ꓥ ꓜꓲ ꓙꓲꓻ ꓖꓴ ꓙꓳˍ ꓟ ꓚꓱ,

ꓥ ꓜꓲ ꓙꓲꓻ ꓖꓴ ꓙꓳˍ ꓐꓯ ꓗꓷ ꓕꓯ ꓠꓬ ꓟꓬꓽ ꓠꓬꓲ ꓠꓽ ꓮ ꓡꓰ ꓟ ꓔꓯ ꓟꓳˍ ꓡ? ꓥ ꓜꓲ ꓐꓯ ꓗꓷ ꓕꓯ ꓠꓽ ꓟꓬ-ꓟ ꓜꓽ ꓫꓵꓽ ꓥ ꓟ ꓟꓳꓠꓧꓲꓠꓗꓧꓮ ꓔꓯ ꓞꓼ ꓐꓰ ꓓꓵꓽ ꓙ ꓟꓶ ꓡˍ ꓟꓽ ꓥ ꓡ?

ꓣꓳ ꓟꓽ ꓢꓷꓸ ꓔ ꓟ ꓠꓬ ꓥ ꓜꓲ ꓗꓪ ꓣꓳ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓮ ꓟꓬꓹ ꓙꓳˍ ꓡꓳ꓾ ꓐꓯ ꓟ ꓥ ꓡꓳ=

ꓥ ꓜꓲ ꓗꓪ ꓥ ꓟ ꓢꓶꓽ ꓡꓰ ꓐꓰ ꓑꓳꓔꓮꓢꓢꓲꓴꓟ ꓐꓰ ꓦꓲꓔꓮꓟꓲꓠ ꓐ6 ꓢꓯꓼ ꓮ ꓟꓬꓹ ꓙꓳˍ ꓟ ꓥ ꓢꓲ ꓝꓲꓐꓰꓣ ꓢꓯꓼ ꓥˍ ꓟꓲ ꓮ ꓟꓬꓹ ꓙꓳˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓖꓴ ꓙꓳ ꓡ ꓝꓲˍ ꓟ ꓜꓽ ꓓꓴ ꓘꓴꓽ ꓗꓪ ꓕꓲ ꓟ ꓥ ꓡꓳ꓾ ꓐꓰ ꓐꓯ ꓓꓹ ꓡꓳ=

ꓥ ꓟ ꓢꓶꓽ ꓜꓽ ꓗꓷˍ ꓕꓯ ꓧꓪꓽ ꓖꓳ ꓓꓱꓽ ꓐꓱ ꓶ ꓙꓲꓻ ꓓꓴ ꓮ ꓟꓬꓹ ꓙꓳˍ ꓟ ꓔꓯ ꓮ ꓙꓵꓽ ꓢꓷꓸ ꓔ ꓥˍ ꓟꓲ꓾ ꓥ ꓜꓲ ꓜꓽˍ ꓠꓬ ꓧꓪꓽ ꓖꓳ ꓓꓱꓽ ꓔꓬꓹ ꓢ ꓓꓴ ꓐꓱ ꓶ ꓙꓲꓻ ꓖꓴ ꓙꓳˍ ꓟ ꓔꓯ ꓠꓽ ꓮ ꓟꓬꓹ ꓟꓽ ꓚꓬꓹ ꓪ ꓡꓰ ꓢꓰꓽ= ꓫꓸ ꓢꓴ ꓟꓷꓼ ꓢꓴ ꓐꓴ ꓜꓽ ꓓꓴ ꓠꓬ ꓥ ꓜꓲ ꓥ ꓡꓳ ꓐꓰ ꓡꓰꓽ ꓓꓵꓽ ꓙ ꓢꓲ ꓟꓳꓠꓧꓲꓠꓗꓧꓮ ꓗꓪ ꓧꓳꓽ ꓜꓽˍ ꓟ ꓗꓪ ꓛꓲˍ ꓡꓰꓽ ꓢꓷꓸ ꓔ ꓟ ꓥ ꓡꓳ=

ꓮ ꓟꓶ ꓗꓪ ꓠꓬ ꓥ ꓜꓲ ꓔꓯ ꓓꓮꓲꓠ-ꓚꓧꓲꓠ ꓐꓰ ꓑꓯꓸ ꓜꓽ ꓫꓳꓽ ꓜꓽˍ ꓟ ꓡꓰꓽ ꓟꓽ ꓞꓲꓺ꓾ ꓥ ꓜꓲ ꓒꓬꓮꓪ-ꓬꓰ ꓓꓳꓻˍ ꓟˍ ꓟꓲ ꓮ ꓘꓶꓸ ꓬꓰ ꓔꓴ ꓡ ꓔꓬ ꓟ ꓥ ꓢꓲ ꓠꓬꓲ꓾ ꓲꓠꓔꓰꓣꓠꓰꓔ ꓗꓪˍ ꓟꓲ ꓮ ꓟꓬꓹ ꓐꓯ ꓔꓬ ꓖꓴˍ ꓟ ꓥ ꓡꓳ=

ꓖꓳ ꓡꓱ ꓠꓬ ꓥ ꓜꓲ ꓠꓬ ꓮ ꓡꓰ ꓫꓵꓽ ꓙꓲꓻ ꓖꓴ ꓖꓶˍ ꓐꓯ ꓟ ꓔꓯ ꓐꓯ ꓟꓸ ꓖꓶ ꓩꓴ ꓡˍ ꓥꓳ=

(1)  ꓥ ꓜꓲ ꓒꓬꓮꓪ-ꓬꓰ ꓔꓯ ꓕꓲꓽ ꓠꓽ ꓘꓴꓽ ꓗꓪ ꓕꓲ ꓧꓪꓹ ꓓꓳꓻ ꓖꓶˍ ꓕꓯ ꓪꓴꓽ ꓓꓲꓻ ꓗꓪ ꓡꓳ ꓓꓰ ꓟꓽ ꓒꓬꓱꓼ ꓡ ꓝꓲ ꓐꓰ ꓐꓯ ꓔ ꓡꓳ= ꓥ ꓜꓲ ꓠꓬ ꓤꓲꓽ (ꓙꓲꓽ ꓫꓵꓹ) ꓐꓰ ꓗꓴꓸ ꓙꓲꓽ ꓙꓳˍ ꓟ ꓠꓻ ꓐꓴ ꓔꓯ ꓗꓽ ꓕ ꓐ ꓡˍ ꓟ ꓢꓯꓼ ꓙꓳˍ ꓟ ꓥ ꓢꓲ꓾ ꓪꓴꓽ ꓓꓲꓻ ꓐꓰ ꓤꓲꓽ (ꓙꓲꓽ ꓫꓵꓹ) ꓚꓱꓹ ꓗꓪ ꓡꓳ ꓓꓰ ꓙꓳˍ ꓕꓯ ꓡꓳ ꓓꓰ ꓔꓯ ꓣꓳꓺ ꓡꓰ ꓝꓲ ꓢꓲ ꓠꓱ ꓫꓳꓸ ꓟꓸ ꓗꓪ ꓓꓳꓻ ꓙꓰ ꓝꓲˍ ꓡꓳ꓾ ꓐꓰˍ ꓟꓲ ꓢꓷꓸ ꓪ ꓡꓳ= ꓮ ꓟꓶ ꓗꓪ ꓠꓬ ꓬꓲꓸ ꓝꓲ ꓗꓪ ꓡꓳ ꓓꓰ ꓙꓳ ꓡꓰ ꓢꓴ ꓐꓴ ꓔꓯ ꓕꓲ ꓠꓽ ꓗꓪ ꓕꓲ ꓧꓪꓹ ꓥ ꓜꓲ ꓜꓽ ꓝꓲˍ ꓟ ꓔꓯ ꓠꓯꓻ ꓞꓲꓼ ꓟꓸ ꓒ ꓐꓴ ꓡꓰ ꓕꓵꓼ ꓪ ꓖꓶ ꓔꓬ ꓡꓳ꓾ ꓐꓰ ꓐꓯ ꓡꓳ=

(2)  ꓝꓲꓐꓰꓣ ꓢꓯꓼ ꓮ ꓟꓬꓹ ꓐꓲꓻ ꓞꓹ ꓟ ꓥ ꓜꓲ ꓔꓯ ꓕꓲ ꓠꓽ ꓗꓪ ꓕꓲ ꓗꓶꓸ ꓓꓳꓻ ꓖꓶˍ ꓟ ꓗꓪ ꓐꓰ ꓟꓶ ꓤ ꓗꓷ ꓡꓰˍ ꓕꓯ ꓧꓪꓽ ꓖꓳ ꓓꓱꓽ ꓗꓪ ꓬꓲꓸ ꓞꓶꓻ ꓐꓴ ꓙꓲꓺ ꓡꓰ ꓢꓲ ꓦꓯꓸ ꓡꓰ (ꓚꓱ ꓡꓰ) ꓝꓲ ꓐ ꓡˍ ꓡꓳ=

(3)  ꓜꓽ ꓧꓳꓽ ꓔ ꓟ ꓐꓴ ꓔꓯ ꓜꓶ ꓟꓽ ꓐ ꓡ ꓢꓲ ꓬꓲ ꓐꓽ ꓗꓪ ꓓꓳꓻ ꓙꓰ ꓟꓽ ꓐ ꓡ ꓢꓴ ꓐꓴ ꓐꓱ ꓶˍ ꓟꓲ ꓥ ꓜꓲ ꓒꓬꓮꓪ-ꓬꓰ ꓔꓯ ꓓꓳꓻ ꓖꓶˍ ꓠꓬ ꓓꓻ ꓡꓰˍ ꓡꓳ꓾ ꓐꓰ ꓐꓯ ꓔ ꓡꓳ=

(4)  ꓚꓲꓸ ꓛꓬ ꓦꓰꓼ ꓟ ꓘꓴꓽ ꓗꓪ ꓬꓲ ꓚꓱ ꓢꓯꓼ ꓮ ꓟꓬꓹ ꓟꓴˍ ꓕꓯ ꓠꓬ ꓥ ꓜꓲ ꓒꓬꓮꓪ-ꓬꓰ ꓕꓲ ꓗꓶꓸ ꓔꓯ ꓠꓯꓼ ꓠꓯꓼ ꓦꓰꓼ ꓛꓲꓽ ꓗꓪ ꓜꓻ ꓟꓽ ꓓꓵˍ ꓕꓯ ꓓꓳꓻ ꓖꓶ꓾ ꓐꓯ ꓡꓳ=

(5)  ꓥ ꓢꓶꓽ ꓠꓬ ꓬꓲ ꓛꓵꓻ ꓓꓵˍ ꓟ ꓑꓶꓸ ꓓꓴ ꓓꓲꓮꓐꓰꓔꓰꓢ ꓠꓻ ꓙꓳ ꓢꓴ ꓐꓴ ꓠꓬ ꓫꓪꓸ ꓠꓬꓲ ꓢꓲ ꓜꓽ ꓔꓬ ꓪ ꓥˍ ꓟꓲ꓾ ꓥ ꓜꓲ ꓒꓬꓮꓪ-ꓬꓰ ꓔꓯ ꓓꓳꓻ ꓟ ꓗꓪ ꓐꓰ ꓧꓰꓟꓳꓖꓡꓳꓐꓲꓠ ꓐꓰ ꓲꓠꓢꓴꓡꓲꓠ ꓮ ꓟꓬꓹ ꓓꓳꓻ ꓡ ꓝꓲ ꓢꓲ ꓫꓵꓽ ꓘꓴꓽ ꓗꓪ ꓞꓼ ꓛꓵꓻ ꓢꓯꓼ ꓞꓼ ꓞꓼ ꓟꓽ ꓟꓴꓺ ꓓꓯꓻ ꓡ ꓠ ꓗꓽ ꓕꓸ ꓖꓶˍ ꓡꓳ=

ꓓꓲꓮꓐꓰꓔꓰꓢ ꓠꓻ ꓒꓬꓱꓼ ꓔꓬ ꓢꓴ꓾ ꓦꓰꓼ ꓟ ꓗꓪ ꓬꓲꓸ ꓑ ꓒꓬꓱꓼ ꓔꓬ ꓢꓴ ꓐꓴ꓾ ꓦꓰꓼ ꓟ ꓠꓻ ꓢꓴ ꓐꓴ ꓠꓬ ꓥ ꓜꓲ ꓔꓯ ꓠꓯꓻ ꓞꓲꓼ ꓕꓲ ꓫꓵꓽˍ ꓡꓰ ꓓꓳꓻˍ ꓕꓯ ꓠꓬ ꓥ ꓜꓲ ꓬꓲ ꓘꓴꓽ ꓗꓪ ꓟꓽ ꓟꓳꓽ ꓟ꓾ ꓡꓯꓸˍ ꓟ ꓬꓲ ꓗꓳ ꓑꓲꓹ 9 ꓒꓯꓼ ꓔꓯ ꓜꓲ ꓗꓷ ꓢꓲ ꓬꓲꓸ ꓪꓴꓽ ꓬꓲꓻ 25 ꓟꓡ (ꓬꓲꓻ ꓖꓴ 3 ꓬꓲꓻ ꓖꓴ) ꓔꓯ ꓠꓱꓸ ꓐꓯ ꓮ ꓫꓵꓽˍ ꓟꓲ ꓟꓽ ꓗꓷ ꓗꓷ꓾ 20 ꓠꓬꓲ ꓓꓳꓻ ꓖꓶ ꓐ ꓡˍ ꓡꓳ꓾ ꓐꓰ ꓢꓷꓸ ꓪ ꓡꓳ= ꓞꓳ ꓤ ꓕꓲ ꓐꓱ ꓐꓱ ꓶ ꓥ ꓜꓲ ꓪꓴꓽ ꓬꓲꓻ ꓓꓳꓽ ꓫꓸ ꓕꓯ ꓠꓽ ꓞꓼ ꓛꓵꓻ ꓮ ꓔꓲꓸ ꓤ ꓧꓳꓽ ꓗꓷ ꓢꓲ ꓓꓳꓻ ꓐ ꓡˍ ꓡꓳ= ꓓꓲꓮꓐꓰꓔꓰꓢ ꓠꓻ ꓙꓳ ꓢꓴ ꓠꓬ ꓞꓼ ꓛꓵꓻ ꓟꓽ ꓧꓳꓽ ꓧꓳꓽ ꓓꓳꓻ ꓠꓯꓹ ꓟ ꓥ ꓡꓳ=

ꓥ ꓜꓲ ꓔꓯ ꓑꓯꓸ ꓜꓽˍ ꓟ꓾ ꓒꓬꓮꓪ-ꓬꓰ ꓫꓬꓹ ꓢꓲ ꓓꓳꓻˍ ꓟ꓾ ꓚꓬꓸ ꓜꓽˍ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓗꓪ ꓮ ꓡꓰ ꓫꓵꓽ ꓟꓽ ꓙꓲꓻ ꓓꓴ ꓔꓯˍ ꓟꓲ ꓟꓽ ꓒꓬꓱꓼ ꓡ ꓝꓲ ꓟ ꓜꓽ ꓓꓴ ꓥ ꓟ ꓑꓶꓸ ꓓꓴ ꓧꓪꓽ ꓖꓳ ꓓꓱꓽ ꓢꓯꓼ ꓐꓱ ꓶ ꓥˍ ꓟꓲ꓾ ꓧꓪꓽ ꓖꓳ ꓓꓱꓽ ꓔꓬꓹ ꓢꓻ ꓓꓴ ꓐꓱ ꓶ ꓥˍ ꓟꓲ ꓙꓲꓻ ꓖꓴ ꓙꓳ ꓝꓲˍ ꓟ ꓑꓶꓸ ꓓꓴ ꓥ ꓜꓲ ꓔꓯ ꓧꓪꓽ ꓖꓳ ꓓꓱꓽ ꓐꓱ ꓶ ꓣꓱꓽ ꓙꓰ ꓡꓯ ꓐꓰ ꓐꓯ ꓖꓶ ꓠꓲꓹ ꓫꓵˍ ꓡꓳ=