ꓙꓵꓻ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓙꓳˍ ꓡꓳ꓾

ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓬꓳ-ꓦ 6ꓽ44-51) ꓗꓪ ꓐꓰ ꓣꓳ ꓔꓯ 3 ꓚꓱꓹ ꓐꓯ ꓟꓸ ꓖꓶ ꓔꓬ ꓡꓳ=

ꓬꓲ ꓪꓴꓸ ꓕꓲ ꓚꓱꓹ ꓠꓬ ꓐꓹ ꓐ ꓠꓬ ꓣꓳ ꓔꓯ ꓬꓰ-ꓢꓴ ꓔꓬ ꓗꓪ ꓚꓵꓹ ꓧꓳꓽ ꓔꓬ ꓡꓳ꓾ ꓐꓯ ꓟ ꓥ ꓡꓳ= ꓪꓴ-ꓢ ꓡꓰ ꓟꓽ ꓠꓽ ꓠꓽ ꓘꓴꓻ ꓔꓬ ꓟ ꓑꓶꓸ ꓓꓴ ꓣꓳ ꓠꓬ ꓬꓲ ꓔꓯ ꓡˍ ꓡꓳ= ꓣꓳ ꓐꓴ ꓠꓬ ꓪꓴ-ꓢ ꓔꓯ ꓡꓳ ꓒꓰ ꓗꓷ ꓢꓲ ꓗ ꓠꓯꓸ ꓢꓲ ꓗꓪ ꓒꓳꓹ ꓙꓰ ꓔꓬ ꓥˍ ꓟꓲ꓾ ꓣꓳ ꓠꓲꓹ ꓟ ꓗꓹ ꓘꓶꓽ ꓔꓯ ꓟꓽ ꓠꓽ ꓠꓽ ꓲ’ꓼ ꓔꓬ ꓡꓳ (ꓟꓳꓸ ꓖꓶ ꓓꓴ 3ꓽ20) = ꓕꓱ ꓟꓬ ꓗꓪ ꓛꓲ ꓪꓴ-ꓢ ꓠꓬ ꓣꓳ ꓮ ꓙꓵꓽ ꓔꓯ ꓬꓲ ꓠꓲꓹ ꓠꓵꓻˍ ꓡꓳ= ꓖꓳ ꓡꓱ ꓥˍ ꓟꓲ ꓬꓲ ꓔꓯ ꓚꓱꓹ ꓬꓲꓼ ꓙꓰ ꓢꓲ ꓠꓲꓹ ꓠꓵꓻ ꓠꓹ ꓟ ꓪꓴ-ꓢ ꓠꓬ ꓣꓳ ꓐꓴ ꓔꓯ ꓜꓲꓽ ꓜꓲꓽ ꓑꓰꓹ ꓑꓰꓹ ꓟꓽ ꓬꓰ=

ꓬꓲ ꓔꓯ ꓠꓬ ꓢꓯꓼ ꓟꓬ ꓝꓸ ꓟ ꓚꓵ ꓘꓶꓽ ꓕꓲ ꓟ ꓙꓳˍ ꓡꓳ= ꓖꓳ ꓟ ꓔꓯ ꓘꓳꓹ ꓣꓴˍ ꓡ꓾ ꓟꓽ ꓘꓳꓹ ꓣꓴ ꓡ? ꓐꓯ ꓟ ꓠꓬ ꓣꓳ ꓶꓻ ꓥ ꓡꓳ= ꓬꓲ ꓠꓬ ꓢꓯꓼ ꓟꓬ ꓜꓽ ꓓꓴ ꓣꓳ ꓔꓯ ꓖꓶꓽ ꓔꓬ ꓡꓳ꓾ ꓕꓱ ꓟ ꓔꓯ ꓜꓽ ꓠꓹ ꓟ ꓣꓳ ꓟꓷꓽ ꓠꓷꓹ ꓔꓯ ꓦꓽ ꓟꓽ ꓐ ꓡ ꓕꓯ ꓠꓽ ꓣꓳ ꓐꓴ ꓠꓬ ꓦꓰꓼ ꓟꓷꓼ ꓡꓰ ꓢꓲ ꓕꓲ ꓞꓲꓼ ꓕꓲ ꓑ ꓝꓴꓲꓸ ꓛꓬ ꓒꓵꓽ ꓖꓶˍ ꓟ ꓠꓯꓸꓼ ꓗꓪ ꓫꓵꓻˍ ꓥꓳ=

ꓝꓮꓲ ꓬꓰ-ꓢꓴ ꓡꓰ “ꓥꓪ ꓔꓯ ꓡ ꓢꓴ ꓔꓯ ꓠꓬ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓥꓪ ꓡꓰ ꓢꓯꓸ ꓬꓲꓼ ꓡ ꓝꓲˍ ꓥꓳ꓾” ꓐꓰ ꓐꓯ ꓔ ꓡꓳ= ꓕꓱ ꓟ ꓠꓬ ꓪꓵꓼ ꓘꓶꓽ ꓬꓲ ꓓꓽ ꓟ ꓥ ꓡꓳ= ꓕꓱ ꓟ ꓠꓬ ꓙꓵꓻ ꓢꓴ ꓣꓳ ꓐꓴ ꓐꓱ ꓶ ꓥꓳ ꓡꓳꓸ ꓓꓴ ꓥ ꓡꓳ= ꓣꓳ ꓐꓴ ꓟꓽ ꓒꓵꓽ ꓥˍ ꓟꓲ꓾ ꓣꓳ ꓐꓴ ꓠꓬ ꓬꓲ ꓔꓯ ꓡ ꓢꓲ ꓬꓲ ꓔꓯ ꓙꓵꓻˍ ꓟ ꓙꓵꓹ ꓗꓪ ꓣꓳ ꓐꓴ ꓔꓯ ꓪꓵꓼ ꓘꓶꓽ ꓖꓶ ꓔ ꓟ ꓥ ꓡꓳ= ꓣꓳ ꓐꓴ ꓠꓬ ꓬꓲ ꓟꓴ ꓗꓪ ꓗꓴꓷꓼ ꓡꓯꓼ ꓪ ꓟꓶ ꓢꓴ ꓒꓬꓱꓼ ꓡ ꓢꓲ꓾ ꓬꓲ ꓐꓰ ꓕꓲ ꓪ ꓕꓲ ꓞꓲꓼ ꓕꓲ ꓑ ꓔꓬ ꓪˍ ꓥꓳ= ꓝꓮꓲ ꓠꓬ ꓢꓯꓼ ꓟꓬ ꓑ ꓑ ꓥ ꓟ ꓬꓰ-ꓢꓴ ꓬꓲ ꓠꓵꓻ ꓠꓲꓹ ꓗꓪ ꓐꓰ ꓣꓳ ꓐꓴ ꓔꓯ ꓔꓳꓹ ꓙ ꓖꓶ ꓔꓬ ꓡꓳ=

“ꓙꓵꓻ ꓢꓴ ꓠꓬ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓙꓳˍ ꓡꓳ꓾” ꓐꓰ ꓬꓰ-ꓢꓴ ꓡꓰ ꓐꓯ ꓡꓳ= ꓙꓵꓻ ꓠꓲꓹ ꓠꓬ ꓢꓯꓼ ꓟꓬ ꓔꓯ ꓖꓶˍ ꓟ ꓥ ꓡꓳ= ꓙꓵꓻ ꓠꓲꓹ ꓠꓬ ꓣꓳ ꓟꓲ ꓙꓬ ꓙꓰˍ ꓟ ꓗꓪ ꓝꓸ ꓢꓲ ꓙ ꓫꓱꓽ ꓐ ꓡ ꓠꓹ ꓟ ꓐꓱ ꓶ ꓢꓯꓼ ꓪ ꓬꓲ ꓚꓰꓺ ꓥ ꓡꓳ= ꓣꓳ ꓐꓴ ꓢꓲꓽ ꓫꓬ ꓕꓳꓽ ꓶ ꓵꓻˍ ꓟ ꓗꓪ꓾ ꓙꓵꓻ ꓠꓲꓹ ꓠꓬ ꓬꓰ-ꓢꓴ ꓔꓯ ꓢꓯꓼ ꓟꓬ ꓑ ꓑ꓾ ꓥ ꓠꓬ꓾ ꓢꓯꓼ ꓪ ꓮ ꓙꓵꓽ ꓬꓲ ꓝꓳꓹ ꓟꓶ ꓡꓰ ꓐꓰ ꓘꓳꓹ ꓣꓴˍ ꓟ ꓥ ꓡꓳ= ꓣꓳ ꓐꓴ ꓠꓬ ꓬꓰ-ꓢꓴ ꓔꓯ ꓙꓵꓻˍ ꓕꓯ꓾ ꓬꓲ ꓠꓬ ꓣꓳ ꓐꓱ ꓶ ꓐꓹ ꓐ ꓪꓴ-ꓢ ꓔꓬ ꓗꓪ ꓙꓰˍ ꓟ ꓙꓻ ꓖꓴ ꓒꓬꓱꓼ ꓡˍ ꓡꓳ= ꓬꓲ ꓠꓬ ꓣꓳ ꓓꓵꓽ ꓙꓽ ꓔ ꓟ꓾ ꓫꓸ ꓕꓱ ꓘꓶꓽ ꓐꓰ ꓣꓳ ꓣꓱꓽ ꓬꓰ ꓚꓱꓹ ꓐꓴ ꓔꓯ ꓙꓻ ꓖꓴ ꓟꓸ ꓖꓶˍ ꓟ ꓔꓱꓹ ꓚꓵˍ ꓟ ꓒꓬꓱꓼ ꓡ ꓟ ꓑꓶꓸ ꓓꓴ ꓣꓳ ꓐꓴ ꓠꓬ ꓬꓰ-ꓢꓴ ꓐꓰ ꓕꓲ ꓪ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓟꓶ ꓒꓵꓽ ꓢꓴ ꓒꓬꓱꓼ ꓡˍ ꓡꓳ=