ꓬꓰ-ꓢꓴ ꓐꓰ ꓟꓵꓽ ꓘꓳꓼ (8) Dialogue with Environment

ꓢꓲꓺ ꓒ ꓬꓰ-ꓢꓴ ꓫꓵꓻˍ ꓟ ꓗꓪ ꓐꓰ ꓢꓯꓸ ꓬꓲꓼ ꓡˍ ꓟ ꓠꓬ ꓚꓰꓼ ꓔ ꓟ ꓬꓲ ꓫꓵꓼ ꓔꓯ ꓓꓽ ꓪꓴꓸ ꓒꓬꓱꓼ ꓡ ꓝꓲˍ ꓟ ꓥ ꓡꓳ(2 ꓘꓳ-ꓡꓱ-ꓕꓴ ꓕꓳ ꓶ 5ꓽ17-19)= ꓘꓶꓽ ꓫꓵꓽ ꓫꓵꓼ ꓔꓯ ꓐꓳ ꓢꓴ ꓮ ꓙꓵꓽ ꓠꓬ ꓢꓲꓺ ꓒ ꓬꓰ-ꓢꓴ ꓫꓵꓻˍ ꓟ ꓗꓪ ꓐꓰ ꓝꓮꓲ ꓢꓯꓸ ꓬꓲꓼ ꓡˍ ꓟ ꓚꓵ ꓚꓵ ꓟꓳꓻ ꓗꓷꓳ꓾ ꓐꓯ ꓟ ꓔꓯ ꓐꓯ ꓟꓸ ꓖꓶ ꓠꓹ ꓟ꓾ ꓐꓳ ꓟꓸ ꓖꓶ ꓠꓹ ꓟ ꓮ ꓘꓶꓸ ꓢꓯꓼ ꓕꓵꓼ ꓔ ꓟ ꓔꓯ ꓡꓳꓸ ꓟꓳꓻ ꓪ ꓓꓹ ꓡꓳ=

ꓢꓲꓺ ꓒ ꓬꓰ-ꓢꓴ ꓬꓲ ꓗꓸ ꓠꓯꓸ ꓛꓳꓻ ꓢꓴ ꓐꓴ ꓐꓰ ꓠꓱꓸ ꓐꓯ ꓞꓳ ꓤ ꓐꓴ ꓔꓯ ꓢꓲꓺ ꓒ ꓬꓰ-ꓢꓴ ꓬꓲ ꓧꓪꓽ ꓖꓳ ꓓꓱꓽ ꓟꓸ ꓖꓶ ꓠꓹ ꓟ ꓐꓱ ꓶ ꓫꓵꓻ ꓟꓽ ꓓ ꓟ ꓦꓻ ꓕꓲ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓧꓪꓽ ꓖꓳ ꓓꓱꓽ ꓠꓯꓸꓼ ꓗꓪ ꓓꓵꓽ ꓡꓰ ꓢꓲ ꓢꓯꓸ ꓬꓲꓼ ꓡˍ ꓟ ꓠꓽ ꓟꓽ ꓥ= ꓚꓵ ꓚꓵ ꓢꓲꓺ ꓒ ꓬꓰ-ꓢꓴ ꓥ ꓐꓯ ꓟ ꓔꓯ ꓟꓸ ꓖꓶˍ ꓡꓳ= ꓕꓱ ꓟ ꓔꓯ ꓖꓣꓰꓰꓗ ꓐꓯ ꓟ ꓦꓲ-ꓡꓰ ꓢꓷꓸ ꓠꓲꓹ ꓙꓳ ꓒ ꓐꓴ ꓠꓬ ꓘꓳꓹ ꓣꓴ ꓐ ꓡˍ ꓡꓳ=

ꓶꓼ ꓓꓳꓽ ꓫꓱꓹ ꓓꓳꓽ ꓔꓯ ꓐꓳ ꓢꓴ꓾ ꓚꓺ ꓢꓴ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓞꓳ ꓤ ꓬꓲ ꓫꓵꓽ ꓬꓲ ꓧꓪꓽ ꓐꓰ ꓝꓮꓲ ꓢꓯꓸ ꓬꓲꓼ ꓡˍ ꓟ ꓔꓯ ꓙꓵꓻ ꓔꓬ ꓡꓳ= ꓕꓱ ꓟ ꓔꓯ ꓮ ꓕꓯ ꓥˍ ꓟꓲ ꓢꓯꓼ ꓕꓵꓼ ꓢꓲ ꓚꓺ ꓔꓬ ꓟ ꓥ ꓪ= ꓟ-ꓕꓲ 21ꓽ1-13꓾ ꓟ-ꓘꓳ 16ꓽ1-8꓾ ꓡꓴ-ꓘ 24ꓽ1-10꓾ ꓬꓳ-ꓦ 20ꓽ1-10 ꓗꓪ ꓣꓳꓽ ꓡꓳꓸ ꓟꓳꓻ ꓪ ꓓꓹ ꓡꓳ=

ꓕꓰ ꓡꓰ ꓟꓲ ꓠꓯ ꓧꓪꓽ ꓖꓳ ꓓꓱꓽ ꓔꓯ ꓟꓳꓸ ꓢꓲꓺ ꓒ ꓬꓰ-ꓢꓴ ꓝꓮꓲꓸ ꓢꓯꓸ ꓬꓲꓼ ꓡˍ ꓟ ꓚꓱꓹ ꓠꓬ ꓬꓲ ꓗꓸ ꓠꓯꓸ ꓢꓲ ꓗꓪ ꓛꓳꓻ ꓢꓴ ꓐꓴ ꓐꓱ ꓶ ꓮ' ꓡꓰ ꓓꓴ ꓓꓽ ꓟ ꓗꓷ ꓡꓰꓳ= ꓬꓲ ꓗ ꓠꓯꓸ ꓢꓲ ꓗꓪ ꓛꓳꓻ ꓢꓴ ꓐꓴ ꓐꓱ ꓶˍ ꓡꓰꓽ ꓟꓽ ꓞꓲꓺ ꓮꓽ ꓠꓱ ꓟ ꓙꓲ-ꓢꓴ ꓢꓲꓺ ꓤ ꓐꓴ ꓐꓱ ꓶ ꓮ' ꓡꓰ ꓓꓴ ꓓꓽ ꓟ ꓥ ꓡꓳ= ꓖꓳ ꓟ ꓑꓶꓸ ꓓꓴ ꓘꓶꓽ ꓫꓵꓽ ꓫꓵꓼ ꓔꓯ ꓐꓳ ꓢꓴ ꓐꓴ ꓠꓬ ꓢꓲꓺ ꓒ ꓬꓰ-ꓢꓴ ꓫꓵˍ ꓟ ꓗꓪ ꓐꓰ ꓝꓮꓲꓸ ꓢꓯꓸ ꓬꓲꓼ ꓡˍ ꓟ ꓚꓱꓹ ꓔꓯ ꓟꓳꓸ ꓓꓽ ꓪꓴꓸ ꓐꓯ ꓕꓯ ꓠꓬ ꓮ ꓘꓶꓸ ꓐꓯ ꓫꓸ ꓔ ꓟ꓾ ꓞꓳ ꓤ ꓔꓯ ꓟꓸ ꓫꓸ ꓔ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓲꓹ ꓟ ꓓꓵꓽ ꓙ ꓫꓸ ꓔ ꓟ ꓠꓯꓸꓼ ꓗꓪ ꓢꓯꓼ ꓕꓵꓼ ꓢꓲ ꓢꓲꓺ ꓒ ꓬꓰ-ꓢꓴ ꓢꓯꓸ ꓬꓲꓼ ꓡˍ ꓟ ꓚꓱꓹ ꓔꓯ ꓐꓯ ꓟꓸ ꓖꓶˍ ꓟ꓾ ꓢꓴ ꓡꓰ ꓓꓶꓽ ꓡ ꓢꓰꓼ ꓡ ꓟ ꓔꓯ ꓙꓳꓺ ꓢꓲ ꓐꓯ ꓟꓸ ꓖꓶˍ ꓟ ꓚꓱꓹ ꓔꓯ ꓮ ꓟꓬꓹ ꓖꓻ ꓗꓪ ꓡꓳꓸ ꓟꓳꓻ ꓪ ꓓꓹ ꓡꓳ= ꓕꓰ ꓡꓰ ꓢꓲꓺ ꓒ ꓬꓰ-ꓢꓴ ꓢꓯꓸ ꓬꓲꓼ ꓡ ꓟ ꓚꓱꓹ ꓔꓯ ꓬꓲ ꓪ ꓠꓬ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓮ ꓟꓬꓹ ꓫꓵꓽ ꓗꓪ ꓐꓰ ꓟꓳꓸ ꓖꓶ꓾ ꓢꓷꓸ ꓙ ꓟꓳ ꓙ ꓖꓶ ꓢꓲ ꓠꓬꓲ ꓐꓯ ꓟꓸ ꓖꓶˍ ꓟ ꓥ ꓪ=

ꓕꓲ ꓐꓱ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓟꓳꓻ ꓗꓷˍ ꓟ ꓚꓱꓹ (ꓬꓳ-ꓦ 20ꓽ27)꓾ ꓕꓲ ꓐꓱ ꓠꓬ ꓝꓮꓲꓸ ꓢꓯꓸ ꓬꓲꓼ ꓡ ꓟ ꓢꓲꓺ ꓒ ꓬꓰ-ꓢꓴ ꓐꓰ ꓕꓲ ꓪꓽ ꓜꓻ ꓜꓽ ꓗꓷ ꓟ ꓚꓱꓹ(ꓬꓳ-ꓦ 21ꓽ4-1) ꓕꓱ ꓡꓱ ꓫꓵꓽ ꓔꓯ ꓡꓳꓸ ꓟꓳꓻ ꓪ ꓓꓹ ꓡꓳ= ꓢꓲꓺ ꓒ ꓬꓰ-ꓢꓴ ꓫꓵꓻˍ ꓟ ꓗꓪ ꓐꓰ ꓝꓮꓲꓸ ꓢꓯꓸ ꓬꓲꓼ ꓡ ꓟ ꓔꓯ ꓐꓯ ꓕꓯ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓟꓲ ꓠꓯ ꓧꓪꓽ ꓖꓳ ꓓꓱꓽ ꓕꓲ ꓟ ꓡꓱꓸꓼ ꓠꓬ ꓒꓳꓹ ꓡꓶꓸ ꓬꓰˍ ꓟ ꓥ ꓡꓳ=

ꓝꓮꓲꓸ ꓢꓯꓸ ꓬꓲꓼ ꓡ ꓗꓸ ꓠꓯꓸ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓧꓪꓽ ꓖꓳ ꓓꓱꓽ ꓠꓬ ꓧꓶꓸ ꓕꓯ ꓕꓲ ꓞꓲꓼˍ ꓡꓰ ꓐꓰ ꓟꓲ ꓠꓯ ꓞꓳ ꓤ ꓡꓰ ꓐꓰ ꓟꓽ ꓥ= ꓬꓲ ꓔꓯ ꓗꓽ ꓕꓸ ꓐ ꓡˍ ꓟ ꓮ ꓫꓵꓽ ꓥˍ ꓟꓲ ꓟꓽ ꓙꓳ= ꓮ ꓡꓰ ꓕꓲ ꓘꓴ ꓗꓪ ꓥˍ ꓟꓲ ꓛꓲꓺ ꓐ ꓡˍ ꓟ ꓧꓪꓽ ꓖꓳ ꓓꓱꓽ ꓗꓷ ꓡꓰˍ ꓡꓳ= ꓬꓲ ꓔꓯ ꓠꓬ ꓮ ꓡꓰ ꓫꓵꓽ ꓥˍ ꓟꓲ ꓑꓲꓸ ꓦꓯꓹ ꓟꓽ ꓐ ꓡ= ꓮ ꓡꓰ ꓫꓵꓽ ꓗꓪ ꓥˍ ꓟꓲ ꓙ ꓐ ꓡˍ ꓟ ꓕꓱ ꓡꓱ ꓫꓵꓽ ꓧꓪꓽ ꓖꓳ ꓓꓱꓽ ꓗꓷ ꓡꓰˍ ꓡꓳ=

ꓢꓲꓺ ꓒ ꓬꓰ-ꓢꓴ ꓫꓵꓻˍ ꓟ ꓗꓪ ꓐꓰ ꓢꓯꓸ ꓬꓲꓼ ꓡ ꓕꓯ ꓑꓬ ꓔꓬ ꓟ ꓙꓲ-ꓢꓴ ꓢꓲ ꓤ ꓐꓴ ꓠꓯꓸꓼ ꓗꓪ ꓕꓲ ꓕꓷꓹ ꓢꓲꓺ ꓒ ꓬꓰ-ꓢꓴ ꓓꓵꓽ ꓡ ꓢꓲ ꓠꓬꓲ ꓝꓲ ꓓꓴ ꓐꓴ ꓠꓬ ꓮ ꓡꓰˍ ꓟ ꓡꓰꓽ ꓟꓽ ꓞꓲꓺ ꓙꓳꓺ ꓡꓰ ꓟ ꓗꓷ ꓡꓰ ꓢꓲ ꓢꓲꓺ ꓒ ꓬꓰ-ꓢꓴ ꓔꓯ ꓟꓳꓻ ꓗꓷꓳ= ꓢꓲꓺ ꓒ ꓬꓰ-ꓢꓴ ꓔꓯ ꓠꓬ ꓮ ꓫꓵꓽ ꓥˍ ꓟꓲ ꓗꓽ ꓕꓸ ꓟꓽ ꓐ ꓡ ꓕꓱ ꓕꓲ ꓘꓴ ꓗꓪ ꓡꓳꓸ ꓟꓳꓻ ꓪ ꓓꓹ ꓡꓳ=(ꓬꓳ-ꓦ 20ꓽ19)

ꓢꓲꓺ ꓒ ꓬꓰ-ꓢꓴ ꓚꓵ ꓚꓵ ꓝꓮꓲꓸ ꓢꓯꓸ ꓬꓲꓼ ꓡˍ ꓟ ꓗꓪ ꓐꓰ ꓒꓬꓱꓼ ꓡ ꓟ ꓮ ꓙꓵꓽ ꓠꓬ ꓮ' ꓡꓰ ꓓꓴ ꓓꓽ ꓟ ꓥ ꓢꓲ ꓞꓳ ꓤ ꓮ ꓟꓬꓹ ꓠꓬ ꓢꓲꓺ ꓒ ꓬꓰ-ꓢꓴ ꓔꓯ ꓟꓳꓻ ꓪ ꓓꓹ ꓟ ꓐꓯ ꓟ꓾ ꓗꓽ ꓕꓸ ꓟꓽ ꓐ ꓡ ꓟ ꓧꓪꓽ ꓖꓳ ꓓꓱꓽ ꓠꓯꓸꓼ ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓒꓳꓹ ꓡꓶꓸ ꓡꓰˍ ꓟ ꓥ ꓪ= ꓬꓲ ꓢꓯꓸ ꓔꓬ ꓟ ꓚꓱꓹ ꓔꓯ ꓠꓬ ꓮꓽ ꓟ ꓥˍ ꓟꓲ ꓗꓽ ꓕꓸ ꓟꓽ ꓐ ꓡ= ꓮ ꓫꓵꓽ ꓥˍ ꓟꓲ ꓗꓽ ꓕꓸ ꓟꓽ ꓐ ꓡ=