ꓟꓬ‐ꓟ ꓗꓴꓷꓼ ꓗꓪ ꓐꓰ ꓬꓲ. ꓪꓴ. ꓔꓲꓺ ꓒ ꓒꓬꓱꓼ ꓡ ꓟ ꓔꓲꓺ ꓒ ꓐꓴ ꓚꓺ ꓟꓲꓽ

ꓟꓬ‐ꓟ ꓗꓴꓷꓼ ꓗꓪ ꓐꓰ ꓬꓲ. ꓪꓴ. ꓔꓲꓺ ꓒ ꓒꓬꓱꓼ ꓡ ꓟ ꓔꓲꓺ ꓒ ꓐꓴ ꓚꓺ ꓟꓲꓽ

ꓟꓬ‐ꓟ ꓗꓴꓷꓼ ꓗꓪ ꓐꓰ ꓬꓲ. ꓪꓴ. ꓔꓲꓺ ꓒ ꓒꓬꓱꓼ ꓡ ꓟ Joseph ꓟꓖ ꓟꓖ ꓖꓬꓲ ꓚꓺ ꓟꓲ ꓥ ꓡꓳ꓿ ꓔꓲꓺ ꓒ ꓙꓳꓢꓰꓑꓧ ꓟꓖ ꓟꓖ ꓖꓬꓲ ꓠꓬ ꓢꓲꓠ‐ꓖꓮꓲ ꓟꓵꓽ ꓬꓯ‐ꓳ ꓘ, ꓛ‐ꓔ ꓘ, ꓗꓪ ꓬꓲ. ꓔꓯ ꓦꓵꓻ ꓗꓷꓳ꓿ ꓟꓬ‐ꓟ ꓗꓴꓷꓼ ꓗꓪ ꓪꓴ‐ꓢ ꓟꓬꓱꓽ ꓟꓯ ꓔꓬ ꓢꓴ Banabite ꓔꓲꓺ ꓒ ꓜꓴꓻ ꓠꓬ ꓟꓬ‐ꓟ ꓗꓴꓷꓼ ꓛ‐ꓔ ꓘ, ꓗꓪ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳ ꓚꓺ ꓗꓷ ꓟ ꓪꓴ. ꓠꓬꓲ ꓔꓲꓺ ꓒ ꓟꓖ‐ꓟꓖ‐ꓖꓬꓲ ꓥ ꓟꓲ ꓪꓴ‐ꓢ ꓐꓯ ꓘꓶꓽ ꓔꓯ ꓠꓻ ꓡꓳ ꓪ ꓗꓷ ꓢꓲ ꓠꓬꓲ ꓪꓴ‐ꓢ ꓦꓻ ꓡꓱ ꓡ ꓢꓴ ꓕꓲ ꓣꓳ ꓒꓬꓱꓼ ꓡ ꓪ꓿

ꓝꓮꓲ ꓔꓲꓺ ꓒ ꓙꓳꓢꓰꓑꓧ ꓠꓬ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓠꓲ, ꓟ ꓐꓽ ꓗꓷ ꓟ ꓪꓴ. ꓠꓬꓲ ꓐꓮꓠꓮꓐꓲꓔꓰ ꓔꓲꓺ ꓒ ꓜꓴꓻ ꓗꓪ ꓪꓴ‐ꓢ ꓐꓯ ꓘꓶꓽ ꓔꓯ ꓢꓳ ꓣꓴ ꓟꓶ ꓗꓷ ꓪ ꓡꓰꓳ꓿ ꓝꓮꓲ ꓔꓲꓺ ꓒ ꓙꓳꓢꓰꓑꓧ ꓠꓬ ꓪꓴ‐ꓢ ꓟꓬꓱꓽ ꓟꓯ ꓠ, ꓟ ꓬ‐ꓖꓳꓥ ꓟꓵꓽ ꓗꓪ ꓪꓴ‐ꓢ ꓐꓯ ꓘꓶꓽ ꓢꓳ ꓣꓴ ꓪ ꓢꓲ ꓠꓬꓲ 1810 ꓘꓳꓼ ꓕꓯ  ꓔꓲꓺ ꓒ ꓕꓲ ꓪ ꓒꓬꓱꓼ ꓡ ꓪ꓿ ꓔꓲꓺ ꓒ ꓙꓳꓢꓑꓰꓧ ꓠꓬ ꓢꓲꓠ‐ꓖꓮꓲ ꓟꓵꓽ ꓟꓴꓠꓖ‐ꓡꓮ ꓘ, ꓗꓪ ꓪꓴ‐ꓢ ꓟꓬꓱꓽ ꓟꓯ ꓗꓷ ꓟ 17 ꓘꓳꓼ ꓡꓻꓳ ꓬꓰ ꓟ ꓙꓵ, ꓕꓯ ꓢꓲꓺ ꓒ ꓠꓯ ꓗꓪ ꓬꓯꓼ ꓟꓶ ꓡꓰꓳ꓿  

ꓔꓲꓺ ꓒ ꓮꓠꓓꓣꓰꓪ ꓟꓖ‐ꓗꓳ ꓚꓺ ꓟꓲꓽ ꓠꓬ ꓢꓲꓠ‐ꓖꓮꓲ ꓟꓵꓽ ꓔ‐ꓢꓯ ꓚꓧꓮꓴꓠꓖ‐ꓬꓴ ꓘ, ꓗꓪ ꓬꓲ ꓔꓯ ꓦꓵꓻ ꓗꓷꓳ꓿ ꓬꓲ ꓠꓬ ꓢꓲꓠ‐ꓖꓮꓲ ꓟꓵꓽ ꓠ‐ꓐꓯ ꓔꓲꓺ ꓒ ꓢꓳ ꓦꓲꓻ ꓗꓪ ꓐꓰ ꓬ‐ꓖꓳꓥ ꓡꓳ ꓒꓱ ꓗꓪ ꓔꓲꓺ ꓒ ꓒꓬꓱꓼ ꓠ, ꓟ ꓪꓴ‐ꓢ ꓐꓯ ꓘꓶꓽ ꓔꓯ ꓢꓳ ꓣꓴ ꓟꓶ ꓡꓰꓳ꓿ ꓔꓲꓺ ꓒ ꓮꓠꓓꓣꓰꓪ ꓠꓬ 1806 10 ꓦ ꓟ ꓕꓲ ꓠꓬꓲ ꓕꓯ ꓔꓲꓺ ꓒ ꓒꓬꓱꓼ ꓡ ꓪ ꓿ ꓝꓮꓲ ꓔꓲꓺ ꓒ ꓮꓠꓓꓣꓰꓪ ꓔꓯ ꓬ‐ꓖꓳꓥ ꓡꓳ ꓒꓱ ꓗꓪ ꓒꓴ ꓔ ꓟ ꓔꓲꓺ ꓒ ꓢꓳ ꓦꓲꓻ ꓗꓪ ꓙꓵꓽ ꓠ, ꓟ ꓙꓵꓽ ꓪ ꓖꓶˍ ꓗꓷꓳ꓿

ꓬ‐ꓖꓳꓥ ꓡꓳ ꓒꓱ ꓗꓪ ꓔꓲꓺ ꓒ ꓢꓳ ꓦꓲꓻ ꓗꓪ ꓮ ꓟꓬꓽ ꓘꓳꓼ ꓪꓴ‐ꓢ ꓐꓯ ꓘꓶꓽ ꓟ. ꓖꓶ ꓗꓷ ꓗ, ꓠꓯ ꓲꓠ‐ꓪ ꓗꓪ ꓢꓳ ꓤ ꓐꓴ ꓔꓯ ꓟꓲ ꓠꓯ ꓢꓷ. ꓠꓲ, ꓕꓳꓽ ꓶ ꓟ. ꓖꓶ ꓠ, ꓟ ꓔꓲꓺ ꓒ ꓔꓯ ꓟꓬꓱꓽ ꓖꓶˍ ꓗꓷꓳ꓿ ꓝꓮꓲ 1826 ꓘꓳꓼ ꓕꓯ ꓬꓲ. ꓪꓴ. ꓕꓲ ꓧꓪ. ꓟ ꓰꓠꓖꓡꓲꓢꓧ ꓐꓰ ꓡꓳ‐ꓟꓲ ꓢꓰꓼ ꓡꓯ ꓘꓳꓼ ꓟ ꓙꓵ, ꓗꓪ ꓰꓠꓖꓡꓲꓢꓧ ꓐꓴ ꓠꓬ ꓪꓽ ꓘꓴ ꓐꓰ ꓮ ꓟꓬ, ꓔꓯ ꓮ. ꓔꓳ. ꓐꓬ ꓡꓰ ꓝꓲ ꓟ ꓟꓲ ꓥ ꓡꓳ꓿ ꓝꓮꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓮ ꓟꓬꓽ ꓫꓵꓽ ꓪꓴꓽ ꓟꓲ ꓖꓶ ꓗꓷ ꓟ ꓥ ꓡꓳ꓿

ꓔꓲꓺ ꓒ ꓮꓠꓓꓣꓰꓪ ꓠꓬ ꓮ ꓟꓬ, ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓪꓴ‐ꓢ ꓟꓬꓱꓽ ꓟꓯ ꓗꓷ ꓟ ꓥ ꓡꓳ꓿ ꓬꓲ. ꓠꓬꓲ 1826 ꓘꓳꓼ ꓕꓯ ꓢꓲꓺ ꓒ ꓠꓯ ꓗꓪ ꓬꓯꓼ ꓟꓶ ꓡꓰꓳ꓿