ꓵ ꓣꓳ ꓟꓬꓽ ꓢꓴ ꓞꓳ ꓫꓵꓽ ꓐꓴ ꓡꓰ ꓥꓲꓸ ꓔ ꓟ (Dialogue with Culture)

ꓟꓲ ꓠꓯ ꓕꓲꓽ ꓚꓳ ꓡꓳ ꓗꓪ ꓡꓲꓽ ꓒꓰꓼ ꓔꓯ ꓐꓬ ꓡꓰ ꓝꓲˍ ꓟ ꓟꓸ ꓖꓶˍ ꓟ ꓚꓱꓹ ꓮꓽ ꓟꓬꓹ ꓙꓳˍ ꓟ ꓠꓯꓸꓼ ꓗꓪ ꓣꓮꓚꓲꓢꓟ ꓐꓯˍ ꓟ ꓞꓳ ꓤꓽ ꓵ ꓣꓳ ꓟꓬꓽ ꓢꓴ ꓚꓵꓸ ꓛꓬꓽ ꓡꓲꓽ ꓒꓰꓼ ꓡꓰ ꓢꓲ ꓟꓽ ꓓ ꓙꓲˍ ꓟ ꓐꓯˍ ꓟ ꓟꓸ ꓖꓶ_ ꓟ ꓙꓵꓹ ꓚꓵꓸ ꓛꓬꓽ ꓡꓲꓽ ꓒꓰꓼ ꓡꓰ ꓢꓲ ꓟꓽ ꓓ ꓙꓲˍ ꓟ ꓕꓱ ꓡꓰ ꓓꓵꓽ ꓙꓽ ꓢꓲ ꓐꓯˍ ꓟ ꓚꓱꓹ ꓬꓰˍ ꓟ ꓚꓱꓹ꓾ ꓠꓬꓲ ꓫꓵꓽ ꓕꓲꓽ ꓫꓵ ꓠꓬ ꓞꓳ ꓤꓽ ꓵ ꓣꓳ ꓟꓬꓽ ꓖꓴ ꓡꓰˍ ꓟ ꓞꓳ ꓫꓵꓽ ꓐꓴ ꓡꓰ ꓒꓰꓼ ꓔꓯ ꓪꓴꓸ ꓓꓵ ꓛꓹ ꓢꓲ ꓬꓲ ꓝꓳꓹ ꓟꓶ ꓛꓹ ꓢꓲ ꓓꓵꓽ ꓙˍ ꓟ ꓚꓱꓹ ꓕꓱ ꓡꓲꓳ ꓫꓵꓽ ꓥˍ ꓡꓳ= ꓕꓱ ꓡꓲꓳ ꓫꓵꓽ ꓒꓬꓱꓼ ꓡˍ ꓟ ꓔꓶꓸ ꓔꓯ ꓛꓳꓽ ꓠꓬꓲ ꓠꓬ ꓟꓬꓽ ꓠꓬꓲ ꓐꓶꓹ ꓠꓬꓲ ꓠꓬ ꓞꓳ ꓫꓵꓽ ꓞꓳ ꓙꓵꓽ ꓮꓽ ꓟꓬꓹ ꓙꓳˍ ꓟ ꓔꓶꓸ ꓞꓳ ꓤꓽ ꓵ ꓣꓳ ꓟꓽ ꓟꓬꓽ ꓟ ꓞꓳ ꓫꓵꓽꓮꓽ ꓟꓬꓹ ꓙꓳˍ ꓟ ꓗꓴꓷꓼ ꓗꓪ ꓡꓳꓸ ꓟ ꓪ ꓓˍ ꓡꓳ=

ꓞꓳ ꓤꓽ ꓵ ꓣꓳ ꓟꓬꓽ ꓢꓴ ꓐꓴ ꓚꓵꓸ ꓛꓬꓽ ꓡꓲꓽ ꓒꓰꓼ ꓠꓬ ꓟꓽ ꓓ ꓬꓳꓸ ꓚꓵˍ ꓟ ꓢꓳꓼˍ ꓟ ꓕꓱ ꓡꓰ ꓓꓵꓽ ꓙˍ ꓟ ꓚꓱꓹ ꓔꓯ ꓟꓳꓸ ꓛꓳ ꓠꓬꓲ ꓠꓬ ꓞꓳ ꓤꓽ ꓵ ꓣꓳ ꓗꓪ ꓐꓰ ꓥˍ ꓠꓬ ꓡꓲꓽ ꓒꓰꓼ ꓗꓪ ꓐꓰ ꓠꓱꓸ ꓐꓯꓼ ꓞꓳ ꓫꓵꓽ ꓕꓯꓽ ꓢꓲ ꓬꓲ ꓪꓽ ꓡꓲꓽ ꓒꓰꓼ ꓠꓬ ꓟꓬꓽ ꓠꓬꓲ ꓙꓲˍ ꓥ꓾ ꓟꓬꓽ ꓠꓬꓲ ꓒꓵꓽˍ ꓥ꓾ ꓟꓬꓽ ꓠꓬꓲ ꓟꓲ ꓓꓳꓽ ꓙꓳˍˍ ꓥ ꓐꓰ ꓕꓱ ꓡꓰ ꓓꓵꓽ ꓙꓽ ꓢꓲ ꓠꓱꓸ ꓐꓯꓼ ꓞꓳ ꓫꓵꓽ ꓡꓲꓽ ꓒꓰꓼ ꓬꓲ ꓕꓯ ꓢꓲ ꓗꓪ ꓗꓪꓸ ꓐ ꓡꓰ ꓠꓹ ꓟ ꓢꓯꓼ ꓕꓵꓼˍ ꓟ ꓕꓱ ꓡꓲꓳˍ ꓫꓵ ꓔꓯ ꓐꓯˍ ꓟ ꓥ ꓪ= 

ꓕꓱ ꓡꓰ ꓓꓵꓽ ꓙˍ ꓟ ꓠꓬ ꓞꓳ ꓫꓵꓽ ꓥˍ ꓠꓬ ꓞꓳ ꓒꓴ ꓞꓳ ꓠꓯ ꓕꓱ ꓡꓲꓳ ꓫꓵꓽ ꓔꓯ ꓪꓴꓸ ꓓꓵ ꓛꓹ ꓢꓲ ꓠꓱꓸ ꓐꓯꓼ ꓞꓳ ꓫꓵꓽ ꓐꓴ ꓔꓯ ꓛꓳꓽ ꓟꓽ ꓟꓵ ꓠꓬꓲ ꓟꓽ ꓟꓵ ꓬꓰˍ ꓟ꓾ ꓥꓲꓸ ꓔ ꓟ꓾ ꓪ ꓙꓵꓽ ꓪꓽ ꓔꓯ ꓟꓽ ꓖꓶˍ ꓟ ꓕꓱ ꓡꓲꓳ ꓫꓵꓽ ꓟꓽ ꓕꓱˍ ꓟ ꓬꓰˍ ꓟ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ= ꓕꓱ ꓡꓰ ꓞꓳ ꓤꓽ ꓵ ꓣꓳ ꓟꓬꓽ ꓟ ꓞꓳ ꓫꓵꓽ ꓐꓴ ꓠꓱꓸ ꓐꓯꓼ ꓕꓯ ꓢꓲ ꓗꓪ ꓗꓪꓸ ꓡꓰ ꓠ ꓬꓰˍ ꓟ ꓬꓲ ꓟꓸ ꓟꓲ ꓔꓯ ꓛꓳꓽ ꓠꓬꓲ ꓠꓬ ꓟꓬ ꓢꓷꓽ ꓟꓽ ꓟꓳˍ ꓟ꓾ ꓓꓵꓽ ꓙꓽ ꓗꓴꓸ ꓔ ꓟ ꓠꓲꓹ ꓟ ꓟꓽ ꓙꓳˍ ꓟ꓾ ꓢꓳ ꓔꓯ ꓠꓲꓹ ꓜꓳˍ ꓟ꓾ ꓢꓳ ꓪ ꓡꓰ ꓠꓹ ꓟ ꓔꓯ ꓠꓲꓹ ꓟ ꓠꓹ ꓟ꓾ ꓢꓷꓸ ꓔ ꓥˍ ꓟꓲ ꓟꓬ ꓢꓷꓽ ꓟꓽ ꓟꓳꓹ ꓪˍ ꓡꓰ ꓬꓰˍ ꓟ꓾ ꓟꓬꓽ ꓠꓬꓲ ꓐꓶꓹ ꓠꓬꓲ ꓚꓵꓸ ꓛꓬꓽ ꓞꓳ ꓫꓵꓽ ꓔꓯ ꓟꓬꓽ ꓠꓬꓲ ꓬꓲ ꓔꓶꓸ ꓪ ꓠ ꓙꓵꓽ ꓪꓽ ꓪ ꓠ ꓬꓰˍ ꓟ ꓕꓱ ꓡꓲꓳ ꓫꓵꓽ ꓔꓯ ꓐꓯ ꓠꓲꓹ ꓫꓵˍ ꓟ ꓥ ꓪ=

 ꓞꓳ ꓙꓳ ꓢꓯꓸ ꓔꓬ ꓚꓱꓹ ꓔꓯ ꓟꓳꓸꓢꓷꓸ ꓠꓲꓹ ꓙꓳ ꓒꓽ ꓐꓴ ꓡꓰ ꓐꓯˍ ꓟ ꓠꓬ ꓕꓱ ꓡꓰ ꓞꓳ ꓤꓽ ꓵ ꓣꓳ ꓟꓬꓽ ꓢꓴ ꓞꓳ ꓫꓵꓽ ꓐꓴ ꓢꓳ ꓕꓯꓽ ꓢꓲ ꓗꓪ ꓧꓪꓸ ꓡꓰ ꓠ ꓢꓳ ꓕꓯꓽ ꓢꓲ ꓗꓪ ꓙꓵꓽ ꓪ ꓠ ꓗꓪꓸ ꓡꓰ ꓠ ꓬꓰˍ ꓟ ꓠꓬ ꓠꓱꓸ ꓐꓯꓼ ꓞꓳ ꓤꓽ ꓐꓰ ꓟꓽ ꓪꓽ ꓡꓰ ꓘꓳ ꓬꓲ ꓪꓽ ꓕꓲꓽ ꓫꓵꓽ ꓠꓯꓸꓼ ꓗꓪ ꓮꓽ ꓠꓱ ꓗꓪ ꓐꓰ ꓮ ꓟꓶ ꓗꓪ ꓛꓲ ꓕꓱ ꓡꓰ ꓐ ꓡˍ ꓟ ꓫꓶꓹ ꓕꓲꓽ ꓟ ꓥˍ ꓡꓳ ꓐꓰ ꓕꓱ ꓡꓰ ꓐꓯˍ ꓡꓳ= ꓕꓱ ꓟ ꓫꓶꓹ ꓠꓬ ꓚꓵꓸ ꓛꓬꓽ ꓔꓵꓹ ꓚꓵꓸ ꓛꓬꓽ ꓟꓬꓽ ꓠꓬꓲ ꓟꓬꓱ ꓓꓳꓽ ꓙꓳˍ ꓥ꓾ ꓟꓬꓽ ꓠꓬꓲ ꓬꓲ ꓪꓽ ꓠꓬ ꓒꓵꓽˍ ꓥ꓾ ꓟꓬꓽ ꓠꓬꓲ ꓬꓲ ꓪꓽ ꓠꓬ ꓬꓳꓸ ꓚꓵˍ ꓥ ꓐꓰ ꓚꓵꓸ ꓛꓬꓽ ꓔꓵꓹ ꓚꓵꓸ ꓛꓬꓽ ꓘꓶꓽ ꓘꓹ ꓔ ꓟ꓾ ꓟꓬꓱ ꓓꓳꓽ ꓧꓪˍ ꓟ ꓕꓱ ꓡꓲꓳ ꓫꓵꓽ ꓠꓲꓹ ꓟ ꓙꓳ ꓢꓲ ꓠꓬꓲ ꓢꓳ ꓔꓯ ꓛꓳꓽ ꓟꓽ ꓟꓵ ꓠꓬꓲ ꓟꓽ ꓟꓵˍ ꓟ꓾ ꓢꓳ ꓕꓯ ꓦꓲꓸ ꓔ ꓟ ꓕꓱ ꓡꓲꓳ ꓫꓵꓽ ꓒꓬꓱꓼ ꓡ ꓝꓲˍ ꓟ ꓥ ꓪ=