖꓶˍ ꓗꓷ ꓟ ꓥ ꓡꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓟ. ꓖꓶ ꓡ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓦꓵꓻ ꓡ ꓟ ꓙꓵ, ꓔꓯ ꓡꓳ. ꓔꓬ ꓟ ꓙꓵ, ꓗꓪ ꓣꓳ ꓬꓰ ꓥꓳꓽ ꓡꓰ ꓟ ꓝꓴꓲ. ꓔꓯ ꓓꓴ ꓙ ꓢꓲ ꓠꓬꓲ ꓪꓴ‐ꓢ ꓠꓲ, ꓒꓴ ꓚꓱ, ꓗꓪ ꓞꓳ ꓫꓱ ꓠ, ꓟ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿

ꓣꓳ ꓝꓴꓲ. ꓙꓳ ꓢꓴ ꓟꓲ ꓠꓯ ꓞꓳ ꓤ ꓐꓱ ꓶ ꓪꓴ‐ꓢ ꓮ‐ꓐ ꓔꓯ ꓖꓶ ꓡ ꓟ ꓙꓵ, ꓦꓵꓻ ꓡ ꓟ ꓗꓪ ꓪꓴ‐ꓢ ꓠꓲ, ꓒꓴ ꓟ ꓚꓱ, ꓗꓪ ꓙꓰ ꓡꓯ꓿ ꓗꓳ.ꓗꓷ ꓟ ꓙꓵ, ꓕꓯ ꓣꓳ ꓬꓰ ꓥꓳꓽ ꓡꓰ ꓟ ꓚꓱ, ꓛꓬ ꓡꓰ ꓟ ꓚꓱ, ꓗꓪ ꓐꓰ ꓓꓴ ꓙ ꓒꓳ, ꓡꓲꓼ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿