ꓪꓴ‐ꓢ ꓐꓰ ꓪ ꓡꓯꓽ ꓘꓳ ꓟ (Sunday reflection)

ꓪꓴ‐ꓢ ꓐꓰ ꓪ ꓡꓯꓽ ꓘꓳ ꓟ

ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴ‐ꓳ ꓣꓳꓽ ꓠꓬ ꓪꓴ‐ꓢ ꓔꓯ ꓫꓱ. ꓟ ꓠꓬ ꓫꓱ. ꓤ ꓗꓴ. ꓟ ꓾ ꓠꓲ, ꓠꓵ ꓗꓴ. ꓟ ꓥꓳ꓿

ꓮ ꓡꓲꓳ ꓐꓯ ꓠꓬ ꓪꓴ‐ꓢ ꓠꓬ ꓠꓵ ꓠꓲ, ꓥ ꓡꓳ꓿

ꓖꓳ ꓡꓱ ꓠꓬꓲ ꓣꓳꓽˍ ꓟꓲ ꓪꓴ‐ꓢ ꓔꓯ ꓫꓱ. ꓟ ꓠꓬ ꓠꓲ, ꓠꓵ ꓗꓴ.ˍ ꓟ  ꓠꓲ, ꓟ ꓙꓳ ꓟ ꓑꓶ. ꓓꓴ ꓥꓳ꓿

ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓥ ꓟ ꓬꓳ‐ꓦ 9ꓽ1‐41 ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓦꓵꓻ ꓕꓯ ꓡꓰ ꓟꓬꓺ ꓢꓲꓽ ꓠꓬꓲ ꓟꓽ ꓟꓳ ꓫꓵꓽ ꓡ ꓞꓳ ꓕꓲꓽ ꓣꓳ ꓔꓯ ꓟꓬꓺ ꓢꓲ  ꓟꓳ ꓡ ꓠꓯ, ꓟ ꓫꓬ, ꓖꓶꓽ ꓟ ꓟ. ꓟꓲ ꓣꓳꓽ ꓑ ꓙˍ ꓡꓳ꓿

ꓢꓲ ꓒ ꓬꓰ‐ꓢꓴ ꓠꓬ ꓠꓵ ꓠꓲ, ꓥ ꓟ ꓑꓶ. ꓓꓴ ꓬꓲ. ꓮ ꓡꓰ ꓗꓪ ꓙꓰˍ ꓟꓲ ꓠꓵ, ꓠꓲ, ꓥꓳꓽ ꓫ ꓕꓱˍ ꓡꓳ꓿ ꓮ ꓫꓵꓽ ꓬꓰˍ ꓟꓲ ꓠꓵ, ꓠꓲ ꓟꓬꓱꓽ ꓬꓰ ꓡꓳ꓿ ꓬꓲ. ꓠꓬ ꓮ ꓘꓶ. ꓫꓱ. ꓤ ꓗꓴ. ꓡꓳ꓿ ꓬꓲ. ꓟꓲꓽ ꓙꓬ ꓗꓪ ꓟꓳˍ ꓟ ꓠꓻ ꓫꓵꓽ ꓠꓻ ꓙꓰ ꓔꓯ ꓫꓬ, ꓖꓶꓽ ꓡꓳ꓿ ꓟ. ꓖꓶꓽ ꓑꓱ ꓖꓶꓽ ꓡꓳ꓿ ꓕꓲꓽ ꓣꓳˍ ꓟꓲ ꓟꓽ ꓡꓳ ꓒꓰ, ꓗꓷ꓿

ꓖꓳ ꓡꓱ ꓥˍ ꓟꓲ ꓙꓵ ꓗ ꓟ. ꓒ ꓐꓴ꓾ ꓒ‐ꓡꓰ‐ꓢꓷ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓙꓲˍ ꓟ ꓟꓽ ꓟꓳ꓿ ꓮ ꓕꓯˍ ꓟꓲ ꓝꓴꓲ. ꓧꓪ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓫꓱ. ꓤ ꓓꓴ ꓟꓬꓱꓽ ꓬꓰ ꓥˍ ꓟꓲ ꓬꓲ. ꓪ ꓠꓬ ꓟꓽ ꓟꓳ꓿

ꓣꓳꓽ ꓥˍ ꓟꓲ ꓫꓱ. ꓤ ꓠꓲ, ꓟ ꓟꓽ ꓙꓳ ꓕꓯ꓾ ꓠꓵ, ꓠꓲ ꓟꓽ ꓙꓳ ꓕꓯ꓾ ꓙꓲˍ ꓟ ꓟꓳ ꓟꓽ ꓘꓴ ꓕꓯ ꓣꓳꓽ ꓠꓬ ꓪꓴ‐ꓢ ꓔꓯ ꓟꓽ ꓫꓱ. ꓙꓰ‐ꓳ꓿ ꓪꓴ‐ꓢ ꓤ ꓫꓵ. ꓤ ꓠꓱ ꓐꓰ ꓣꓳꓽ ꓐꓯ ꓟꓽ ꓙꓲ‐ꓳ꓿

ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴ‐0 ꓟꓲꓺ ꓠꓯ ꓕꓱ ꓟ ꓗꓪ ꓠꓱ. ꓐꓯ ꓮ ꓫꓵꓽ ꓙꓱꓽ ꓤˍ ꓟꓲ ꓬꓰ ꓟꓽ ꓗꓴ. ꓟ ꓠꓱ. ꓐꓯ ꓢꓴ ꓔꓯ ꓫꓱ. ꓤ ꓟ ꓣꓳꓽ ꓢꓯꓼ ꓕꓵꓼ ꓙꓰ ꓡꓯ꓿ ꓕꓱ ꓟ ꓠꓬ ꓣꓳꓽ ꓔꓯ ꓪꓴ‐ꓢ ꓔꓯ ꓫꓱ. ꓡꓰ ꓝꓲˍ ꓟ ꓥꓳ꓿

ꓠꓵ ꓠꓲ, ꓟꓬꓱꓽ ꓣꓳꓽ ꓢꓯꓼ ꓕꓵꓼ ꓙꓰ ꓡꓯ꓿ ꓫ ꓟꓳ