ꓪꓴ-ꓢ ꓫꓱꓸ ꓤ ꓠꓲꓹ ꓕꓲ ꓞꓲꓼ ꓟꓽ ꓡꓳꓹ ꓬꓰ ꓟ

ꓠꓬꓲ. ꓠꓬꓲ ꓦ ꓢꓯꓼ ꓪ ꓣꓴ ꓓꓴ ꓠꓬ ꓮ ꓛꓬꓹ ꓙꓱ 3ꓽ 22‐23 ꓗꓪ ꓛꓲ ꓥꓳ꓾ “ꓮ ꓡꓲꓳ ꓐꓯ ꓠꓬ ꓪꓴ‐ꓢ ꓬꓲ ꓠꓲ, ꓙꓽ ꓟꓬ ꓗꓳˍ ꓟ ꓠꓬ ꓟꓽ ꓖꓴ ꓡꓰ꓿ ꓬꓲ ꓫꓱ. ꓤ ꓠꓲ,ˍ ꓟꓲ ꓟꓽ ꓡꓳ, ꓬꓰ꓿ ꓕꓲ ꓠꓯꓼ ꓡꓰ ꓕꓲ ꓠꓯꓼ ꓬꓲ ꓠꓲ, ꓙꓽ ꓟꓬ ꓗꓳˍ ꓟ ꓠꓬ ꓬꓲ ꓫꓵꓼ ꓥ ꓢꓲ ꓬꓲ ꓑꓶ. ꓟꓽ ꓞꓷꓹ ꓗꓷ꓿ ꓬꓲ ꓦ ꓡꓱ ꓐꓳ ꓠꓲ,ˍ ꓟꓲ ꓬꓲ ꓓꓽ ꓟ ꓥꓳ” ꓐꓰ ꓐꓯ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓦ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓿

ꓪꓴ‐ꓢ ꓬꓲ. ꓫꓱ. ꓤ ꓠꓲ, ꓟ ꓐꓰ ꓬꓲ ꓠꓲ, ꓙꓽ ꓟꓬ ꓗꓳˍ ꓟ ꓠꓬ ꓕꓲꓽ ꓠꓯꓼ ꓡꓰ ꓕꓲꓽ ꓠꓯꓼ ꓬꓲ. ꓫꓵꓼ ꓒꓬꓱꓼ ꓡ ꓡꓳ ꓐꓰ ꓢꓲ ꓫꓬ ꓕꓳ ꓶ ꓗꓪ ꓐꓯ ꓔ ꓡꓳ꓿ ꓠꓬꓲ ꓕꓲꓽ ꓠꓬꓲ ꓖꓴ ꓡꓰ ꓢꓲ ꓝꓮꓲ ꓕꓲꓽ ꓠꓬꓲ ꓛꓲ ꓙꓰ ꓕꓯ ꓟꓲꓽ ꓟꓲ ꓥˍ ꓟꓲ ꓬꓲ. ꓫꓵꓼ ꓓꓳ ꓡ ꓡꓳ꓿ ꓠ ꓠ, ꓗ ꓛꓲꓽˍ ꓟ ꓠꓬ, ꓤ ꓬꓲ. ꓢꓯꓼ ꓥˍ ꓟꓲ ꓝꓮꓲ. ꓕꓲꓽ ꓧꓪ, ꓑ, ꓙꓽˍ ꓡꓳ꓿ ꓟꓲꓺ ꓠꓯꓺ ꓕꓱ ꓟ ꓗꓪ ꓢꓯ. ꓫꓵꓽ ꓢꓯ. ꓙꓰꓽ ꓮ ꓙꓵꓽ ꓧꓪ. ꓛꓲꓽ ꓡ ꓢꓲ ꓟꓴꓽ ꓖꓪ ꓖꓪ ꓔꓬ, ꓡꓳ꓿

ꓕꓱ ꓟ ꓡꓰ ꓐꓰ ꓠꓯꓼ ꓠꓯꓼ ꓟꓲꓽ ꓕꓯꓽ ꓙꓲ ꓡˍ ꓕꓯ ꓪꓴ‐ꓢ ꓫꓱ. ꓤ ꓠꓲ, ꓥˍ ꓟꓲ ꓬꓲ. ꓫꓵꓼ ꓒꓬꓱꓼ ꓡ ꓡꓳ꓿ ꓮ ꓟꓰ ꓕꓯ ꓣꓳꓽ ꓛꓬꓻ ꓗꓷ ꓥꓳꓽ ꓗꓷ ꓟ ꓔꓯ ꓬꓲ. ꓡꓰ ꓖꓼ ꓖꓶꓽ ꓗꓷ ꓢꓲ ꓠꓵ ꓠꓲ, ꓬꓲ. ꓫꓵꓼ ꓐꓰ ꓣꓳꓽ ꓕꓯꓽ ꓢꓲ ꓗꓪ ꓑꓲ. ꓖꓶꓽˍ ꓡꓳ꓿ ꓟꓲꓽ ꓕꓯ ꓙꓲ ꓡˍ ꓕꓯ ꓟꓲꓽ ꓟꓲˍ ꓡꓰ ꓐꓰ ꓣꓳꓽ ꓕꓯꓽ ꓢꓲ ꓗꓪ ꓬꓲ. ꓠꓵꓻ ꓠꓲ, ꓠꓬ ꓬꓲ. ꓫꓵꓼ ꓒꓬꓱꓼ ꓡˍ ꓡꓳ꓿

ꓕꓱ ꓟ ꓠꓬ ꓣꓳꓽ ꓐꓱ ꓶ ꓢꓯꓼ ꓓꓽ ꓟ ꓥꓳ꓿ ꓢꓯꓼ ꓪ ꓣꓴ ꓓꓴ ꓥꓳ꓿ ꓬꓲ. ꓠꓬ ꓣꓳꓽ ꓔꓯ ꓟꓽ ꓐꓯ ꓞꓷ,꓿ ꓣꓳꓽ ꓔꓯ ꓐꓯ ꓟꓴ ꓟꓽ ꓘꓶꓽ꓿ ꓠꓬꓲ. ꓠꓬꓲ ꓥˍ ꓟꓲ ꓠꓴ ꓟꓬꓻ ꓢꓶꓽ ꓒꓴ ꓡ ꓟ ꓣꓱꓽ ꓛꓰꓽ ꓟꓶ ꓡꓰ ꓕꓯ ꓡꓰ ꓢꓲ ꓒ ꓣꓱꓽ ꓛꓰ ꓬꓲ. ꓫꓵꓼ ꓠꓴ ꓑꓯ, ꓟꓶ ꓡꓰꓳ꓿

ꓖꓳ ꓡꓱ ꓠꓬꓲ ꓮ ꓟꓰ ꓫꓵ ꓟꓰ ꓕꓯ ꓠꓲ, ꓫ ꓟꓬ ꓫ ꓓꓴ ꓠꓬꓲ. ꓠꓬꓲ ꓗꓪ ꓕꓽ ꓣꓴ ꓔꓯ, ꓡ꓿ ꓢꓲ ꓫꓬ, ꓕꓳ ꓶ ꓗꓪ ꓣꓳ ꓔꓯ ꓢꓯꓼ ꓖꓶꓽ ꓔ ꓡꓳ꓿ ꓪꓴ‐ꓢ ꓬꓲ. ꓠꓲ, ꓙꓽ ꓟꓬ ꓗꓳˍ ꓟ ꓠꓬ ꓕꓲꓽ ꓞꓲꓼ ꓟꓽ ꓡꓳ, ꓬꓰ꓾ ꓐꓰ ꓐꓯ ꓔ ꓡꓳ꓿

ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓐꓱ ꓶ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓿ ꓪꓴ‐ꓢ ꓠꓬ ꓫꓱ. ꓤ ꓠꓲ, ꓐꓲ ꓞꓹ ꓡꓳ꓿ ꓠꓲ, ꓟꓽ ꓕ ꓫꓸ꓾ ꓗ, ꓛꓲꓽ ꓛꓲꓽ ꓡꓰꓽ ꓔꓬ,꓿ ꓣꓳꓽ ꓦꓲꓻ ꓕꓱ ꓟ ꓠꓬ ꓕꓲꓽ ꓞꓲꓼ ꓟꓽ ꓥ꓿ ꓕꓲꓽ ꓑ, ꓤ ꓡꓰ ꓥꓳ꓿

ꓪꓴ‐ꓢ ꓡꓰ ꓣꓳꓽ ꓔꓯ ꓫꓱ. ꓤ ꓢꓲ ꓖꓼ ꓖꓶꓽ ꓔꓬ, ꓡꓳ꓾ ꓠꓲ, ꓠꓵ ꓔꓬ, ꓡꓳ ꓐꓯ ꓟ ꓔꓯ ꓠꓴ ꓙꓵˍ ꓕꓯ ꓮ ꓫꓵꓽ ꓠꓲ, ꓟ ꓫꓸ ꓓꓴ ꓟꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓣꓳꓽ ꓠꓬ ꓕꓲꓽ ꓠꓬꓲ ꓙꓳˍ ꓠꓬ ꓢꓲ ꓒ ꓔꓯ ꓟꓳ ꓪ ꓓꓴ ꓥꓳ꓿ ꓕꓱ ꓟ ꓠꓬ ꓣꓳꓽ ꓟꓲꓺ ꓠꓯꓺ ꓞꓳ ꓤ ꓬꓲ. ꓔꓶꓺ ꓙꓱꓼ ꓥꓳ꓿