(ꓢꓲꓽ ꓫꓬꓹ ꓟ ꓠꓽ ꓡꓲꓸ ꓠꓬꓲ) Maundy Thursday

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸꓼ

ꓠꓬꓲꓸ ꓠꓬꓲ ꓠꓬ ꓢꓲꓽ ꓫꓬ ꓓꓰ ꓡꓰˍ ꓟ ꓠꓽ-ꓡꓲꓸ-ꓠꓬꓲ ꓥ ꓡꓳ= ꓠꓬꓲꓸ ꓠꓬꓲ ꓣꓳ ꓑ ꓙꓽ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓠꓬ ꓢꓲꓺ ꓒ ꓬꓰ-ꓢꓴ ꓠꓬ ꓬꓲꓸ ꓡꓯꓼ ꓐꓳ ꓔꓶꓸ ꓓꓴ ꓟꓽ ꓑꓱꓸ ꓙꓰ ꓧꓶꓸ ꓕꓯ ꓬꓲ ꓝꓲ ꓓꓴ ꓐꓴ ꓔꓯ ꓘꓴ ꓢꓲ ꓟꓶꓽ ꓘꓶꓼ ꓜ ꓜꓽ ꓑꓮꓲꓽ ꓬꓰˍ ꓟ ꓔꓯ ꓣꓳ ꓑ ꓙꓽ ꓪˍ ꓡꓳ= ꓬꓳ-ꓦ 13ꓽ1-15 ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓟꓽ ꓟꓶ ꓫꓵ ꓕꓯ ꓫꓵꓻ ꓠ ꓗˍ ꓟ ꓔꓯ ꓬꓲ ꓢꓷꓸˍ ꓠꓬꓲ ꓟꓶꓽ ꓘꓶꓼ ꓜ ꓜꓽ ꓑꓮꓲꓽ ꓔꓯ ꓫꓬꓹ ꓔꓲꓸ ꓬꓰˍ ꓡꓳ=

ꓖꓳ ꓡꓱ ꓠꓬꓲ ꓬꓲ ꓠꓬ ꓕꓱ ꓟ ꓠꓬ ꓥꓪ ꓫꓵꓽ ꓥꓳ꓾ ꓥꓪ ꓧꓪꓽ ꓥꓳ꓾ ꓐꓯ ꓢꓲ ꓠꓬꓲ ꓬꓲ ꓫꓵꓽ ꓬꓲ ꓧꓪꓽ ꓜꓽ ꓠꓹ ꓟ ꓐꓱ ꓶ ꓫꓬꓹ ꓗꓷ ꓔꓲꓸ ꓬꓰˍ ꓡꓳ= ꓟꓲ ꓠꓯ ꓕꓲ ꓟ ꓡꓱꓸꓼ ꓗꓪ ꓔꓲꓺ ꓒ ꓕꓲ ꓣꓳˍ ꓡꓰꓽ ꓙꓳˍ ꓡꓳ= ꓕꓱ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓥꓳ= ꓖꓳ ꓡꓱ ꓥˍ ꓟꓲ ꓬꓲ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓮꓽ ꓟˍ ꓟꓲ ꓜꓽ ꓪ ꓠꓹ ꓟ ꓐꓱ ꓶ ꓬꓲ ꓔꓲꓺ ꓒ ꓤꓶꓻ ꓔꓯ ꓬꓲ ꓝꓲ ꓓꓴ ꓐꓴ ꓔꓯ ꓖꓶ ꓔꓲꓸ ꓬꓰˍ ꓡꓳ= ꓔꓲꓺ ꓒ ꓐꓯ ꓟ ꓬꓲ ꓤꓶꓻ ꓔꓯ ꓝꓲ ꓓꓴ ꓐꓴ ꓔꓯ ꓖꓶ ꓔꓲꓸ ꓬꓰˍ ꓡꓳ=

ꓖꓳ ꓡꓱ ꓠꓬꓲ ꓬꓲ ꓝꓲ ꓓꓴ ꓐꓴ ꓗꓪ ꓐꓰ ꓔꓲꓺ ꓒ ꓙꓳ ꓡˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓠꓬꓲꓸ ꓠꓬꓲ ꓠꓬ ꓣꓳ ꓔꓲꓺ ꓒ ꓐꓴ ꓐꓱ ꓶ ꓪꓽ ꓘꓴ ꓙ ꓖꓶ ꓠꓹ ꓟ ꓬꓲ ꓙꓵꓹ ꓟꓲ ꓥ ꓡꓳ= ꓔꓲꓺ ꓒ ꓐꓰ ꓢꓲꓽ ꓫꓬ ꓖꓳ ꓓꓱꓽ꓾ ꓕꓱ ꓠꓬꓲꓽ ꓚꓱꓹ ꓗꓪ ꓕꓲ ꓚꓱꓹ ꓟꓽ ꓙꓳ ꓠꓬ ꓝꓮꓲ ꓕꓲ ꓚꓱꓹˍ ꓟꓲ ꓟꓽ ꓒꓬꓱꓼ ꓡ= ꓢꓲꓽ ꓫꓬ ꓖꓳ ꓓꓱꓽ ꓟꓽ ꓙꓳ ꓠꓬ ꓔꓲꓺ ꓒ ꓟꓽ ꓙꓳ= ꓔꓲꓺ ꓒ ꓟꓽ ꓙꓳ ꓕꓯ ꓠꓽ ꓢꓲꓽ ꓫꓬ ꓖꓳ ꓓꓱꓽˍ ꓟꓲ ꓟꓽ ꓙꓳ=

ꓖꓳ ꓡꓱ ꓠꓬꓲ ꓬꓲ ꓠꓬ ꓟꓶꓽ ꓘꓶꓼ ꓜ ꓜꓽ ꓑꓮꓲꓽ ꓬꓰˍ ꓕꓯ ꓬꓲ ꓝꓲ ꓓꓴ ꓐꓴ ꓛꓲ ꓒꓯꓹ ꓔꓯ ꓞꓲꓽ ꓖꓶˍ ꓟ ꓔꓯˍ ꓟꓲ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓑ ꓙꓽ ꓪˍ ꓡꓳ= ꓕꓱ ꓟ ꓮ ꓫꓵꓽ ꓔꓯ ꓐꓯˍ ꓡ? ꓬꓲ ꓠꓬ ꓔꓲꓺ ꓒ ꓕꓲ ꓣꓳ ꓥˍ ꓟꓲ꓾ ꓪꓴ-ꓢ ꓕꓲ ꓣꓳ ꓥ ꓐꓯ ꓥˍ ꓟꓲ ꓟꓲ ꓠꓯ ꓞꓳ ꓤ ꓥ ꓟ ꓬꓲ ꓝꓲ ꓓꓴ ꓛꓲ ꓒꓯꓹ ꓔꓯ ꓞꓲꓽ ꓖꓶˍ ꓐꓯ ꓟ ꓠꓬ ꓞꓳ ꓤ ꓐꓰ ꓗꓴꓸ ꓙꓲꓽ ꓙꓳ ꓠꓲꓹ ꓫꓵˍ ꓟ ꓞꓳ ꓤ ꓐꓴ ꓐꓱ ꓙ ꓡꓯ ꓘꓳ ꓠꓲꓹ ꓫꓵˍ ꓟ꓾ ꓕꓲ ꓚꓱꓹ ꓐꓯ ꓪˍ ꓠꓬ꓾ ꓬꓲ ꓠꓬ ꓟꓲ ꓠꓯ ꓞꓳ ꓤ ꓔꓯ ꓬꓰ ꓙˍ ꓟ꓾ ꓣꓱꓽ ꓙˍ ꓟ ꓥ ꓡꓳ=

ꓪꓴ-ꓢ ꓡꓰ ꓣꓳ ꓔꓯ ꓧꓶꓸ ꓕꓯ ꓣꓱꓽ ꓙ ꓡˍ ꓟ ꓥ ꓡꓳ= ꓣꓳ ꓧꓶꓸ ꓕꓯ ꓪꓴ-ꓢ ꓔꓯ ꓧꓪꓸˍ ꓟ ꓪꓴ-ꓢ ꓔꓯ ꓣꓱꓽ ꓙˍ ꓟ ꓟꓽ ꓥ= ꓪꓴ-ꓢ ꓡꓰ ꓧꓶꓸ ꓕꓯ ꓣꓳꓽ ꓔꓯ ꓣꓱꓽ ꓙ ꓡ ꓟ ꓥ ꓡꓳ= ꓬꓲ ꓫꓵꓽ ꓬꓲ ꓧꓪꓽ ꓖꓶꓽ ꓜꓽ ꓢꓲ ꓠꓬꓲ ꓬꓲ ꓠꓬ ꓣꓳ ꓐꓰ ꓗꓴꓸ ꓙꓲꓽ ꓙꓳ ꓠꓹ ꓟ ꓐꓱ ꓶ ꓣꓳ ꓛꓲ ꓒꓯꓹ ꓗꓪ ꓞꓲꓽ ꓖꓶˍ ꓟ ꓥ ꓡꓳ= ꓕꓲ ꓚꓱꓹ ꓐꓯˍ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓛꓳ ꓫꓱꓽ ꓔꓬ ꓟ ꓗꓪ ꓬꓲ ꓠꓬ ꓣꓳ ꓐꓰ ꓕꓲ ꓪꓽ ꓞꓳ ꓙꓳ ꓠꓹ ꓟ ꓐꓱ ꓶ ꓬꓲ ꓡꓰ ꓕꓱ ꓟ ꓔꓯ ꓬꓰˍ ꓟ ꓥ ꓡꓳ=

ꓖꓳ ꓡꓱ ꓠꓬꓲ ꓣꓳ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓜꓽ ꓠꓹ ꓟ ꓬꓳꓸ ꓚꓵˍ ꓡꓳ= ꓬꓳ-ꓦ 6ꓽ66 ꓗꓪ ꓢꓲꓺ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓘꓳꓹ ꓣꓴ ꓟꓽ ꓐ ꓡ ꓟ ꓑꓶꓸ ꓓꓴ ꓬꓲ ꓛꓳ ꓒꓯꓹ ꓮ ꓟꓬꓹ ꓣꓳ ꓠꓬ ꓒꓳꓹ ꓙꓰ ꓢꓲ꓾ ꓢꓲꓺ ꓒ ꓬꓰ-ꓢꓴ ꓔꓯ ꓝꓮꓲ ꓟꓽ ꓛꓳ ꓟ ꓔꓯ ꓡꓳꓸ ꓟꓳ ꓪ ꓓꓹ ꓡꓳ=

ꓣꓳ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓢꓲꓽ ꓫꓬ ꓖꓳ ꓓꓱꓽ ꓕꓯꓽ ꓢꓲ ꓪꓴꓽˍ ꓟ ꓟꓽ ꓙꓳ= ꓖꓳ ꓡꓱ ꓠꓬꓲ ꓢꓲꓽ ꓫꓬ ꓖꓳ ꓓꓱꓽ ꓕꓱ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓥ ꓡꓳ꓾ ꓢꓲꓺ ꓒ ꓬꓰ-ꓢꓴ ꓠꓬ ꓕꓱ ꓗꓪ ꓔꓬ ꓡꓳ ꓐꓯˍ ꓟ ꓔꓯ ꓙꓵꓻ ꓢꓲ ꓠꓬꓲ ꓔꓲꓺ ꓒ ꓐꓴ ꓡꓰ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓟꓲ-ꓢ ꓔꓲꓺ ꓖꓶ ꓔꓬ ꓡꓳ=

ꓠꓬꓲꓸ ꓠꓬꓲ ꓣꓳ ꓔꓲꓺ ꓒ ꓐꓴ ꓐꓱ ꓶ ꓪꓽ ꓘꓴ ꓙˍ ꓟ ꓡꓰ ꓐꓰ ꓣꓳ ꓥˍ ꓟꓲ ꓢꓲꓽ ꓫꓬ ꓖꓳ ꓓꓱꓽ ꓕꓱ ꓟ ꓔꓯ ꓒꓵꓽ ꓒꓵꓽ ꓡꓰꓽ ꓘꓳꓹ ꓣꓴ ꓠꓹ ꓟ ꓐꓱ ꓶ ꓢꓲꓽ ꓫꓬ ꓟ ꓠꓽ-ꓡꓲꓸ-ꓠꓬꓲ ꓾ ꓧꓪꓽ ꓒꓴ ꓫꓵꓽ ꓥꓳꓽ ꓗꓪ ꓐꓰ Maundy Thursday ꓕꓱ ꓕꓲ ꓠꓬꓲ ꓔꓯ ꓠꓬ ꓔꓲꓺ ꓒ ꓐꓴ ꓐꓱ ꓶ꓾ ꓝꓮꓲ ꓢꓲꓺ ꓒ ꓬꓰ-ꓢꓴ ꓫꓬꓹ ꓔꓲꓸ ꓬꓰ ꓟ ꓢꓲꓽ ꓫꓬ ꓖꓳ ꓓꓱꓽ ꓔꓯ ꓮ ꓘꓶꓸ ꓓꓵꓽ ꓙ ꓠꓬꓲ ꓠꓹ ꓟ ꓠꓬꓲ ꓕꓲ ꓠꓬꓲ ꓥ ꓡꓳ=

1 ꓘꓳ-ꓡꓱ-ꓕꓴ 11ꓽ23-26 ꓗꓪ ꓢꓲꓺ ꓒ ꓬꓰ-ꓢꓴ ꓠꓬ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓖꓶꓽ ꓜꓽˍ ꓟ ꓠꓬ ꓬꓲ ꓔꓯ ꓚꓲꓸ ꓟꓶ ꓓꓴ ꓡꓰꓽ ꓟꓽ ꓥ꓾ ꓕꓱ ꓟ ꓠꓬ ꓥꓪ ꓫꓵꓽ ꓥꓳ ꓥꓪ ꓧꓪꓽ ꓥꓳ ꓐꓯ ꓢꓲ ꓖꓶꓽ ꓜꓽ ꓡ ꓟ ꓑꓶꓸ ꓓꓴ ꓾ ꓠꓬꓲꓸ ꓠꓬꓲ ꓗꓪ ꓣꓳ ꓟꓲ-ꓢ ꓬꓰ ꓔꓬ ꓟ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓥꓳ ꓐꓯ ꓟ ꓔꓯ ꓚꓵ ꓚꓵ ꓙꓵꓻ ꓢꓲ ꓠꓬꓲ ꓜꓽ ꓠꓹ ꓟ ꓣꓳ ꓢꓯꓼ ꓕꓵꓼ ꓠꓹ ꓟ ꓬꓳꓸ ꓚꓵˍ ꓡꓳ=

ꓢꓲꓺ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓟꓽ ꓒꓵꓽ ꓒꓵꓽ ꓜꓽˍ ꓕꓯ ꓠꓬ꓾ ꓢꓲꓺ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓔꓯ ꓟꓽ ꓙꓵꓻ ꓙꓵꓻ ꓜꓽˍ ꓕꓯ ꓢꓲꓺ ꓒ ꓬꓰ-ꓢꓴ ꓬꓲ ꓧꓪꓽ ꓖꓳ ꓓꓱꓽ ꓔꓯ ꓘꓳꓹ ꓣꓴ ꓔꓬ ꓥˍ ꓟꓲ ꓣꓳ ꓠꓯꓸꓼ ꓗꓪ ꓠꓲꓽ ꓢ-ꓓꓯ ꓓꓵꓽ ꓡꓰˍ ꓡꓳ꓾ ꓐꓰ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓬꓴ-ꓓ ꓲ-ꓢ-ꓗ-ꓣꓲ-ꓳ ꓔꓯ ꓣꓳ ꓟꓳꓻ ꓪˍ ꓡꓳ= ꓬꓲ ꓠꓬ ꓢꓲꓺ ꓒ ꓬꓰ-ꓢꓴ ꓬꓲ ꓫꓵꓽ ꓬꓲ ꓧꓪꓽ ꓜꓽ ꓗꓷ ꓗ ꓠꓯꓸ ꓠꓲꓽ ꓓꓵꓽ ꓡꓰꓳ꓾ ꓐꓰ ꓣꓳ ꓑ ꓙꓽˍ ꓡꓳ=

ꓖꓳ ꓡꓱ ꓠꓬꓲ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓘꓳ ꓣꓴ ꓔꓬ ꓟ ꓢꓲꓽ ꓫꓬ ꓖꓳ ꓓꓱꓽ ꓔꓯ ꓒꓵꓽ ꓒꓵꓽ ꓡꓰꓽ ꓘꓳ ꓣꓴ ꓐ ꓡ ꓠꓹ ꓟ꓾ ꓙꓵꓻ ꓠꓲꓹ ꓗꓪ ꓐꓰ ꓘꓳ ꓣꓴ ꓐ ꓡ ꓠꓹ ꓟ ꓠꓬꓲꓸ ꓠꓬꓲ ꓠꓽ ꓡꓲꓸ ꓠꓬꓲ ꓗꓪ ꓐꓰ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓡꓳ= ꓔꓲꓺ ꓒ ꓮ ꓙꓵꓽ ꓐꓱ ꓶ ꓪꓽ ꓘꓴ ꓖꓶˍ ꓟ ꓡꓰ ꓐꓰ ꓢꓲꓺ ꓒ ꓬꓰ-ꓢꓴ ꓠꓬ ꓣꓳ ꓤꓶꓻ ꓗꓪ ꓢꓲꓽ ꓫꓬ ꓖꓳ ꓓꓱꓽ ꓗꓪ ꓐꓰ ꓓꓵꓽ ꓡˍ ꓡꓳ꓾ ꓐꓯ ꓟ ꓔꓯ ꓙꓵꓻ ꓢꓲ ꓠꓬꓲ ꓪ ꓜꓲ ꓢꓲꓽ ꓫꓬꓹ ꓟ ꓠꓲꓹ ꓟ ꓡꓰ ꓑ-ꓢ-ꓗ ꓑꓮꓲꓽ ꓔꓯ ꓘꓳꓹ ꓣꓴ ꓟꓶ ꓠꓹ ꓟ ꓢꓯꓼ ꓕꓵꓼ ꓙꓰ ꓡꓯ=