ꓠꓲꓽ ꓜꓴ ꓜꓶꓽꓞꓹ ꓢꓴ ꓔꓯ ꓫꓬꓹ ꓓꓻ ꓡꓰˍꓟ (Reflection)

ꓗꓸ ꓠꓯꓸ ꓬꓲ ꓪꓽ ꓠꓬ ꓬꓲꓻ ꓡꓴꓽ ꓐꓱ ꓖꓳ ꓐꓽ ꓢꓲ꓾ ꓖꓶ-ꓡ-ꓢꓲ-ꓠꓲ ꓢꓴ ꓟꓵꓽ ꓗꓪ ꓛꓲ ꓬꓰˍ ꓡꓳ꓿ 2 ꓡꓲ ꓗꓪ ꓐꓰ ꓬꓰ-ꓢꓴ ꓓꓳ ꓡ ꓟꓶꓽ ꓕꓯ꓾ ꓟꓽ ꓫꓬ ꓠꓲꓽ ꓜꓶꓽ ꓞꓹ ꓟ ꓡ ꓞꓳ ꓕꓲ ꓣꓳ ꓠꓬ ꓡꓱꓼ ꓜꓴ ꓐꓬꓼ ꓗꓪ ꓐꓰ ꓡꓻ ꓢꓲ ꓬꓰ-ꓢꓴ ꓔꓯ ꓜꓲꓻ ꓡ ꓡꓳ꓿ 3 ꓬꓲ ꓔꓬ ꓖꓴ ꓠꓬ ꓡꓱꓼ ꓜꓴ ꓐꓬꓼ ꓗꓪ ꓥ ꓢꓲ꓾ ꓧꓳꓺ ꓫꓱ ꓚ ꓡꓰ ꓞꓳꓹˍ ꓟꓲ ꓬꓲ ꓔꓯ ꓞꓳꓹ ꓧꓪꓸ ꓡꓰ ꓘꓴ ꓢꓴ ꓟꓽ ꓙꓳ꓿ 4 ꓬꓲ ꓔꓯ ꓡꓸ ꓕꓸ ꓕꓯꓼ ꓠꓬꓲ꓾ ꓧꓳꓺ ꓫꓱ ꓚ ꓡꓰ ꓞꓳꓹ ꓠꓬꓲ ꓐꓰ ꓮꓽ ꓟꓬꓹ ꓧꓪꓹ ꓬꓰˍ ꓟꓲ꓾ ꓬꓲ ꓡꓰ ꓡꓸ ꓕꓸ ꓔꓯ ꓘꓳꓹ ꓩꓴ ꓗꓷ ꓢꓲ꓾ ꓧꓳꓺ ꓫꓱ ꓚ ꓔꓯˍ ꓟꓲ ꓚꓵꓹ ꓞꓷꓹ ꓗꓷ ꓝꓲ ꓠꓬꓲ꓾ ꓬꓲ ꓔꓯ ꓞꓳꓹ ꓧꓪꓹ ꓡꓰ ꓘꓴ ꓢꓴ ꓟꓽ ꓙꓳ꓿ 5 ꓬꓲ ꓠꓬ ꓟꓳꓼ ꓡꓳ ꓢ ꓘꓪ ꓮ ꓕꓯꓽˍ ꓟꓲ꓾ ꓡꓱꓼ ꓜꓴ ꓐꓬꓼˍ ꓐꓰ ꓪꓽ ꓚꓲ ꓗꓪ ꓘꓴꓻ ꓔꓬ ꓢꓲ꓾ Bꓸ ꓛꓲ ꓡꓰ ꓚꓲꓸ ꓛꓬ ꓔꓯ ꓶꓺˍ ꓡꓳ꓿ 6 ꓶꓽ ꓤ ꓗꓪ ꓬꓰ-ꓢꓴ ꓔꓯ ꓟꓳꓻ ꓗꓷ ꓠꓬ ꓔꓷꓹ ꓡ ꓢꓲ꓾ ꓬꓲ ꓔꓯ ꓪꓴꓸ ꓓꓵ ꓕꓱꓼ ꓢꓲ ꓠꓬꓲ꓾ 7 ꓢꓯꓼ ꓓꓽ ꓟ ꓡꓰ꓾ ꓟꓴꓺ ꓡꓳꓹ ꓬꓰ ꓢꓴ ꓪꓴ-ꓢ ꓮ ꓐꓲ ꓬꓰ-ꓢꓴꓳ꓾ ꓠꓴ ꓠꓬ ꓥꓪ ꓔꓯ ꓮꓸ ꓫꓵ ꓪꓴꓸ ꓠꓬꓲ ꓘꓶꓻ ꓡꓶꓽ ꓡ ꓡ? ꓪꓴ-ꓢ ꓔꓯ ꓖꓴꓺ ꓢꓲ ꓠꓴ ꓔꓯ ꓓꓰꓽˍ ꓠꓬꓲ꓾ ꓥꓪ ꓔꓯ ꓕꓽ ꓫꓸ ꓙꓵ ꓝꓲ ꓡꓯ꓾ ꓐꓯˍ ꓡꓳ꓿ 8 ꓬꓲ ꓕꓱ ꓡꓱ ꓓꓰꓽˍ ꓟ ꓠꓬ ꓬꓰ-ꓢꓴ ꓡꓰ꓾ ꓟꓽ ꓫꓬ ꓠꓲꓽ ꓠꓴ꓾ ꓡꓽ ꓞꓳ ꓕꓱ ꓕꓲ ꓣꓳ ꓗꓪ ꓐꓰ ꓓꓳ ꓡꓯ꓾ ꓐꓰ ꓐꓯ ꓗꓷ ꓠꓬꓲ ꓥꓳ꓿ 9 ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓟꓬꓱꓺ ꓮ ꓡꓲ ꓟꓬꓱ ꓔ ꓡ?꓾ ꓐꓰ ꓠ ꓠꓬꓲˍ ꓕꓯ꓾ ꓥꓪ ꓠꓴꓽ ꓠꓬ ꓮꓽ ꓟꓬꓹ ꓥ ꓠꓬꓲ ꓥꓪ ꓟꓬꓱ ꓠꓬ꓾ ꓬꓲ-ꓜꓴꓻ꓾ ꓟꓬꓱ ꓔ ꓡꓳ꓾ ꓐꓯˍ ꓡꓳ꓿ 10 ꓖꓳ ꓕꓯ ꓬꓲ ꓪꓽ ꓔꓯ ꓖꓳ ꓕꓲ ꓟꓵ ꓗꓪ ꓐꓰ ꓟꓽ ꓖꓼ ꓓꓳ ꓗꓷ ꓠꓹ ꓟ꓾ ꓬꓲ ꓡꓰ ꓬꓰ-ꓢꓴ ꓔꓯ ꓮꓽ ꓘꓶꓸ ꓓꓰꓽˍ ꓡꓳ꓿ 11 ꓖꓳ ꓕꓯ ꓪꓽ ꓚꓲ ꓗꓪ ꓖ ꓜꓽ ꓔꓬ ꓟ ꓮꓸ ꓪꓯꓼ ꓕꓲ ꓜꓴ ꓓꓽ ꓟ ꓙꓳˍ ꓡꓳ꓿ 12 ꓠꓲꓽ ꓜꓴ ꓡꓰ ꓬꓰ-ꓢꓴ ꓔꓯ꓾ ꓥꓪ ꓠꓴꓽ ꓔꓯ ꓮꓸ ꓪꓯꓼ ꓠꓯꓸꓼ ꓗꓪ ꓓꓵꓽ ꓙꓰ ꓝꓲ ꓡꓯ꓾ ꓐꓰ ꓓꓰꓽˍ ꓡꓳ꓿ 13 ꓬꓰ-ꓢꓴ ꓬꓲ ꓪꓽ ꓔꓯ ꓓꓽ ꓔꓳꓹ ꓗꓷ ꓠꓬ꓾ ꓟꓽ ꓫꓬ ꓠꓲꓽ ꓠꓽ ꓓꓳ ꓡ ꓢꓲ ꓮꓸ ꓪꓯꓼ ꓠꓯꓸꓼ ꓗꓪ ꓓꓵꓽ ꓡꓰꓳ꓿ ꓖꓳ ꓡꓱ ꓢꓲ ꓮꓸ ꓪꓯꓼ ꓠꓬꓲꓽ ꓔꓴ ꓛꓲ ꓟ ꓠꓬ ꓐꓶꓽ ꓘꓶꓽ ꓗꓪ ꓐꓰ ꓔꓷꓹ ꓬꓯꓼ ꓙꓰ ꓢꓲ ꓬꓲꓻ ꓡꓴꓽ ꓐꓱ ꓗꓪ ꓔꓲꓹ ꓫꓵꓳ꓿ 14 ꓖꓳ ꓕꓯ ꓮꓸ ꓪꓯꓼ ꓡꓳꓸ ꓢꓴ ꓠꓬ ꓛꓰꓹ ꓙꓰ ꓢꓲ꓾ ꓡꓳ ꓒꓱˍ ꓐꓰ ꓖꓳ ꓕꓲ ꓟꓵꓽ ꓕꓲ ꓚꓳ ꓡꓳ ꓗꓪ ꓐꓯ ꓖꓶꓽ ꓙꓰ ꓠꓬ꓾ ꓮ ꓡꓲ ꓗꓷ ꓡꓰ ꓟ ꓔꓯ ꓡꓳꓸ ꓠꓬꓲ ꓠꓹ ꓟ ꓡꓽ ꓞꓳ ꓮꓽ ꓟꓬꓹ ꓡ ꓡꓳ꓿ 15 ꓬꓲ ꓪꓽ ꓬꓰ-ꓢꓴ ꓔꓯ ꓛꓲ ꓡ ꓕꓯ꓾ ꓧꓶꓸ ꓕꓯ ꓠꓲꓽ ꓜꓶꓽ ꓞ ꓢꓴ ꓖꓳ ꓕꓲ ꓣꓳ ꓠꓬ ꓐꓵ ꓞꓶ ꓖꓪꓽ ꓔ ꓠꓬꓲ ꓐꓰ ꓠꓲꓹ ꓟ ꓧꓪꓸ ꓛꓲꓽ ꓛꓲ ꓠꓬꓲꓸ ꓠꓸ ꓔꓬ ꓟ ꓔꓯ ꓟꓳꓻ ꓗꓷ ꓠꓬ ꓬꓲ ꓪꓽ ꓙꓳꓺ ꓡꓰˍ ꓡꓳ꓿ 16 ꓧꓶꓸ ꓕꓯ ꓠꓲꓽ ꓜꓶꓽ ꓞ ꓢꓴˍ ꓐꓰ ꓮꓸ ꓪꓯꓼ ꓜꓴ ꓔꓯ ꓮ ꓡꓲ ꓗꓷ ꓡꓰ ꓟ ꓡꓳꓸ ꓟꓳꓻ ꓢꓴ ꓐꓴ ꓡꓰ꓾ ꓔꓱꓹ ꓠꓬꓲ ꓡ ꓢꓴ ꓐꓴ ꓔꓯ ꓫꓵꓽ ꓪꓴꓻ ꓕꓱ ꓟ ꓮꓽ ꓙꓵ ꓐꓯ ꓟꓸ ꓖꓶˍ ꓡꓳ꓿ 17 ꓖꓳ ꓡꓱ ꓠꓬ ꓖꓳ ꓗꓪ ꓔꓬ ꓢꓴ ꓐꓴ ꓡꓰ ꓬꓰ-ꓢꓴ ꓔꓯ ꓬꓲ ꓪꓽ ꓟꓵꓽ ꓗꓪ ꓐꓰ ꓓꓳ ꓙꓰ ꓠꓹ ꓟ ꓓꓰꓽˍ ꓡꓳ꓿ 18 ꓡꓲ ꓗꓪ ꓬꓰ-ꓢꓴ ꓓꓵꓽ ꓡꓰ ꓠꓬ꓾ ꓧꓶꓸ ꓕꓯ ꓠꓲꓽ ꓜꓶꓽ ꓞ ꓢꓴ ꓖꓳ ꓕꓲ ꓣꓳ ꓡꓰ꓾ ꓬꓲ ꓔꓯˍ ꓟꓲ ꓛꓳ ꓙꓰ ꓝꓲ ꓡꓯ꓾ ꓐꓰ ꓓꓰꓽˍ ꓡꓳ꓿ 19 ꓬꓰ-ꓢꓴ ꓠꓬ ꓬꓲ ꓔꓯ ꓟꓽ ꓓꓽ ꓔꓳꓹ ꓔꓳꓹ꓾ ꓠꓴ ꓦꓲ ꓗꓪ ꓠꓴ ꓫꓵꓽ ꓠꓴ ꓧꓪ ꓐꓴ ꓔꓯ ꓙꓰ ꓢꓲ꓾ ꓢꓲ ꓒꓽ ꓡꓰ ꓠꓴ ꓐꓱ ꓶ ꓬꓰ ꓖꓶ ꓗꓷ ꓟ ꓟꓬꓱꓽ ꓮꓺ ꓪꓴꓻ ꓛꓲ ꓥ ꓟ ꓐꓰ꓾ ꓠꓴ ꓔꓯ ꓬꓲ ꓮ ꓡꓲ ꓫꓱꓸ ꓤ ꓡ ꓟ꓾ ꓬꓲ ꓪꓽ ꓔꓯ ꓐꓯ ꓖꓶ ꓬꓰ꓾ ꓐꓯ ꓖꓶˍ ꓡꓳ꓿ 20 ꓖꓳ ꓡꓱ ꓠꓬ ꓬꓲ ꓙꓰ ꓢꓲ꓾ ꓬꓰ-ꓢꓴ ꓡꓰ ꓬꓲ ꓐꓱ ꓶ ꓬꓰ ꓖꓶ ꓗꓷ ꓟ ꓟꓬꓱꓽ ꓮ ꓪꓴꓻ ꓛꓲ ꓥ ꓟ꓾ ꓓꓱ-ꓘꓹ-ꓒꓳ-ꓡꓲ ꓟꓵ ꓗꓪ ꓐꓯ ꓒꓬꓱꓺ ꓙꓰ ꓠꓬ ꓮꓽ ꓙꓵ ꓢꓴ ꓓꓵꓽ ꓙ ꓟꓶ ꓡꓰꓳ꓿ 21 ꓬꓰ-ꓢꓴ ꓠꓬ ꓝꓮꓲ ꓕꓲ ꓧꓪꓹ ꓡꓲ ꓗꓪ ꓐꓰ ꓖꓳ ꓐꓽ ꓢꓲ ꓗꓳꓸ ꓙꓰ ꓢꓲ꓾ ꓬꓲꓻ ꓡꓴ ꓐꓱ ꓘꓶꓽ ꓗꓪ ꓔꓬ ꓕꓯ꓾ ꓞꓳ ꓜꓴ ꓞꓳ ꓟꓯꓼ ꓬꓲ ꓔꓬ ꓗꓪ ꓜꓲꓼ ꓡ ꓡꓳ꓿ 22 ꓙꓰ-ꓣꓴ ꓟꓬꓱ ꓔ ꓟ ꓜꓲꓼ ꓦꓲ ꓙꓵꓽ ꓢꓴ ꓗꓪ ꓟ ꓕꓲ ꓣꓳˍ ꓟꓲ ꓬꓲ ꓔꓯ ꓡ ꓢꓲ꓾ ꓬꓲ ꓟꓲꓽ ꓕꓯꓽ ꓢꓲ ꓗꓪ ꓟꓳꓼ ꓔ ꓢꓲ ꓠꓬꓲ꓾ 23 ꓥꓪ ꓮꓸ ꓟꓲꓽ ꓤ ꓠꓬ ꓫꓵꓻˍ ꓐꓰ ꓗꓹ ꓡꓳ꓿ ꓬꓲ ꓓꓻ ꓡꓰ ꓢꓲ ꓢꓯꓸ ꓔꓬ ꓟꓶ ꓠꓹ ꓟ꓾ ꓠꓴ ꓬꓲ ꓔꓯ ꓡꓯꓼ ꓒꓯꓹ ꓚꓰꓹ ꓖꓶ ꓡꓯ꓾ ꓐꓰ ꓮꓽ ꓘꓶꓸ ꓓꓰꓽˍ ꓡꓳ꓿ 24 ꓖꓳ ꓕꓯ ꓬꓰ-ꓢꓴ ꓠꓬ ꓬꓲ ꓔꓯ ꓛꓳ ꓙꓰˍ ꓡꓳ꓿ ꓞꓳ ꓜꓴ ꓞꓳ ꓟꓯꓼˍ ꓟꓲ ꓬꓰ-ꓢꓴ ꓔꓯ ꓛꓳ ꓙꓰ ꓢꓲ ꓬꓲ ꓔꓯ ꓕꓳꓽ ꓡ ꓡꓳ꓿ 25 ꓫꓵꓽ ꓜꓲꓺ ꓓꓳ ꓠꓬꓲ ꓞꓲ ꓠꓬꓲꓽ ꓘꓳꓼ ꓠꓻ ꓔꓬ ꓢꓴ ꓤ ꓟꓶ ꓤ ꓕꓲ ꓣꓳ ꓙꓳˍ ꓡꓳ꓿ 26 ꓠꓻ ꓫꓬꓹ ꓢꓴ ꓮꓽ ꓟꓬꓹ ꓣꓳ ꓡꓯꓼ ꓒꓯꓹ ꓗꓪ ꓫꓸ ꓙꓵˍ ꓟ ꓮꓽ ꓟꓬꓹ ꓜꓲꓽ ꓢꓲ꓾ ꓬꓲ ꓙꓳˍ ꓟ ꓮꓽ ꓙꓵ ꓣꓱꓽ ꓖꓴ ꓡꓰ ꓗꓪ ꓛꓲ ꓠꓻ ꓫꓬꓹ ꓗꓷˍ ꓟꓲ꓾ ꓮꓸ ꓔꓲˍ ꓟꓲ ꓟꓽ ꓓ ꓡꓰ꓾ ꓟꓬꓽ ꓠꓬꓲ ꓠꓻ ꓡ ꓡꓳ꓿ 27 ꓬꓰ-ꓢꓴ ꓓꓳꓽ ꓬꓲ ꓑ ꓙꓽ ꓗꓷ ꓠꓬ꓾ ꓡꓽ ꓞꓳ ꓬꓲ ꓜꓴꓻ ꓗꓳ ꓡꓳ ꓗꓪ ꓬꓰ-ꓢꓴ ꓗꓸ ꓠꓯꓸ ꓢꓲ ꓡ ꓢꓲ ꓬꓲ ꓐꓵ ꓞꓶꓽ ꓔꓯ ꓫꓱꓹ ꓡ ꓡꓳ꓿ 28 ꓮ ꓡꓲꓳ ꓐꓯ ꓠꓬ ꓬꓲ ꓠꓽ꓾ ꓬꓰ-ꓢꓴ ꓬꓲ ꓐꓵ ꓞꓶꓽ ꓟꓶꓽ ꓗꓪˍ ꓡꓰ ꓫꓱꓹ ꓟꓶˍ ꓟꓲ ꓥꓪ ꓠꓽ ꓓꓻ ꓡꓰˍ ꓥꓳ꓾ ꓐꓰ ꓓꓵꓽ ꓙˍ ꓡꓳ꓿ 29 ꓖꓳ ꓕꓯ ꓬꓲ ꓫꓵꓽ ꓓꓳˍ ꓟ ꓞꓼ ꓐꓰ ꓠꓽ ꓡꓰ ꓢꓲ꓾ ꓬꓲ ꓖꓳ ꓓꓱ ꓗꓪ ꓬꓲ ꓠꓻ ꓓꓻ ꓡꓰˍ ꓟ ꓔꓯ ꓬꓲ ꓚꓲꓸ ꓛꓬ ꓚꓬꓹ ꓪ ꓡꓰꓳ꓿ 30 ꓬꓰ-ꓢꓴ ꓠꓬ ꓬꓲ ꓖꓳ ꓓꓱꓽ ꓗꓪ ꓐꓰ ꓪꓽ ꓠꓬꓲˍ ꓟ ꓢꓯꓼ ꓓꓳ ꓙꓰ ꓟ ꓔꓯ ꓞꓼ ꓐꓰ ꓚꓬꓹ ꓪ ꓡꓰ ꓠꓬꓲ꓾ ꓞꓳ ꓜꓴ ꓗꓳ ꓡꓳ ꓗꓪ ꓔꓲꓸ ꓒꓳꓹ ꓢꓲ꓾ ꓮꓽ ꓟ ꓡꓰ ꓥꓪ ꓐꓵ ꓞꓶꓽ ꓗꓪ ꓫꓱꓹ ꓗꓷ ꓡ?꓾ ꓐꓰ ꓠ ꓠꓬꓲˍ ꓡꓳ꓿ 31 ꓖꓳ ꓕꓯ ꓬꓲ ꓛꓳꓽ ꓒꓯꓹ ꓐꓴ ꓡꓰ ꓬꓲ ꓔꓯ꓾ ꓞꓳ ꓜꓴꓻ ꓞꓳ ꓟꓯꓼ ꓠꓴ ꓔꓯ ꓕꓳꓽ ꓞꓹ ꓟ ꓠꓴ ꓢꓷꓸˍ ꓡꓳ꓿ ꓕꓱ ꓘꓶ ꓟꓬꓽˍ ꓟ ꓞꓳ ꓜꓴꓻ ꓗꓳ ꓡꓳ ꓗꓪ ꓠꓴ ꓔꓯ ꓫꓱꓹ ꓗꓷ ꓢꓴ ꓮꓽ ꓟ ꓥ ꓟ ꓮ ꓡꓲ ꓢꓷꓸ ꓓ ꓢꓰꓽ꓾ ꓐꓯˍ ꓡꓳ꓿ 32 ꓖꓳ ꓡꓱ ꓥ ꓟꓲ ꓬꓰ-ꓢꓴ ꓠꓽ ꓬꓲ ꓔꓯ ꓫꓱꓹ ꓢꓴ ꓔꓯ ꓢꓷꓸ ꓡꓰ ꓠꓹ ꓟ ꓚꓳ ꓡꓳ ꓡꓳ ꓡꓳꓸ ꓠꓬꓲˍ ꓡꓳ꓿ 33 ꓤ ꓟꓶ ꓤ ꓖꓳ ꓕꓲ ꓣꓳ ꓠꓬ ꓬꓲ ꓓ ꓡꓰ ꓟ ꓢꓷꓸˍ ꓠꓬꓲ꓾ ꓙꓳꓺ ꓠꓬꓲ ꓛꓱꓽ ꓠꓬꓲ ꓐꓰ ꓬꓲ ꓟꓲꓽ ꓙꓬꓽ ꓗꓪ ꓟꓳꓼ ꓡ ꓢꓲ꓾ ꓮꓽ ꓙꓵ ꓡꓱꓸꓼ ꓔꓱꓹ ꓔꓱꓹꓼ ꓐꓯ ꓖꓶˍ ꓡꓳ꓿ 34 ꓬꓰ-ꓢꓴ ꓡꓰ ꓬꓲ ꓔꓯ꓾ ꓮꓸ ꓟꓲꓽꓳ꓾ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ꓿ ꓧꓪꓸ ꓧꓪS ꓙꓰ꓿ ꓠꓴ ꓠꓻˍ ꓟ ꓓꓻ ꓡꓰ ꓟꓶ ꓝꓲ꓾ ꓐꓯ ꓖꓶˍ ꓡꓳ꓿ 35 ꓬꓲ ꓖꓳ ꓡꓱ ꓫꓸ ꓕꓱ ꓔꓬ ꓕꓯ꓾ ꓜꓲꓼ ꓦꓲ ꓙꓵꓽ ꓢꓴ ꓙꓰ-ꓣꓴ ꓦꓲ ꓗꓪ ꓐꓰ ꓡꓽ ꓞꓳ ꓕꓲ ꓧꓳꓽ ꓛꓲ ꓡ ꓢꓲ꓾ ꓠꓴ ꓮꓸ ꓟꓲꓽ ꓠꓽ ꓫꓵꓳ꓾ ꓟꓸ ꓒ ꓔꓯ ꓝꓮꓲ ꓕꓽ ꓘꓶꓻ ꓡꓶꓽ꓾ ꓐꓯˍ ꓡꓳ꓿ 36 ꓬꓲ ꓪꓽ ꓐꓯ ꓘꓶꓽ ꓔꓯ ꓬꓰ-ꓢꓴ ꓑ ꓙꓽ ꓗꓷ ꓠꓬ꓾ ꓜꓲꓼ ꓦꓲ ꓙꓵꓽ ꓢꓴ ꓖꓳ ꓕꓲ ꓣꓳ ꓔꓯ꓾ ꓕꓽ ꓙꓳꓺ꓾ ꓙꓵꓻˍ ꓡꓰꓽ ꓙꓵꓻ꓾ ꓐꓯ ꓖꓶˍ ꓡꓳ꓿ 37 ꓬꓲ ꓠꓬ ꓒꓲ-ꓕꓱˍ ꓐꓰ ꓬ-ꓗꓴˍ ꓐꓰ ꓬ-ꓗꓴ ꓬꓲ ꓠꓬꓲ ꓤ ꓬꓳ-ꓦ ꓔꓯˍ ꓡꓰꓽ ꓧꓳꓽ ꓙꓰ ꓢꓲ꓾ 38 ꓜꓲꓼ ꓦꓲ ꓙꓵꓽ ꓢꓴ ꓦꓲ ꓗꓪ ꓬꓲ ꓪꓽ ꓛꓲ ꓡ ꓠꓬ꓾ ꓡꓽ ꓞꓳ ꓢꓴ ꓔꓬ ꓟq ꓐꓰ꓾ ꓥꓴꓻ ꓠꓬꓲ ꓮꓸ ꓛꓬꓺ ꓙꓱꓺ ꓠꓬꓲ ꓬꓰ ꓔꓬ ꓟ ꓔꓯ ꓬꓲ ꓟꓳꓻˍ ꓡꓳ꓿ 39 ꓬꓲ ꓓꓵꓽ ꓡꓰ ꓕꓯ ꓬꓲ ꓡꓰ ꓬꓲ ꓪꓽ ꓔꓯ꓾ ꓮꓸ ꓫꓵ ꓪꓴꓸ ꓠꓬꓲ ꓥꓴꓻ ꓠꓬꓲ ꓢꓴꓺ ꓠꓬꓲ ꓬꓰ ꓔꓬ ꓡ? ꓮꓸ ꓟꓲꓽ ꓤ ꓠꓽ ꓟꓽ ꓫꓵꓻ꓿ ꓬꓲꓼˍ ꓡꓰꓽ ꓬꓲꓼ ꓟꓶ ꓔꓬ ꓡꓳ꓾ ꓐꓯ ꓖꓶˍ ꓡꓳ꓿ 40 ꓖꓳ ꓡꓱ ꓠꓬ ꓬꓲ ꓪꓽ ꓬꓲ ꓔꓯ ꓪꓽ ꓫꓱꓻˍ ꓡꓳ꓿ ꓖꓳ ꓕꓯ ꓬꓲ ꓡꓰ ꓮꓽ ꓙꓵ ꓢꓴ ꓔꓯ ꓓꓳ ꓙꓰ ꓝꓲ ꓢꓲ꓾ ꓮꓸ ꓟꓲꓽ ꓤ ꓬꓲ ꓐꓹ ꓐ ꓟꓹ ꓟˍ ꓐꓰ ꓬꓲˍ ꓐꓰ ꓕꓲ ꓛꓳꓺꓼ ꓡꓻ ꓢꓴ ꓢ ꓣꓳ ꓔꓯ ꓧꓳꓽ ꓔ ꓢꓲ ꓠꓬꓲ꓾ ꓮꓸ ꓟꓲ ꓤ ꓓꓹ ꓖꓴ ꓗꓪ ꓓꓵꓽ ꓡꓰˍ ꓡꓳ꓿ 41 ꓬꓲ ꓡꓰ ꓮꓸ ꓟꓲꓽ ꓤ ꓡꓯꓼ ꓒꓯꓹ ꓗꓪ ꓣꓴ ꓔ ꓢꓲ꓾ Zꓕ ꓡꓲ ꓕ ꓗꓴ ꓟꓲ꓾X ꓐꓯ ꓖꓶˍ ꓡꓳ꓿ (ꓕꓱ ꓟ ꓠꓬ ꓾ ꓮꓸ ꓟꓲꓽ ꓤꓽꓳ꓾ ꓠꓴ ꓔꓯ ꓥꓪ ꓐꓯ ꓖꓶˍ ꓠꓬꓲ꓾ ꓔꓴꓺ꓾ ꓐꓯˍ ꓟ ꓥ ꓡꓳ꓿) 42 ꓮꓸ ꓟꓲꓽ ꓤ ꓠꓬ ꓞꓼ ꓐꓰ ꓔꓴ ꓡ ꓢꓲ ꓙ ꓖꓴ ꓫꓱꓽˍ ꓡꓳ꓿ ꓮꓸ ꓟꓲ ꓤ ꓠꓬ ꓞꓲ ꓠꓬꓲꓽ ꓘꓳꓼ ꓙꓳˍ ꓡꓳ꓿ ꓕꓱ ꓟ ꓔꓯ ꓟꓳ ꓢꓴ ꓬꓲ ꓪꓽ ꓮꓽ ꓘꓶꓸ ꓓꓵꓽ ꓙ ꓟꓶ ꓡꓰꓳ꓿ 43 ꓬꓰ-ꓢꓴ ꓡꓰ꓾ ꓮꓽ ꓟ ꓔꓯˍ ꓟꓲ ꓕꓽ ꓢꓷꓸ ꓡꓰ ꓝꓲ꓾ ꓐꓰ ꓬꓲ ꓪꓽ ꓔꓯ ꓙꓳꓺ ꓗꓽ ꓖꓶ ꓗꓷ ꓠꓬ꓾ ꓮꓸ ꓟꓲꓽ ꓤ ꓔꓯ ꓜꓽ ꓓꓴ ꓕꓲꓽ ꓫꓵꓽ ꓖꓶ ꓜꓽ꓾ ꓐꓯ ꓖꓶˍ ꓡꓳ꓿