ꓒꓴ ꓒꓴ ꓡꓯꓽ ꓡꓯꓽ ꓐꓯ ꓟꓸ ꓐ ꓡˍ ꓟ꓾ ꓛꓳꓻ ꓐ ꓡˍ ꓟ ꓙꓵꓽ ꓪ

Social Teaching ꓐꓯˍ ꓟ ꓘꓴ ꓜꓲꓼ ꓞꓳ ꓡꓰ ꓟꓸ ꓖꓶ ꓡˍ ꓟ ꓞꓳ ꓙꓳ ꓢꓯꓸ ꓔꓬ ꓚꓱꓹ ꓠꓯꓸꓼ ꓗꓪ ꓚꓳꓸ ꓡꓲꓽ ꓒꓰꓼ ꓠꓬ ꓒꓴ ꓒꓴ ꓡꓯꓽ ꓡꓯꓽ ꓐꓯ ꓟꓸ ꓐ ꓡˍ ꓟ꓾ ꓛꓳꓻ ꓐ ꓡˍ ꓟ ꓙꓵꓽ ꓪ ꓐꓯˍ ꓟ ꓠꓯꓸꓼ ꓗꓪ ꓚꓳꓸ ꓠꓬꓲ ꓝꓸ ꓢꓲ ꓐꓯ ꓟꓸ ꓖꓶ ꓓꓴ ꓥꓳ=

ꓡꓳꓹ ꓬꓰ ꓟ ꓕꓲ ꓫꓵꓽ ꓠꓽ ꓗꓪ ꓣꓳ ꓵꓻ ꓣꓳ ꓟꓽ ꓟꓬꓽ ꓟ ꓞꓳ ꓫꓵꓽ ꓐꓴ ꓔꓯ ꓵꓻ ꓣꓳ ꓟꓬꓽˍ ꓟ ꓞꓳ ꓫꓵꓽ ꓐꓴ ꓡꓰ ꓡꓲꓽ ꓒꓰꓼ ꓔꓯ ꓟꓶꓽ ꓡꓰ ꓠ ꓬꓰˍ ꓟ ꓪꓴꓸ ꓠꓬꓲ ꓗꓴꓷꓼ ꓘꓴꓽ ꓗꓪ ꓫꓵꓽ ꓪꓴꓻ ꓓꓽ ꓟ꓾ ꓢꓰꓼ ꓡꓯ ꓘꓳ ꓓꓴ ꓓꓶꓽ ꓡꓯ ꓘꓳ ꓓꓴ ꓓꓳ ꓡ ꓟ ꓚꓱꓹ ꓔꓯ ꓐꓯ ꓟꓸ ꓖꓶ ꓡꓳꓹ ꓬꓰꓳ=

ꓟꓲ ꓠꓯ ꓕꓱ ꓟ ꓗꓪ ꓞꓳ ꓫꓵꓽ ꓞꓳ ꓙꓰꓽ ꓫꓵꓽ ꓪꓴ ꓚꓱꓹ ꓔꓯ ꓟꓳꓸ ꓙꓳꓧꓠ ꓣꓰꓢꓔ ꓐꓯˍ ꓢꓴ ꓡꓰ ꓮ ꓡꓰ ꓐꓯˍ ꓥ ꓐꓯ ꓠꓬ꓾ ꓞꓳ ꓫꓵꓽ ꓟꓽ ꓪꓽ ꓡꓯ ꓘꓳ ꓟ ꓐꓰ ꓪ ꓙꓵꓽ ꓪ ꓕꓲ ꓡꓰꓹ ꓙꓳˍ ꓟ ꓕꓱ ꓟ ꓠꓬꓲꓽ ꓫꓵꓽ ꓒꓴ ꓒꓴ ꓡꓯꓽ ꓡꓯꓽ ꓬꓰ ꓐ ꓡˍ ꓟ ꓬꓲ ꓔꓶꓸ ꓙꓳ ꓠ ꓔ ꓡꓳ=

ꓪ ꓙꓵꓽ ꓪ ꓕꓲ ꓡꓰꓹ ꓙꓳˍ ꓟ ꓟꓽ ꓐ ꓐ꓾ ꓡꓲꓽ ꓒꓰꓼ ꓟꓽ ꓫꓱꓸ ꓡꓯ ꓘꓳ ꓟ ꓔꓯ ꓡꓰꓽ ꓬꓳꓸ ꓚꓵˍ ꓥ ꓫꓪꓸ ꓠꓬ ꓫꓵꓽ ꓘꓶꓽ ꓡꓯ ꓘꓳꓹ ꓟ ꓐꓰ ꓪ ꓙꓵꓽ ꓪ ꓕꓲ ꓡꓰˍ ꓟꓽ ꓙꓳ ꓟ ꓐꓯˍ ꓟ ꓓꓳꓻ ꓡ ꓢꓲ ꓠꓬꓲ꓾ ꓠꓲꓹ ꓧꓳꓹ ꓫꓵꓽ ꓧꓳꓹ ꓪꓽ ꓡꓯ ꓘꓳ ꓓꓴ ꓠꓯꓸꓼ ꓗꓪ ꓮ ꓘꓶꓸ ꓫꓸ ꓔ ꓟ ꓕꓱ ꓡꓱ ꓫꓵꓽ ꓔꓯ ꓓꓳꓻ ꓡ ꓝꓲˍ ꓡꓳ=

ꓖꓳ ꓟ ꓡꓰ ꓐꓰ ꓕꓲ ꓡꓰꓹ ꓡꓲꓽ ꓒꓰꓼ ꓟꓽ ꓪꓽ ꓡꓯ ꓘꓳ ꓟ ꓔꓯ ꓬꓲ ꓓꓵꓺ ꓛꓬꓹ ꓢꓲ ꓠꓬꓲ꓾ ꓪ ꓙꓵꓽ ꓪ ꓕꓲ ꓡꓰꓹ ꓙꓳˍ ꓟ ꓔꓯ ꓬꓳꓸ ꓚꓵˍ ꓥ ꓫꓪꓸˍ ꓠꓬ ꓡꓲꓽ ꓒꓰꓼ ꓟꓽ ꓪꓽ ꓡꓯ ꓘꓳ ꓟ ꓐꓯˍ ꓟ ꓪꓴꓸ ꓠꓬꓲ ꓠꓱꓸ ꓐꓯ ꓡꓲꓽ ꓒꓰꓼ ꓔꓯ ꓠꓬꓲꓸ ꓔ ꓟ ꓒꓬꓱꓼ ꓡ ꓢꓲ ꓮ-ꓠ-ꓫꓲ ꓐꓯˍ ꓟ ꓠꓱꓸ ꓐꓯ ꓞꓳ ꓫꓵꓽ ꓔꓯ ꓠꓬꓲꓸ ꓔ ꓟ꓾ ꓵꓻ ꓣꓳ ꓟꓽ ꓟꓬꓽ ꓟ ꓞꓳ ꓫꓵꓽ ꓔꓯ ꓠꓬꓲꓸ ꓔ ꓟ꓾ ꓙꓵꓽˍ ꓟ ꓕꓱ ꓡꓱ ꓫꓵꓽ ꓒꓬꓱꓼ ꓡ ꓝꓲˍ ꓡꓳ꓾ ꓐꓰ ꓕꓱ ꓡꓱ ꓐꓯˍ ꓡꓳ=

ꓬꓲ ꓡꓰ ꓐꓯˍ ꓟ ꓕꓲ ꓡꓰꓹ ꓡꓳꓸ ꓠꓬꓲ ꓠꓬ ꓗꓴꓷꓼ ꓔꓯ ꓙꓵꓽ ꓢꓴ ꓢꓲꓽ ꓒ ꓐꓴ ꓠꓬ ꓗꓴꓷꓼ ꓗꓪ ꓞꓳ ꓫꓵꓽ ꓞꓳ ꓙꓰꓽ ꓮ ꓙꓵꓽ ꓔꓯ ꓠꓲꓹ ꓧꓳꓹ ꓫꓵꓽ ꓧꓳꓹ ꓪꓽ ꓡꓯ ꓘꓳ ꓝꓲ ꓠꓹ ꓟ ꓚꓱꓹ ꓔꓯ ꓮ ꓘꓶꓸ ꓒꓵꓽ ꓢꓲ ꓠꓬꓲ ꓪꓴꓸ ꓓꓵꓺ ꓛꓬꓹ ꓢꓲ ꓠꓬꓲ ꓬꓰ ꓝꓲ ꓠ ꓗꓹ ꓡꓳ=

ꓖꓳ ꓡꓱ ꓬꓰˍ ꓕꓯ ꓞꓳ ꓫꓵꓽ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓬꓲ ꓪ ꓡꓲꓽ ꓒꓰꓼ꓾ ꓬꓲ ꓪ ꓫꓸ ꓪ꓾ ꓬꓲ ꓪ ꓞꓳ ꓚꓱꓹ꓾ ꓬꓲ ꓪ ꓙꓵꓻ ꓠꓲꓹ ꓮ ꓙꓵꓽ ꓔꓯ ꓒꓵꓽ ꓗ ꓬꓰ ꓢꓲ ꓠꓬꓲ ꓘꓳꓹ ꓣꓴ ꓠꓹ ꓟ ꓬꓳꓸ ꓚꓵˍ ꓡꓳ= ꓟꓲ ꓠꓯ ꓕꓲ ꓚꓳ ꓡꓳ ꓗꓪ ꓟ ꓞꓳ ꓤ ꓪ ꓙꓵꓽ ꓪ ꓚꓱꓹ ꓔꓯ ꓟꓳꓸ ꓐꓳ ꓔ ꓟ ꓠꓸ ꓑ (27) ꓬꓲꓸ ꓤ ꓤ 1 ꓗꓪ ꓠꓬ “ꓞꓳ ꓤ ꓕꓲ ꓣꓳ ꓡꓰ ꓕꓲ ꓣꓳ ꓬꓲ ꓜꓴꓻ ꓬꓲ ꓟꓯꓼ ꓡꓲꓽ ꓒꓰꓼ ꓡꓰ ꓐꓰ ꓕꓲ ꓡꓰꓹ ꓬꓲ ꓪ ꓕꓲ ꓞꓲꓼ ꓗꓪ ꓒꓴ ꓒꓴ ꓡꓯꓽ ꓡꓯꓽ ꓐ ꓪ ꓠꓹ ꓟ ꓪ ꓙꓵꓽ ꓪ ꓙꓳ ꓠ ꓔ ꓥ=

ꓖꓳ ꓟ ꓞꓳ ꓫꓵꓽ ꓐꓴ ꓬꓲ ꓪ ꓐꓲꓻ ꓜꓴꓽ ꓠꓴꓽ꓾ ꓬꓲ ꓪ ꓢꓷꓸ ꓠꓲꓹ꓾ ꓬꓲ ꓪ ꓪꓴꓽ ꓡ ꓟꓴ ꓡ ꓚꓱꓹ ꓕꓱ ꓡꓱ ꓫꓵꓽ ꓮ ꓙꓵꓽ ꓔꓯ ꓪ ꓙꓵꓽ ꓪ ꓙꓳ ꓠ ꓔ ꓥ” ꓐꓰ ꓕꓱ ꓡꓱ ꓐꓯ ꓔ ꓡꓳ= ꓔꓲꓺ ꓒ ꓪ ꓔꓲ ꓬꓳ-ꓦ ꓒꓳ-ꓡꓳ 2 ꓡꓰ ꓟꓲ ꓠꓯ ꓢꓲ ꓡꓲ ꓗꓷ ꓡ ꓠꓹ ꓟ ꓐꓱ ꓶ ꓐꓳ ꓔ ꓟ ꓕꓳꓽ ꓶ ꓗꓪ “ꓞꓳ ꓫꓵꓽ ꓞꓳ ꓙꓰꓽ ꓮ ꓙꓵꓽ ꓠꓬ ꓙꓵꓽ ꓗ ꓠꓯꓸꓼ ꓗꓪ ꓕꓲ ꓡꓰꓹ ꓪ ꓙꓵꓽ ꓪ ꓙꓳ ꓠ ꓔ ꓥ=ꓕꓲ ꓡꓰꓹˍ ꓢꓯꓸ ꓔꓬ ꓠꓹ ꓟ ꓪ ꓙꓵꓽ ꓪ ꓙꓳ ꓠ ꓔ ꓥ= ꓚꓲꓸ ꓛꓬ ꓡꓲꓽ ꓒꓰꓼ ꓔꓯ ꓗꓽ ꓕꓸ ꓠꓹ ꓟ꓾ ꓡꓳꓸ ꓙ ꓟꓳ ꓙ ꓠꓹ ꓟ꓾ ꓛꓵꓹ ꓔꓴ ꓠꓹ ꓟ꓾ ꓕꓱ ꓟ ꓔꓯ ꓪꓴꓽ ꓡ ꓟꓴ ꓡ ꓠꓹ ꓟ꓾ ꓕꓱ ꓡꓱ ꓫꓵꓽ ꓙꓳ ꓠ ꓔ ꓟ ꓡꓰꓽ ꓟꓽ ꓞꓲꓺ ꓦꓻ ꓕꓲ ꓒꓳꓹ꓾ ꓙꓵꓻ ꓠꓲꓹ ꓕꓲ ꓛꓱꓽ ꓗꓪ ꓥˍ ꓟꓲ ꓒꓴ ꓒꓴ ꓡꓯꓽ ꓡꓯꓽ ꓬꓰ ꓠꓹ ꓟ ꓪꓽ ꓙꓵꓽ ꓪ ꓙꓳ ꓠ ꓔ ꓥ” ꓐꓰ ꓕꓱ ꓡꓱ ꓟꓸ ꓖꓶ ꓡˍ ꓡꓳ=

ꓖꓳ ꓟ ꓠꓬ ꓞꓳ ꓫꓵꓽ ꓕꓲ ꓫꓵꓽ ꓡꓰ ꓕꓲ ꓫꓵꓽ ꓠꓬꓲꓽ ꓗꓴꓸ ꓚꓸꓼ ꓗꓪ ꓫꓵꓽ ꓪꓴ ꓓꓳ ꓡ ꓢꓲ ꓢꓰꓼ ꓡꓯ ꓘꓳ꓾ ꓓꓶꓽ ꓡꓯ ꓘꓳˍ ꓟ ꓒꓬꓱꓼ ꓡ ꓝꓲˍ ꓟ ꓗꓴꓷꓼ ꓠꓯꓸꓼ ꓗꓪ ꓢꓲ ꓡꓲ ꓟ ꓙꓳ ꓡ ꓠꓹ ꓟ ꓐꓱ ꓶ ꓟꓽ ꓙꓳ ꓟꓽ ꓓ ꓟ ꓬꓳꓸ ꓚꓵˍ ꓟ ꓕꓲ ꓟ ꓥ ꓪ꓾ ꓐꓰ ꓕꓱ ꓡꓱ ꓐꓯˍ ꓡꓳ=