ꓟꓬꓱˍ ꓡꓰꓽ ꓟꓯ ꓢꓴ ꓔꓯ ꓙꓳ ꓗꓽ ꓖꓶˍ ꓟ

ꓟ-ꓕꓲ = 7ꓽ21ꓹ24-27

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳ ꓶ ꓗꓪ ꓠꓬ ꓢꓲꓺ ꓒ ꓬꓰ-ꓢꓴ ꓡꓰ ꓥꓪ ꓔꓯ ꓢꓲꓺ ꓒꓽꓳ꓾ ꓢꓲꓺ ꓒꓽꓳ ꓐꓰ ꓘꓴ ꓢꓴ ꓥ ꓕ ꓑꓳꓸꓼ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓪ ꓓꓵꓽ ꓡꓰ ꓟꓽ ꓓ= ꓥꓪ ꓐꓹ ꓐ ꓠꓲꓹ ꓡꓶꓽ ꓔꓯ ꓛꓳ ꓢꓴ ꓡꓰꓽ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓪ ꓓꓹ ꓡꓳ꓾ ꓐꓰ ꓐꓯ ꓔ ꓡꓳ=

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓦꓬꓼ ꓠꓬꓲ ꓠꓯꓸꓼ ꓗꓪ ꓞꓳ ꓤ ꓮ ꓟꓬꓹ ꓠꓬ ꓕꓰ ꓡꓰ ꓟꓬꓱꓺ ꓓꓳꓽ ꓣꓴ ꓔꓬ ꓟ ꓥ ꓡꓳ= ꓥꓪ ꓠꓬ ꓪꓴ-ꓢ ꓦ ꓡꓱ ꓢꓴ ꓥ ꓡꓳ= ꓥꓪ ꓠꓬ ꓔꓱꓹ ꓚꓵˍ ꓟ ꓪꓴ-ꓢ ꓔꓯ ꓥꓪ ꓧꓪ ꓟꓶ ꓡꓰꓳ= ꓥꓪ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓟꓶ ꓡꓰꓳ= ꓥꓪ ꓠꓬ ꓮ ꓓꓲ ꓒꓵꓽˍ ꓟ ꓪꓴ-ꓢ ꓔꓯ ꓘꓳꓹ ꓣꓴ ꓟꓶ ꓡꓰꓳ= ꓥꓪ ꓦ ꓡꓱ ꓐꓳ ꓡꓰꓳ= ꓪꓴ-ꓢ ꓔꓯ ꓥꓪ ꓓꓳ ꓟꓴ ꓫꓱꓸ ꓖꓶˍ ꓥꓳ= ꓮ-ꓡꓰ-ꓡꓴ-ꓬ ꓮ-ꓟꓰꓠ ꓐꓰ ꓪꓴ-ꓢ ꓟꓬꓱꓺ ꓔꓯ ꓘꓴ ꓓꓰꓽ ꓢꓲ ꓠꓬꓲ ꓫꓱꓸ ꓖꓶ ꓔꓬ ꓡꓳ=

ꓖꓳ ꓡꓱ ꓐꓯ ꓥ ꓟꓲ ꓕꓱ ꓟ ꓠꓯꓸꓼ ꓗꓪ ꓟꓬꓽ ꓠꓬꓲ ꓠꓬ ꓢꓲꓺ ꓒꓽꓳ꓾ ꓢꓲꓺ ꓒꓽꓳ ꓐꓰ ꓐꓯ ꓢꓲ ꓠꓬꓲ ꓚꓵꓺ ꓚꓵꓺ ꓤꓶꓻ ꓦꓬꓼ ꓠꓬꓲ ꓛꓳ ꓫꓱꓽ ꓔꓬ ꓟ ꓠꓬ ꓐꓹ ꓐ ꓠꓶꓽ ꓡꓶꓽ ꓟꓽ ꓥ ꓥ ꓐꓰ ꓛꓳ ꓫꓱꓽ ꓔꓬ ꓟ ꓟꓬꓽˍ ꓡꓳ= ꓖꓳ ꓟ ꓪꓴꓸ ꓠꓬꓲ ꓣꓳ ꓥˍ ꓟꓲ ꓪꓴ-ꓢ ꓦ ꓡꓱ ꓢꓴ ꓐꓯ ꓕꓲ ꓖꓼ꓾ ꓢꓲꓺ ꓒꓽꓳ ꓢꓲꓺ ꓒꓽꓳ ꓐꓰ ꓘꓴ ꓔꓬ ꓕꓲ ꓖꓼ ꓣꓳ ꓕꓰ ꓡꓰ ꓦꓬꓼ ꓠꓬꓲ ꓗꓳꓸ ꓔꓬ ꓥꓳ ꓐꓯ ꓠꓬ ꓟꓴꓽ ꓗꓪ ꓗꓴꓷꓼ ꓠꓬ ꓣꓳ ꓐꓰ ꓶꓽ ꓤ ꓗꓶꓹ ꓞꓹ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓠꓬ ꓐꓹ ꓐ ꓠꓲꓹ ꓡꓶꓽ ꓔꓯ ꓛꓳ ꓠ ꓗˍ ꓡꓳ= ꓐꓹ ꓐ ꓠꓲꓹ ꓡꓶꓽ ꓠꓬ ꓮ ꓫꓵꓽ ꓥ ꓡ= ꓐꓹ ꓐ ꓠꓲꓽ ꓡꓶꓽ ꓠꓬ ꓣꓳ ꓟꓲ ꓠꓯ ꓞꓳ ꓤ ꓮ ꓙꓵꓽ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓣꓳ ꓚꓬꓴꓸ ꓢꓲꓺ ꓒ ꓡꓰ ꓐꓰ ꓙꓵꓻ ꓢꓲ ꓠꓬꓲ ꓚꓬꓴꓸ ꓢꓲꓺ ꓒ ꓐꓯ ꓔ ꓟ ꓐꓯ ꓘꓶꓽ ꓔꓯ ꓛꓳ ꓠꓹ ꓟ ꓥ ꓡꓳ= ꓢꓲꓺ ꓒ ꓬꓰ-ꓢꓴ ꓣꓳ ꓔꓯ ꓮ ꓫꓵꓽ ꓐꓯ ꓖꓶ ꓡ ꓔꓬ ꓡ꓾ ꓮ ꓫꓵꓽ ꓐꓯ ꓟꓳꓸ ꓖꓶ ꓔ ꓡ ꓐꓯ ꓠꓬ ꓠꓴ ꓪ ꓪꓴ-ꓢ ꓔꓯ ꓙꓵꓻ= ꓕꓲ ꓖꓳ ꓓꓱꓽ ꓕꓲ ꓶꓽ ꓟꓬ ꓡꓱꓸꓼ ꓪꓴ-ꓢ ꓔꓯ ꓠꓲꓹ ꓠꓵꓻ= ꓥꓪ ꓠꓴꓻ ꓪ ꓔꓯ ꓠꓲꓹ ꓠꓵˍ ꓟ ꓡꓰ ꓐꓰ ꓠꓴ ꓪ ꓥˍ ꓟꓲ ꓕꓲ ꓣꓳ ꓛꓳ ꓕꓲ ꓣꓳ ꓠꓲꓹ ꓠꓵ ꓡꓯ ꓘꓳ꓾ ꓐꓰ ꓐꓯ ꓔ ꓟ ꓐꓯ ꓘꓶꓽ ꓥ ꓡꓳ=

ꓢꓲꓺ ꓒ ꓬꓰ-ꓢꓴ ꓐꓯ ꓔ ꓟ ꓡꓰ ꓐꓰ ꓣꓳ ꓠꓶꓽ ꓛꓳ ꓕꓲ ꓣꓳ ꓔꓯ ꓣꓳ ꓠꓲꓹ ꓠꓵ ꓔꓬ ꓡ? ꓢꓲꓺ ꓒ ꓬꓰ-ꓢꓴ ꓡꓰ ꓐꓯ ꓔ ꓡꓳ= ꓣꓳ ꓓꓰ ꓡꓰˍ ꓟ ꓕꓲ ꓣꓳ ꓔꓯ ꓬꓲꓻ ꓙꓬ ꓕꓲ ꓗꓶꓸ ꓧꓳꓸ ꓖꓶˍ ꓠꓬ ꓥꓪ ꓔꓯ ꓧꓳꓸ ꓖꓶˍ ꓟ ꓥ ꓡꓳ= ꓐꓵ ꓞꓶꓽ ꓟꓽ ꓙꓳ ꓢꓴ ꓔꓯ ꓐꓵ ꓞꓶꓽ ꓖꓶˍ ꓠꓬ ꓥꓪ ꓔꓯ ꓖꓶˍ ꓟ ꓥ ꓡꓳ= ꓫꓸ ꓢꓴ ꓟꓷꓼ ꓢꓴ ꓔꓯ ꓬꓰ ꓙˍ ꓟ ꓠꓬ ꓥꓪ ꓔꓯ ꓬꓰ ꓙˍ ꓟ ꓥ ꓡꓳ꓾ ꓐꓰ ꓐꓯ ꓟ ꓕꓲ ꓡꓰꓹ ꓫꓸ ꓢꓴ ꓟꓷꓼ ꓢꓴ ꓣꓳ ꓠꓶꓽ ꓛꓳ ꓕꓲ ꓣꓳ ꓔꓯ ꓠꓲꓹ ꓠꓵ ꓔꓬ ꓥꓳ ꓐꓯ ꓠꓬ ꓟꓴꓽ ꓗꓪ ꓗꓴꓷꓼ ꓠꓬ ꓣꓳ ꓐꓱ ꓶ ꓥ ꓡꓳ= ꓕꓱ ꓟ ꓠꓬ ꓐꓹ ꓐ ꓬꓲꓸ ꓠꓲꓹ ꓡꓶꓽ ꓥ ꓡꓳ=

ꓣꓳ ꓮ ꓙꓵꓽ ꓠꓬ ꓢꓲꓺ ꓒ ꓬꓰ-ꓢꓴ ꓗꓪ ꓐꓰ ꓐꓹ ꓐ ꓪꓴ-ꓢ ꓔꓬ ꓗꓪ ꓙꓰˍ ꓡꓳ= ꓕꓱ ꓟ ꓪꓴꓸ ꓠꓬꓲ ꓢꓲꓺ ꓒ ꓬꓰ-ꓢꓴ ꓗꓪ ꓐꓰ ꓟꓽ ꓥ ꓠꓬ ꓮ ꓟ ꓥˍ ꓟꓲ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓙꓰ ꓪ ꓟꓽ ꓓ꓾ ꓐꓰ ꓐꓯ ꓔ ꓟ ꓙꓳˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓶꓽ ꓛꓳ ꓕꓲ ꓣꓳ ꓐꓱ ꓶ ꓣꓳ ꓢꓯꓸ ꓔꓬ ꓠꓬ ꓕꓱ ꓟ ꓠꓬ ꓪꓴ-ꓢ ꓐꓱ ꓶ ꓣꓳ ꓢꓯꓸ ꓔꓬ ꓟ ꓥ ꓡꓳ= ꓠꓶꓽ ꓛꓳ ꓕꓲ ꓣꓳ ꓐꓱ ꓶ ꓢꓯꓸ ꓔꓬ ꓟ ꓠꓬ ꓟꓲ ꓠꓯ ꓗꓪ ꓢꓷꓸ ꓠꓲꓹ ꓙꓳ ꓒ ꓕꓲ ꓣꓳ ꓕꓯꓽ ꓢꓲ ꓢꓷꓸ ꓠꓲꓹ ꓙꓳ ꓓꓰꓺ ꓡꓰ ꓢꓴ ꓥ ꓡꓳ= ꓧꓶꓽ ꓚꓲꓺ ꓕꓯ ꓢꓲ ꓦꓲꓻ ꓫꓬꓹ ꓔ ꓟ ꓟꓽ ꓥ ꓥ ꓐꓰ ꓭꓸ ꓛꓲꓺ ꓕꓯꓽ ꓢꓲ ꓦꓲꓻ ꓫꓬꓹ ꓔ ꓟ ꓔꓯ ꓫꓱꓸˍ ꓡꓳ= ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓡ ꓕꓯ ꓠꓬ ꓦꓲꓻ ꓕꓱ ꓟ ꓠꓬ ꓐꓬ ꓡꓰ ꓟꓶꓽ ꓡꓰ ꓟꓽ ꓓ ꓟ ꓕꓲ ꓡꓰꓹ ꓣꓳ ꓠꓶꓽ ꓛꓳꓽ ꓐꓱ ꓶ ꓣꓳ ꓢꓯꓸ ꓔꓬ ꓟ ꓠꓬ ꓪꓴ-ꓢ ꓐꓱ ꓶ ꓢꓯꓸ ꓔꓬ ꓟ ꓪꓴꓸ ꓠꓬꓲ ꓪꓴ-ꓢ ꓐꓰ ꓕꓲ ꓡꓰꓹ ꓔꓬ ꓟ ꓑꓶꓸ ꓓꓴ ꓮ ꓫꓵꓽ ꓔꓳꓹ ꓜꓳꓽ ꓡˍ ꓥ ꓟꓲ ꓣꓳ ꓠꓬ ꓐꓬ ꓡꓰ ꓛꓵꓽ ꓡꓰ ꓟꓶꓽ ꓡꓰ ꓟꓽ ꓓ=

ꓖꓳ ꓟ ꓪꓴꓸ ꓠꓬꓲ ꓣꓳ ꓐꓱ ꓶ ꓟꓴꓽ ꓗꓪ ꓗꓴꓷꓼ ꓠꓬ ꓣꓳ ꓠꓶꓽ ꓛꓳꓽ ꓕꓲ ꓣꓳ ꓔꓯ ꓬꓰ ꓙ ꓔꓳꓹ ꓙ꓾ ꓠꓶꓽ ꓛꓳꓽ ꓐꓱ ꓶ ꓢꓯꓸ ꓔꓬ ꓟ ꓤꓶꓻ ꓦꓬꓼ ꓠꓬꓲ ꓥ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓶꓽ ꓛꓳꓽ ꓐꓱ ꓶ ꓢꓯꓼ ꓕꓵꓼ ꓓꓴ ꓬꓰ ꓡꓯ= ꓕꓱ ꓟ ꓠꓬ ꓪꓴ-ꓢ ꓔꓯ ꓣꓳ ꓣꓱꓽ ꓙ ꓔꓬ ꓟ ꓥ ꓡꓳ=