ꓢꓯ. ꓬꓲꓼ ꓡ ꓑꓮꓲꓽ (Easter Sunday reflection)

ꓢꓯ. ꓬꓲꓼ ꓡ ꓑꓮꓲꓽ

ꓮ ꓙꓵꓽ ꓢꓴ ꓧꓪ. ꓧꓪ ꓠꓬꓲ. ꓠꓬꓲ ꓠꓬ ꓢꓯ. ꓬꓲꓼ ꓡ  ꓑꓮꓲꓽ ꓛꓲ ꓡꓳ ꓪ꓿ ꓮ ꓘꓶ. ꓗ, ꓛꓲ ꓟ  ꓢꓯ. ꓬꓲꓼ ꓡ ꓑꓮꓲ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓟ ꓔꓯ ꓧꓪ. ꓡꓰꓳ꓿ ꓫꓵꓽ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓧꓪ. ꓡꓰꓳ ꓟꓲ ꓠꓯ ꓕꓱ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓧꓪ. ꓡꓰ ꓟꓽ ꓘꓴ꓿ ꓟꓲ ꓠꓯ ꓔꓯ ꓧꓪ. ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓪꓴ. ꓓꓵ. ꓓꓴ ꓔꓬ ꓥꓳꓽ ꓬꓲ. ꓠꓬ ꓣꓳ ꓢꓲꓺ ꓒ ꓥ ꓡꓳ꓿

ꓟꓵꓽ ꓚꓰꓼ ꓟꓲꓽ ꓚꓰꓼ ꓕꓯ ꓡꓰ ꓮ ꓠꓱ ꓕꓯ ꓡꓰ ꓫꓵꓻ ꓗꓪ ꓐꓰ ꓢꓯ. ꓬꓲꓼ ꓡ ꓟ ꓟꓽ ꓙꓳ꓿ ꓖꓳ ꓡꓱ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓬ ꓢꓯ. ꓬꓲꓼ ꓡꓳ꓿ ꓖꓳ ꓟ ꓠꓬ ꓣꓳ ꓐꓱ ꓶ ꓢꓯꓼ ꓪ ꓟꓶ ꓓꓴ ꓥꓳꓽ ꓢꓯꓼ ꓪ ꓙꓳˍ ꓓꓴ ꓥꓳ꓿ ꓝꓲ ꓓꓴ ꓒꓳ‐ꓡꓳ ꓡꓰ ꓣꓳ ꓪꓴ. ꓓꓵ. ꓓꓵ ꓔꓬ ꓟ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓗꓪ ꓐꓰ ꓟꓽ ꓢꓯ. ꓬꓲꓼ ꓡ ꓥꓳꓽ ꓐꓯ ꓣꓳ ꓙꓵꓻ ꓟ ꓠꓬ ꓬꓲ. ꓖꓳ ꓥ ꓡꓳ ꓐꓰ ꓐꓯ ꓔ ꓡꓳ꓿ ꓣꓳ ꓞꓳ ꓙꓳ ꓟ ꓣꓳ ꓟ. ꓟ ꓚꓺ ꓟ ꓮ ꓙꓵꓽ ꓠꓬ ꓬꓲ. ꓖꓳ ꓡꓰ ꓥꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓟ ꓗꓪ ꓐꓰ ꓢꓯ. ꓬꓯꓼ ꓡ ꓟ ꓮ ꓙꓵꓽ ꓠꓬ ꓬꓲ. ꓔꓶꓻ ꓙꓱꓽ ꓙꓳ ꓡꓳ ꓐꓰ ꓐꓯ ꓔ ꓡꓳ꓿

ꓝꓲ ꓓꓴ ꓒꓳ‐ꓡꓳ ꓠꓬ ꓢꓲꓺ ꓒ ꓬꓰ‐ꓢꓴ ꓐꓱ ꓶ ꓢꓯꓼ ꓟꓬꓽ ꓔꓯ ꓖꓶ ꓗꓷ ꓧꓪ ꓛꓲ ꓞꓳ ꓙꓳˍ ꓢꓯ. ꓔꓬ ꓗꓷ ꓟ ꓥ ꓡꓳ꓿ ꓝꓮꓲ ꓝꓲ ꓓꓴ ꓒꓳ‐ꓡꓳ ꓡꓰ ꓮ ꓡꓰ ꓐꓯ ꓔ ꓥ ꓐꓯ ꓠꓬ ꓣꓳ ꓢꓲꓺ ꓒ ꓬꓰ‐ꓢꓴ ꓔꓯ ꓟꓲ ꓠꓯ ꓗꓪ ꓧꓪ ꓜꓽ ꓧꓪ ꓓꓳꓽ ꓟꓶ ꓠ, ꓟ ꓜꓽ ꓟꓬ, ꓔꓬ ꓢ ꓠ, ꓟ ꓞꓳ ꓐꓳ ꓒꓬꓱꓼ ꓡ ꓠ, ꓟ ꓐꓱ ꓶ ꓡꓰ ꓦꓻ ꓡꓰ ꓥꓳꓽ ꓐꓯ ꓠꓬ ꓟꓲ ꓠꓯ ꓗꓪ ꓣꓳ ꓮ ꓘꓶ. ꓛꓲ ꓫꓱ ꓤ ꓢꓴ ꓡ ꓞꓳ ꓠꓬ ꓠꓱ ꓐꓯ ꓟꓽ ꓙꓳ꓿ ꓣꓳ ꓡꓱ ꓠꓬ ꓬꓲ ꓤ ꓠꓬꓲ ꓤ ꓐꓴ ꓣꓳ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓟ ꓗꓪ ꓐꓰ ꓢꓯ. ꓬꓯꓼ ꓡꓳ꓿ ꓧ‐ꓡꓯ‐ꓡꓴ‐ꓬ ꓐꓰ ꓟꓴ ꓖꓪꓽ ꓖꓪ ꓡꓰ ꓐꓰ ꓢꓲꓺ ꓒ ꓬꓰ‐ꓢꓴ ꓣꓳ ꓠꓲ, ꓟ ꓠꓯ, ꓗꓪ ꓚꓵ. ꓚꓵ. ꓓꓴ ꓙ ꓠ, ꓟ ꓣꓳꓺ ꓚꓲ ꓡꓳ꓿

ꓣꓳ ꓠꓲ, ꓟ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓲꓼ ꓡꓳ ꓐꓰ ꓣꓳ ꓙꓵꓻ ꓥꓳ ꓐꓯ ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓐꓰ ꓞꓳ ꓙꓳ ꓥꓳꓽ ꓢꓲꓺ ꓒ ꓬꓰ‐ꓢꓴ ꓡꓰ ꓐꓰ ꓫ. ꓕꓱ ꓥꓳ ꓣꓳ ꓟꓬꓱꓽ ꓬꓰ ꓥꓳ꓿ ꓮ ꓡꓱ ꓐꓯ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓕꓲ ꓞꓲꓼ ꓟꓽ ꓫꓵꓻ ꓥꓪ ꓠꓲ, ꓟ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓔꓬ ꓡꓳ꓿

ꓬꓲ ꓐꓰ ꓮ ꓡꓰ ꓗꓪ ꓙꓰ ꓥ ꓟꓲ ꓢꓲꓺ ꓒ ꓐꓰ ꓕꓲ ꓪ ꓙꓰ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓚꓵ. ꓚꓵ. ꓢꓯ. ꓬꓯꓼ ꓡꓰ ꓐꓰ ꓙꓵꓻ ꓢꓴ ꓠꓬ ꓠꓲ, ꓫ. ꓟꓬ, ꓫ. ꓔꓳ, ꓜꓳ ꓥ ꓟꓲ ꓬꓲ. ꓠꓬ ꓗ, ꓛꓲ ꓢꓲ ꓠꓬꓲ ꓠꓲ, ꓫ. ꓟꓬ, ꓫ. ꓓꓴ ꓔꓯ ꓬꓲ. ꓧꓪ. ꓡꓰꓳ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓟ ꓧꓪ, ꓡꓰ ꓢꓴ ꓥ ꓢꓲ ꓠꓬꓲ ꓮ ꓫꓵꓽ ꓔꓯ ꓟꓲ ꓧꓪ, ꓡꓰ ꓘꓴꓽ ꓢꓴ ꓥ ꓡꓳ ꓐꓰ ꓬꓲ, ꓙꓵꓻ ꓟ ꓑꓶ. ꓓꓴ ꓥ ꓡꓳ꓿

ꓞꓳ ꓤ ꓕꓲ ꓐꓱ ꓠꓬ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓲꓼ ꓡꓳ ꓐꓯ ꓟ ꓔꓯ ꓪꓴ. ꓠꓶ. ꓗꓪ ꓡꓰ ꓢꓷ. ꓡꓳ꓾ ꓠꓲ, ꓟ ꓗꓪ ꓐꓰ ꓟꓽ ꓙꓵꓻ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓬꓲ. ꓪ ꓠꓲ, ꓟ ꓠꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓯꓼ ꓡ ꓟ ꓟꓽ ꓓꓵꓽ ꓟ ꓑꓶ. ꓓꓴ ꓬꓲ. ꓪ ꓞꓳ ꓙꓳ ꓟ ꓫ. ꓕꓱ ꓟ ꓮ ꓙꓵꓽ ꓠꓬ ꓪꓴ‐ꓢ ꓠꓲ, ꓡꓶ ꓟꓽ ꓥ꓿  ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓬꓲ. ꓪ ꓪꓴ. ꓠꓶ. ꓗꓪ ꓐꓰ ꓡꓰ ꓢꓲꓺ ꓒ ꓬꓰ‐ꓢꓴ ꓢꓯ. ꓬꓯꓼ ꓡꓳ ꓙꓵꓻ ꓡꓳ ꓬꓲ. ꓪ ꓠꓲ, ꓟ ꓠꓯ, ꓗꓪ ꓐꓰ ꓟꓽ ꓙꓵꓻ ꓿

ꓖꓳ ꓡꓱ ꓠꓬ ꓠꓬꓲ. ꓠꓬꓲ ꓠꓴ ꓥꓪ ꓢꓲꓺ ꓒ ꓬꓰ‐ꓢꓴ ꓚꓵ. ꓚꓵ. ꓢꓯ. ꓬꓲꓼ ꓡꓳ ꓐꓯ ꓟ ꓙꓵꓻ ꓕꓯ ꓠꓬ ꓠꓴ ꓠꓲ, ꓟ ꓠꓯ, ꓗꓪ ꓬꓲ. ꓢꓯ. ꓔꓬ ꓡ? ꓐꓯ ꓟ ꓣꓳ ꓓꓴ ꓙ ꓠ, ꓠꓬꓲ ꓡꓯ꓿ ꓠꓬꓲ. ꓠꓬꓲ ꓢꓯ. ꓬꓯꓼ ꓡ ꓟ ꓑꓮꓲꓽ ꓗꓪ ꓣꓳ ꓗ, ꓛꓲ ꓡꓯ꓿ ꓗꓳ. ꓗꓷ ꓟ ꓙꓵ, ꓕꓯ ꓣꓳ ꓔꓳ, ꓜꓳ ꓗꓷ ꓟ ꓫ. ꓓꓴ ꓟꓶ ꓓꓴ ꓮ ꓟꓬ, ꓔꓯ ꓢꓲꓺ ꓒ ꓬꓰ‐ꓢꓴ ꓔꓯ ꓡꓯꓼ ꓙꓱ ꓗꓷ꓿ ꓠꓬꓲ. ꓠꓬꓲ ꓬꓲ. ꓠꓬ ꓫꓵꓻ ꓟ ꓔꓯ ꓧꓪ. ꓡꓰꓳ꓿ ꓣꓳ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓢꓯꓼ ꓪ ꓗꓪ ꓐꓰ ꓧꓪ. ꓡꓰ ꓓꓽ ꓡꓳ꓿

ꓢꓯ. ꓬꓯꓼ ꓡ ꓟ ꓪꓴ‐ꓢ ꓥ ꓟ ꓫꓵꓽ ꓓꓵꓽ ꓥ ꓟ ꓝꓴꓲ  ꓔꓯ ꓧꓪ ꓡꓰ ꓟ ꓪꓴ‐ꓢ ꓥ ꓟ ꓢꓲꓸꓺ ꓒ ꓬꓰ‐ꓢꓴ ꓠꓬ ꓠꓬꓲ. ꓠꓬꓲ ꓣꓳ ꓔꓳ, ꓜꓳ ꓔꓬ ꓟ ꓫ. ꓓꓴ ꓟꓶ ꓓꓴ ꓮ ꓟꓬ, ꓫꓵꓽ ꓐꓰ ꓝꓮꓲ ꓣꓳ ꓬꓰ ꓗꓷ ꓟ ꓝꓴꓲ ꓔꓯ  ꓢꓲꓺ ꓒ ꓬꓰ‐ꓢꓴ ꓢꓯꓼ ꓪ ꓗꓪ ꓐꓰ ꓧꓪ. ꓡꓰ ꓓꓽ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓣꓳ ꓠꓲ, ꓟ ꓗꓪ ꓘꓴˍ ꓡꓯ꓿ ꓬꓲ. ꓠꓬ ꓣꓳ ꓐꓰ ꓕꓲ ꓪ ꓔꓬ ꓡꓳ꓿ ꓫꓵꓻ ꓟ ꓗꓪ ꓐꓰ ꓢꓯ. ꓬꓯꓼ ꓡꓳ꓿ ꓠꓴ ꓐꓰ ꓥꓪ ꓢꓯꓼ ꓪ ꓙꓳ ꓙꓳ ꓡꓰ ꓐꓰ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓟꓲ ꓠꓯ ꓐꓱ ꓶ ꓡꓰ ꓟꓽ ꓥ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ, ꓐꓱ ꓶ ꓬꓲ. ꓠꓬ ꓣꓳ ꓔꓯ ꓙꓽ ꓖꓶ ꓔ ꓡꓳ꓿ ꓣꓳ ꓠꓲ, ꓟ ꓠꓯ, ꓗꓪ ꓬꓲ. ꓔꓯ ꓔꓬ ꓖꓴ ꓖꓶˍ ꓢꓲ ꓠꓬꓲ ꓗ, ꓛꓲ ꓛꓲ ꓡꓰ ꓔꓬ ꓓꓴ ꓬꓰ ꓡꓯ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓖꓶˍ ꓩꓴ ꓡ ꓥꓳ꓿ ꓮ ꓙꓵꓽ ꓢꓴ ꓔꓯ ꓗ, ꓛꓲ ꓟ ꓢꓯ. ꓬꓲꓼ ꓡ ꓑꓮꓲꓽ ꓒꓬꓱꓼ ꓡ ꓝꓲ ꓫ. ꓟꓳ ꓪ꓿