ꓟꓬꓻ ꓢꓶꓽ ꓠꓬꓲ ꓟꓳꓻ ꓓꓴ ꓢꓯꓼ ꓪꓽ ꓠꓬꓲ ꓡ ꓓꓴ ꓐꓱ ꓶ ꓜꓽ ꓖꓶ ꓠꓯꓹ ꓟ ꓜꓽ ꓫꓵꓽ

ꓟꓬ ꓢꓶꓽ ꓠꓬꓲ ꓟꓳꓻˍ ꓟ ꓢꓯꓼ ꓪꓽ ꓠꓬꓲ ꓡ ꓓꓴ ꓐꓱ ꓶ ꓜꓽ ꓖꓶ ꓠꓯꓹ ꓟ ꓜꓽ ꓫꓵꓽ

ꓞꓳ ꓤ ꓐꓴ ꓠꓬ 5 ꓢꓰꓠꓢꓰꓢ ꓔꓯ ꓣꓱꓽ ꓢꓲ ꓟꓲ ꓠꓯ ꓐꓰ ꓕꓲ ꓚꓳ ꓡꓳ ꓗꓪ ꓙꓳˍ ꓟ ꓔꓯ ꓕꓲꓺ ꓢꓲ ꓟꓳꓻ ꓢꓲ ꓠꓬꓲ ꓞꓳ ꓙꓳ ꓢꓯꓸ ꓔꓬ ꓟ ꓥ ꓡꓳ= ꓟꓳꓻˍ ꓟ꓾ ꓑ ꓙꓽˍ ꓟ꓾ ꓬꓲ ꓐꓵꓻ ꓟꓶˍ ꓟ꓾ ꓜꓽ ꓙꓲꓻ ꓜꓽ ꓟꓽ ꓙꓲꓻ ꓢꓷꓸˍ ꓟ꓾ ꓕꓲꓺ ꓡꓰˍ ꓟ ꓕꓱ ꓟ ꓘꓴꓽ ꓗꓪ ꓢꓯꓸ ꓔꓬ ꓟ ꓐꓰꓽ ꓟꓽ ꓢꓯꓸ ꓔꓬ ꓟ꓾ ꓟꓲ ꓠꓯ ꓗꓪ ꓙꓳ ꓫꓵꓽ ꓐꓴ ꓔꓯ ꓡꓳꓸ ꓟꓳꓻ ꓢꓲ ꓪꓴꓸ ꓠꓷꓸ ꓗꓪ     ꓚꓲꓸ ꓔ ꓢꓲ ꓢꓳ ꓣꓴˍ ꓟ ꓔꓯ ꓬꓰ ꓠꓹ ꓟ ꓐꓱ ꓶ ꓠꓬꓲ ꓟꓳꓻ ꓓꓴ ꓠꓬ ꓟꓬꓽ ꓠꓬ ꓬꓳꓸ ꓚꓵˍ ꓟ ꓥ ꓡꓳ=

ꓠꓯꓼ ꓠꓯꓼ ꓔꓴ ꓡˍ ꓟ ꓗꓪ ꓐꓰ ꓟꓶꓽ ꓘꓶꓼ ꓬꓲꓼ ꓔ ꓖꓴ ꓗꓪ ꓓꓵꓽ ꓡꓰˍ ꓗꓪ ꓛꓲꓺ ꓕꓲ ꓠꓬꓲ ꓡꓱꓸꓼ ꓡꓳꓸ ꓔꓬ ꓪˍ ꓟ ꓑꓶꓸ ꓓꓴ ꓟꓬꓻ ꓢꓶꓽ ꓢꓯꓼ ꓪꓽ ꓠꓬꓲ ꓢꓲ ꓫꓬꓽ ꓫꓬꓽ ꓡꓰꓽ ꓟꓳꓻ ꓠꓹ ꓟˍ ꓟꓲ ꓬꓳꓸ ꓚꓵˍ ꓟ ꓥ ꓡꓳ=

ꓟꓬꓻ ꓢꓶꓽ ꓢꓯꓼ ꓪꓽ ꓠꓬꓲ ꓢꓲ ꓫꓬꓽ ꓫꓬꓽ ꓡꓰꓽ ꓟꓳꓻ ꓠꓹ ꓟ ꓐꓱ ꓶ ꓬꓳꓸ ꓚꓵˍ ꓟ ꓠꓬ ꓕꓲ ꓘꓳꓼ ꓕꓲ ꓧꓪꓹ ꓟꓬꓻ ꓢꓶꓽ ꓔꓯ ꓠꓯꓻ ꓞꓲꓼ ꓦꓲꓻ ꓗꓪ ꓟꓳꓸ ꓖꓶ ꓠ ꓔ ꓡꓳ= ꓖꓳ ꓗ ꓠꓯꓸ ꓠꓬ ꓟꓬꓻ ꓢꓶꓽ ꓠꓬꓲ ꓟꓳꓻ ꓓꓴ ꓢꓯꓼ ꓪꓽ ꓠꓬꓲ ꓓꓴ ꓐꓱ ꓶ ꓬꓰ ꓙ ꓔꓳꓹ ꓙ ꓖꓶˍ ꓟ ꓜꓽ ꓫꓵꓽ ꓜꓽ ꓙꓰꓽ ꓐꓴ ꓔꓯ ꓜꓽ ꓖꓶ ꓠꓯꓹ ꓟ ꓥ ꓡꓳ=

ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓣꓳ ꓐꓴ ꓠꓬ ꓑꓧꓳꓠꓰ꓾ ꓚꓳꓟꓑꓴꓔꓰꓣ ꓣꓱꓽ ꓟꓬꓽ ꓡˍ ꓟ ꓑꓶꓸ ꓓꓴ ꓟꓬꓻ ꓢꓶꓽ ꓢꓯꓼ ꓟꓽ ꓙꓳ ꓗꓷ ꓡꓰˍ ꓡꓳ= ꓕꓱ ꓟ ꓐꓱ ꓶ ꓜꓽ ꓓꓴˍ ꓟꓲ ꓠꓯꓻ ꓞꓲꓼ ꓠꓯꓻ ꓞꓲꓼ ꓥˍ ꓟꓲ ꓜꓽ ꓓꓴ ꓐꓯˍ ꓟ ꓐꓯ ꓘꓶꓽ ꓙꓳˍ ꓟ ꓕꓲ ꓡꓰꓹ ꓜꓽ ꓓꓴ ꓕꓱ ꓟ ꓔꓯ ꓟꓬꓽ ꓠꓬꓲ ꓜꓽ ꓖꓶˍ ꓕꓯ ꓟꓬꓽ ꓢꓶꓽ ꓠꓬꓲ ꓟꓳꓻ ꓓꓴ ꓢꓯꓼ ꓪꓽ ꓠꓬꓲ ꓡ ꓓꓴ ꓐꓱ ꓶ ꓬꓰ ꓙ ꓔꓳꓹ ꓙ ꓖꓶ ꓐ ꓡˍ ꓡꓳ=

(1) ꓥꓪꓸ

ꓢꓮꓡꓟꓳꓠ ꓡꓰ ꓐꓰ ꓥꓪꓸ ꓐꓴ ꓗꓪ ꓳꓟꓰꓖꓮ-3 ꓢꓯꓼ ꓟꓬꓽ ꓠꓬꓲ ꓙꓳˍ ꓟ ꓑꓶꓸ ꓓꓴ ꓟꓬꓽ ꓢꓶꓽ ꓙꓴꓺ ꓡꓰˍ ꓟ꓾ ꓐꓰ ꓟꓬꓽ ꓢꓶꓽ ꓔꓬ ꓢ ꓓꓴ ꓐꓱ ꓶ ꓮ ꓟꓬꓹ ꓬꓰ ꓙ ꓐ ꓡˍ ꓟ ꓥ ꓡꓳ=

(2) ꓪꓳꓽ ꓙꓲꓽ ꓫꓵꓽ

ꓪꓳꓽ ꓙꓲꓽ ꓫꓵꓽ ꓗꓪ ꓦꓲꓔꓮꓟꓲꓠ ꓮ ꓐꓰ ꓐꓰꓔꓮ ꓚꓮꓣꓳꓔꓰꓠꓰ ꓢꓯꓼ ꓙꓳˍ ꓟ ꓑꓶꓸ ꓓꓴ ꓠꓬꓲ ꓟꓳꓻ ꓓꓴ ꓢꓯꓼ ꓙꓳ ꓡ ꓓꓴ ꓐꓱ ꓶ ꓮ ꓟꓬꓹ ꓬꓰ ꓙ ꓖꓶˍ ꓡꓳ=

(3) ꓐꓯ-ꓓ ꓫꓵꓸ

ꓦꓲꓔꓮꓟꓲꓠ ꓰ ꓙꓳˍ ꓟ ꓑꓶꓸ ꓓꓴ ꓠꓱꓸ ꓐꓯ ꓬꓲ ꓫꓵꓸ ꓬꓲ ꓢꓶꓽ ꓐꓴˍ ꓡꓰ ꓐꓰ ꓟꓬ ꓢꓶꓽ ꓢꓯꓼ ꓔꓯ ꓪꓽ ꓠꓬꓲ ꓡꓰ ꓝꓲˍ ꓡꓳ=

(4) ꓮ ꓭꓸ ꓩꓴ

ꓮ ꓭꓸ ꓩꓴ ꓗꓪ ꓦꓲꓔꓮꓟꓲꓠ ꓮ꓾ ꓡꓴꓔꓰꓲꓠꓹ ꓜꓰꓮꓫꓮꓠꓔꓧꓲꓠ ꓐꓰ ꓜꓲꓠꓚ ꓡꓰ ꓐꓰ ꓢꓯꓼ ꓙꓳˍ ꓟ ꓑꓶꓸ ꓓꓴ ꓠꓬꓲ ꓟꓳꓻ ꓓꓴ ꓢꓯꓼ ꓔꓯ ꓟꓬꓽ ꓠꓬꓲ ꓪꓽ ꓠꓬꓲ ꓡ ꓝꓲˍ ꓡꓳ=

(5) ꓙꓱꓽ ꓤ ꓮ ꓚꓵꓹ ꓬꓲꓻ

ꓙꓱꓽ ꓤ ꓮ ꓚꓵꓹ ꓬꓲꓻ ꓗꓪ ꓥˍ ꓟꓲ ꓜꓲꓠꓚ ꓐꓰ ꓦꓲꓔꓮꓟꓲꓠ ꓮ ꓢꓯꓼ ꓙꓳˍ ꓟ ꓑꓶꓸ ꓓꓴ ꓟꓬꓻ ꓢꓶꓽ ꓐꓱ ꓶ ꓢꓯꓼ ꓧꓳꓽ ꓖꓶˍ ꓡꓳ=

(6) ꓧꓪꓽ ꓗꓳꓼ ꓢꓶꓽ

ꓦꓲꓔꓮꓟꓲꓠ ꓚ ꓮ ꓟꓬꓹ ꓙꓳˍ ꓟ ꓧꓪꓽ ꓗꓳꓼ ꓢꓶꓽ ꓠꓬ ꓟꓬꓽ ꓢꓶꓻ ꓗꓪ ꓟ ꓫꓵꓽ ꓙꓴꓽ ꓔꓯ ꓮ ꓟꓬꓹ ꓬꓰ ꓙ ꓔꓳꓹ ꓙ ꓖꓶ ꓐ ꓡˍ ꓟ ꓑꓶꓸ ꓓꓴ ꓠꓬꓲ ꓟꓳꓻ ꓓꓴ ꓢꓯꓼ ꓪꓽ ꓠꓬꓲ ꓡꓰ ꓝꓲˍ ꓡꓳ=

(7) ꓗꓮꓲꓡꓮꓠ

ꓮꓠꓔꓲꓳꓫꓲꓓꓮꓠꓔꓢ꓾ ꓡꓴꓔꓰꓲꓠ ꓐꓰ ꓜꓰꓮꓫꓮꓠꓔꓧꓲꓠ ꓐꓴ ꓙꓳˍ ꓟ ꓪꓴꓸ ꓠꓬꓲ ꓗꓮꓲꓡꓮꓠ (ꓪꓳꓽ ꓒꓲꓻ) ꓔꓯ ꓪꓽ ꓠꓬꓲˍ ꓟ ꓜꓽ ꓓꓴ ꓐꓰ ꓐꓯ ꓔꓬ ꓖꓴˍ ꓟ ꓥ ꓡꓳ= ꓦꓲꓔꓮꓟꓲꓠ ꓐꓰ ꓲꓣꓳꓠ ꓢꓯꓼ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓠꓬꓲ ꓟꓳꓻ ꓓꓴ ꓢꓯꓼ ꓔꓯ ꓪꓽ ꓠꓬꓲ ꓡ ꓝꓲˍ ꓟ ꓢꓯꓼ ꓐꓴ ꓙꓳˍ ꓟ ꓥ ꓡꓳ=

ꓕꓱ ꓟꓬ ꓫꓵꓽ ꓟ ꓠꓬ ꓟꓬꓻ ꓢꓶꓽ ꓠꓬꓲ ꓟꓳꓻ ꓓꓴ ꓢꓯꓼ ꓪꓽ ꓠꓬꓲ ꓡ ꓓꓴ ꓐꓱ ꓶ ꓜꓽ ꓖꓶ ꓠꓯꓹ ꓟ ꓜꓽ ꓫꓵꓽ ꓜꓽ ꓙꓰꓽ ꓥ ꓡꓳ=