ꓣꓱ-ꓧꓳ-ꓐꓳ ꓐꓰ ꓙꓱ-ꓣꓳ-ꓐꓳ ꓟꓸ ꓟꓲꓽ (2)

ꓖꓳ ꓡꓱ ꓠꓬꓲ ꓪ ꓔꓲ ꓣꓱ-ꓧꓳ-ꓐꓳ ꓠꓬ ꓬꓴ-ꓔ ꓟꓵꓽ ꓥ ꓟ ꓙꓱ-ꓣꓴ-ꓢ-ꓡꓱ ꓗꓪ ꓬꓲꓼ ꓙꓰ ꓗꓷꓳ= ꓙꓱ-ꓣꓳ-ꓐꓳ ꓠꓬ ꓫꓱ-ꓘꓷ-ꓟꓷ ꓡꓳ ꓒꓱ ꓗꓪ ꓔꓬ ꓢꓲ ꓬꓲ-ꓢꓷ-ꓡꓰ ꓟꓵꓽ ꓔꓯ ꓙꓵꓽˍ ꓡꓳ= ꓗꓸ ꓠꓯ ꓕꓯ ꓠꓬ ꓕꓲ-ꓣꓷ-ꓜꓷ ꓡꓳ ꓒꓱ ꓗꓪ ꓐꓰ ꓬꓲ-ꓢꓷ-ꓡꓰ ꓟꓵꓽ ꓔꓯ ꓙꓵꓽ ꓗꓷꓳ=

ꓖꓴ ꓪꓴꓸ ꓗꓴꓷꓼ ꓔꓯ ꓔꓶꓺ ꓓꓳ ꓡꓰˍ ꓕꓯ ꓪ ꓔꓲ ꓙꓱ-ꓣꓳ-ꓐꓳ ꓠꓬ ꓑ ꓫꓬ ꓐꓴ ꓡꓰ ꓪꓴꓸ ꓓꓵ ꓕꓱꓼ ꓠꓹ ꓟ ꓐꓱ ꓶ ꓙꓱ-ꓣꓴ-ꓢ-ꓡꓱ ꓗꓪ ꓟ ꓢꓲꓽ ꓫꓬ ꓦꓲ ꓗꓪ ꓙꓰˍ ꓠꓬ ꓬꓲ ꓪ ꓐꓴ ꓠꓽ ꓣꓱ-ꓧꓳ-ꓐꓳ ꓔꓯ ꓚꓱꓹ ꓬꓲꓼ ꓙꓰˍ ꓥꓳ ꓐꓰ ꓓꓵꓽ ꓙ ꓫꓸ ꓔꓬ ꓡꓳ= ꓖꓳ ꓟ ꓑꓶꓸ ꓓꓴ ꓬꓲ ꓠꓬ ꓐꓱ-ꓕꓷ-ꓡꓲ ꓡꓳ ꓒꓱ ꓐꓰ ꓔꓯ-ꓠꓷ ꓡꓳ ꓒꓱ ꓐꓴ ꓗꓪ ꓪꓴꓸ ꓓꓵ ꓕꓱꓼ ꓖꓴ ꓫꓬꓹ ꓢꓲ ꓮꓸ ꓠꓬꓲꓽ ꓐꓬꓱꓽ ꓠꓬꓲꓽ ꓟ ꓫꓬꓹ ꓗꓷ ꓢꓲ ꓠꓬꓲ꓾ “ꓠꓴ ꓪ ꓠꓬ ꓪꓴꓸ ꓓꓵ ꓕꓱꓼ ꓠꓹ ꓟ ꓐꓱ ꓶ ꓙꓱ-ꓣꓴ-ꓢ-ꓡꓱ ꓗꓪ ꓙꓰ ꓟꓽ ꓛꓵꓳ= ꓕꓱꓻꓽ꓾ ꓬꓲ-ꓙꓲ ꓟꓵꓽ ꓗꓪ ꓐꓰ ꓠꓴ ꓪ ꓔꓯ ꓧꓳꓽ ꓓꓳ ꓡ ꓢꓴ ꓢꓲꓺ ꓠꓬ ꓕꓱ ꓟ ꓥꓳ꓾” (1 ꓪ ꓔꓲ 12ꓽ28)꓾ ꓐꓰ ꓐꓯ ꓖꓶˍ ꓡꓳ=

ꓙꓱ-ꓣꓳ-ꓐꓳ ꓠꓬ ꓟꓴˍ ꓟ ꓪꓽ ꓡꓴꓸ ꓪꓽ ꓔ ꓥ ꓕ ꓑꓳꓸ ꓗꓪ ꓪꓴꓸ ꓓꓵ ꓕꓱꓼ ꓖꓴ ꓫꓬꓹ ꓢꓲ꓾ ꓡꓱ-ꓬꓲ ꓞꓲꓼ ꓤ ꓡꓯꓹ ꓤ ꓟꓽ ꓥ ꓢꓴ ꓐꓴ ꓔꓯ ꓔꓲ ꓒ ꓟꓬꓱꓽ ꓬꓰ ꓠꓹ ꓟ ꓢꓲ ꓚꓰꓸˍ ꓡꓳ= ꓑꓮꓲꓽ ꓦꓬꓼ ꓠꓬꓲ ꓐꓴ ꓗꓪ ꓑꓮꓲꓽ ꓬꓰ ꓢꓲ ꓲ' ꓔ ꓟ ꓫꓵꓺ ꓮ ꓠꓬꓲꓽ ꓐꓬꓱꓽ ꓔꓯ ꓔꓲ ꓓꓴ ꓢꓰꓼ ꓔꓲ ꓖꓶˍ ꓡꓳ ( 1 ꓪ ꓔꓲ 12ꓽ31-33)=

ꓪꓴ-ꓢ ꓡꓰ ꓑ ꓫꓬ ꓐꓴ ꓗꓳ ꓡꓳ ꓗꓪ ꓐꓰ ꓬꓲ-ꓢꓷ-ꓡꓰ ꓔꓯ ꓙꓵꓽ ꓠꓹ ꓟ ꓙꓱ-ꓣꓳ-ꓐꓳ ꓔꓯ ꓢꓲ ꓣꓴ ꓗꓷ ꓥˍ ꓟꓲ꓾ ꓙꓱ-ꓣꓳ-ꓐꓳ ꓠꓬ ꓢꓲꓺ ꓐꓬꓱꓽ ꓔꓯ ꓪꓴꓸ ꓓꓵ ꓕꓱꓼ ꓗꓷꓳ= ꓝꓮꓲ ꓟꓷꓽ ꓠꓷꓹ ꓝꓸ ꓒ ꓱ-ꓦꓲ-ꓬ ꓡꓰ ꓙꓱ-ꓣꓳ-ꓐꓳ ꓬꓲ ꓕꓲ ꓦꓲꓻ ꓢꓴ ꓠꓬ ꓟꓶꓽ ꓬꓰˍ ꓥꓳ ꓐꓰ ꓙꓱ-ꓣꓳ-ꓐꓳ ꓔꓯ ꓐꓯ ꓖꓶ ꓗꓷꓳ (1 ꓪ ꓔꓲ 14ꓽ)

ꓙꓱ-ꓣꓳ-ꓐꓳ ꓠꓬ ꓖꓴ ꓪꓴꓸ ꓬꓲ-ꓢꓷ-ꓡꓰ ꓗꓴꓷꓼ ꓗꓪ ꓑ ꓫꓬ ꓐꓴ ꓔꓯ ꓪꓴ-ꓢ ꓔꓯ ꓐꓰ ꓶꓽ ꓡꓰ ꓠꓽ ꓙꓵꓽ ꓔꓬ ꓕꓯ꓾ ꓖꓴ ꓟꓶꓸ ꓬꓲ-ꓢꓷ-ꓡꓰ ꓗꓴꓷꓼ ꓗꓪ ꓟ ꓣꓱ-ꓧꓳ-ꓐꓳ ꓥˍ ꓟꓲ ꓑ ꓫꓬ ꓐꓴ ꓔꓯ ꓪꓴ-ꓢ ꓔꓯ ꓐꓰ ꓶꓽ ꓤ ꓗꓷ ꓡꓰ ꓝꓲ ꓗꓷꓳ= ꓣꓱ-ꓧꓳ-ꓐꓳ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓞꓲ ꓘꓳꓼ ꓛꓲ ꓙꓵꓽ ꓗꓷ ꓥˍ ꓟꓲ “ ꓬꓲ ꓠꓬ ꓪꓴ-ꓢ ꓔꓯ ꓧꓪ ꓠꓹ ꓟ ꓬꓲ ꓠꓲꓹ ꓟ ꓟꓽ ꓕꓶꓺ ꓠꓬꓲ ꓥꓶˍ ꓟ ꓬꓰˍ ꓡꓳ” (2 ꓚ ꓟꓲꓽ 12ꓽ14)

ꓣꓱ-ꓧꓳ-ꓐꓳ ꓦꓬꓼ ꓠꓬꓲ ꓗꓸ ꓠꓯꓸ ꓕꓯ ꓠꓬ ꓬꓴ-ꓔ ꓟꓵꓽ ꓗꓪ ꓙꓲˍ ꓟ ꓐꓰ ꓥꓶˍ ꓟ ꓪ ꓔꓲ ꓐꓴ ꓮ ꓟꓬꓹ ꓙꓳ ꓗꓷꓳ= ꓠꓯꓸ ꓐꓯ ꓞꓲꓼ ꓤ ꓡꓯꓹ ꓤ ꓐꓴ ꓗꓪ ꓙꓲˍ ꓟ ꓪ ꓔꓲ ꓠꓬ ꓑ ꓫꓬ ꓐꓴ ꓔꓯ ꓪꓴ-ꓢ ꓔꓯ ꓟꓳꓸ ꓚꓱꓹ ꓬꓲꓼ ꓡ ꓝꓲ ꓗꓷꓳ= ꓖꓳ ꓡꓱ ꓥˍ ꓟꓲ ꓖꓴ ꓪꓴꓸ ꓕꓲ ꓛꓱꓽ ꓔꓯ ꓙꓵꓽˍ ꓟ ꓪ ꓔꓲ ꓐꓴ ꓠꓬ ꓖꓳ ꓡꓱ ꓟꓽ ꓥ= ꓬꓲ ꓪ ꓐꓴ ꓠꓬ ꓪ ꓔꓲ ꓙꓱ-ꓣꓳ-ꓐꓳ ꓔꓯ ꓛꓳ ꓢꓲ ꓥꓶˍ ꓟ ꓡꓰꓽ ꓬꓰˍ ꓡꓳ=

ꓙꓱ-ꓣꓳ-ꓐꓳ ꓠꓬ ꓬꓲ-ꓢꓷ-ꓡ ꓞꓳ ꓫꓵꓽ 10 ꓪꓳꓼ ꓔꓯ 22 ꓘꓳꓼ ꓙꓵꓽ ꓗꓷ ꓢꓲ ꓬꓲ ꓤ ꓠ-ꓔ-ꓐꓷ ꓡꓰ ꓝ ꓢꓲ ꓪ ꓔꓲ ꓣꓱꓽˍ ꓡꓳ= ꓖꓳ ꓡꓱ ꓥˍ ꓟꓲ ꓠ-ꓔ-ꓐꓷ ꓠꓬ ꓪ ꓔꓲ ꓣꓱꓽ ꓗꓷ ꓗ ꓠꓯꓸ 2 ꓘꓳꓼ ꓕꓯ ꓢꓰꓼ ꓗꓷˍ ꓟ ꓟꓶ ꓗꓷꓳ= ꓬꓲ ꓔꓯ ꓢꓰꓼ ꓢꓴ ꓠꓬ ꓙꓱ-ꓣꓳ-ꓐꓳ ꓕꓲ ꓦꓲꓻ ꓢꓴ ꓮ ꓙꓵꓽ ꓔꓯ ꓢꓰꓼ ꓗꓷ ꓕꓯ ꓟꓷꓽ ꓠꓷꓹ ꓝꓸ ꓒ ꓱ-ꓦꓲ-ꓬ ꓟꓷꓽ ꓠꓷꓹ ꓝꓸ ꓘꓶꓽ ꓐꓲ ꓡꓰ ꓟ ꓥ ꓡꓳ ( 1 ꓪ ꓔꓲ 15ꓽ25-30)=

ꓬꓲ-ꓢꓷ-ꓡꓰ ꓗꓴꓷꓼ ꓗꓪ ꓟ ꓪ ꓔꓲ ꓙꓱ-ꓣꓳ-ꓐꓳ ꓙꓵꓽ ꓪ ꓔꓯ ꓝꓸ ꓣꓴ ꓢꓲ ꓙꓵꓽ ꓔꓬ ꓟ ꓪ ꓔꓲ ꓮ ꓙꓵꓽ ꓠꓬ ꓙꓱ-ꓣꓳ-ꓐꓳ ꓬꓰ ꓗꓷ ꓟ ꓚꓱꓹ ꓔꓯ ꓛꓳ ꓫꓱꓽˍ ꓡꓳ= ꓬꓲ ꓪ ꓗꓪ ꓟ ꓕꓲ ꓣꓳˍ ꓟꓲ ꓬꓲ-ꓢꓷ-ꓡꓰ ꓪꓴ-ꓢ ꓔꓯ ꓟꓽ ꓠ ꓡꓳꓸ ꓗꓷ=