ꓗꓳꓸ ꓛꓲ ꓡˍ ꓟ ꓙꓵꓹ ꓓꓽ ꓪꓴꓸ ꓕꓲꓽ ꓫꓵꓽ ꓠꓽ (Homily)

ꓗꓳꓸ ꓛꓲ ꓡˍꓟ ꓙꓵꓹ ꓠꓯꓸꓼ ꓗꓪ ꓟ ꓓꓽ ꓪꓴꓸ ꓕꓲꓽ ꓫꓵꓽ ꓠꓽ

ꓬꓲ-ꓢ-ꓬ ꓕꓳꓽ ꓶ 2ꓽ 1-5

ꓬꓴ-ꓔ ꓟꓵˍ ꓐꓰ ꓙꓱ-ꓣꓴ-ꓢ-ꓡꓱ ꓔꓯ ꓖꓴˍ ꓟ꓾ ꓮ-ꓟꓳ-ꓤꓶ ꓬꓲ ꓤ ꓬꓲ-ꓢ-ꓬ ꓟꓳˍ ꓟ ꓦꓻ ꓐꓬꓱ ꓐꓯ ꓘꓶ꓿ꓡꓳꓹ ꓬꓰˍ ꓟ ꓦꓬ ꓠꓬꓲ ꓗꓪ꓾ ꓬꓰ-ꓧꓳ-ꓧꓪ ꓦꓲ ꓪꓼ ꓚꓲ ꓠꓬ ꓪꓽ ꓙꓵ ꓪꓴ ꓓꓵ ꓗꓪ ꓔꓶ ꓕꓶ ꓡꓰ ꓢꓲ꓾ ꓠꓱ ꓐꓯ ꓪ ꓚꓲ ꓢꓶꓸ ꓟꓽ ꓞꓲ ꓓꓳꓹ ꓟꓴ ꓔˍ ꓟ ꓒꓬꓱ ꓡˍ ꓥꓳ꓿ ꓞꓳ ꓫꓵ ꓥ ꓕ ꓑꓳ ꓠꓬ ꓪ ꓚꓲ ꓕꓱ ꓟ ꓗꓪ ꓜꓲꓼ ꓩꓴ ꓡˍ ꓥꓳ꓿ ꓖꓳ ꓡꓱ ꓢꓲ ꓑ ꓫꓬ ꓮ ꓟꓬ ꓫꓵꓽ ꓙꓰ ꓢꓲ꓾ ꓕꓱ ꓡꓱ ꓐꓯˍ ꓥꓳ꓾ ꓡꓯ꓾ ꓬꓰ-ꓧꓳ-ꓧꓪ ꓬꓲ ꓚꓱꓹ ꓣꓳ ꓔꓯ ꓟꓸ ꓖꓶ ꓡ ꓠꓹ ꓟˍ ꓐꓰ ꓬꓲ ꓙ ꓖꓴ ꓗꓪ ꓣꓳ ꓫꓱ ꓠꓹ ꓟ꓾ ꓬꓰ-ꓧꓳ-ꓧꓪ ꓪ ꓚꓲ ꓗꓪ꓾ ꓬ-ꓗꓴ ꓬꓲ ꓪꓴ-ꓢ ꓦꓲ ꓗꓪ ꓣꓳ ꓓꓯ ꓙꓰ ꓡꓯ꓿ ꓮ ꓡꓲꓳ ꓐꓯ ꓠꓬ ꓜꓲ-ꓬꓴ ꓗꓪ ꓐꓰ ꓙꓵꓽ ꓗ ꓚ ꓓꓳ ꓙꓰˍ ꓥꓳ꓿ ꓙꓱ-ꓣꓴ-ꓢ-ꓡꓱ ꓗꓪ ꓐꓰ ꓬꓰ-ꓧꓳ-ꓧꓪ ꓐꓯ ꓘꓶ ꓟꓸ ꓓꓳ ꓙꓰˍ ꓥꓳ꓿ ꓬꓲ ꓠꓬ ꓞꓳ ꓫꓵ ꓞꓳ ꓙꓰ ꓠꓬꓲꓽ ꓗꓴ ꓚꓸꓼ ꓗꓪ ꓐꓯ ꓟꓴ ꓘꓶˍ ꓥꓳ꓿ ꓑ ꓫꓬ ꓮ ꓟꓬ ꓫꓵꓽ ꓐꓱ ꓶ ꓐꓯ ꓞꓷˍ ꓥꓳ꓿ ꓖꓳ ꓡꓱ ꓢꓲ ꓬꓲ ꓪ ꓮ ꓕ ꓪꓴ ꓒꓲ ꓔꓯ ꓠꓬ ꓡꓽ ꓘꓶꓽ ꓓꓶˍ ꓥꓳ꓿ ꓬꓲ ꓪ ꓐ ꓥꓷꓹ ꓔꓯ ꓠꓬ ꓟꓳꓸ ꓞꓳꓹ ꓓꓶˍ ꓥꓳ꓿ ꓖꓳ ꓕꓯ ꓞꓳ ꓫꓵ ꓛꓳꓽ ꓞꓳ ꓫꓵ ꓠꓬ ꓮ ꓕ ꓪꓴ ꓒꓲꓹ ꓚꓵꓹ ꓢꓲ ꓔꓳꓹ ꓡꓯ ꓘꓳˍ ꓟ ꓟꓽ ꓬꓰꓳ꓿ ꓟꓯꓼ ꓓꓶ ꓡꓯ ꓘꓳ ꓠꓹ ꓟˍ ꓟꓲ ꓬꓲ ꓪ ꓟꓽ ꓢꓳꓺꓳ꓿ ꓬ-ꓗꓴ ꓕꓲ ꓦꓲ ꓢꓴꓳ꓾ ꓡꓯ꓾ ꓬꓰ-ꓧꓳ-ꓧꓪ ꓠꓬꓲ ꓟꓳ ꓓꓴ ꓗꓪ ꓣꓳꓽ ꓫꓱꓽ ꓡꓯ꓿

ꓣꓳ-ꓟ 12ꓽ 11-14

ꓞꓳ ꓕꓰꓻ ꓬꓰˍ ꓟ ꓗꓪ ꓕꓽ ꓐꓴꓻ꓿ ꓦꓻ ꓗꓪ ꓠꓲꓹ ꓟ ꓡꓱ ꓢꓲ ꓢꓲ ꓒꓽ ꓔꓯ ꓣꓱꓽ ꓙ꓿ 12 ꓥꓳ ꓡꓳꓸˍ ꓟ ꓗꓪ ꓗꓹ ꓛꓲ ꓢꓲ꓾ ꓫꓸ ꓙꓵˍ ꓟ ꓗꓪ ꓜꓲꓽ ꓘꓴ ꓢꓲ ꓠꓬꓲ꓾ ꓪꓽ ꓘꓴˍ ꓟ ꓗꓪ ꓮ ꓕꓯˍ ꓟꓲ ꓦ ꓡꓱ ꓐꓳ ꓐꓳ ꓡꓰ ꓢꓯꓼ ꓕꓵꓼ꓿ 13 ꓦ ꓡꓱ ꓢꓴ ꓐꓴ ꓣꓱꓽ ꓟꓽ ꓡꓳꓼ ꓟ ꓗꓪ ꓬꓰ ꓙ ꓡꓯ ꓘꓳ꓿ ꓪꓰ ꓤ ꓔꓯ ꓠꓲꓹ ꓒꓴ ꓒꓴˍ ꓡꓰꓽ ꓘꓳ ꓣꓴ꓿ 14 ꓠꓴ ꓪꓽ ꓔꓯ ꓗꓸ ꓧꓪ ꓢꓴ ꓔꓯ ꓶꓼ ꓥꓳ ꓙꓱꓽ ꓖꓶ꓿ ꓶꓼ ꓥꓳꓽˍ ꓡꓰ ꓙꓱꓽ ꓖꓶ ꓢꓲ꓾ ꓬꓲ ꓪꓽ ꓔꓯ ꓟꓽ ꓙꓲˍ ꓟ ꓕꓽ ꓙꓱꓽ꓿

ꓟ-ꓕꓲ 24ꓽ 37-44

ꓠꓳ-ꓪ ꓦꓬꓼ ꓠꓬꓲ ꓗꓪ ꓮ ꓡꓲ ꓥ ꓠꓬ꓾ ꓡ-ꓞꓳ-ꓮ-ꓐꓲ ꓡ ꓟ ꓦꓬꓼ ꓠꓬꓲ ꓗꓪˍ ꓟꓲ ꓖꓳ ꓡꓱ ꓗꓹ ꓥꓳ꓿ 38 ꓟꓵꓽ ꓟꓽ ꓟꓷꓸ ꓟꓲ ꓟꓽ ꓟꓷꓸ ꓢꓰꓽ ꓟ ꓦꓬꓼ ꓠꓬꓲ ꓗꓪ ꓐꓰ꓾ ꓠꓳ-ꓪ ꓦꓲ ꓡꓲ ꓓꓽ ꓟ ꓗꓪ ꓓꓵꓽ ꓡꓰ ꓟ ꓦꓬꓼ ꓠꓬꓲ ꓗꓪ ꓛꓲ꓾ ꓬꓲ ꓪꓽ ꓠꓬ ꓜꓽ ꓠꓬꓲ ꓓꓳꓻ ꓠꓬꓲ꓾ ꓤꓽ ꓟꓶꓻ ꓘꓴ ꓠꓬꓲ꓾ ꓮꓸ ꓟꓲꓽ ꓩꓴꓺ ꓠꓬꓲ ꓬꓰ ꓢꓲ꓾ 39 ꓟꓵꓽ ꓟꓷꓸ ꓟꓲ ꓟꓷꓸ ꓡ ꓢꓲ ꓠꓬꓲ ꓬꓲ ꓪꓽ ꓮꓽ ꓙꓵ ꓔꓯ ꓐꓴꓻ ꓔꓯꓹ ꓙꓰ ꓗꓪ ꓛꓲ ꓬꓲ ꓪꓽ ꓟꓽ ꓧꓪꓸ ꓛꓲ꓿ ꓡ-ꓞꓳ-ꓮ-ꓐꓲ ꓡ ꓟ ꓦꓬꓼ ꓠꓬꓲ ꓗꓪˍ ꓟꓲ ꓖꓳ ꓟ ꓡꓰ ꓐꓰ ꓗꓹ ꓥꓳ꓿ 40 ꓦꓬꓼ ꓠꓬꓲ ꓖꓳ ꓟ ꓗꓪ ꓞꓳ ꓑꓸ ꓤ ꓠꓬꓲꓽ ꓣꓳ ꓦꓻ ꓟꓲ ꓗꓪ ꓔꓬ ꓠꓬ꓾ ꓕꓲ ꓣꓳ ꓔꓯ ꓔꓯꓹ ꓙꓰ ꓢꓲ ꓕꓲ ꓣꓳ ꓔꓯ ꓠꓽ ꓗꓶ ꓔ ꓬꓰˍ ꓥꓳ꓿ 41 ꓤꓽ ꓟꓶ ꓤ ꓠꓬꓲꓽ ꓣꓳ ꓡꓳꓺ ꓙꓱ ꓖꓳꓻ ꓔꓬ ꓠꓬ꓾ ꓕꓲ ꓣꓳ ꓔꓯ ꓔꓯꓹ ꓙꓰ ꓢꓲ ꓕꓲ ꓣꓳ ꓔꓯ ꓗꓶꓺ ꓔ ꓬꓰˍ ꓥꓳ꓿ 42 ꓖꓳ ꓡꓱ ꓠꓬꓲ ꓧꓪꓸ ꓛꓲ ꓔꓬ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓢꓲ ꓒꓽ ꓮ ꓡꓲ ꓕꓲꓽ ꓠꓬꓲ ꓗꓪ ꓛꓲ ꓡ ꓟ ꓠꓴ ꓪꓽ ꓟꓽ ꓢꓷ꓿ 43 ꓘꓴꓽ ꓒ ꓠꓬ ꓢ ꓘꓪ ꓮ ꓡꓲ ꓕꓲ ꓙꓵꓹ ꓗꓪ ꓡꓻˍ ꓟ ꓦꓲ ꓢꓲ ꓒꓽ ꓢꓷˍ ꓕꓯ ꓠ꓾ ꓬꓲ ꓦꓲ ꓗꓪ ꓟꓽ ꓓꓵꓽ ꓡ ꓝꓲ ꓠꓹ ꓟ꓾ ꓬꓲ ꓧꓪꓸ ꓛꓲꓽˍ ꓐꓰ ꓔꓬ ꓡꓳ ꓫꓵꓽ ꓥꓳ꓾ ꓐꓰ ꓠꓴ ꓪꓽ ꓢꓷˍ ꓡꓳ꓿ 44 ꓖꓳ ꓡꓱ ꓠꓬꓲ ꓠꓴ ꓪꓽ ꓙꓽ ꓖꓶꓽ ꓔ꓿ ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓟꓽ ꓓꓵꓽ ꓙꓽ ꓔ ꓟ ꓖꓳ ꓕꓲ ꓙꓵꓹ ꓗꓪ ꓡ-ꓞꓳ-ꓮ-ꓐꓲ ꓡꓻˍ ꓥꓳ꓿