ꓣꓴ-ꓕꓱ ꓐꓰ ꓠ-ꓳ-ꓟꓲ ꓟꓸ ꓟꓲꓽ

ꓐꓯ ꓟꓴ ꓫꓬꓹ ꓒ ꓐꓴ ꓙꓵꓽˍ ꓟ ꓦꓬꓼ ꓠꓬꓲ ꓗꓪ ꓬꓲ-ꓢꓷ-ꓡꓰ ꓟꓵꓽ ꓗꓪ ꓦꓰꓼ ꓟꓷꓼ ꓘꓳꓼ ꓬꓲ ꓓꓽ ꓟ ꓓꓳ ꓡˍ ꓡꓳ= ꓡ ꓞꓳ ꓮ ꓟꓬ ꓠꓬ ꓚꓲꓸ ꓛꓬ ꓕꓲ ꓦꓲꓻ ꓢꓴ ꓜꓽ ꓓꓴ ꓧꓪ ꓠꓹ ꓟ ꓐꓱ ꓶ ꓠꓱꓸ ꓐꓯ ꓗꓴꓷꓼ꓾ ꓐꓶꓽ ꓗꓴꓷꓼ ꓗꓪ ꓚꓵꓸ ꓙꓰˍ ꓡꓳ= ꓬꓴ-ꓔ ꓟꓵꓽ ꓐꓱ-ꓡꓱ-ꓦꓱ ꓡꓳ ꓒꓱ ꓗꓪ ꓐꓰ ꓰ-ꓡꓲ-ꓟꓷ-ꓘꓷ ꓠꓬ ꓬꓲ ꓤ ꓟꓶ ꓠ-ꓳ-ꓟꓲ ꓐꓰ ꓕꓲ ꓪꓽ ꓬꓲ ꓤ ꓠꓬꓲꓽ ꓫꓵꓸ ꓥ ꓟ ꓟꓯ-ꓧꓷ-ꓡꓳ ꓐꓰ ꓘꓰ-ꓡꓲ-ꓳ-ꓠ ꓐꓴ ꓔꓯ ꓧꓳꓽ ꓢꓲ ꓜꓽ ꓓꓴ ꓧꓪ ꓠꓹ ꓟ ꓐꓱ ꓶ ꓟꓳ-ꓮ-ꓐꓷ ꓟꓵꓽ ꓗꓪ ꓙꓰ ꓢꓲ ꓖꓳ ꓗꓪ ꓔꓬ ꓬꓰˍ ꓡꓳ= ꓗ ꓠꓯꓸ ꓕꓯ ꓰ-ꓡꓲ-ꓟꓷ-ꓘꓷ ꓫꓵꓻ ꓢꓲ ꓠ-ꓳ-ꓟꓲ ꓠꓬ ꓬꓲ ꓤ ꓠꓬꓲ ꓫꓵꓸ ꓔꓯ ꓡꓯꓽ ꓒꓯꓹ ꓝꓸ ꓔ ꓟ ꓟꓳ-ꓮ-ꓐꓷ ꓟꓵꓽ ꓗꓪ ꓔꓬ ꓢꓴ ꓳ-ꓣꓱ-ꓩ ꓐꓰ ꓣꓴ-ꓕꓱ ꓐꓴ ꓐꓰ ꓕꓲ ꓪꓽ ꓔꓬꓹ ꓗꓷꓳ= ꓖꓳ ꓗ ꓠꓯꓸ ꓬꓲ ꓤ ꓠꓬꓲꓽ ꓣꓳ ꓥˍ ꓟꓲ ꓫꓵꓳ= ꓖꓳ ꓡꓱ ꓠꓬꓲ ꓬꓲ ꓪ ꓕꓲ ꓦꓲꓻ ꓗꓪ ꓠ-ꓳ-ꓟꓲ ꓐꓰ ꓬꓲ ꓛꓲꓼ ꓟ ꓠꓬꓲꓽ ꓫꓵꓸ ꓡꓰꓽ ꓔꓬꓳ=

ꓬꓰ-ꓧꓳ-ꓧꓪ ꓪꓴ-ꓢ ꓠꓬ ꓬꓲ ꓑ ꓫꓬ ꓐꓴ ꓔꓯ ꓶꓼ ꓤ ꓫꓱꓹ ꓤ ꓖꓶ ꓢꓲ ꓜꓽ ꓓꓴ ꓓꓳ ꓓꓴ ꓙꓳ ꓡ ꓝꓲˍ ꓟ ꓔꓯ ꓠ-ꓳ-ꓟꓲ ꓑ ꓙꓽ ꓡꓰ ꓕꓯ ꓬꓲ ꓠꓬ ꓬꓴ-ꓔ ꓟꓵꓽ ꓗꓪ ꓬꓲꓼ ꓙꓰ ꓠꓹ ꓟ ꓓꓵꓽ ꓙ ꓞꓷꓹ ꓗꓷ ꓢꓲ꓾ ꓬꓲ ꓛꓲꓼ ꓟ ꓐꓴ ꓥ ꓟ ꓳ-ꓣꓱ-ꓩ ꓐꓰ ꓣꓴ-ꓕꓱ ꓐꓴ ꓔꓯ ꓚꓲꓸ ꓛꓬ ꓟꓹ ꓟ ꓦꓲꓻ ꓗꓪ ꓬꓲꓼ ꓙꓰ ꓢꓲ ꓦꓲ ꓢꓲ ꓒ ꓬꓲ ꓫꓵꓼ ꓧꓪ ꓠꓹ ꓟ ꓐꓯ ꓖꓶˍ ꓡꓳ= ꓳ-ꓣꓱ-ꓩ ꓠꓬ ꓬꓲ ꓟꓹ ꓟ ꓦꓲꓻ ꓗꓪ ꓚꓱꓹ ꓬꓲꓼ ꓙꓰˍ ꓡꓳ= ꓣꓴ-ꓕꓱ ꓠꓽ ꓠ-ꓳ-ꓟꓲ ꓔꓯ ꓢꓳꓸ ꓔ ꓢꓲ ꓬꓲ ꓠꓬ ꓠ-ꓳ-ꓟꓲ ꓐꓰ ꓕꓲ ꓪ ꓔꓬ ꓟ ꓐꓰ ꓠ-ꓳ-ꓟꓲ ꓪꓴ-ꓢ ꓐꓰ ꓬꓲ ꓑ ꓫꓬ ꓐꓴ ꓠꓬ ꓣꓴ-ꓕꓱ ꓪꓴ-ꓢ ꓐꓰ ꓬꓲ ꓡ ꓞꓳ ꓐꓴ ꓥ ꓡꓳ꓾ ꓐꓯ ꓖꓶˍ ꓡꓳ=

ꓐꓱ-ꓡꓱ-ꓦꓱ ꓡꓳ ꓒꓱ ꓗꓪ ꓛꓲ ꓬꓰ ꓕꓯ꓾ ꓣꓴ-ꓕꓱ ꓠꓬ ꓤꓴ ꓖꓳ ꓢꓴ ꓐꓴ ꓜꓰꓻ ꓡꓰ ꓟ ꓬꓲ ꓐꓯꓻ ꓔꓯ ꓖꓳ ꓠꓹ ꓟ ꓐꓱ ꓶ ꓦ ꓟꓲ ꓗꓪ ꓓꓵꓽ ꓙꓰ ꓠ ꓟ ꓓꓵꓽ ꓙˍ ꓡꓳ= ꓣꓴ-ꓕꓱ ꓠꓬ ꓐꓳ-ꓮ-ꓢꓶ ꓟꓬꓱ ꓔ ꓟ ꓡ ꓞꓳ ꓕꓲ ꓣꓳ ꓬꓲ ꓦ ꓟꓲ ꓗꓪ ꓟ ꓟꓬꓱꓽ ꓬꓰ ꓢꓴ ꓗ ꓠꓯꓸ ꓢꓲ ꓗꓪ ꓤꓴ ꓐꓯꓻ ꓖꓳˍ ꓡꓳ= ꓐꓳ-ꓮ-ꓢꓶ ꓠꓬ ꓬꓲ ꓐꓹ ꓐ ꓑꓯꓹ ꓰ-ꓡꓲ-ꓟꓷ-ꓘꓷ ꓕꓲ ꓗꓪ ꓢꓴ ꓥ ꓡꓳ= ꓠ-ꓳ-ꓟꓲ ꓠꓬ ꓣꓴ-ꓕꓱ ꓐꓰ ꓕꓲ ꓪꓽ ꓬꓴ-ꓔ ꓟꓴꓽ ꓗꓪ ꓬꓲꓼ ꓡ ꓗꓷ ꓢꓲ꓾ ꓣꓴ-ꓕꓱ ꓠꓬ ꓬꓲ ꓦ ꓟꓲ ꓗꓪ ꓟꓬꓱꓽ ꓬꓰ ꓢꓴ ꓐꓴ ꓜꓰꓻ ꓡꓰ ꓟ ꓤꓴ ꓐꓯꓻ ꓖꓳ ꓔꓬ ꓟ ꓔꓯ ꓐꓳ-ꓮ-ꓢꓶ ꓑ ꓙꓽ ꓡꓰ ꓕꓯ꓾ ꓬꓲ ꓠꓬ ꓣꓴ-ꓕꓱ ꓔꓬ ꓗꓪꓙꓰ ꓢꓲ ꓣꓴ-ꓕꓱ ꓔꓯ ꓬꓲ ꓦ ꓟꓲ ꓗꓪ ꓠꓲꓹ ꓪꓴꓽ ꓪꓴꓽ ꓡꓰꓽ ꓟꓬꓱꓽ ꓬꓰ ꓐ ꓡˍ ꓟ ꓐꓰ ꓬꓲ ꓢꓲꓼ ꓡˍ ꓕꓯ ꓬꓲ ꓬꓲꓻ ꓙꓬ ꓱꓹ ꓓꓳꓻ ꓓꓹ ꓟ ꓔꓯ ꓐꓯ ꓖꓶˍ ꓡꓳ=

ꓖꓳ ꓕꓯ ꓣꓴ-ꓕꓱ ꓡꓰ ꓮ ꓫꓵꓽ ꓪꓴꓸ ꓠꓬꓲ ꓥꓪ ꓕꓯꓽ ꓢꓲ ꓙꓲˍ ꓟ ꓬꓰ ꓖꓶˍ ꓡ ꓐꓰ ꓠꓺ ꓠꓬꓲˍ ꓕꓯ꓾ ꓐꓳ-ꓮ-ꓢꓶ ꓡꓰ ꓕꓱ ꓡꓱ ꓒꓳꓹ ꓖꓶˍ ꓡꓳ= ꓠꓴ ꓠꓬ ꓠ-ꓳ-ꓟꓲ ꓔꓯ ꓙꓲˍ ꓟ ꓬꓰ ꓖꓶˍ ꓠꓬꓲ ꓬꓲ-ꓢꓷ-ꓡꓰ ꓐꓴ ꓪꓴ-ꓢ ꓠꓬ ꓠꓴ ꓔꓯ ꓶꓼ ꓤ ꓫꓱꓹ ꓤ ꓖꓶꓽ ꓡˍ ꓥꓳ꓾ ꓐꓰ ꓐꓯ ꓖꓶˍ ꓡꓳ=

ꓣꓴ-ꓕꓱ ꓠꓬ ꓬꓲ ꓐꓰ ꓬꓲ ꓟꓹ ꓟ ꓑꓯꓹ ꓠ-ꓳ-ꓟꓲ ꓐꓴ ꓐꓱ ꓶ ꓜꓽ ꓓꓴ ꓡꓳꓼ ꓡ ꓠꓹ ꓟ ꓟꓬꓱꓽ ꓮ ꓟꓬꓹ ꓢꓯꓼ ꓕꓵꓼ ꓗꓷꓳ= ꓤꓴ ꓶꓼ ꓫ ꓗꓷ ꓗ ꓠꓯꓸ ꓠ-ꓳ-ꓟꓲ ꓠꓬ ꓤꓴ ꓓꓶꓽ ꓓꓰ ꓗꓪ ꓐꓳ-ꓮ-ꓢꓶ ꓔꓯ ꓙꓰ ꓠꓹ ꓟ ꓣꓴ-ꓕꓱ ꓔꓯ ꓕꓵꓼ ꓪ ꓖꓶ ꓗꓷ ꓢꓲ꓾ ꓐꓳ-ꓮ-ꓢꓶ ꓟꓬꓱꓽ ꓬꓰ ꓓꓳ ꓡꓰ ꓕꓯ ꓬꓲ ꓛꓲꓺ ꓔꓲꓺ ꓗꓪ ꓬꓲꓼ ꓔ ꓠꓹ ꓟ ꓐꓯ ꓖꓶˍ ꓡꓳ= ꓐꓳ-ꓮ-ꓢꓶ ꓧꓪꓸ ꓛꓲꓽ ꓡ ꓢꓲ ꓣꓴ-ꓕꓱ ꓠꓬ ꓬꓲ ꓛꓲ ꓟꓶ ꓓꓴ ꓗꓪ ꓬꓲꓼ ꓔ ꓔꓬ ꓟ ꓔꓯ ꓚꓬꓹ ꓪ ꓡꓰ ꓠꓬ ꓣꓴ-ꓕꓱ ꓬꓲ ꓙꓲˍ ꓟ ꓔꓯ ꓢꓷꓸ ꓡꓰ ꓠꓬꓲ ꓬꓲ ꓔꓯ ꓶꓼ ꓤ ꓫꓱꓹ ꓤ ꓖꓶˍ ꓡꓳ= ꓖꓳ ꓗ ꓠꓯꓸ ꓐꓳ-ꓮ-ꓢꓶ ꓠꓬ ꓣꓴ-ꓕꓱ ꓔꓯ ꓠ-ꓳ-ꓟꓲ ꓔꓬꓹ ꓗꓪ ꓔꓯꓹ ꓬꓲꓼ ꓙꓰ ꓠꓹ ꓟ ꓤꓴ ꓕꓲ ꓡꓳꓻ ꓐꓶꓽ ꓔꓯˍ ꓟꓲ ꓖꓶꓽ ꓗꓷꓳ=

ꓐꓳ-ꓮ-ꓢꓶ ꓠꓬ ꓰ-ꓡꓲ-ꓟꓷ-ꓘꓷ ꓡꓯꓼ ꓪ ꓦ ꓟꓲ ꓔꓯ ꓪꓴꓻ ꓠꓲꓹ ꓟ ꓬꓲ ꓛꓳ ꓒꓯꓹ ꓐꓴ ꓐꓰ ꓬꓲ ꓕꓯꓽ ꓢꓲ ꓪꓴꓽ ꓢꓴ ꓐꓴ ꓟꓲ ꓙꓬ ꓗꓪ ꓙꓰˍ ꓡꓳ= ꓗ ꓠꓯꓸ ꓕꓯ ꓬꓲ ꓠꓬ ꓣꓴ-ꓕꓱ ꓐꓰ ꓡꓯꓽ ꓒꓯꓹ ꓝ ꓗꓷ ꓢꓲ ꓬꓲ ꓪ ꓔꓯ ꓳ-ꓐꓷ ꓟꓬꓱ ꓔ ꓟ ꓤ ꓕꓲ ꓫꓵꓸ ꓐꓰ ꓬꓰ-ꓫꓲ ꓐꓰ ꓟꓬꓱ ꓔ ꓟ ꓡꓲꓸ ꓑ ꓕꓲ ꓣꓳ ꓙꓳ ꓡꓰꓳ= ꓓ-ꓪꓵ ꓬꓲ ꓐꓹ ꓐ ꓒꓬꓱꓼ ꓡˍ ꓟ ꓬꓰ-ꓫꓲ ꓠꓬ ꓚꓬꓴꓸ ꓢꓲꓺ ꓒ ꓬꓰ-ꓢꓴ ꓬꓲ ꓒꓵꓽ ꓒ ꓥˍ ꓟꓲ ꓒꓬꓱꓼ ꓡ ꓗꓷ ꓟ ꓥꓳ=

ꓟꓸ ꓟꓲꓽ ꓕꓱ ꓟ ꓗꓪ ꓐꓰ ꓣꓳ ꓢꓳꓺ ꓣꓴ ꓟꓶˍ ꓟ ꓠꓬ ꓣꓴ-ꓕꓱ ꓠꓬ ꓮ ꓘꓶꓸ ꓫꓸ ꓟ ꓦꓬꓼ ꓠꓬꓲ ꓔꓯ ꓔꓳꓹ ꓜꓳꓽ ꓪˍ ꓥˍ ꓟꓲ ꓬꓲ ꓟꓹ ꓟ ꓑꓯꓹ ꓥ ꓟ ꓠ-ꓳ-ꓟꓲ ꓔꓯ ꓟꓽ ꓡꓳ ꓔ= ꓬꓲ ꓤ ꓖꓴ ꓫꓵꓻ ꓗꓷ ꓗ ꓠꓯꓸ ꓝꓮꓲ ꓕꓲ ꓧꓪꓹ ꓦꓲꓻ ꓧꓪ ꓐ ꓡˍ ꓥˍ ꓟꓲ ꓬꓲ ꓟꓽ ꓬꓰ= ꓬꓲ ꓟꓹ ꓟ ꓑꓯꓹ ꓐꓰ ꓕꓲ ꓪꓽ ꓬꓴ-ꓔ ꓟꓵꓽ ꓗꓪ ꓙꓰ ꓢꓲ ꓠ-ꓳ-ꓟꓲ ꓔꓯ ꓬꓲ ꓮ ꓡꓰ ꓐ ꓡˍ ꓮ ꓡꓰ ꓣꓱꓽ ꓙˍ ꓡꓳ= ꓖꓳ ꓟ ꓑꓶꓸ ꓓꓴ ꓪꓴ-ꓢ ꓡꓰ ꓬꓲ ꓔꓯ ꓶꓼ ꓤ ꓫꓱꓹ ꓤ ꓖꓶꓽ ꓢꓲ ꓬꓲ ꓕꓲ ꓪꓳꓼ ꓗꓪ ꓬꓴ-ꓔ ꓪ ꓔꓲ ꓒꓬꓱꓼ ꓡˍ ꓟ ꓓ-ꓪꓵ ꓔꓯ ꓦꓵꓻ ꓓꓳ ꓡ ꓝꓲ ꓗꓷꓳ= ꓗ ꓠꓯꓸ ꓕꓯ ꓠꓬ ꓟꓴꓽ ꓗꓪ ꓐꓰ ꓟꓲ ꓠꓯ ꓮ ꓙꓵꓽ ꓗꓪ ꓟ ꓪ ꓔꓲ ꓥ ꓟ ꓢꓲꓺ ꓒ ꓬꓰ-ꓢꓴ ꓬꓲ ꓒꓵꓽ ꓒ ꓒꓬꓱꓼ ꓡ ꓝꓲ ꓗꓷꓳ꓾ ꓐꓯ ꓟ ꓥ ꓡꓳ=